Micah 7
Awo a bɨ-a kì a ghelɨ Isìlæ̀ nɨ̀n nî.
1Mɨ ghɨ a mɨ̂lùmchuŋ!
Mɨ ghɨ kɨ ta wul ɨlvɨ ta ghɨ kœ̀ mèsì mɨtam nɨ̀ lùm
wù na bu kɨŋ kɨ fɨ̀tam sɨ sayntɨ sɨ kfɨl.
Nô nchfɨ̂ŋ gèlêbsɨ̀ bu ghɨ wi sɨ chɨ̀l ɨ jêŋ ateyn,
sem kfɨ kɨ nô kfɨ ma sɨ kfɨlɨ fîk sìsɨ̀ a sɨ bàŋ sɨ asɨ, sɨ ghɨ wi.
2Wùlɨ̀ bu ghɨ wi a Isìlæ̀ a wù n-fâyn Fɨyini;
wùl àti ati bu ghɨ wi.
Nô mɨ ndà nɨn duʼa, kɨŋ kɨ dzɨ sɨ zue wâyn nì;
Nô mɨ ndà ɨ beynà kɨ àtam sɨ̂ wâyn nì.
3Aŋena nô ghɨ̀ jɨ̀m nɨ̀n faytɨ̂ kya kɨ nô kya sɨ ni mbɨ;
Wùl ɨ tisɨnɨ nɨn kɨŋ kɨ na ghɨ na fu ɨ̀fwo sɨ̂ zɨ̀,
Wùlɨ̀ vzɨ̀ a wù nsaʼ nsaʼsɨ ɨ kɨŋ kɨ na ghɨ na yuyntɨ̂ yùyntɨ zɨ,
wùl àdyaʼ ɨ kɨŋ na ghɨ na yvɨ nô mɨ ghà kɨ̀ sɨ̂ zɨ̀.
Àŋena nɨn chɨ̂yntɨ̀ ghɨ kɨ ɨ̀chɨm ɨ mbɨ.
4Nô mɨ wul ɨ̀jùŋ a àŋena antêynɨ̀ nɨn ghɨ kɨ ta fɨkâfɨ sùnjoŋnjoŋsɨ,
Wùl vzɨ̀ a wù layn gòʼsɨ̀ ɨ ghɨ kɨ ta ɨtwaʼ ayòyn.
Mɨtì ɨlvɨ kfêyn meyn lvɨ̂yn ta ka ngeʼ koli aŋena kɨ ighel ta nfèʼtɨ̀ sɨ àŋena sɨ nɨ̂n læ nà be-à.
Aŋena zɨ meyn a ngeʼ ɨ̀ nà sɨ fɨm kɨ fɨm.
5Ka wùl nɨn fì sàmsɨ wâynà ŋweyn;
Ka wùl nɨn fì yèʼtɨ ɨwùyn nɨ̀ suyn ŋweyn.
Ka wùl nɨn fì fèʼtɨ̀ ɨ̀lva ŋweyn nô mɨ sɨ̂ wî ŋweyn.
Yì na tòʼnɨ̀ nɨ̀ àwo kì a yi n-bê nô mɨ sɨ̂ ghɨ̀ki ghi.
6Nô mɨ wâyn ɨlûmnɨ̀ sɨ wumsɨ̂ kɨ wumsɨ bæ̀,
wâyn wi ɨ lalì kɨ tèyn wu kèʼ nì,
wî wâyn sɨ lalì kɨ tèyn wu kèʼ nà lum.
Mbàynɨsɨ wûlsɨ̀ sɨ kasî fvɨ̂ kɨ a ndo.
7Mɨtì sɨ̂ mà, mà sɨ ki kɨ na Bôbo Fɨyini gvi gàmtɨ̀ mà.
Mɨ n-chîtɨ̀ kɨ Fɨyini ɨ mbœ̀sɨ̀ yem;
Fɨyini femfɨ nɨn yvɨ ìjêm ìyemi.
