Leviticus 4

Ifu ɨlvɨ ta wùl jas, ɨ̀ nì mbɨ

¹Bôbo Fɨyini nɨn be meyn sɨ̂ Mosìs na, ²“Bè sɨ̂ ghelɨ Isìlæ̀ na, ‘Akeynà nɨn ghɨ àwo kì a àŋena nɨn kelɨ sɨ nà ni-à ɨlvɨ ta wùl ɨ̀ jas nì iwo isaʼ i Bôbo Fɨyini ɨ bɨmî wì.’”

³“Ngàŋ ndô Fɨyini i ngaŋtɨnɨ kæ sɨ nì mbɨ, ɨ̀ gvì nɨ̀ ngeʼ atu nɨ̀ ghelɨ, a wù na kelɨ sɨ fu ifu nɨ̀ wâyn nyàm mbòloʼ ɨ lûmnɨ̀ yi kelɨ wi nseʼi sɨ̂ Bôbo Fɨyini bòm mbɨ zɨ̀ a wù nì. ⁴Wù n-kelɨ sɨ gvi nɨ̀ nyàm àteyn ɨchfɨ fɨndo nɨ̀ Bôbo Fɨyini sɨ lèm awu atu àteyn sɨ sɨ asɨ nɨ̀ Bôbo Fɨyini. ⁵Wù sɨ, ngàŋ ndô Fɨyini i ngaŋtɨnɨ ɨ lì mɨ̀luŋ mɨ̀ àteyn ɨ̀n lì, ɨ zɨ nɨ̀ ɨ̀mêyn a fɨndo nɨ̀ Bôbo Fɨyini. ⁶Wù zɨ, wu tuŋ baŋ àwu nɨ̀ ŋweyn a mɨ̂lùŋ nâ ghè ɨ mɨ̀sì ìngal nsòmbo asɨ nɨ̀ Bôbo Fɨyini asɨ abàs a ndzɨsɨ ghè a kɨ gwòsɨ alêʼ a laynɨ-a nɨ̀ àlêʼ kì a kɨ layn kfèynɨ. ⁷Wù mɨsì, wu lì mɨ̀luŋ mɨ̀ àteyn ɨ̀n lì ɨ yoʼ a mɨchoʼ ghè a mɨ̀ n-ghɨ abaŋ ileŋ asɨ nɨ̀ Bôbo Fɨyini a fɨndo nɨ̀ ŋweyn. Wù yoʼ, wu lì àbes a mɨ̂lùŋ nâ kì-à, ɨ ndu sfɨ̀s isas abaŋ ifu i nyoʼnɨ-i ɨchfɨ fɨndo nɨ̀ Bôbo Fɨyini. ⁸Wù nî, wu fvɨ̀sɨ̀ ìso i nyâm nâ zɨ̀ a wù fu sɨ su mbɨ̂ ŋweyn tì nô ì jɨ̀m, baʼsɨ̂ nɨ̀ ìso zɨ̀ a yi n-ghɨ ɨfwo ɨlvà nô ì jɨ̀m kèsa ɨzɨ̂ a yi n-baʼsɨ a ngùŋ àteyn. ⁹Wù nî, wu fvɨ̀sɨ kɨmɨ nfyeŋsɨ akɨŋ nɨ̀ ìso zɨ̀ a yi n-ghɨ a ngùŋ àteyn baʼsɨ̂ ndû akuʼtɨ, nɨ̀ àlêʼ a jûŋ kì a kɨ n-ghɨ ɨtwem ikuè, wu ghɨ sɨ fvɨ̀sɨ̀ sɨ baʼsɨ nɨ̀ fyeŋsɨ akɨŋsɨ. ¹⁰Wù fvɨsɨ, ngàŋ ndô Fɨyini ɨ nyòʼ atû abaŋ ifu i nyoʼnɨ-i kɨ̀ ighel ta ghɨ nî ghɨ nyòʼ ìso i nyâm zɨ̀ a ghɨ n-fu sɨ nà chi nɨ̀ mbôynɨ̀. ¹¹Mɨtì wù nî wu lì ɨ fvɨ̀ nɨ̀ gvɨ̂ nyàm àteyn nɨ̀ njwò àteyn nô ì jɨ̀m, nɨ̀ àtu a kɨ̀mɨ nɨ̀ àfyeyn a nɨ̀ ɨ̀fwo ɨlvà nɨ̀ mɨ̀tû mɨ̀ àteyn, ¹²baʼsɨ̂ nô mɨ nɨ̀ ghà ta kɨ bɨ̀sɨ a nyâm nâ ghè sɨ a alèʼ ghè a àŋena bɨ̀ ateyn ɨ ndù nɨ̀ ànkeyna alèʼ a laynɨ-a ghê a ghɨ n-sfɨs abvɨ ichɨ ateyn, ɨ nyòʼ ɨvɨ̀s afî a wù nì kwò atû àbvɨ nâ ghè.”

