Nehemiah 3
Nèhèmayà
Ghɨ kasi bàʼlɨ̀ mbàyn Jèlusalèm
1Ɨghêyn nɨn ghɨ ghelɨ ghì a ghɨ n-læ kasi bàʼlɨ̀ mbàyn Jèlusalèm. Elìyashìb ɨ ngàŋ ndô Fɨyini i ngaŋtɨnɨ ŋêyn ngàŋsɨ ndô Fɨyini sɨ lisɨ nɨn læ meyn kasi bàʼlɨ̀ ɨ̀chfɨ mbàyn vzɨ̀ a ghɨ nà n-toŋtɨ na ɨchfɨ mbàyn njɨ̀sɨ̀ ɨ ghaŋsɨ ɨ̀bwâʼ ateyn. Àŋena nɨ̂n bàʼlɨ mbàyn ateyn ɨ ndu chem abaŋ a nchì ghè a nchìsɨ nî sɨ nà duʼ ateyn ɨvɨ ɨ fi ndu chem abaŋ a nchì a li-a ghɨ toŋtɨ̂ na Hananèl. Àŋena nɨ̂n bàʼlɨ tî ɨ lèm sɨ a nyɨŋ sɨ̂ Bôbo Fɨyini. 2Ghelɨ ghì a ghɨ n-bàʼlɨ baʼsɨ sɨ̂ Elìyashìb nà n-ghɨ ghelɨ Jèliko. Zakù ɨ wâyn Imlì ɨ bàʼlɨ̀ baʼsɨ a ngùŋ nɨ̀ ghelɨ Jèlikò nâ ghì.
3Woyn Hasenà nɨn læ kasi bàʼlɨ ɨchfɨ mbàyn vzɨ̀ a ghɨ nà n-toŋtɨ na, Ɨchfɨ Mbàyn Sfɨ̀sɨ. Àŋena nɨn mbayn meyn ɨ̀nkâʼ ɨ ghaŋsɨ àchfɨ̂ ateyn, ɨ we ɨ̀nfò nɨ̀ mbàŋ sîsɨ̀ a ka ghɨ na fò ateyn. 4Melemòt ɨ wâyn Yulìyà ɨ kasi bàʼlɨ baʼsɨ sɨ̂ woyn Hasenà. Bò Yulìyà nà n-ghɨ Hakòz. Meshulàm ɨ wâyn Bèlèkayà nɨn bàʼlɨ baʼsɨ sɨ̂ Melemòt. Bò Bèlèkayà nà n-ghɨ Mèshezabèl. Zadòk ɨ wâyn Banà ɨ bàʼlɨ baʼsɨ sɨ̂ Meshulàm. 5Ghɨ̀lûmnɨ Tekowà nɨn bàʼlɨ baʼsɨ sɨ̂ Zadòk mɨtì ghelɨ ghɨ tisɨnɨ nɨ̀ àŋena ɨ leʼ na ghɨ n-fèlɨ̀ wì isas isaʼ nɨ̀ ghelɨ ghì a ghɨ n-kini ifêl ateyn.
6Jòyadà ɨ wâyn Basè nɨ̀ Meshulàm ɨ wâyn Bèsòdeyà nɨn læ kasi bàʼlɨ ɨchfɨ mbàyn ghɨ tôŋtɨ̂ na, ɨchfɨ mbàyn Jeshanà. Àŋena nɨn mbayn meyn ɨ̀nkâʼ ɨ ghaŋsɨ àchfɨ̂ ateyn, ɨ we ɨ̀nfò nɨ̀ mbàŋ sîsɨ̀ a ka ghɨ na fò ateyn. 7Ghɨ̀lûmnɨ Gibìyòn nɨ̀ ɨ ghɨ Mizbà ma à ti Mèlàtaya nɨ̀ Jadòn nɨn bàʼlɨ baʼsɨ sɨ̂ Joyadà ŋêyn Meshulàm. Mèlàtayà nà n-ghɨ wul ɨ̀ Gibìyòn, Jadòn ɨ ghɨ wul ɨ̀ Melonòt. Ɨlwêʼ nâ wèyn nà n-ghɨ isas isaʼ nɨ̀ wùl ɨ̀ vzɨ̀ a wù nà n-saʼ injɨyn i jvâ Yuflèt. 