Nehemiah 12

Ngàŋsɨ ndô Fɨyini nɨ̀ ghelɨ ndo nɨ̀ Levì

¹Akeynà nɨn ghɨ àzɨyn a ngàŋsɨ ndô Fɨyini nɨ̀ ghelɨ ndo nɨ̀ Levì ghì a ŋêyn ghɨ̀ Zèlubàbêl ɨ wâyn Shèyaltìyèl nɨ̀ Jeshùwà nɨn læ kasi kfa sɨ a ndo àkòs a Babilòn.

À nà n-ghɨ Sèlayà ŋêyn Jèlìmayà nɨ̀ Ezlà,

²nɨ̀ Amalìyà nɨ̀ Malùk ŋêyn Hatùsh,

³kɨ̀mɨ nɨ̀ Shèkànayà nɨ̀ Lehùm ŋêyn Melemòt,

⁴kɨ̀mɨ nɨ̀ Idò nɨ̀ Ginetòn ŋêyn Abijà nɨ̀,

⁵Mijamìn nɨ̀ Madayà ŋêyn Bilgà nɨ̀,

⁶Shèmayà nɨ̀ Jòyalìb ŋêyn Jèdayà,

⁷kɨ̀mɨ nɨ̀ Salù nɨ̀ Amòk ŋêyn Hilkayà nɨ̀ Jèdayà.

À ti ghelɨ ghì a ghɨ nà n-tisɨ ngàŋsɨ ndô Fɨyini nɨ̀ ghelɨ ndo nɨ̀ Levì ghɨ li ɨtuʼ nɨ̀ Jeshùwà.

⁸Ghelɨ ndo nɨ̀ Levì ghì a ghɨ n-kàsi kfa nà n-ghɨ Jeshùwà nɨ̀ Binyuè nɨ̀ Kadmiyèl kɨ̀mɨ nɨ̀ Shèlèbayà ŋêyn Judà nɨ̀ Màtànayà. Màtànayà nɨ̀ ghelɨ ndo nɨ̀ Levì ghɨ li nà n-tisɨ ghelɨ ghì a ghɨ nà n-yem njàŋsɨ̀ fu àyòŋnɨ̀ sɨ̂ Fɨyini fɨ, ⁹ma Bàkbùkayà ŋêyn Yunì nɨ̀ ghelɨ ndò nɨ̀ Levì ghɨ li timi meyn keʼnɨ àŋena.

¹⁰Jeshùwà nà n-ghɨ bò Jòyakìm, Jòyakìm ɨ ghɨ bò Elìyashìb, Eliyashìb ɨ ghɨ bo Jòyadà. ¹¹Jòyadà ɨ ghɨ bò Jònatàn, Jònatàn ɨ ghɨ bò Jadùwà.

Ghelɨ ghɨ tisɨnɨ asas a ndosɨ nɨ̀ ngàŋsɨ ndô Fɨyini

¹²Akeynà nɨn ghɨ àzɨyn a ghelɨ ghì a ghɨ nà n-tisɨ asas a ndosɨ nɨ̀ ngàŋsɨ ndô Fɨyini ɨtuʼ ta Jòyakìm nà n-ghɨ ngàŋ ndô Fɨyini i ngaŋtɨnɨ:

Mèlayà nà n-tisɨ̂ isas i ndo nɨ̀ Sèlayà.

Hànànayà ɨ tisɨ̂ ìsas i ndo nɨ̀ Jèlìmayà.

¹³Meshùlayàm ɨ tisɨ̂ isas i ndo nɨ̀ Ezlà,

Jòhòhanàn ɨ tisɨ̂ ìsas i ndo nɨ̀ Amalìyà,

¹⁴Jònatàn ɨ tisɨ̂ ìsas i ndo nɨ̀ Malùk,

Josèf ɨ tisɨ̂ ìsas i ndo nɨ̀ Shèkànayà,

¹⁵Adnà ɨ tisɨ̂ ìsas i ndo nɨ̀ Halìm,

Helkày ɨ tisɨ̂ ìsas i ndo nɨ̀ Melemòt,

¹⁶Zèkàliyà ɨ tisɨ̂ ìsas i ndo nɨ̀ Idò,

Meshulàm ɨ tisɨ̂ ìsas i ndo nɨ̀ Ginetòn,

¹⁷Ziklì ɨ tisɨ̂ ìsas i ndo nɨ̀ Abijà,

Wùl ɨ̀ lvɨ̀ nà n-tisɨ̂ kɨmɨ ìsas i ndo nɨ̀ Mìnìyamìn.

