Nehemiah 4

Fɨyini fɨ ɨ bebsɨ ìfêl i mbàynɨ̀sɨ̀

¹À nà n-ghɨ ta Sànbalàt yvɨ na ghesɨ̀ sɨ kasî bâʼlɨ̀ mbàyn Jèlusalèm, ɨtoŋ ŋweyn ɨ yaf nô sɨ a ŋaŋ, wu nà sɨ wêsɨ̀ ghelɨ Jûsɨ̀, ²asɨ nɨ̀ ghelɨ ŋweyn nɨ̀ sugeyʼsɨ Sàmalìyàsɨ̀ bɨfɨ na, “Mɨ̀ngvɨ̂ytɨ mɨ̀ ghelɨ Jûsɨ̀ mèyn ti n-mômsɨ̀ sɨ ni gha? A àŋena ti n-kfâʼtɨ̀ na ghɨ n-fu tɨ̀fu a Fɨyini fɨ àŋena fɨ ni a àŋena kasi bàʼlɨ̀ mbàyn Jèlusalèm kɨ̀ achi à mòʼa? Àŋena nɨn lì wo ngòʼsɨ̀ ma ɨvɨsɨ nyoʼ meyn ɨ̀ bèbsɨ ɨsîsɨ̀ a ghɨ tî bàʼlɨ̀ ateyn a?”

³Tòbayà ɨ wul ɨ̀ Amòn nà n-ti a ngùŋ nɨ̀ Sanbalàt ɨ bɨfɨ na, “Àŋena nɨn laʼì nô na ghɨ n-bâʼlɨ̀ ghà nɨ̀ ngòʼsɨ̀ ma à kæ koʼ kɨ fɨ̀gɨ̀ ateyn a kɨ bɨsa kɨ̀ bɨsa?”

⁴Ma nà sɨ jemà bê na, “Yvɨ ta ghelɨ ghèyn nɨn wêsɨ̀ ghes fî bê àwo a yafɨnɨ-a sɨ̂ ghès a Fɨyini feyfɨ, ni itaŋi i yafɨnɨ ɨ nɨ̀ àwo nâ kèynà a àŋena nɨn wesɨ ghes ateyn tèyn kasi fe atu nɨ̀ àŋena. Fu àŋena sɨ ɨfwo iwòŋ sɨ̂ ìlaʼ atum i a Fɨyini fɨ. ⁵Ka n-lèsɨ̀ fù mbɨ àŋena. Àŋena nɨn bê àwo a bɨ-a kûm và asɨ nɨ̀ ghelɨ ghì a ghɨ n-bâʼlɨ.

⁶Mɨ n-jèm tî ghès ɨ faŋ ɨ nà bâʼlɨ kɨ baʼlɨ, ɨ bàʼlɨ̀ yi koʼ ɨ tèmnɨ̀ bòm ta ghelɨ nà n-felɨ̀ kɨ nô nɨ̀ àtem a àŋena à jɨ̀m à.

⁷A nà ghɨ ta Sànbalàt nɨ̀ Tòbayà ŋêyn ghelɨ Alàb nɨ̀ ɨ ghɨ Amòn baʼsɨ̂ nɨ̀ ɨ ghɨ Ashdòd yvɨ na abâʼlɨ̀ a mbàyn Jèlusalèm kì nɨn ndû kɨ asɨ, ghɨ fêyntɨ̀ ndû nɨ̀ ɨ̀ywemi vzɨ̀ a wu tî nà ghɨ ateyn, iwo ateyn i ɨ yaf àŋena nô sɨ a ŋaŋ. ⁸Àŋena kæ kul mɨ̀nàŋ nô ghɨ̀ jɨ̀m na ghɨ n-gvì nû tâysɨ̀ ìwo zɨ̀ a ghès nɨn nî a Jèlusalèm. ⁹Ghès ɨ jèm sɨ̂ Fɨyini feyfɨ ɨ lèm ghelɨ na ghɨ na chì ghès nɨ̀nchuè chî nɨ̀ntuʼ.

¹⁰Ghelɨ Judà ɨ yem a gyâ njàŋ na, “Ghelɨ ghɨ felɨnɨ bolɨ meyn, ɨbweʼlɨ ɨfwo vzɨ̀ a wu n-ghɨ sɨ lìsì ɨ dvɨ̂ chwôsɨ̀-a. A ghès ti kàʼ a ghɨ baʼlɨ-a?”

¹¹A ghɨ tì mbàynɨ̀ seysɨ ɨ bê sɨ̂ àŋena ngeŋsɨ na, “Àŋena nɨn bɨytɨ̂ àsɨ, ɨ̀ se sɨ yàsì ma ghèsɨ̀ gvɨtɨ meyn fvɨ̀ ɨ̀ zuètɨ àŋena, a ifêl ateyn i timi.”

¹²Ghelɨ Jûsɨ̀ ghì a ghɨ n-chi baʼsɨ sɨ̂ mbàynɨ̀ seysɨ ɨ kæ gvì sɨ nà be-à fî kûmtɨ̀ sɨ̂ ghès na, “Mbàynɨ̀ seysɨ baʼtɨ meyn sɨ nu ghes kɨ̀ ɨbyâs ɨ̀ jɨ̀m.”

