Nehemiah 2

Nèhèmayà ɨ ndù a Jèlusalèm

¹À n-læ nà ghɨ a njôŋ Nisàn ma fòyn Atazezès sɨ ghɨ achɨ sɨ a bèŋ mɨ̀vɨm ɨ̀m bò, ghɨ gvì nɨ̀ mɨ̀lùʼ sɨ̂ fòyn, ma wetɨ ɨ̀n lì a bom ɨ fu sɨ̂ ŋweyn. À nà n-ghɨ tì bula ma timi tàŋsɨ̀ ìkêʼ asɨ nɨ̀ fòyn. ²Fòyn ɨ yeyn tî ɨ bɨf sɨ̂ mà na, “Wà n-koynsɨ̂ kêʼ tèyn bòm ghà koʼî wì a? Iwo i nɨn fu ngeʼ a wa ikfàʼtɨ̀.”

Fòyn nɨn taŋi tî, ma nà fâyn nô sɨ a ŋaŋ, ³ɨ kæ be sɨ̂ fòyn na, “Mbæ̀, ɨfôyn va faŋ meyn kɨ̀ samoʼ, mà kàʼ ma bû faŋ tɨ̀ nà koynsɨ̂ keʼà ma ghɨ bebsɨ meyn ntèʼ zɨ̀ a ghɨ gvɨ̀mi ghɨ̀bo ghem ateyn fì nyòʼ àchfɨ̂ a mbàynsɨ̀ ateyn a?”

⁴Fòyn ɨ bɨf sɨ̂ mà na, “Wà n-kɨŋ na mà ni gha sɨ̂ và a?

Ma kæ jem sɨ̂ Fɨyini fìfɨ̀ a fɨ n-ghɨ iyvɨ, ⁵ɨ bè sɨ̂ fòyn na, “Wà kæ nà kèlɨ àtem a juŋà sɨ̂ mà ɨ wul ɨ̀ felɨnɨ nɨ̀ và a mbæ̀, nà koŋa, wa bè mà kfa ndù a Judà alèʼ ghè a tɨsêtɨ ghɨ̀bo ghem nɨn ghɨ ateyn ɨ̀ kasi bàʼlɨ̀ ntèʼ àteyn.”

⁶Fòyn ɨ kæ bɨf sɨ̂ mà na, “Wa n-ndù chi chem ti a? Wà læ̀ kasî gvî ɨtuʼ gha? Ma fèʼtɨ̀ ɨ̀lvɨ vzɨ̀ a ka mà kasi gvì ateyn Fòyn ɨ bɨmi na mà ndu. Wu nà n-taŋî tì wî ntoʼ ɨ duʼ a ŋweyn a ngùŋ.

⁷Ma fi bè sɨ̂ fòyn na, “Wà kæ nà kòŋà a mbæ̀, wa fu ŋwàʼlɨ̀sɨ sɨ̂ mà, mà ndu fù sɨ̂ ɨ̀tu vzɨ̀ a wu n-saʼ ɨbyâs ilaʼ injɨyn i jvâ Yuflèt ta ka àŋena visi a mà chwo ndù a Judà. ⁸Fu kɨmɨ ŋwàʼlɨ̀ mà ndu fù sɨ̂ Asàf ɨ wul ɨ vzɨ̀ a wù n-tôʼnɨ nɨ̀ àku a fòynà wù fu ɨnkâʼ ghɨ faytɨ achfɨ̂ a mbàyn àlèʼ a nchì kì a kɨ n-ghɨ a ngùŋ ndo Fɨyini nɨ̀ mbàyn ntèʼ kɨ̀mɨ nɨ̀ ndo zɨ̀ a ka mà na chi ateyn. Fòyn ɨ nì nô mɨ ghà ta mà bɨf bòm ta Fɨyini fɨ nà n-kelɨ àtem a juŋà sɨ̂ mà.

Nèhèmayà ɨ baʼtɨ sɨ kasi sɨ bàʼlɨ mbàyn Jèlusalèm

⁹Mɨ n-læ se sɨ lù, fòyn ɨ fu ɨtu sugèyʼsɨ̀, nɨ̀ sugèyʼsɨ lisɨ sɨ jelɨ̀ atû nyamsɨ kfaŋ, ghesɨ̀ àŋena ɨ lù amoʼ. Ma ndu fu ŋwàʼlɨ̀ sìsɨ̀ a fòyn fu sɨ̂ ɨ̀tu vzɨ̀ a wu n-saʼ tɨlaʼ injɨyn i jvâ Yuflèt. ¹⁰A nà ghɨ ta Sànbalàt ɨ wul ɨ̀ Holòn, nɨ̀ Tòbayà ɨ wul ɨ̀ tisɨnɨ ilaʼ nɨ̀ ghelɨ Amòn yvɨ̀ na wùl ɨ̀ gvi meyn sɨ gàmtɨ ghelɨ Isìlæ̀, iwo ateyn i ɨ yaf àŋena nô sɨ a ŋaŋ. ¹¹Ma lù ɨ ndù a Jèlusalèm ɨ chi afu sɨ a mɨchi ɨ̀n tal. ¹²A ni nà ghɨ nɨ̀ntuʼ ma fvɨ̀ ghesɨ̀ ghɨ̀lûmnɨ̀ ghɨ li, bula ma fêʼtɨ̀ ìwo zɨ̀ sɨ̂ àŋena a Fɨyini femfɨ bè na mà ni a Jèlusalèm. Mɨ n-bu læ lì nyamsɨ abu kɨ njàkâs zɨ̀ a mɨ n-jelɨ̀ atu àteyn.