Biltày ɨ tisɨ̂ ìsas i ndo nɨ̀ Mòyàdayà,

¹⁸Shamùwà ɨ tisɨ̂ ìsas i ndo nɨ̀ Bilgà,

Jònatàn ɨ tisɨ̂ ìsas i ndo nɨ̀ Shèmayà,

¹⁹Màtènây ɨ tisɨ̂ ìsas i ndo nɨ̀ Jòyalìb,

Uzì ɨ tisɨ̂ ìsas i ndo nɨ̀ Jèdayà,

²⁰Kalày ɨ tisɨ̂ ìsas i ndo nɨ̀ Salù,

Ebà ɨ tisɨ̂ ìsas i ndo nɨ̀ Amòk

²¹Hàshàbayà ɨ tisɨ̂ ìsas i ndo nɨ̀ Hilkayà,

Nètanèl ɨ tisɨ̂ ìsas i ndo nɨ̀ Jèdayà.

²²À nà n-ghɨ ta Elìyashìb nɨ̀ Jòyadà nɨ̀ Jòhanàn ŋêyn Jadùwà nɨn ghɨ ngàŋsɨ ndô Fɨyini sɨ ghaʼnɨsɨ, ghɨ nyàʼ àzɨyn a ghelɨ ghì a ghɨ nà n-tisɨ asas a ndosɨ nɨ̀ Levì a mɨchi nâ ghè. Ghɨ n-læ nyàʼ ɨ koʼ chem ɨtuʼ ta fòyn Dalìyòs nà n-saʼ Besìyà.

Azɨyn a ngàŋsɨ ndô Fɨyini nɨ̀ ghelɨ isas i ndo nɨ̀ Levì

²³Ghɨ n-læ meyn nyàʼ Àzɨyn a ghelɨ ghì a ghɨ nà n-tisɨ asas a ndosɨ nɨ̀ ghelɨ Levì a ŋwàʼlɨ̀ ghè a ghɨ n-nyâʼ awo ilaʼ ateyn. Ghɨ n-læ nyàʼ ɨ koʼ chem ɨtuʼ nɨ̀ Jòhanàn ɨ wâyn Elìyashìb. ²⁴Ghelɨ ghɨ tisɨnɨ isas i ndo nɨ̀ Levì ɨ Hàshàbayà nɨ̀ Shèlèbayà nɨ̀ Jeshùwà ɨ wâyn Kadmìyèl, baʼsɨ̂ nɨ̀ ghelɨ ndo nɨ̀ Levì ghɨ li ɨ gwòsɨ̀ inôyn ì bò ɨ timi ɨ kèʼnɨ̀ ɨ nà yem njàŋsɨ̀, fu àyòŋnɨ̀ sɨ̂ Fɨyini. Ghɨ n-tìmi tî, ghelɨ ghɨ li ɨ nà fu njàŋ ghɨli bêynsɨ̀-à kɨ̀ ighel ta Devìt ɨ wul ɨ̀ Fɨyini nɨn læ bè.

²⁵Ghelɨ ghì a ghɨ nà n-chî achfɨ̂ a mbàyn nɨ̀ ndo sìsɨ̀ ɨchfɨ mbàyn a ghɨ nà n-lêm ɨfwo ateyn nà n-ghɨ Màtànayà nɨ̀ Bàkbùkayà nɨ̀ Obàdayà nɨ̀ Meshulàm nɨ̀ Talmòn nɨ̀ Akùb.

