Micah 6
Bôbo Fɨyini nɨ̀n n-kelɨ nsaʼ ŋêyn ghelɨ Isìlæ̀
1Ghelɨ Isìlæ̀, yì yvɨtɨ iwo zɨ̀ a Bôbo Fɨyini nɨ̀n bê kûm zɨ̀. Wù bè na,
yì lali nà fêʼtɨ̀ ngeʼ sisɨ, kfɨynsɨ ghaʼlɨnɨsɨ yvɨtɨ-à,
yì na fêʼtɨ̀ ngeʼ sisɨ, kfɨynsɨ telâsɨ̀ yvɨtɨ-à.
2Kfɨynsɨ ghaʼlɨnɨsɨ na yvɨtɨ nsaʼ zɨ̀ a Bôbo Fɨyini nɨ̀n n-kelɨ ŋêyn ghelɨ ŋweyn.
Ɨfwo vzɨ̂ a ghɨ n-læ bàʼlɨ mbzɨ atû àteyn, wu ghɨ sɨ faŋ kɨ faŋ nô ta ka ghɨ̀ læ̂ ghɨ̀, na yvɨtɨ-à.
Bôbo Fɨyini nɨ̀n n-kelɨ nsaʼ kûm ghelɨ ŋweyn.
Bôbo Fɨyini tom meyn ghelɨ Isìlæ̀ iti i nsaʼ.
3Bôbo Fɨyini bɨf na, “Mà bèbsɨ ghà sɨ̂ ghelɨ ghem a?
À n-ghɨ ngeʼ ìkà a mà fù sɨ̂ zɨ̀-a? Yì feʼtɨ sɨ̂ mà.
4À n-læ fvɨ̀sɨ ma zɨ sɨ a Ijìb.
À n-læ fvɨ̀sɨ̀ ma zɨ̀ sɨ a ndô àkòs nâ ghè.
Mɨ n-læ meyn tum Mosìs na wù na tisɨ̂ zɨ̀,
ɨ fi tum kɨmɨ Alòyn ŋêyn Miliyàm na àŋena na tisɨ̂ zɨ̀.
5Ghelɨ ghem, ka yi n-lèsɨ̀
ìwo zɨ̀ a Balàk ɨ fòyn Mowàb nɨn læ baʼtɨ sɨ ni sɨ̂ zɨ̀,
ka yi n-lèsɨ̀ dzɨ zɨ̀ a Balàm ɨ wâyn Beyò nɨn læ fɨ̀ysɨ Balàk kûm mɨnaŋ mɨ̀ ŋweyn nâ mzɨ̀.
Yì kasi kfàʼtɨ̀ ta yi n-læ lù a Shitɨ̀m ɨ jèl ndu chem a Gilgàl,
yì kæ kfàʼtɨ̀ a yì yeyn na Bôbo Fɨyini ni meyn àwo sɨ̂ zɨ̀, kɨ ghɨ kɨ àti ati.
6Mà ti kàʼ a mà gvì nô nɨ̀ ghà asɨ nɨ̀ Bôbo Fɨyini sɨ koʼsɨ ŋweyn nɨ̀ ànkeyn a?
Mà ti kàʼ a ma gvi nô nɨ̀ ghà sɨ ngvɨmlɨ Fɨyini fîfɨ̀ a fɨ ngàŋtɨ chwo nɨ̀ ànkeyn a?
Mɨ ti n-gvì nɨ̀ ìfu i nyoʼnɨ-i ma,
mɨ n-gvì nì wâyn nyàm ma wù sɨ ghɨ bèŋ a?
7A mà ti gvì nɨ̀ ɨ̀ywaʼ nô mɨ nkam sɨ̂ Bôbo Fɨyini, atem àkema layn wi, a wù na saŋlɨ-à?
A mà ti gvì nô mɨ nɨ̀ mɨ̀vɨ̂l, mɨ kalì ta jvasɨ, atem àkema layn wi, a wù na saŋlɨ a?
Mà ti kàʼ a mà fu wâyn àsɨ nɨ̀ mà na Bôbo lesɨ fù mbɨ yem ma?
Mà fù nô mɨ wayn ma wù fvɨ̀ a ma ɨlvà, wù bu fsɨ.
