Leviticus 7

Ifu ɨlvɨ ta wùl ɨ̀ nì mbɨ

¹“Ɨtêyntɨ̀ nɨn ghɨ tɨ̀saʼ tìtɨ̀ a yi n-kelɨ sɨ nà lemà ɨlvɨ ta wùl ɨ̀ nì mbɨ. Ifu ateyn i nɨn ghɨ ìfu layn kfeynɨ-à. ²Ghɨ n-kelɨ sɨ nà sɨ nyam ìfu nâ yèyn kɨ̀ alèʼ ghè a ghɨ n-sɨ nyam ìfu i nyoʼnɨ-i ateyn, ghɨ lì mɨ̀luŋ mɨ̀ ateyn, ɨ mɨ̀sì ɨwùyn abaŋ ifu nâ ghè kɨ̀ ɨbyâs ɨ̀ jɨ̀m. ³Ghɨ na sɨ nyam àteyn ghɨ fvɨ̀sɨ̀ ìso zɨ̀ a yi n-ghɨ a ɨ̂nkùyn, nɨ izɨ-ì a yi n-ghɨ ɨfwo ɨlvà nô ɨ̀ jɨ̀m, ɨ nyòʼ atu àbaŋ ifu, ⁴ɨ lì nfyeŋsɨ akɨŋ baʼsɨ̂ nɨ̀ ìso zɨ̀ a yi n-ghɨ a ngùŋ àkùʼtɨ, nɨ̀ ìso zɨ̀ a yi n-ghɨ a ɨtwem ikuè. ⁵Ghɨ na fvɨ̀sɨ̀ ɨ̀fwo ateyn, ngàŋ ndô Fɨyini ɨ chɨ̀yntɨ nyoʼ nô ɨ̀ jɨ̀m atu àbaŋ ifu sɨ a nyɨŋ sɨ̂ Bôbo Fɨyini. Ifu nâ yèynì nɨn ghɨ ìfu ɨlvɨ ta wùl ɨ̀ nì mbɨ. ⁶Nô mɨ wùl ɨ lûmnɨ̀ ɨ̀ kfà isas i ndo nɨ̀ ngàŋ ndô Fɨyini kàʼ a wù kfɨl nyam nâ yèyn mɨtì kelɨ sɨ kfɨl kɨ alèʼ a laynɨ-a bòm ta yì n-layn kfeynɨ-à.”

⁷“Isaʼ nâ yèynì nɨn ghɨ kɨmɨ sɨ̂ ìfu zɨ̀ a ghɨ n-fu na Fɨyini fɨ lesɨ fù mbɨsɨ, nɨ̀ izɨ-ì a ghɨ n-fu ɨlvɨ ta wùl ɨ̀ nì mbɨ. Njwò ìfu nâ yèyn nɨ̀n kelɨ ngàŋ ndô Fɨyini zɨ̀ a yì nyòʼ ifu ateyn. ⁸Gvɨ nyàm zɨ̀ a ghɨ sɨ ɨ̀ nyòʼ sɨ ifu nɨn kelɨ ngàŋ ndô Fɨyini zɨ̀ a yì nyòʼ nyam àteyn. ⁹Nô mɨ ìfu i ɨfwo ɨ yɨnɨ ì kà ta ghɨ nyòʼ ichɨ, kèsa ghɨ kfè akaŋ kèsa ghɨ kfè ikaŋ a, nɨn kelɨ ngàŋ ndô Fɨyini zɨ̀ a yì fu ifu ateyn. ¹⁰Mɨtì nô mɨ ìfu i ɨfwo ɨ yɨnɨ ì kà ta ghɨ fyes nɨ̀ mɨ̀vɨ̂l, kèsa ghɨ bû fyes a, nɨ̀n kelɨ woyn Alòyn, ma à ti ngàŋsɨ ndô Fɨyini, ghɨ sɨ gwò kɨ ighel ighel.”

Ifu sɨ nà chi nɨ̀ mbôynɨ̀

¹¹“Ɨtêyntɨ̀ nɨn ghɨ tɨ̀saʼ tìtɨ̀ a yi n-kelɨ sɨ nà lemà ɨlvɨ ta wùl nɨ̀n fu ifu sɨ̂ Bôbo Fɨyini sɨ nà chi nɨ̀ mbôynɨ̀.

