Leviticus 5

¹“Ghɨ kæ jàŋ wul na wù gvi ɨ̀ tìmi nchwò nsaʼ iwo ta wù n-kya kèsa à n-ghɨ ìwo ta wù yèyn a, wù gvî leʼ na yi n-bè wì iwo, a yi na ghɨ na wù ni meyn mbɨ, ghɨ kelɨ sɨ ghal ŋweyn na wù laʼ. ²Wùl kæ jas kùm afo kɨ layn wi ta isaʼ i nɨn dyêyn nô mɨ ta wù bû nì nà kya, a wù na layn wi. À kæ nà ghɨ ma wù kùm àkfɨ a nyâm ɨ̀twaʼ kèsa à n-ghɨ àkfɨ a nyâm i maʼnɨ-a kèsa à n-ghɨ àkfɨ afo kɨ ŋâŋlɨ̀ ŋaŋlɨ a nse a, a à na ghɨ ma wù nî meyn mbɨ.

³“Wùl ɨ̀ kæ jas kùm afo ma kɨ fvɨ̀ a wùl ɨwùyn layn wi, a wù na layn wi. À kæ nà ghɨ nô mɨ ìnkì afo à kà, ma kɨ kàʼ a kɨ ni na wù na layn wi, nô mɨ ta wù bû nì nà kya, ɨ̀ nì kèli, a à na ghɨ ma wù ni meyn mbɨ. ⁴Wùl ɨ̀ kæ bɨm chfɨ̀nɨ sɨ ni iwo i bzɨ-i kèsa i juŋì izɨyn nɨ̀ Fɨyini fɨ, kèsa à n-ghɨ nô mɨ ìnkì iwo ì kà, nô mɨ ta wù bû nì nà kya, ɨ̀ nì kèli, a à na ghɨ ma wù ni meyn mbɨ.

⁵“Wùl kæ jas iwo antêynɨ̀ àwo nâ ghàyn, a wù na kelɨ sɨ taŋ ɨchfɨ ŋweyn kûm mbɨ zɨ̀ a wù nì, ⁶kelɨ sɨ fu ifu sɨ̂ Bôbo Fɨyini nɨ̀ njɨ̀ kèsa nɨ̀ ìkfɨ i bzɨ-i ma wù fvɨ̀sɨ̀ anòyn a bzɨsɨ nɨ̀ ŋweyn na Fɨyini fɨ lesɨ fù mbɨ ŋweyn. Wu n-fu tì, a ngàŋ ndô Fɨyini yuyn atu a ŋweyn.

⁷“Wùl kæ nà ghɨ ma wù kaʼ wu bû kèli njɨ̀ kèsa bzɨ, wu fu woyn àlàlàtoto ghɨ̀ bò kèsa mɨ̀nlàynɨ̀ ɨ̀m bò sɨ a ifu sɨ̂ Bôbo Fɨyini, fɨlifɨ na ghɨ ìfu ta ka Fɨyini fɨ lesɨ fù mbɨ ŋweyn, fɨlifɨ ɨ ghɨ ìfu i nyoʼnɨ-i. ⁸Wù n-kelɨ sɨ gvi nɨ̀ ɨ̀mêyn sɨ̂ ngàŋ ndô Fɨyini, na wù fu ifu sɨ sù mbɨ ŋweyn sɨ asɨ. Wù gvî, ngàŋ ndô Fɨyini ɨ fyeʼ ɨtoŋ ateyn mɨtì ka wu n-tèyn teyn atu ateyn. ⁹Wù fyeʼ ɨ̀toŋ ateyn, wu lì mɨ̀luŋ mɨ̀ àteyn ɨ̀n lì, ɨ mɨ̀sì ɨwùyn abaŋ ifu, ɨ lì àbes ateyn ɨ̀ sfɨ̀s isas abaŋ ifu. À n-ghɨ ìfu sɨ su mbɨsɨ. ¹⁰Ngàŋ ndô Fɨyini àteyn nî, wu lì fɨ̀nyuyn fɨ lifɨ fìfɨ̀ ɨ fu sɨ a ifu i nyoʼnɨ-i kɨ̀ ta isaʼ i nɨn dyêyn sɨ yuyn atu a wûl nâ vzɨ̀. Wu nî tèyn a Fɨyini fɨ lesɨ fù mbɨ ŋweyn.