8Bôbo Fɨyini feʼtɨ meyn ìwo zɨ̀ sɨ̂ zɨ̀ a yi n-jofɨ̀ sɨ nà ni-à.
Ba Bôbo bè na wù n-kɨŋ na yì na nî àwo kèynà têyn?
Bôbo Fɨyini nɨ̀n kɨŋ na yì na nî àwo kì a kɨ n-ghɨ àti ati, koynsɨ̂ ìsuyn sɨ̂ ghelɨ,
ngvɨmlɨ̂ Fɨyini fifɨ, chî ta fɨ n-kɨŋ.
Bôbo Fɨyini nɨn fu ngeʼ sɨ̂ ghelɨ Isìlæ̀ bòm mbɨsɨ àŋena.
9À n-taŋî mà Bôbo Fɨyini, ma yi n-kelɨ itof a yì na ngvɨmlɨ̂ mà bòmta mɨ n-kelɨ àdyaʼ sɨ fu ngeʼ sɨ̂ zɨ̀.
Yì faytɨ læ̂ yvɨ̀tɨ ntum zɨ̀ a Bôbo Fɨyini tùm sɨ̂ zɨ̀ ghelɨ ntèʼ Jelusalem.
10Ghelɨ ghɨ bɨ ghèyn, yi n-kfâʼ na mà kàʼ a mà lesɨ ɨfwo vzɨ̀ a yi n-kelɨ a yi a ndosɨ ma yì chòŋ choŋ ma?
Mà kàʼ ma bû lèsɨ̀ ɨfyeʼ vzɨ̀ a yi n-choŋ ghelɨ ateyn tî, mɨ n-bâyn ɨ̀fyeʼ nâ vzɨ̀ nô sɨ a ŋaŋ.
11Mà kàʼ ma bû lèsɨ̀ fu ghelɨ, ghɨ fêʼ ɨ̀fwo ɨfyèʼ wu kfêynɨ̂ wì,
mà kàʼ ma bû lèsɨ̀ fu ghelɨ, ghɨ fêʼ ɨ̀fwo ɨfyèʼ ɨ choŋnɨ.
12Ghelɨ ghaʼnɨ a Jelusalem nɨn kelɨ nchînɨ̀ sɨ tosɨ;
Achfɨ̂ àŋena nɨn ghɨ ma à luyn kɨ ànkaŋ.
Àŋena nɨn wama.
13À ti iwo zɨ̀ a yi nì mà na bebsɨ̂ zɨ̀.
Mɨ n-bebsɨ̂ mesì kɨ mesi zɨ̀ bòm mbɨ sisɨ.
14Yì nà yɨ-a mɨ̀tì yvɨ wi;
Yì nà yɨ-a jeŋsɨ nà bu yafɨ kɨ yafɨ zɨ.
Yì nà ghayn ɨ̀fwo, ɨ̀ yvɨ̀ŋtɨ̀, yi kɨŋ kɨ moŋ,
bòm ta yi na bɨsɨ mɨ ghà ma nì mbàynɨ̀ sisɨ nù ɨ fsɨ kɨ fsɨ.
15Yì na tòʼ àfo, kfî wì;
Yì na chuʼ mɨ̀vɨ̀l mɨtì kelɨ wi sɨ yisi,
Yì na ches mɨ̀lûʼ mɨtì lum kelɨ wi sɨ nyvɨ.
16Yi bimi meyn sɨ nà nî awo abɨ-a kɨ̀ ta fòyn Omlì nɨn læ bè na yì na nì-à.
Yi ni meyn àwo abɨ-a ki a woyn Ahàb nɨn læ nà nî nô à jɨ̀m.
Yi n-chî kɨ nchînɨ sɨ àŋena.
Bòm tèyn mɨ n-bebsɨ̂ mesì kɨ mesi zɨ, a à na ghɨ nchwæ sɨ̂ ghelɨ ghɨ li.
Ghelɨ ghi na lum nì ìwo, yi chem wi a dzɨ;
Tɨlaʼtɨ mbzɨ tɨ litɨ na lum chyeʼ kɨ chyeʼ zɨ.