Leviticus 6

¹Bôbo Fɨyini nɨ̀n be meyn sɨ̂ Mosìs na, ²“Wùl kæ nà bê ìwo asɨ nɨ̀ Bôbo Fɨyini nî wì, a ghɨ tì lɨsɨ̂ wâynà ŋweyn iwo afo ta wù tî fu na wù lèm, kèsa à n-ghɨ àfo ta wù tî lèm na wù na kini-à, kèsa wù chòŋ afo a, kèsa a n-ghɨ àfo ma wù fsɨ̀ sɨ a itof a, a à na ghɨ ma wù ni meyn mbɨ. ³Wùl ti kæ boŋ nô mɨ boŋ afo, ɨ̀ wam ànkaŋ kûm àfo ateyn, kèsa wù kàyn ìzɨyn i Bôbo Fɨyini sɨ a ànkaŋ, kèsa wù fì nì nô mɨ mbɨ ì kà, têyn ta ɨseyn nâ sèynsɨ̀, ⁴a wù na kelɨ sɨ kasi sɨ làʼ afo kì a wù choŋ kèsa afo kì a wù fsɨ̀ sɨ a adyaʼ kèsa afo ta ghɨ tî fu na wù lema kèsa afo ta kɨ tî lè wù boŋ. ⁵À kæ sɨ nà ghɨ nô mɨ àfo ma wù kayn meyn ìzɨyn i Bôbo Fɨyini ateyn sɨ a ànkaŋ, ɨ̀ nì kèli, a wù na kelɨ sɨ kasi sɨ fu afo ateyn nô à jɨ̀m, sɨ fì sɨ lì àfo ateyn a li-a sɨ gwòtɨ̀ ɨlwêʼ ɨ̀ twâyn sɨ fu sɨ yomtɨ atû àfo nâ ghè, sɨ̂ bò àfo nâ vzɨ̀ achi ghè a wù gvì sɨ fu ifu na Bôbo Fɨyini lesɨ fù mbɨ ŋweyn. ⁶Wù n-kelɨ kɨmɨ sɨ gvi nɨ̀ àyaʼ a kɨ kelɨ wi nseʼi, ghɨ ɨfyèʼ ghè a ghɨ n-kɨŋ a ndô Fɨyini sɨ fu sɨ̂ ngàŋ ndô Fɨyini, ma wù ti fù sɨ̂ Bôbo Fɨyini ta ka wù lesɨ fù mbɨ ŋweyn. ⁷Wu n-gvî nɨ̀ ànkeyna, a ngàŋ ndô Fɨyini fsɨ ɨ̀ yuyn atu a ŋweyn sɨ̂ Bôbo Fɨyini nɨ̀ ànkeyna, a Bôbo Fɨyini lesɨ fù nô mɨ mbɨ ì kà ta wù tî nì.”

Tɨsaʼ kûm ìfu i nyoʼnɨ-i

⁸Bôbo Fɨyini nɨ̀n be meyn sɨ̂ Mosìs na, ⁹“Bè sɨ̂ Alòyn ŋêyn woyn ŋweyn na, ‘Ɨtêyntɨ̀ nɨ ghɨ tɨ̀saʼ kûm ìfu i nyoʼnɨ-i. Àŋena na nyôʼ ìfu i nyoʼnɨ-i atû àbaŋ ifu, yi chi kɨ afu, ɨvɨs ɨ chi bali kɨ isas ateyn tèyn nô ta ka ɨtuʼ nî layn. ¹⁰Ɨtuʼ layn, ngàŋ ndô Fɨyini maʼ ndzɨ sìsɨ̀ a wù n-mâʼ antêynɨ̀, ɨ màʼ ɨ sîsɨ̀ a wù nî wu màʼ atu àteyn ma ghɨ faytɨ nɨ̀ àbâs a ndzɨsɨ a fɨfâ ɨ ndu myèl àbvɨ ifu zɨ̀ a yi fɨ̀ meyn tì ɨ lèm a ngùŋ àbaŋ ifu. ¹¹Wù myêl, wu kfɨnɨ ndzɨsɨ ŋweyn ɨ lì abvɨ ateyn ɨ fvɨ̀ nɨ̀ ànkeyna sɨ a alèʼ ghè a ghɨ bɨ̀ ateyn ɨ màʼ alèʼ ghè a kɨ n-layn kfeynɨ ta isaʼi nɨn dyêyn. ¹²Ɨvɨs ɨ nɨn kelɨ sɨ nà balî kɨ bali abaŋ ifu mɨlvɨ ɨ̀n jɨ̀m. Ngàŋ ndô Fɨyini na lalì nô mɨ achi à kà wu kwò kfeynsɨ ɨ̀nkâʼ, ɨ baʼtɨ ìfu i nyoʼnɨ-i nâ zɨ̀ atû àteyn, ɨ nyòʼ ɨ baʼsɨ̂ nɨ̀ ìso zɨ̀ a ghɨ fvɨ̀sɨ̀ a nyamsɨ ghè a ghɨ fù tɨfu ateyn sɨ nà chi nɨ̀ mbôynɨ̀. ¹³Ɨvɨs ateyn nɨn kelɨ sɨ nà lum balî kɨ bali abaŋ ifu nâ ghè, lɨmâ wì nô sakos.’”