¹³“Ghelɨ Isìlæ̀ nô ghɨ̀ jɨ̀m kæ jas ɨ̀ nì ìwo isaʼ i Bôbo Fɨyini ɨ bɨmî wì, nà kya wi nô mɨ kya, a à na ghɨ ma àŋena ni meyn mbɨ. ¹⁴Àŋena keli nô mɨ ɨlvɨ gha na àŋena ni meyn mbɨ, ghɨ fu wâyn nyàm mbòloʼ ɨ lûmnɨ̀ yi kelɨ wi nseʼi sɨ a ifu ɨchfɨ fɨndo nɨ̀ Bôbo Fɨyini bòm mbɨ zɨ̀ a àŋena nì. ¹⁵Àŋena gvî nɨ̀ nyàm àteyn, chyeʼsɨ Isìlæ̀sɨ̀ ɨ lèm ɨ̀wu àŋena atu àteyn asɨ nɨ̀ Bôbo Fɨyini ɨ sɨ. ¹⁶Àŋena sɨ, ngàŋ ndô Fɨyini i ngaŋtɨnɨ ɨ lì mɨ̀luŋ mɨ̀ àteyn ɨ̀n lì ɨ̀ zɨ nɨ̀ ɨ̀mêyn a fɨndo nɨ̀ Bôbo Fɨyini. ¹⁷Wù zɨ, wu tuŋ baŋ àwu nɨ̀ ŋweyn a mɨ̂lùŋ nâ ghè ɨ mɨ̀sì asɨ nɨ̀ Bôbo Fɨyini ìngal nsòmbo asɨ abàs a ndzɨsɨ ghè a kɨ gwòsɨ alêʼ a laynɨ-a nɨ̀ àlêʼ kì a kɨ layn kfèynɨ. ¹⁸Wù mɨsì, wu lì mɨ̀luŋ mɨ̀ àteyn ɨ̀n lì ɨ yoʼ a mɨchoʼ ghè a mɨ̀ n-ghɨ abaŋ ileŋ asɨ nɨ̀ Bôbo Fɨyini a fɨndo nɨ̀ ŋweyn. Wù yoʼ wu lì àbes a mɨ̂lùŋ nâ kì-à, ɨ ndu sfɨ̀s isas abaŋ ifu i nyoʼnɨ-i ghê ɨchfɨ fɨndo nɨ̀ Bôbo Fɨyini. ¹⁹Wù sfɨs, wu fvɨ̀sɨ̀ ìso i nyâm àteyn nô ì jɨ̀m ɨ nyòʼ atû àbaŋ ifu. ²⁰Wù n-kelɨ sɨ ni nɨ̀ nyàm àteyn kɨ ighel ta wù n-nî nɨ̀ nyàm ɨlvɨ ta ghɨ fù sɨ a ifu na Fɨyini fɨ lesɨ fù mbɨ. Ngàŋ ndô Fɨyini i ngaŋtɨnɨ nɨn nî tì, a à na ghɨ ma wù yuyn meyn àtu a ghelɨ Isìlæ̀, a Bôbo Fɨyini lesɨ fù mbɨsɨ àŋena. ²¹Wù nî, wu lì ɨ fvɨ̀ nɨ̀ wâyn nyàm mbòloʼ ɨ lûmnɨ̀ nâ zɨ̀ sɨ a alèʼ ghè a àŋena bɨ̀ ateyn, ɨ nyoʼ kɨ ta wù nì nyòʼ wâyn nyàm mbòloʼ ɨ lûmnɨ̀ ɨwu àsɨ vzɨ̀. À n-ghɨ ìfu zɨ̀ a ka yi su mbɨsɨ ghelɨ Isìlæ̀ nô ghɨ̀ jɨ̀m.

²²“Wùl ɨ tisɨnɨ kæ jas ɨ̀ nì ìwo isaʼ i Bôbo Fɨyini, ɨ Fɨyini fɨ ŋweynfɨ ɨ bɨmî wì, a à na ghɨ ma wù ni meyn mbɨ. ²³Wù nî kèli nô mɨ ɨlvɨ gha na wù ni meyn mbɨ, wu fu ifu nɨ̀ ìfef i, yi kelɨ wi nseʼi. ²⁴Wù gvî nɨ̀ ìnyeyni, wu lèm àwu atû àteyn, ɨ sɨ alèʼ ghè a ghɨ n-sɨ nyamsɨ ifu i nyoʼnɨ-i ateyn asɨ nɨ̀ Bôbo Fɨyini. À n-ghɨ ìfu ta ka Bôbo Fɨyini lesɨ fù mbɨ. ²⁵Wù sɨ, ngàŋ ndô Fɨyini ɨ lì mɨ̀luŋ mɨ̀ àteyn ɨ̀n lì nɨ̀ baŋ àwu nɨ̀ ŋweyn, ɨ yoʼ a mɨchoʼ afî a mɨ̀ n-ghɨ abaŋ ifu i nyoʼnɨ-i. Wù nî wu lì àbes a mɨ̂lùŋ nâ kì-à, ɨ ndu sfɨ̀s isas abaŋ ifu nâ ghè. ²⁶Wù sfɨ̂s, wu nyòʼ ìso ateyn nô ì jɨ̀m kɨ̀ ighel ta wù n-nyôʼ iso i nyâm ìfu sɨ nà chi nɨ̀ mbôynɨ̀. À ti ta ka ngàŋ ndô Fɨyini ni sɨ yuyn atu a wûl ɨ tisɨnɨ. Wu nî tèyn a Fɨyini fɨ lesɨ fù mbɨ ŋweyn.”