²⁶Àŋena nà n-felɨ̀ ɨtuʼ nɨ̀ Jòyakìm ɨ wâyn Jeshùwà, Jeshùwà ɨ ghɨ wâyn Jòzadàk. Àŋena nɨn felɨ meyn kɨmɨ ɨtuʼ ghê a Nèhèmayà nà n-saʼ Judà ateyn Ezlà ɨ ghɨ ngàŋ ndô Fɨyini fî ghɨ wul ɨ̀ nyaʼnɨ.

Ghɨ jèm ɨ fu mbàyn Jèlusalèm sɨ̂ Fɨyini fɨ

²⁷À n-læ nà ghɨ ta ghɨ n-jêm sɨ fu mbàyn Jèlusalèm sɨ̂ Fɨyini fɨ, ghɨ jaŋtɨ̀ ghelɨ ndo nɨ̀ Levì nô mɨ wo ta àŋena nà n-chi àŋena gvì a Jèlusalèm sɨ yɨ ayɨ. Àŋena nɨ̂n gvì tî ɨ nà yem njàŋsɨ̀ nɨ̀ ìsaŋlɨ i fu àyòŋnɨ̀ sɨ̂ Fɨyini fɨ, buʼ ɨ̀fwo ɨ kfasɨnɨ, buʼ tɨ̀luŋ nɨ̀ ɨtɨ mɨnchaʼtɨ. ²⁸Ghɨ n-læ meyn jàŋtɨ kɨmɨ ghelɨ ghɨ yemnɨ ghì a ghɨ nà n-chi ɨlwèʼ ghè a wu n-baʼsɨ a Jèlusalèm, nɨ ɨghî a ghɨ n-ghɨ a ntèʼsɨ nɨ̀ ghelɨ Netofàt, ²⁹ɨ jaŋtɨ kɨmɨ ghelɨ ghɨ yemnɨ a ntèʼ Bet Gilgàl nɨ̀ mɨ̀ntèʼtɨ̂ mzɨ̀ a mɨ̀ n-ghɨ a Gebà nɨ̀ ɨ ghɨ Azmavèt. A nà n-ghɨ tì ma ghelɨ ghɨ yemnɨ baʼlɨ meyn ntèʼsɨ àŋena a mbæ̀sɨ Jèlusalèm. ³⁰À nà n-ghɨ ta àŋena gvì a Jèlusalèm, ngàŋsɨ ndô Fɨyinisɨ nɨ̀ ghelɨ ndo nɨ̀ Levì ghɨ li ɨ lèm ngeŋsɨ àŋena sɨ a asɨ sɨ nà layn ta isaʼi nɨn dyêyn, ɨ kæ lem ghelɨ ghɨ li na ghɨ na layn ta isaʼi nɨn dyêyn, ɨ lem kɨmɨ àchfɨ̂ a mbàyn baʼsɨ̂ nɨ̀ mbàyn sɨ a nyɨŋ ta isaʼi nɨn dyêyn.