8Uzìyèl ɨ wul vzɨ̂ a wu nà n-tsɨ alâm ɨ kasi bàʼlɨ baʼsɨ sɨ̂ ghɨlûmnɨ Gibìyòn nɨ ɨ ghɨ Mizbà. Uzìyèl nà n-ghɨ wâyn Hàhayà. Hànànayà ɨ wul vzɨ̂ a wù nà n-faytɨ̂ mɨyisi ɨ̀nlɨ̀mtɨnɨ̂ ɨ bàʼlɨ̀ ɨ baʼsɨ a ngùŋ nɨ̀ Uzìyèl. Àŋena nɨn kasi bàʼlɨ mbàyn Jèlusalèm tì ɨ teyn visi àlêʼ kì a kɨ n-ndû chem alèʼ ghè a ghɨ n-toŋtɨ na Azɨ a mbàyn a ghaʼnɨ-a. 9Lefayà ɨ wâyn Hûl vzɨ̀ a wu nà n-saʼ abâs a Jèlusalèm a li-a ɨ bàʼlɨ̀ ɨ baʼsɨ sɨ̂ Uzìyèl. 10Jedayà ɨ wâyn Halumàf ɨ bàʼlɨ àlêʼ a mbàyn kɨ kêʼnɨ̀ ndô ŋweyn. Hatùsh ɨ wâyn Hashàbneyà ɨ kasi bàʼlɨ̀ ɨ baʼsɨ sɨ̂ Jèdayà. 11Malkijà ɨ wâyn Halìm ŋêyn Hashùb ɨ wâyn Bahat Mowàb ɨ bàʼlɨ̀ ɨ baʼsɨ sɨ̂ Jèdayà ɨ fi bàʼlɨ kfeynsɨ ndo ì dyefɨnɨ zɨ̀ a ghɨ n-nyôʼ abayn a kfaŋ ateyn. 12Shalùm ŋêyn woyn ŋweyn ghɨki nɨn kàsi bàʼlɨ baʼsɨ sɨ̂ Malkijà ŋêyn Hashùb. Shalùm nà n-ghɨ wâyn Halohèsh, a ghɨ kɨmɨ wùl ɨ vzɨ̀ a wu na n-tisɨ abâs a Jèlusalèm a li-a.
13Hanùn ŋêyn ghelɨ ghì a ghɨ n-chi a Zanowà ɨ kasi bàʼlɨ̀ ɨ̀chfɨ mbàyn vzɨ̀ a ghɨ nà n-toŋtɨ na ɨchfɨ mbàyn ìbàl. Àŋena nɨn bàʼlɨ tî ɨ ghaŋsɨ àchfɨ̂ ateyn, ɨ we ɨ̀nfò nɨ̀ mbàŋ sîsɨ̀ a ka ghɨ na fò ateyn. Àŋena nɨn baʼlɨ meyn kɨmɨ àlêʼ a mbàyn sɨ zɨ̀tɨ̀ ɨchfɨ mbàyn afî a ghɨ nà n-toŋtɨ na ɨchfɨ mbàyn ìbàl sɨ ndù sɨ chem ɨchfɨ mbàyn afî a ghɨ nà n-toŋtɨ̂ nà ɨchfɨ mbàyn ìlɨ̀ŋ. Alêʼ a mbàyn kì a àŋena nɨ̂n bàʼlɨ nà n-dyefɨ̀ chem ntàmsɨ̀ ighɨ ì kæ nɨ̀ ntàmsɨ̀ mɨ̀vɨm ɨ̀n tâyn. 14Malkijà ɨ wâyn Lekàb nɨ̀n læ kasi bàʼlɨ ɨchfɨ mbàyn vzɨ̀ a ghɨ nà n-toŋtɨ na ɨchfɨ mbàyn ìlɨŋ. Wu n-bàʼlɨ tî, ɨ ghaŋsɨ àchfɨ̂ ateyn, ɨ we ɨ̀nfò nɨ̀ mbàŋ sîsɨ̀ a ka ghɨ na fò ateyn. Malkijà nà n-ghɨ wul ɨ tisɨnɨ a Bet Hakelèm.