Tɨsaʼ kûm ìfu ɨfwo ɨ yɨnɨ

¹⁴“Ɨtêyntɨ̀ nɨn ghɨ tɨ̀saʼ kûm ìfu ɨfwo ɨ yɨnɨ. Ghɨ na gvî nɨ̀ ìnyeyni, wâyn Alòyn ɨ gvì nɨ̀ ìnyeyni asɨ abaŋ ifu sɨ fu sɨ̂ Bôbo Fɨyini. ¹⁵Ghɨ gvî, ngàŋ ndô Fɨyini ɨ myèytɨ̀ àwu ɨnkfɨ̀ŋ ma ghɨ gva meyn mɨ̀ faytɨ kfɨ ghɨ fyes mɨ̀vɨl ateyn baʼsɨ̂ nɨ̀ ìleŋ i nô ì jɨ̀m ɨ̀ nyòʼ atû àbaŋ ifu sɨ dyèyn na ifu ateyn i nô ì jɨ̀m nɨn kelɨ Bôbo Fɨyini, a ghɨ ìfu ta ghɨ nyòʼ, yi lɨ̂mtɨ̀ fom sɨ̂ Bôbo Fɨyini. ¹⁶Wù n-yôʼ, à bɨsɨ nô mɨ ghà, Alòyn ŋêyn woyn ŋweyn ɨ yɨ alèʼ a laynɨ-a ɨwe fɨndo nɨ̀ Bôbo Fɨyini. Àŋena se sɨ yɨ ka ghɨ n-we fɨ̀shɨ̀k ateyn. ¹⁷Ghɨ se sɨ nyoʼ abayn ateyn, ka ghɨ n-we fɨ̀shɨ̀k ateyn. À n-ghɨ ɨ̀fwo ɨ yɨnɨ vzɨ̀ a mà fù sɨ̂ ngàŋsɨ ndô Fɨyini antêynɨ̀ ifu ɨfwo ɨ yɨnɨ ghê a ghɨ fù sɨ̂ mà. Ifu nâ yèynì nɨn layn kfeynɨ̂ kɨmɨ ta ifu sɨ loyn ilêsɨ̀ ifu nɨ̀ ìfu i sɨ dyèyn na wùl ɨ̀ ni meyn mbɨ. ¹⁸Nô mɨ wayn ɨ̀ lûmnɨ̀ ɨ̀ kfà isas i ndo nɨ̀ Alòyn, kàʼ a wù yɨ ɨfwo ɨ yɨnɨ ifu nâ wèyn a ghɨ nyòʼ sɨ a ifu sɨ̂ Bôbo Fɨyini, a ghɨ àbâs ifu kì a àŋena nɨn kelɨ nɨ̀ àjâŋ kì a kɨ læ̀ koʼ ibàm, mɨtì ma wùl ɨ wûlù kæ kùm, a wù li ndòyn.”