³¹Àŋena nɨ̂n nì tî, ma bè ghelɨ ghì a ghɨ n-tisɨ Judà ɨ koʼ timi atû mbàyn, ma choʼ inôyn i ghelɨ ghɨ yemnɨ ì bò ili nà yem ndû dzɨ abàs ɨkœ ɨ two ɨchfɨ mbàyn ghè a ghɨ n-toŋtɨ̂ na Ɨchfɨ Mbàyn ìlɨ̀ŋ. ³²Hòshayà ŋêyn ghelɨ ghɨ tisɨnɨ ghɨ li a Judà ɨ ndû a àŋena ibàm, ³³baʼsɨ̂ nɨ̀ Àzalìyà nɨ̀ Ezlà nɨ̀ Meshulàm, ³⁴kɨ̀mɨ nɨ̀ Judà nɨ̀ Benjamìn ŋêyn Shèmayà nɨ̀ Jèlìmayà. ³⁵Ngàŋsɨ ndô Fɨyini sɨ lisɨ nà ndû a àŋena ibàm toŋ tɨ̀soŋ, Zèkàliyà ɨ kûmtɨ̀ a àŋena ibàm. Zèkàliyà nà n-ghɨ wâyn Jònatàn, Jònatàn ɨ ghɨ wâyn Shèmayà, Shèmayà ɨ ghɨ wâyn Mètanìyà, Màtànayà ɨ ghɨ wâyn Mìkayà, Mìkayà ɨ ghɨ wâyn Zakùl, Zakùl ɨ ghɨ wâyn Asàf, ³⁶baʼsɨ̂ nɨ̀ ghelɨ ndo nɨ̀ Levì ghɨ li ɨ Shèmayà ŋêyn Azalèl nɨ̀ Milalày kɨ̀mɨ nɨ̀ Gilalày nɨ̀ Mây ŋêyn Nètanèl nɨ̀ Judà baʼsɨ̂ nɨ̀ Hànanì. Àŋena nà n-kelɨ ɨ̀fwo ɨ buʼnɨ̀ vzɨ̀ a Devìt ɨ wul Fɨyini nɨn læ bè na ghɨ na buʼa. Àŋena nà n-ndu-à a tisɨ̂ Ezlà ɨ wul ɨ̀ nyaʼnɨ. ³⁷Àŋena jèl ɨ ndu chem ɨchfɨ mbàyn ghè a jvà nɨ̀n fvɨ̂ a ngùŋ àteyn ɨ koʼ kɨ àtì-ati a mbaŋisɨ afî a sɨ n-koʼ a Ntèʼ nɨ̀ Devìt. Àŋena nɨn jèl atû mbàyn nâ ghàyn ɨ ndu chwò atû ntoʼ nɨ̀ Devìt ɨ ndù abàs ɨchfɨ mbàyn ghè a ghɨ n-toŋtɨ̂ na ɨchfɨ mbàyn mù abàs ghè a ɨchfɨ-iyvɨ i nɨn sal ateyn.

³⁸Anôyn a ghelɨ ghɨ yemnɨ a li-a kì nà n-ndû dzɨ abàs ɨkœ nɨ̂nkœ̀ jelɨ̀ atû mbàyn nâ ghàyn, ma ndû a àŋena ibàm baʼsɨ̂ nɨ̀ ghelɨ ghɨ li ghì ɨ ndu chwò ndo ì dyefɨnɨ zɨ̀ a ghɨ n-nyôʼ abayn a kfaŋ ateyn ɨ ndu chem azɨ a mbàyn a ghaʼnɨ-a. ³⁹Ghès nɨ̂n lù afu ɨ ndu chwò ɨ̀chfɨ mbàyn Eflèm nɨ̀ ɨ̀chfɨ mbàyn Jeshanà ɨ chwò ɨ ndù ɨchfɨ mbàyn sfɨ̀sɨ ɨ fi chwò abaŋ a nchì a li-a ghɨ toŋtɨ̂ na Hananèl nɨ̀ abaŋ a nchì kì a nchìsɨ nî sɨ nà duʼ ateyn ɨvɨ. Àŋena nɨn jèl ɨ ndu gòʼsɨ̀ ɨchfɨ mbàyn nchì.

⁴⁰Inôyn i ghelɨ ghɨ yemnɨ zɨ̀ ì bò a yi nà n-yem fu àyòŋnɨ̀ sɨ̂ Fɨyini fɨ ɨ zɨ a ndo Fɨyini ɨ timi ɨlwèʼ nɨ̀ àŋena. Ghesɨ̀ ghelɨ ghɨ tisɨnɨ ghɨ li ɨ boŋ zɨ, ⁴¹baʼsɨ̂ nɨ̀ ngàŋsɨ ndô Fɨyinisɨ ɨ Eliyakìm nɨ̀ Maseyà nɨ̀ Miniyamìn nɨ̀ mìkayà kɨmɨ nɨ̀ Eliyonày nɨ̀ Zèkàliyà baʼsɨ̂ nɨ̀ Hànànayà, àŋena ghɨ nɨ̀ tɨ̀soŋ tɨ àŋenatɨ. ⁴²Maseyà nɨ̀ Shèmayà nɨ̀ Elezà nɨ̀ Uzì kɨmɨ nɨ̀ Jèhòhanàn nɨ̀ Malkijà nɨ̀ Elàm baʼsɨ̂ nɨ̀ Ezà nà n-ti kɨmɨ afu. Àŋena nà n-yema a tisɨ̂ Jèzlàhayà. ⁴³À nà n-ghɨ achi nâ ghè, ghɨ fu tɨfu nô sɨ idvɨ̀. Ghelɨ nà fu-a n-saŋlɨ̂ à bòm ta Fɨyini fɨ ni meyn na àŋena na saŋlɨ̂ nô sɨ a ŋaŋ. Ghɨ nà n-saŋlɨ-à ghɨ̀ki nɨ̀ woynda ɨ boŋ saŋlɨ-à. Àŋena nà n-saŋlɨ a Jèlusalèm ghɨ yvɨ gyasɨ àŋena nô a ndyèyn.