15Shalùm ɨ wâyn Kol-Hozè nɨ̀n læ kasi bàʼlɨ ɨchfɨ mbàyn vzɨ̀ a ghɨ nà n-toŋtɨ na ɨchfɨ mbàyn jvà, ɨ ghaŋsɨ àchfɨ̂ ateyn, ɨ we ɨ̀nfò, nɨ̀ mbàŋ sîsɨ̀ a ka ghɨ na fò ateyn. Wù n-baʼlɨ meyn kɨmɨ àzɨ a mbàyn kì a kɨ nà n-ghɨ a ngùŋ Àchɨ̀m a Silòm a mbæ̀ gvèyn nɨ̀ fòyn ɨ ndu chem a mbaŋisɨ afî a ghɨ n-fvɨ̂ a ntèʼ nɨ̀ Devìt ghɨ kàlì ateyn. Shalùm nà n-ghɨ wul ɨ tisɨnɨ a Mizbà. 16Nèhèmayà ɨ wâyn Azbùk nɨ̀n kàsi bàʼlɨ baʼsɨ sɨ̂ Shalùm. Wu n-bàʼlɨ ɨ ndu chem alèʼ kɨ kêʼnɨ̀ ngvɨ̀misɨ ghelɨ ndo nɨ̀ Devìt a Bet Zûl ɨ fi ndu chem achɨ̀m ma ghɨ kùʼ kuʼ ɨ ndu chem kɨmɨ alèʼ ghè a ghelɨ iwòŋ ghɨ bemnɨ nà n-chi ateyn. Nàhèmayà nà n-ghɨ wul ɨ tisɨnɨ abàs a Bet Zùl a li-a.
17Ghelɨ ndo nɨ̀ Levì nɨn læ bàʼlɨ baʼsɨ sɨ̂ Nèhèmayà, a tisɨ̂ Lehùm ɨ wâyn Banì. Hàshàbayà vzɨ̀ a wu nà n-tisɨ abâs a Kelà a li-a ɨ kasi bàʼlɨ baʼsɨ sɨ̂ ghelɨ ndo nɨ̀ Levì. Wù n-læ bàʼlɨ alèʼ a mbàyn kì a ghelɨ ntèʼ nɨ̀ ŋweyn nà n-kelɨ sɨ bàʼlɨ̀. 18Binyuè ɨ wâyn Henadàd nɨ̀n læ meyn tisɨ ghelɨ ntèʼ nɨ̀ ŋweyn ghɨ bàʼlɨ baʼsɨ sɨ̂ Hàshàbayà ŋêyn Lehùm. Binyuè nà n-tisɨ̂ àbâs a Kelà a li-a kì. 19Ezà ɨ wâyn Jeshùwà nɨ̂n kàsi bàʼlɨ baʼsɨ sɨ̂ Binyuè. Wù n-læ kasi bàʼlɨ alêʼ a li-a zɨ̂tɨ̀ alèʼ kɨ kêʼnɨ̀ mbaŋi sìsɨ̀ a sɨ n-koʼ ndù alèʼ ghè a ghɨ n-lêm ɨfwo iwòŋ ateyn ɨ ndu chem alèʼ ghè a mbàyn ngòl ateyn. Ezà nà n-ghɨ wul ɨ tisɨnɨ a Mizbà. 20Balùch ɨ wâyn Zabày nɨn bàʼlɨ baʼsɨ a ngùŋ nɨ̀ Ezà zɨ̂tɨ̀ kɨ alèʼ ghè a mbàyn ngol ateyn sɨ ndu sɨ chem a dzɨ afî a yì n-zɨ a ndo nɨ̀ Elìyashìb ɨ ngàŋ ndô Fɨyini i ngaŋtɨnɨ. 21Melemòt ɨ wâyn Yulìyà nɨ̀n fi meyn bàʼlɨ baʼsɨ sɨ̂ Balùch, zɨ̂tɨ̀ a dzɨ ta yì n-zɨ a ndo nɨ̀ Elìyashìb sɨ ndù sɨ chem alèʼ ghè a yì gòʼsɨ ateyn. Yulìyà nà n-ghɨ wâyn Hakòz.