¹²“Wùl kæ sɨ choʼnɨ sɨ gvi nɨ̀ ìfu nâ yèynì sɨ fu sɨ a àyòŋnɨ̀ sɨ̂ Bôbo Fɨyini, a wu sesɨ gvì nɨ̀ nyàm àteyn, ɨ̀ bàʼsɨ àbayn ateyn ma ghɨ fyes meyn nɨ̀ mɨ̀vɨl mɨ̀ olìfsɨ̀, kɨ kelɨ wi fɨ̀shɨ̀k, baʼsɨ̂ nɨ̀ mɨ̀bàynɨ̀ mɨ̀ àbayn ɨ̀n lì ma ghɨ nyòʼ nyoʼ bula fɨ̀shɨ̀k, ɨ̀ yoʼ mɨvɨl mɨ̀ olìfsɨ̀ ateyn, kɨ̀mɨ nɨ̀ àbayn a ma ghɨ lam nɨ̀ ɨ̀nkfɨ̀ŋ ma ghɨ gva meyn mɨ̀ kfɨ, ghɨ faytɨ̂ ɨ̀ tu, ɨ̀ fyes nɨ̀ mɨ̀vɨl mɨ̀ olìfsɨ̀. ¹³Wù se sɨ gvi nɨ̀ ìfu i sɨ nà chi nɨ̀ mbôynɨ̀, wu gvi baʼsɨ kɨmɨ nɨ̀ tɨ̀ghef tɨ abayn tɨ ma ghɨ lam meyn ɨ̀ we fɨ̀shɨ̀k ateyn. ¹⁴Ghɨ na gvì nɨ̀ abayn àmoʼ àmòʼ kɨ tɨ̀nki tɨ̀ jɨ̀m sɨ a ifu sɨ a nyɨŋ sɨ̂ Bôbo Fɨyini, a nà kelɨ ngàŋ ndô Fɨyini zɨ̀ a yì nì mɨ̀sì mɨluŋ mɨ̀ ìfu sɨ nà chi nɨ̀ mbôynɨ̀ ɨwùyn abaŋ ifu. ¹⁵Ghɨ n-kelɨ sɨ kfɨl sɨ mèsi njwò nyàm ìfu nâ zɨ̀ kɨ̀ achi nâ ghè a ghɨ fù ateyn, ka ɨtuʼ nɨ̂n layn kòli.”

¹⁶“Wùl ti kæ gvi nɨ̀ nyàm ma wù tî chfɨ̀nɨ̀ chfɨnɨ sɨ fu, kèsa wù gvì kɨ̀ nô nɨ̀ ɨ̀nyeyn ta wù chòʼnɨ sɨ fu sɨ̂ Bôbo Fɨyini, ghɨ kfɨl achi nâ ghè a wù fu ifu ateyn, yì bɨsɨ ɨtuʼ layn ghɨ kâʼ a ghɨ fî kfɨl. ¹⁷Njwò ifu nâ yèyn kæ bɨsɨ, ɨ̀ chi chem mɨchi ɨ̀n tal, a ghɨ na kelɨ kɨ sɨ nyòʼ na yì fɨ. ¹⁸Ghɨ kæ kfɨl njwò ìfu sɨ nà chi nɨ̀ mbôynɨ̀ ma yì chi meyn mɨchi ɨ̀n tal, wùl vzɨ̀ a wù fu ifu ateyn nà kya na Bôbo Fɨyini nɨn fsɨ wi ifu i ŋweyn, a wù faŋ tɨ̀ kèli ɨmyaʼtɨ bòm ta wù kwò nkfɨm, ma à kfɨ̀l mɨ ndà njwò àteyn, a ghɨ na kelɨ sɨ ghal na wù laʼ.”