¹⁹Bôbo Fɨyini nɨ̀n fi meyn bè sɨ̂ Mosìs na, ²⁰“Iyeynì nɨn ghɨ ìfu zɨ̀ a ka Alòyn ŋêyn woyn ŋweyn gvi nɨ̀ ìnyeyni achi ghè a ghɨ n-yisi ŋweyn kèsa nô mɨ wâyn ŋweyn ɨ̀ kfà ateyn. Wu n-lî ìfûʼ i ɨnkfɨ̀ŋ ma ghɨ gva meyn mɨ̀ faytɨ kfɨ, ɨ̀ gwòtɨ̀ ɨlwêʼ ìvɨm, ɨ̀ lì àlêʼ àmòʼ ɨ̀ fu sɨ a ifu ɨfwo ɨ yɨnɨ kɨ̀ ta ghɨ lum fu. Wu n-fu àbeʼ nɨ̀ bɨsì bɨsì, ɨ̀ nì fu mèsì abeʼ aleŋ ɨlvɨ ikfa. ²¹Ɨ̀nkfɨ̀ŋ mɨ̀ àteyn nɨn kelɨ sɨ nà ghɨ ma ghɨ faytɨ meyn fyes mɨvɨl mɨ̀ olìfsɨ̀ ateyn, ɨ̀ nyòʼ ikaŋ ɨ̀ beyʼlɨ ɨ̀ fù sɨ a ifu ɨfwo ɨ yɨnɨ, a ghɨ ìfu i nyoʼnɨ-i, lɨ̂mtɨ̀ fom sɨ̂ Bôbo Fɨyini. ²²À na lum faytɨ̂ kɨ wâyn Alòyn vzɨ̀ a wù n-kelɨ sɨ yɨ ŋweyn sɨ a ngàŋ ndô Fɨyini i ngaŋtɨnɨ, a ghɨ ìfu zɨ̀ a ghɨ lum fu sɨ̂ Bôbo Fɨyini, ghɨ kelɨ sɨ nyòʼ na yi fɨ kɨ ì jɨ̀m. ²³Yi ti n-dyêyn na ghɨ n-kelɨ sɨ nà nyôʼ ifu ɨfwo ɨ yɨnɨ zɨ̀ a ngàŋ ndô Fɨyini fù nô ì jɨ̀m ghɨ faŋ tɨ yɨ nô àfo ateyn.”

Tɨsaʼ kûm ìfu ɨlvɨ ta wùl ɨ̀ jas ɨ̀ nì mbɨ

²⁴Bôbo Fɨyini nɨ̀n be meyn sɨ̂ Mosìs na, ²⁵“Bè sɨ̂ Alòyn ŋêyn woyn ŋweyn na, ‘Ɨtêyntɨ̀ nɨn ghɨ tɨ̀saʼ kûm ìfu ɨlvɨ ta wùl ɨ̀ jas ɨ̀ nì mbɨ. Ghɨ n-kelɨ sɨ nà sɨ nyam zɨ̀ a wùl fu ifu ateyn ta ka ghɨ lesɨ fù mbɨ ŋweyn alèʼ ghè a ghɨ n-sɨ nyam ìfu i nyoʼnɨ-i ateyn asɨ nɨ̀ Bôbo Fɨyini. À n-ghɨ ìfu layn kfeynɨ-a. ²⁶Ngàŋ ndô Fɨyini zɨ̀ a yì n-fu ifu nâ yèynì nɨn kelɨ sɨ yɨ, ghɨ sɨ yɨ kɨ alèʼ a laynɨ-a ɨwe fɨndo nɨ̀ Bôbo Fɨyini. ²⁷Wùl ɨ wûlù kæ sɨ kum njwò nâ zɨ̀, a Bôbo Fɨyini fu ngeʼ sɨ̂ ŋweyn. Mɨ̀lûŋ mɨ̀ àteyn kæ jas kùm ndzɨsɨ wûl, a wù na kelɨ sɨ su kɨ aleʼ a laynɨ-a. ²⁸Ghɨ kæ kfe njwò ìfu nâ zɨ̀ a ntòyn àchàʼ, a ghɨ na kelɨ sɨ zuelɨ ntòyn àteyn, ma ghɨ kæ kfè a ntòyn ma ghɨ faytɨ nɨ̀ ìdyayn i, a ghɨ na kelɨ sɨ faytɨ sɨ sù, sɨ chùʼtɨ nɨ̀ mu. ²⁹Nô mɨ wul ɨ̀ lûmnɨ̀ ɨ̀kfà isas i ndo nɨ̀ ngàŋ ndô Fɨyini kàʼ a wù kfɨl njwò àteyn. Njwò àteyn nɨn layn kfeynɨ-à. ³⁰Mɨtì ka wùl nɨn læ̀ kfɨl njwò ifu zɨ̀ a ghɨ fù sɨ loyn ilêsɨ̀ ifu ɨ̀ lì zɨ nɨ̀ mɨ̀lûŋ mɨ̀ àteyn a fɨndo nɨ̀ Bôbo Fɨyini sɨ yuyn atu a ghêl alèʼ a laynɨ-a. Ghɨ n-kelɨ sɨ nyoʼ njwò àteyn nà yì fɨ nô ì jɨ̀m.’”