Ghɨ fu ɨfwo sɨ̂ ghelɨ ghì a ghɨ n-felɨ̀ a ndô Fɨyini

⁴⁴À n-læ nà ghɨ achi nâ ghè ghɨ choʼtɨ ghelɨ na àŋena na tôʼnɨ̀ nɨ̀ ndo sìsɨ̀ a ghɨ n-gvî nɨ̀ tɨ̀fu tɨ ghɨ lèm ateyn. Ghelɨ ɨ nà sɨ gvì nɨ̀ mɨ̀tam mɨ̀ àsɨ baʼsɨ̂ nɨ̀ àfo àmòʼ àmòʼ antêynɨ̀ ɨ̀fwo ìvɨm fu-a àŋena lêm a ndosɨ nâ ghè. Ghelɨ Isìlæ̀ na kelɨ sɨ nà kfî ɨfwo ɨ yɨnɨ a gvêynsɨ̀ ghê a ngùŋ ntèʼsɨ ghɨ gvì nɨ̀ ɨvzɨ̂ a isaʼi nɨn dyêyn na ghɨ na fu sɨ̂ ngàŋsɨ ndô Fɨyini nɨ̀ ghelɨ ndo nɨ̀ Levì ɨ lèm a ndosɨ afî a ghɨ n-lêm ɨfwo ateyn. Nô ghelɨ Judà ghɨ̀ jɨ̀m nà n-saŋlɨ̂ kûm ìfêl zɨ̀ a ngàŋsɨ ndô Fɨyinisɨ nɨ̀ ghelɨ ndo nɨ̀ Levì nɨn nî. ⁴⁵Àŋena nà n-nî ìfêl i Fɨyini fɨ àŋena, nî na ghelɨ na layn ta isaʼi nɨn dyêyn. Ghelɨ ghɨ yemnɨ nɨ̀ ghelɨ ghì a ghɨ n-chi achfɨ̂ a mbàyn ɨ nî kɨmɨ ìfêl i àŋena kɨ̀ ighel ta Devìt ŋêyn wâyn ŋweyn Sòlomòn nɨn læ be na àŋena na ni-à. ⁴⁶À nà n-ghɨ ɨtuʼ nɨ̀ fòyn Devìt ŋêyn Asàf ɨ bò njàŋsɨ, a ghelɨ nɨn zɨ̀tɨ sɨ nà tisɨ ghelɨ ghɨ yemnɨ ghì a ghɨ n-nà n-yem njàŋsɨ̀ fu àyòŋnɨ̀ koʼsɨ̂ Fɨyini. ⁴⁷A nà ghɨ ɨtuʼ nɨ̀ Zèlubàbêl ŋêyn Nèhèmayà, ghelɨ Isìlæ̀ nô ghɨ̀ jɨ̀m ɨ nà fu ɨ̀fwo ɨ yɨnɨ sɨ̂ ghelɨ ghɨ yemnɨ nɨ̀ nchìsɨ achfɨ̀ a mbàyn kɨ̀ mɨchi ɨ̀n jɨ̀m. Àŋena nà n-fu kɨmɨ àfo àmòʼ antêynɨ̀ ɨ̀fwo ivɨ̀m sɨ̂ ghelɨ ndo nɨ̀ Levì, ghelɨ ndo nɨ̀ Levì ɨ fu alêʼ àmòʼ antêynɨ̀ ɨ̀fwo ìvɨ̀m sɨ̂ ngàŋsɨ ndô Fɨyini ɨ woyn Alòyn.