¹⁹“Njwò àteyn kæ sɨ kùm afo kɨ layn wi ta isaʼ nɨn dyêyn, ka wùl nɨ̂n kfɨl, ghɨ nyòʼ kɨ nyoʼ. À kæ nà layn nô mɨ ndà ta isaʼ i nɨn dyêyn, wù kâʼ a wù kfɨl njwò ì lì zɨ̂ a ghɨ fu sɨ a ifu. ²⁰Mɨtì, wùl kæ nà layn wi, ɨ̀ kfɨl njwò ìfu sɨ nà chi nɨ̀ mbôynɨ̀, a kelɨ Bôbo Fɨyini, a ghɨ na kelɨ sɨ sàŋ sɨ fvɨ̀sɨ̀ ŋweyn sɨ antêynɨ̀ nɨ̀ ghelɨ Fɨyini. ²¹Wùl ɨ̀ kæ kùm afo kɨ layn wi ta isaʼ i nɨn dyêyn, ɨ̀ fì gvì kfɨl njwò ìfu zɨ̀ a ghɨ fù sɨ̂ Bôbo sɨ nà chi nɨ̀ mbôynɨ̀, a ghɨ na kelɨ sɨ sàŋ sɨ fvɨ̀sɨ ŋweyn sɨ antêynɨ̀ nɨ̀ ghelɨ Fɨyini. Yi n-kelɨ kɨ sɨ nà ghɨ têyn kèsa wù nì kùm àfo ma kɨ fvɨ̀ a wul ɨwùyn, kèsa à nì nà ghɨ àfo ma kɨ fvɨ ɨwùyn nɨ̀ nyam, kèsa à n-fî ghɨ nô mɨ gha ɨ̀ lvì ta kɨ n-layn wi fî chaʼnɨ-à.”

Wùl nɨ̀n kelɨ wi sɨ kfɨl iso i nyâm kèsa mɨluŋ mɨ̀ nyàm

²²Bôbo Fɨyini nɨ̀n fi meyn bè sɨ̂ Mosìs na, ²³“Bè sɨ̂ ghelɨ Isìlæ̀ na, ‘Ka wùl nɨ̂n læ̀ kfɨl iso i nyâm, kèsa à n-ghɨ ìso i nyâm mbòloʼ, kèsa à n-ghɨ ìso i bzɨ̂ njɨ̀ kèsa à n-ghɨ ìso i bzɨ̂ ndoŋ. ²⁴Nyàm kæ kfɨ sɨ a ngeŋ, kèsa à zue nyam ɨ̀twaʼ, ka wùl nɨ̂n mòm sɨ kfɨl iso ateyn. Ghɨ kàʼ a ghɨ ni nô mɨ ghà ateyn mɨtì ka wùl nɨ̂n kfɨ̀l kfɨlɨ. ²⁵Wùl kæ kfɨl iso i nyâm ma ghɨ nyoʼ meyn nyam àteyn sɨ ifu sɨ̂ Bôbo Fɨyini, a ghɨ na kelɨ sɨ sàŋ sɨ fvɨ̀sɨ ŋweyn sɨ antêynɨ̀ nɨ̀ ghelɨ Fɨyini. ²⁶Wùl Isìlæ̀ na chi nô mɨ awo, ka wû n-læ̀ mòm kfɨl mɨluŋ mɨ̀ nyàm kèsa mɨluŋ mɨ̀ fɨ̀nyùyn. ²⁷À kfɨ̀l mɨ ndà mɨluŋ, a ghɨ na kelɨ sɨ sàŋ sɨ fvɨ̀sɨ̀ ŋweyn sɨ antêynɨ̀ nɨ̀ ghelɨ Fɨyini.’”