²⁷“Wùl àntsɨ kæ jas ɨ̀ nì ìwo, isaʼ i Bôbo Fɨyini ɨ bɨmî wì, a à na ghɨ ma wù nî meyn mbɨ. ²⁸Wù nî kèli nô mɨ ɨlvɨ gha na wù ni meyn mbɨ, wu gvì nɨ̀ ìkfɨ ɨ bzɨ yi kelɨ wi nseʼi sɨ a ifu ta ka Fɨyini fɨ lesɨ fù mbɨ ŋweyn. ²⁹Wù gvî nɨ̀ ìnyeyni, wu lèm àwu atû ìfu nâ ghàyn, ɨ sɨ alèʼ ghè a ghɨ n-sɨ ifu i nyoʼnɨ-i ateyn. ³⁰Wù sɨ, ngàŋ ndô Fɨyini ɨ lì mɨ̀luŋ mɨ̀ àteyn ɨ̀n lì nɨ̀ baŋ àwu nɨ̀ ŋweyn ɨ yoʼ a mɨchoʼ afî a mɨ̀ n-ghɨ abaŋ ifu i nyoʼnɨ-i. Wù nî wu lì àbes a mɨ̂lùŋ nâ kì-à, ɨ ndu sfɨ̀s a isas abaŋ ifu. ³¹Wù sfɨ̂s, wu fvɨ̀sɨ̀ ìso i bzɨ nâ zɨ̀ nô ì jɨ̀m kɨ̀ ighel ta ghɨ nî ghɨ fvɨ̀sɨ̀ a nyâm ìfu sɨ nà chi nɨ̀ mbôynɨ̀, ngàŋ ndô Fɨyini nyoʼ abaŋ ifu ta ka yi na lɨ̂mtɨ̀ fom sɨ̂ Bôbo Fɨyini. À ti ta ka ngàŋ ndô Fɨyini ni sɨ yuyn atu a wûl nâ vzɨ̀. Wu nî tèyn a Fɨyini fɨ lesɨ fù mbɨ ŋweyn.

³²“Wùl kæ gvi nɨ̀ wâyn njɨ̀ sɨ a ifu nɨ̀ ŋweyn sɨ loyn ilêsɨ̀ ifu sɨ̂ Bôbo, ka yì na kelɨ nseʼi. ³³Wù gvî nɨ̀ nyeyn, wu lèm àwu a ŋweyn atû àteyn, ɨ sɨ sɨ a ifu sɨ loyn ilêsɨ̀ ifu alèʼ ghè a ghɨ n-sɨ nyamsɨ ifu i nyoʼnɨ-i ateyn. ³⁴Wù sɨ, ngàŋ ndô Fɨyini ɨ lì mɨ̀luŋ mɨ̀ àteyn ɨ̀n lì nɨ̀ baŋ àwu nɨ̀ ŋweyn ɨ yoʼ a mɨchoʼ afî a mɨ̀ n-ghɨ abaŋ ifu i nyoʼnɨ-i. Wù yoʼ, wu lì àbes a mɨ̂lùŋ nâ kì-à, ɨ ndu sfɨ̀s isas abaŋ ifu nâ ghè. ³⁵Wù sfɨ̂s, wu fvɨ̀sɨ̀ ìso ateyn nô ì jɨ̀m kɨ̀ ighel ta ghɨ nî ghɨ fvɨ̀sɨ̀ i yi wâyn njɨ̀ zɨ̀ a ghɨ n-fu sɨ a ifu sɨ nà chi nɨ̀ mbôynɨ̀. Wù fvɨsɨ̀, ngàŋ ndô Fɨyini ɨ nyòʼ ɨ baʼsɨ ifu i nyoʼnɨ-i afî atû abaŋ ifu sɨ̂ Bôbo Fɨyini. À ti ta ka ngàŋ ndô Fɨyini ni sɨ yuyn atu a wûl nâ vzɨ̀. Wu nî tèyn a Fɨyini fɨ lesɨ fù mbɨ ŋweyn.