22Ngàŋsɨ ndô Fɨyini sìsɨ a sɨ nà n-ghɨ abàs ilaʼ nâ ghè nɨ̂n bàʼlɨ baʼsɨ sɨ̂ Melemòt. 23Ngàŋsɨ ndô Fɨyinìsɨ̀ nɨn bàʼlɨ tî, Benjamìn ŋêyn Hashùb ɨ kasi bàʼlɨ̀ ɨ baʼsɨ sɨ̂ àŋena. Azalìyà ɨ bàʼlɨ̀ a ngùŋ ndo nɨ̀ ŋweyn baʼsɨ̂ sɨ̂ Benjamìn. Azalìyà nà n-ghɨ wâyn Maseyà, Maseyà ɨ ghɨ wâyn Ananìyà 24Binyuè ɨ wâyn Henadàd nɨn fi meyn kasi bàʼlɨ zɨ̂tɨ̀ a ndo nɨ̀ Azalìyà ndû chem alèʼ ghè a mbàyn ngol ateyn fî ndû chem ibvɨ i mbàyn. 25Balàl ɨ wâyn Uzày ɨ bàʼlɨ̀ àlêʼ kɨ kêʼnɨ̀ àlêʼ kì a mbàyn n-gòl ateyn kêʼnɨ̀ kɨmɨ àbaŋ a nchì kì a kɨ nà n-ghɨ atû ntoʼ a ngùŋ àlèʼ ghè a nchìsɨ̀ nɨn chi ateyn. Bèdayà ɨ wâyn Balòsh, 26ŋêyn ghelɨ ghɨ felɨnɨ ndô Fɨyini ghì a ghɨ nà n-chɨ a kfɨ̂yn Ofèl ɨ bàʼlɨ̀ ɨ baʼsɨ sɨ̂ Balàl ɨ ndu dzɨ abàs ghè a ɨchfɨ̂-iyvɨ nɨn sal ateyn ɨ ndu chem asɨ ɨchfɨ mbàyn afî a ghɨ n-toŋtɨ na ɨchfɨ mbàyn mù a ngùŋ àbaŋ a nchì. 27Bèdayà ŋêyn ghelɨ ghɨ felɨnɨ ndô Fɨyini nɨn læ bàʼlɨ tî, ghɨ̀lûmnɨ Tekowà ɨ kasi bàʼlɨ baʼsɨ sɨ̂ àŋena zɨ̂tɨ̀ abaŋ a nchì sɨ ndù sɨ chem azɨ a mbàyn ghè a ghɨ nà n-toŋtɨ na azɨ a mbàyn Ofèl.
28Ngàŋsɨ ndô Fɨyinisɨ̀ nɨn læ bàʼlɨ abàs ikuè ɨ chfɨ mbàyn ghè a ghɨ nà n-toŋtɨ̂ na ɨchfɨ mbàyn Nyàm kfaŋ nô mɨ ndà ɨ bâʼlɨ̀ kɨ àlêʼ kì a kɨ kèʼnɨ̀ ɨchfɨ ndo nɨ̀ ŋweyn. 29Àŋena nɨ̂n bàʼlɨ tî, Zadòk ɨ wâyn Imà ɨ kasi bàʼlɨ̀ ɨ baʼsɨ sɨ̂ àŋena alèʼ kɨ kêʼnɨ̀ ndô ŋweyn. Shèmayà nɨ̀n baʼlɨ meyn baʼsɨ a ŋweyn a ngùŋ. Wù nà n-ghɨ wul ɨ vzɨ̀ a wù n-chi ɨchfɨ mbàyn abàs ghè a ɨchfɨ-iyvɨ i nɨn sal ateyn. Shèmayà nà n-ghɨ wâyn Shèkànayà. 30Shèmayà nɨ̀n læ bàʼlɨ tî, Hànànayà ɨ wâyn Shèlèmayà ŋêyn Hanùn ɨ kasi bàʼlɨ̀ ɨ baʼsɨ sɨ̂ ŋweyn. Hanùn nà n-ghɨ wâyn Zalàf, ma ghɨ bzɨ ŋweyn ibàm nɨ̀ ghelɨ ghɨ̀ tâyn. Meshulàm ɨ wâyn Bèlèkayà nɨ̀n fi meyn baʼlɨ baʼsɨ sɨ̂ àŋena, alèʼ kɨ kêʼnɨ̀ ntèʼ zɨ̀ a wu nà n-chi ateyn. 31Malkijà ɨ wul àlâm ɨ kasi bàʼlɨ baʼsɨ sɨ̂ Meshulàm ɨ ndu chem a ndo ghè a ghelɨ ghɨ felɨnɨ ndô Fɨyini nɨ̀ ghelɨ mbèʼìnkùm nà n-chi ateyn. Alêʼ ateynà nà n-kêʼnɨ̀ ɨ̀chfɨ mbàyn vzɨ̀ a ghɨ nà n-toŋtɨ̂ na ɨchfɨ mbàyn Mifkàd sɨ ndù sɨ chem a ndo ìyvɨ̀ afî a yì n-ghɨ ibvɨ i mbàyn. 32Ghelɨ alàm nɨ̀ ghelɨ mbèʼìnkùm nɨn fi meyn kasi bàʼlɨ̀ àlêʼ sɨ zɨ̀tɨ̀ ibvɨ i mbàyn sɨ ndù sɨ chem alèʼ ghè a ghɨ nà n-toŋtɨ̂ na ɨchfɨ mbàyn njɨ̀sɨ̀.