Ɨlwêʼ ɨ nyâm vzɨ̀ a ka ghɨ na fu sɨ̂ ngàŋ ndô Fɨyini

²⁸Bôbo Fɨyini nɨ̀n be meyn kɨmɨ sɨ̂ Mosìs na, ²⁹“Bè sɨ̂ ghelɨ Isìlæ̀ na, ‘À na gvì nô mɨ ndà nɨ̀ nyam sɨ fu sɨ ifu sɨ nà chi nɨ̀ mbôynɨ̀, wu nà kelɨ sɨ fu abâs a li-a sɨ a nyɨŋ sɨ̂ Bôbo Fɨyini. ³⁰Ghɨ na sɨ nyam ìfu, ɨ̀ nyòʼ sɨ̂ Bôbo Fɨyini, a nà kelɨ kɨ wul vzɨ̀ a wù gvì nɨ̀ ɨ̀nyeyn sɨ lì sɨ gvì nɨ̀ iso ateyn i baʼsɨ̂ nɨ̀ nkumtɨ àteyn, sɨ làysɨ̀ sɨ koʼsɨ nkumtɨ àteyn iyvɨ sɨ̂ Bôbo Fɨyini sɨ ifu. ³¹Wù na gvì nɨ̀ ìso ateyn i, Alòyn, ma à ti ngàŋ ndô Fɨyini ɨ nyòʼ atû àbaŋ ifu, mɨtì nkumtɨ àteyn zɨ̀ ɨ nà kelɨ ŋweyn ŋêyn woyn ŋweyn. ³²Wùl na gvì nɨ̀ nyàm sɨ fu ifu sɨ nà chi nɨ̀ mbôynɨ̀, ghɨ fu abî ɨkœ ɨ two sɨ̂ ngàŋ ndô Fɨyini ³³Wâyn Alòyn vzɨ̀ a wù fu mɨluŋ mɨ̀ nyàm ìfu nâ mzɨ̀ sɨ̂ Bôbo baʼsɨ̂ nɨ̀ ìso ateyn i, nɨn kelɨ sɨ keli abî ɨkœ ɨ two. ³⁴Ma fsɨ meyn nkumtɨ nyàm zɨ̀ a ghelɨ Isìlæ̀ nì fù sɨ ifu sɨ nà chi nɨ̀ mbôynɨ̀, ghɨ lâysɨ̀ iyvɨ tî. Mà fsɨ bàʼsɨ nɨ̀ àbî ɨkœ ɨ two kì ɨ̀ chɨ̀yntɨ fu kɨ̀ sɨ̂ Alòyn ɨ ngàŋ ndô Fɨyini ŋêyn woyn ŋweyn. À n-kelɨ sɨ nà lum kelɨ kɨ àŋena ɨlvɨ ta ghelɨ Isìlæ̀ fu ifu nâ yèynì.’”

³⁵À ti ɨlwêʼ ɨ nyâm ìfu vzɨ̀ a ghɨ n-læ nyòʼ sɨ ifu sɨ̂ Bôbo Fɨyini, wu bè achi nâ ghè a ghɨ nà n-yisi Alòyn ateyn ŋêyn woyn ŋweyn sɨ a ngàŋsɨ ndô Fɨyini na ghɨ fu sɨ̂ àŋena. ³⁶À n-læ nà ghɨ achi nâ ghè a ghɨ n-yisi àŋena ateyn tì, Bôbo Fɨyini ɨ chwòsɨ̀ sɨ isaʼ na ghelɨ Isìlæ̀ na lum fu kɨ ɨ̀lwêʼ nâ wèyn sɨ̂ Alòyn ŋêyn woyn ŋweyn. À læ̀ nà koʼ nô mɨ àjâŋ à kà, kɨ nà nî kɨ tèyn.

³⁷Ɨteyn nâ tèyntɨ̀ nɨn ghɨ tɨ̀saʼ tìtɨ̀ a ghɨ n-kelɨ sɨ nà lemà ɨlvɨ ta wùl nɨ̀n fu ifu i nyoʼnɨ-i, nɨ̀ ìfu i ɨfwo ɨ yɨnɨ-i, kɨ̀mɨ nɨ̀ ìfu i na Fɨyini fɨ lesɨ fu mbɨsɨ ŋweyn, nɨ̀ ìfu i ɨlvɨ ta wùl ɨ̀ nì mbɨ, nɨ̀ ìfu i ɨlvɨ ta ghɨ n-yisi wul sɨ a ngàŋ ndô Fɨyini, baʼsɨ̂ nɨ̀ ìfu i sɨ nà chi nɨ̀ mbôynɨ̀. ³⁸Bôbo Fɨyini nɨn læ fu tɨsaʼ nâ tèyntɨ̀ sɨ̂ Mosìs atû kfɨyn Sinày, a nse iyum, achi ghè a Bôbo Fɨyini nɨn læ bè sɨ̂ ghelɨ Isìlæ̀ na àŋena na gvì nɨ̀ tɨ̀fu tɨ sɨ̂ ŋweyn.