Bôbo Fɨyini nɨn bœ̀sɨ̀ ghelɨ Isìlæ̀
8Ka yì fì chyeʼ ghes a mbàynɨ̀ seysɨ.
Ghesɨ̀ nɨn ghɨ nô mɨ a ngeʼ, tèyn yi ghɨ kɨ sɨ mæ̀.
Ghès nɨn ghɨ nô mɨ abe afɨmnɨ-a têyn,
Bôbo Fɨyini ɨ ghɨ kɨ sɨ nì sɨ dyeyn dzɨ.
9Ghèsɨ ni meyn mbɨ asɨ nɨ̀ Bôbo Fɨyini.
Wù nyôʼsɨ meyn ɨ̀toŋ sɨ̂ ghès nô sɨ a ŋaŋ, ghes na kelɨ wi iwo sɨ bè,
sɨ chem taka wù fu ngeʼ sɨ̂ ghès, yì kfeyn,
ɨlvâ ŋweyn yvɨtɨ.
Wu nì fvɨsɨ̀ ghès sɨ a ngeʼ nâ ghàyn,
a ghèsɨ̀ yeʼi nchînɨ̀ àti ati nɨ̀ ŋweyn.
10Mbàynɨ̀ seysɨ nɨn nì yeyn ta Fɨyini fɨ̀ bœ̀sɨ̀ ghes,
a iwumi na ndù kɨ sɨ zue àŋena,
ɨ mbàynɨ̀ sìsɨ̀ a sɨ tî nà chyeʼ ghes bɨfɨ na,
“Bôbo Fɨyini ɨ Fɨyini fifɨ fì ba a?”
Aŋena læ̀ felɨ-a, a ghes na boŋ ki-a.
Mbàynɨ̀ sɨ àŋenasɨ læ̀ foyn àŋena,
kɨ̀ ta ghɨ fòyn achâʼlɨ̀ a dzɨ.
11Ghelɨ Jelusalem, achi a nɨn gvi-à ta ka ghɨ kasî bàʼlɨ̀ mbàyn ntèʼ nɨ̀ zɨ.
Achi nâ kì læ̀ gvi-à a ghɨ ghaʼsɨ ntèʼ zɨ.
12À læ̀ nà ghɨ achi nâ ghè a ghelɨ gvî ngvɨmlɨ̂ zɨ̀, dvɨ̂ kɨ tèyn.
Ghelɨ læ̀ nà lû a Asilìyà fî lù a Ijìb gvî sɨ̂ zɨ̀.
Ghelɨ læ̀ nà lû ɨlwèʼ ghè a àŋena nɨn chi ateyn nô ɨ̀jɨ̀m, kɨ̀ sɨ lù a Ijìb sɨ ndù sɨ chem a jvâ Yuflèt gvî ngvɨmlɨ̂ zɨ̀.
Ghɨ læ̀ nà gvî sɨ̂ zɨ̀ ma ghɨ lù kɨ ɨlwêʼ ɨ̀jɨ̀m, lù sɨ a mbæ̀ jvà ìghaʼnɨ,
fî lù a kfɨynsɨ ghaʼlɨnɨsɨ nô a ndyèynsɨ̀ gvî sɨ̂ zɨ̀.
13Ghelɨ mbzɨ læ̀ ni mbɨ ɨ̀ chèm aleŋ ali-a a mbzɨ na sɨ ghɨ kɨ ta nse iyum,
ghelɨ læ̀ ni mbɨ ɨ̀ chèm aleŋ ali-a ɨ̀ sàm sɨ a aŋena ɨlwêʼ ɨ̀ leʼ gvì sɨ̂ zɨ̀, a ɨlwêʼ àŋena faŋ kɨ̀ ɨyum.
Bôbo Fɨyini læ̀ koynsɨ̂ ìsuyn sɨ̂ ghelɨ ŋweyn.