¹³Ma kæ fu mɨ̀nyuè nɨ̀ àwoŋa nɨ̀ mɨ̀nchya sɨ̂ ghelɨ sɨ lèm sɨ ndù nɨ̀ àŋena ɨlwèʼ ghè a ghɨ nà n-bu duʼ tɨ̀ kòʼsɨ. Mɨ n-lem kɨ asas a ndosɨ asas a ndosɨ. ¹⁴Ma yeyn ta iwo ateyn i nɨn fu ngeʼ ɨ bè sɨ̂ ghelɨ ghɨ tisɨnɨ nɨ̀ ghelɨ ghɨ li na, “Yì na kya na Bôbo Fɨyini nɨn ngaŋtɨ-à, kelɨ àdyaʼ a bɨmnɨ-a. Yì nu sɨ̂ woynà ghì ɨ̀ nù sɨ̂ woyn ghi ghɨ lûmnɨ̀ nɨ̀ ghɨki nɨ̀ ghɨ̀ki ghi ɨ̀ nù sɨ̂ ghelɨ ndo nɨ̀ zɨ̀.”

¹⁵A nà ghɨ ta mbàynɨ seynsɨ yvɨ na ghèsɨ keli meyn mɨ̀nàŋ mzɨ̂ a àŋena kul, ɨ yeyn na Fɨyini fɨ bebsɨ meyn ìwo zɨ̀ a àŋena tî nà baʼtɨ-à, ghès ɨ kasi ndù alèʼ abàʼlɨ̀, nô mɨ ndà ɨ timi kɨ alèʼ ghè a wù tî nà felɨ̀ ateyn.

¹⁶Sɨ zɨ̀tɨ achi nâ ghè, ma gwòtɨ̀ ghelɨ ghɨ felɨnɨ nɨ̀ mà ghɨ li nà bâʼlɨ̀-à, ghɨ li chî ghelɨ ghɨ felɨnɨ ma ghɨ maʼ meyn ndzɨsɨ ma ghɨ faytɨ nɨ̀ àkas a ɨ̀ ghal awoŋ nɨ̀ mɨ̀nchya. Ghelɨ ghɨ tisɨnɨ ɨ timɨ kɨ ibàm nɨ̀ ghelɨ Judà, ¹⁷ghì a ghɨ nà n-baʼlɨ mbàyn àteyn. Ghelɨ ghì a ghɨ nà n-li fu ɨfwo abàʼlɨ̀, nà n-felɨ̀ nɨ̀ àwu à mòʼa, ghal àfo iwòŋ nɨ̀ a li-a. ¹⁸Nô mɨ wul ɨ̀baʼlɨnɨ ɨ̀ kfà nà n-se sɨ fèl wu kulɨ fɨ̀nyuè a ŋweyn a kuʼtɨ. Mɨtì wùl ɨ̀ vzɨ̀ a wù n-kelɨ sɨ toŋ isoŋ ɨlvɨ ta mbàynɨ̀sɨ̀ nɨn gvî ɨ ti a ma ngùŋ.

¹⁹Ma kæ be sɨ̂ chyeʼsɨ nɨ̀ ghelɨ ghɨ tisɨnɨ baʼsɨ̂ nɨ̀ ghelɨ ghɨ li na, “Mbàyn yèyn nɨ̀n dyêf nô sɨ a ŋaŋ wùl ɨ ti baʼsɨ̂ wì sɨ̂ wul ɨ̀ lvɨ̀. ²⁰Wùl ɨ̀ kæ yvɨ ta ghɨ tòŋ isoŋ ghɨ nô mɨ wo, wu nyɨŋ gvì alèʼ ghè a ghès nɨn ghɨ ateyn. Fɨyini fɨ ghesɨ̀nàfɨ nɨn nù ìwoŋ ateyn sɨ̂ ghesɨ̀nà.”

²¹Ghèsɨ nà n-zɨtɨ̀ ìfêl nɨ̀ bɨsì bɨsì ɨtuʼ nî jɨ ghèsɨ kæ kfa. Ghèsɨ nà n-felà ghelɨ ghɨ li ɨ ghɨ kɨ a nchì ma ghɨ ghalɨ meyn àwoŋ. ²²Ma be sɨ̂ ghelɨ nô ghɨ jɨ̀m na, “Yi n-jôf na nô mɨ ndà na chî kɨ a Jèlusalèm ŋêyn wùl ɨ̀ felɨnɨ nɨ̀ ŋweyn ta ka ghɨ lem ghelɨ a ghɨ na ghɨ nchìsɨ̀ nɨ̀ntuʼ, felɨ̀ nɨ̀nchuèʼ.” ²³A nà n-ghɨ ta ghɨ n-baʼlɨ mbàyn àteyn, ma kfâ chî kɨ nɨ̀ ndzɨsɨ felɨnɨsɨ ghesɨ̀ woynà ghem nɨ̀ ghelɨ ghɨ felɨnɨ baʼsɨ̂ nɨ̀ ghelɨ nchì nô mɨ ndà ɨ ghɨ kɨ nɨ̀ ìwoŋi awu nô mɨ ɨlvɨ ta wù n-ndû sɨ tu mu.