¹³Mɨ n-fvɨ̀ ɨchfɨ mbàyn ghè a yì n-ghɨ ibal ɨ ndu chwò dzɨ a ibɨ i mu i Jakàl ɨ fi ndu chwò ɨchfɨ mbàyn afî a ghɨ n-mâʼ ilɨŋ ateyn. Mɨ nà n-jelɨ̀ ki mbàyn Jèlusalèm zɨ̀ a yì bɨ̀ytɨ̀, nɨ̀ àchfɨ̂ ateyn a ta kɨ fɨ. ¹⁴Mɨ n-ki tî, ɨ lu ndù dzɨ a ɨchfɨ mbàyn afî a jvà nɨ̀n fvɨ̂ a ngùŋ àteyn ɨ fi ndu chem achɨ̀m nɨ̀ fòyn mɨtì dzɨ̀ ɨ nà falî sɨ̂ nyàm zɨ̀ a mɨ n-jelɨ̀ atu àteyn sɨ chwò. ¹⁵Ma fi lu kɨ nɨ̀ntuʼ ɨ jèl ibal i Kidlòyn, ki ndû kɨ nɨ̀ mbàyn àteyn, ɨ ni kasi gvì ɨ zɨ ɨchfɨ mbàyn afî a wu n-ghɨ ibal. ¹⁶À nà n-ghɨ tì ghelɨ ghɨ tisɨnɨ a ntèʼ nâ ghè ɨ kya wi na mà ndù wo a, kya wi mɨ ìwo zɨ̀ a mɨ n-nî. Mɨ nà n-bu duʼ tɨ̀ bè iwo sɨ̂ ghelɨ Jûsɨ̀ kèsa ngàŋsɨ ndô Fɨyini kèsa chyeʼsɨ nɨ̀ ghelɨ ghɨ tisɨnɨ baʼsɨ̂ nɨ̀ ghelɨ ghɨ li ghì a ghɨ n-kelɨ sɨ nà nî ifêl ateyn.

¹⁷Ma kæ bè sɨ̂ àŋena na, “Yì yeyn ngeʼ zɨ̀ a ghesɨ̀nà nɨn ghɨ ateyn a. Ghɨ bebsɨ meyn Jèlusalèm ɨ̀ nyòʼ àchfɨ̂ a mbàyn àteyn. Yì gvi ghesɨ̀na kasi bàʼlɨ̀ mbàyn Jèlusalèm ɨ̀ lìsì ìwumi sɨ a ghesɨ̀nà atu.” ¹⁸Mɨ n-bè tî ɨ fèʼtɨ̀ àwo a juŋà kì sɨ̂ àŋena a Fɨyini fɨ nì sɨ̂ mà ɨ fi fèʼtɨ̀ àwo kì a fòyn tî bè sɨ̂ mà.

Àŋena bè na, “Ghesɨ̀nà zɨtɨ sɨ nà kasi baʼlɨ ntèʼ àteyn. Àŋena kæ zɨ̀tɨ ifêl i juŋì nâ yèynì.

¹⁹Mɨtì a nà ghɨ ta Sanbalàt ɨ wul ɨ̀ Holòn nɨ̀ Tòbayà ɨ wul ɨ̀ tisɨnɨ nɨ̀ ghelɨ Amòn, nɨ̀ Geshèm ɨ wul ɨ̀ Alàb, yvɨ iwo zɨ̀ a ghès nɨn kɨŋ sɨ nì, àŋena nà wêsɨ̀-à fî chyeʼtɨ-à bɨf nâ, “À n-ghɨ ghà nâ wèyn a yi n-kɨŋ sɨ nì a? Yi n-kɨŋ sɨ dyèyn atu a tonɨ-a sɨ̂ fòyn ma?”

²⁰Ma bè sɨ̂ àŋena na, “Fɨyini fìfɨ̀ a fɨ n-ghɨ iyvɨ nɨn ngamtɨ̀-à a ghès ɨ ghelɨ ghɨ felɨnɨ nɨ̀ ɨ̀nfeynfɨ ni ifêl ateyn. Mɨtì sɨ̂ zɨ̀ yi n-kelɨ wi afo a ngeŋ nɨ̀ zɨ̀ a Jèlusalèm, kelɨ wi adyaʼ a li-a atû àfo kèsa atû ìwo a ndô Fɨyini a Jèlusalèm.”