14Wa tisɨ̂ ghelɨ ghya nɨ̀ mbàŋ nchì bzɨsɨ nɨ̀ và a Bòbo Fɨyini.
Àŋena nɨn ghɨ bzɨ shyasɨ wa ghɨ nchì àŋena.
Nô mɨ ta bzɨ shyasɨ nɨn chî kɨ sɨ a ngeŋ ɨtwaʼ,
nse ìjùŋ nɨ̀n baʼsɨ̂ sɨ̂ àŋena, ɨfwo yɨnɨ koʼ ateyn.
Ni àŋena na yɨ ɨ̀fwo yɨnɨ vzɨ̀ a wu n-koʼ a Bashàn nɨ̀ ɨvzɨ̂ a wu n-koʼ a Gilèd,
kɨ̀ ta àŋena nɨ̀n læ nà yɨ sɨ asɨ.
15Bôbo Fɨyini bè na “Mɨ n-dyèyn nchwæsɨ awo akaynɨ-a sɨ̂ zɨ̀,
kɨ̀ ta mɨ n-læ dyèyn ɨtuʼ ghê a yì n-fvɨ̂ sɨ a Ijìb.”
16Ghelɨ tɨlaʼtɨ mbzɨ læ̀ yeyn àwo kì a Bôbo Fɨyini nì sɨ̂ zɨ̀ ɨ̀ nà wumi-à,
àŋena læ̀ wumi-à bòm ta àŋena læ̀ nà bu kelɨ wi adyaʼ nô sɨ akos.
Àŋena læ̀ chimi kɨ̀ têyn moŋ ɨ̀ nà sɨ tom kɨ àwu,
bu fì kôŋ wì sɨ yvɨ iwo.
17Àŋena læ̀ nà mûʼ àbɨ̂l kɨ̀ ta mbamsɨ,
àŋena læ̀ nà mûʼ àbɨ̂l kɨ̀ ta ɨfwo vzɨ̀ a wu ŋâŋlɨ̀ a nse.
Àŋena læ̀ nà ŋâŋlɨ̀ fvɨ̂ gvî ɨbùʼ ghè a àŋena nɨn chi ateyn, chɨŋtɨ̂ faynà.
Àŋena læ̀ kasî gvî sɨ̂ Bôbo Fɨyini ɨ fɨyini fɨ ghesɨ̀na, chɨŋtɨ̂ faynà.
Àŋena læ̀ nà fâyn zɨ̀.
18Fɨyini fɨ lifɨ nɨn ghɨ wi ta vâ a Bôbo,
Wà n-lêsɨ̀ fu ghelɨ ghya, ki wi mbɨsɨ àŋena.
Bôbo nɨn lêsɨ̀ fu ghelɨ ŋweyn ghì a ghɨ bu chi.
Wà nyôʼsɨ̀ ɨ̀toŋ kɨ̀ sɨ a fɨlèʼnɨ̀ tèyn,
mɨtì kôŋ sɨ nà koynsɨ̂ isuyn sɨ̂ ghelɨ̀ ghya.
19Wà læ̀ fî kòynsɨ̂ ìsuyn sɨ̂ ghès a Bôbo;
wà læ̀ tom àvɨ atû mbɨsɨ nɨ̀ ghès,
wa læ̀ lâŋ maʼì àwo a bɨ-a nɨ̀ ghès a kɨ kalî faŋ isas i jvâ ìghaʼnɨ.
20Wa læ̀ dyêyn àtem ajuŋà nɨ̀ và sɨ̂ woyn Jàkôb
Wa læ̀ dyêyn ìkôŋ i mɨ̂kàyn nɨ̀ và sɨ̂ woyn Abɨ̀làhâm,
kɨ̀ ighel ta wà n-læ chfɨ̀nɨ sɨ̂ ghɨ̀bo ghesɨ ɨtuʼ ɨmu ɨ yɨ mɨkâyn zɨ̂ àŋena.