¹¹“Wùl àteyn kæ nà ghɨ ma wù kàʼ wu bû kèli ɨ̀lwàlàtoto nâ vzɨ̀ ɨ̀ bwò kèsa woyn mɨnlàynɨ̀ ɨ̀m bò, a wù na kelɨ sɨ fu ifu sɨ̂ Bôbo ta ka Bôbo lesɨ fù mbɨ ŋweyn. Wù n-kelɨ sɨ fu ifûʼ i ɨnkfɨ̀ŋ ma ghɨ gva meyn mɨ̀ faytɨ kfɨ ɨ̀ gwòtɨ̀ ɨlwêʼ ìvɨ̀m, ɨ̀ fu alêʼ àmòʼ sɨ a ifu ta ka Fɨyini fɨ lesɨ fù mbɨ ŋweyn. Ka wu n-we mɨ̀vɨl ateyn kèsa ileŋ bòm ta à n-ghɨ ìfu sɨ loyn ilêsɨ̀ ifu. ¹²Wù n-kelɨ sɨ lì sɨ ndu nɨ̀ ɨ̀fwo ateyn sɨ̂ ngàŋ ndô Fɨyini na wù myeytɨ awu ɨnkfɨ̀ŋ sɨ dyèyn na ifu ateyn i nô ì jɨ̀m nɨn kelɨ Bôbo Fɨyini sɨ nyòʼ sɨ baʼsɨ a tɨ̀fu tɨ litɨ ghê a ghɨ fù sɨ̂ Bôbo Fɨyini, a ghɨ ìfu sɨ loyn ilêsɨ̀ ifu. ¹³À ti ta ngàŋ ndô Fɨyini nɨn kelɨ sɨ nì sɨ yuyn atu a wûl ɨlvɨ ta wù nì nô mɨ mbɨ ì kà antêynɨ̀ mbɨsɨ nâ ghàyn na Fɨyini fɨ lesɨ fù mbɨ wùl àteyn, a abes ifu nâ kì-à nà kelɨ ngàŋ ndô Fɨyini kɨ̀ ighel ta ghɨ n-fu ifu ɨfwo ɨ yɨnɨ, abes ateyn a nà kelɨ kɨmɨ ŋweyn.”

Ifu ɨlvɨ ta wùl ɨ̀ nì mbɨ.

¹⁴Bôbo Fɨyini nɨn be meyn sɨ̂ Mosìs na, ¹⁵“Wùl ti kæ jas, ɨ̀ faŋ tɨ̀ fu ɨfwo vzɨ̀ a wù n-kelɨ sɨ fu sɨ̂ Bôbo Fɨyini a à na ghɨ ma wù ni meyn mbɨ, nà kelɨ sɨ fu ayaʼ kɨ kelɨ wi nseʼi ma wù fvɨ̀sɨ̀ anòyn a bzɨsɨ nɨ̀ ŋweyn kɨ kfeynɨ̂ ɨfyèʼ aso ɨkwo a fɨfâ kɨ ighel ta ɨfyêʼ ɨ ndô Fɨyini nɨn dyêyn. À n-ghɨ ìfu sɨ nì na Bôbo Fɨyini lesɨ fù mbɨ ŋweyn. ¹⁶Wù na kelɨ sɨ kasi sɨ fu afo kì a wù tî faŋ tɨ̀ fu sɨ fì sɨ lì a li-a sɨ gwòtɨ̀ ɨlwêʼ ɨ̀ twâyn sɨ li alêʼ àmòʼ sɨ baʼsɨ ifu nâ ghè sɨ fu sɨ̂ ngàŋ ndô Fɨyini. Wù fu, ngàŋ ndô Fɨyini ɨ̀ lì àyaʼ kì ɨ fu sɨ a ifu sɨ yuyn atu a wûl nâ vzɨ̀, a Bôbo Fɨyini lesɨ fù mbɨ ŋweyn.

¹⁷“Wùl kæ jas ni iwo isaʼ i Bôbo Fɨyini ɨ bɨmî wì nô mɨ ta wù bû nì nà kya, a à na ghɨ ma wù ni meyn mbɨ, ghɨ kelɨ sɨ ghal ŋweyn na wù laʼ. ¹⁸Wùl àteyn na kelɨ sɨ gvi nɨ̀ àyaʼ a kɨ kelɨ wi nseʼi kɨ̀ ighel ta ɨfyêʼ ɨ ndô Fɨyini nɨn dyêyn ma wù fvɨ̀sɨ̀ anòyn a bzɨsɨ nɨ̀ ŋweyn sɨ fu sɨ a ifu na Bôbo Fɨyini lesɨ fù mbɨ ŋweyn. À ti ta ngàŋ ndô Fɨyini nɨn yuyn atu a wûl àteyn bòm mbɨ zɨ̀ a wù jas nì, na Bôbo Fɨyini lesɨ fù ŋweyn. ¹⁹Ifu nâ yèynì nɨn ghɨ ìfu bòm mbɨ zɨ̀ a wù nì asɨ nɨ̀ Bôbo Fɨyini.”