Nehemiah 8

¹Àŋena nɨn yvɨŋtɨ meyn ɨchfɨ ayisɨ ɨchfɨ mbàyn ghè a ghɨ nà n-toŋtɨ na ɨchfɨ mbàyn mu ɨ timi kɨ ɨchfɨ̂ ɨ̀mòʼ, ɨ bè sɨ̂ Ezlà ɨ ndèynsɨ̀ ìsaʼ na wù li gvì nɨ̀ ŋwàʼlɨ̀ ìsaʼ nɨ̀ Mosìs zɨ̀ a Fɨyini fɨ nɨn læ fu sɨ̂ ghelɨ Isìlæ̀.

²Àŋena nɨn bè tî, a nà ghɨ achi a kɨ asɨ-a a njoŋsɨ nsòmbo, Ezlà ɨ ngàŋ ndô Fɨyini ɨ lì ŋwàʼlɨ̀ ìsaʼ nâ zɨ̀ ɨ timi asɨ nɨ̀ ghelɨ nâ ghì. Ghɨ̀lûmnɨ̀ nà n-ghɨ afu nɨ̀ ghɨ̀ki nô mɨ nɨ̀ nda vzɨ̂ a wù nà n-ghɨ ma wù lemtɨ meyn chèm sɨ yvɨ sɨ keli iwo. ³Wu timi ɨ kèʼ àyisi kì a kɨ n-ghɨ ɨchfɨ mbàyn afî a ghɨ nà n-toŋtɨ̂ na ɨchfɨ mbàyn mù ɨ zɨ̀tɨ̀ sɨ jaŋ ŋwàʼlɨ ìsaʼ nâ zɨ̀ nô nɨ̀ gya ì to. Wù n-bɨsɨ zɨ̀tɨ̀ sɨ jàŋ, chuè ɨ ni bayn to wu jâŋ kɨ jaŋ asɨ nɨ̀ ghɨ̀lûmnɨ̀ nɨ̀ ghɨ̀ki nô mɨ nɨ̀ ndà ɨlvɨ̀ vzɨ̂ a wu nà n-ghɨ ma wù lemtɨ meyn chem sɨ yvɨ sɨ keli iwo. Wù nà n-jâŋ tì, ghelɨ ateyn nô ghɨ̀ jɨ̀m ɨ faytɨ̂ yvɨtɨ-à.

⁴Ezlà ɨ ndyèynsɨ̀ ìsaʼ nà n-ti atû àbaŋ ma ghɨ bayn kɨ bòm ìwo nâ yèynì. Maltìtayà nɨ̀ Shemà kɨ̀mɨ nɨ̀ Anayà nɨ̀ Yulìyà kɨ̀mɨ nɨ̀ Hilkayà baʼsɨ̂ nɨ̀ Maseyà ɨ ti ɨkœ ɨ two nɨ̀ ŋweyn. Bèdaya nɨ̀ Mishèl kɨ̀mɨ nɨ̀ Malkijà nɨ̀ Hashùm nɨ̀ Hashbàdanà nɨ̀ Zèkàliyà baʼsɨ̂ nɨ̀ Meshulàm ɨ ti ɨkœ nɨ̂nkœ̀ nɨ̀ ŋweyn.

⁵Ezlà ɨ yàs ŋwàʼlɨ̀ àteyn nô mɨ ndà ɨ ki yeyna bòm ta wu nà n-ti atû àbaŋ, wu nà yasɨ̀ gvî kɨ tèyn, ghelɨ ɨ làli timi iyvɨ nô ghɨ̀ jɨ̀m. ⁶Ezlà ɨ koʼsɨ Bôbo Fɨyini ɨ Fɨyini fɨ ngaŋtɨnɨfɨ. Nô ghelɨ ghɨ̀ jɨ̀m ɨ làysɨ̀ ɨ̀wu iyvɨ ɨ bè na, “Àmèyn! Àmèyn!” ɨ tfɨŋsɨ ɨ̀tu a nse ɨ nà koʼsɨ̂ Bôbo Fɨyini.

⁷Àŋena koʼsɨ Bôbo ɨ kasi làli timi, Jeshùwà, nɨ̀ Banì nɨ̀ Shèlèbayà nɨ̀ Jamìn kɨmɨ nɨ̀ Akùb nɨ̀ Shabetayà nɨ̀ Hòdayà nɨ̀ Maseyà kɨmɨ nɨ̀ Kelità nɨ̀ Azalìyà nɨ̀ Jozabàd nɨ̀ Hanàn baʼsɨ̂ nɨ̀ Bèlayà a ghɨ ghelɨ isas i ndo nɨ̀ Levì ɨ nà fêʼtɨ̀ baynsɨ̂ ìsaʼ i Mosìs sɨ̂ ghelɨ. ⁸Àŋena nà n-taŋ ŋwàʼlɨ̀ ìsaʼ nɨ̀ Fɨyini fɨ, ghɨ faytɨ fèʼtɨ̀ ɨ baynsɨ ìsaʼ i Fɨyini ta ka ghelɨ na yvɨ kelî ìwo zɨ̀ a yi n-bê.

⁹Nèhèmayà ta wu nà n-saʼ abâs ilaʼ nâ kì ŋêyn Ezlà ɨ ngàŋ ndô Fɨyini, a ghɨ kɨmɨ ndyèynsɨ̀ baʼsɨ̂ nɨ̀ ghelɨ ndo nɨ̀ Levì ghì a ghɨ nà n-faytɨ̂ feʼtɨ isaʼ i Bôbo sɨ ghelɨ ɨ kæ bè sɨ̂ àŋena na, “Layn nɨn ghɨ àchi a laynɨ-a nɨ̀ Bôbo Fɨyini ɨ Fɨyini fifɨ. Ka yi n-fì kòynsɨ kèʼ, ka yi n-fì dzɨ̀. Àŋena nà n-bê tì ta ghelɨ yvɨ iwo zɨ̀ a isaʼ i Bôbo Fɨyini bè nà sɨ dzɨ̀-à.

¹⁰Nèhèmayà ɨ bè na, “Yì kfa ndù nà yɨ àchi nâ kèynà. Yì ndu nà yɨ ɨ̀fwo ɨ yɨnɨ ɨ jûŋ, nyvɨ mɨ̀lûʼ ɨntofɨnɨ̂. Yi se sɨ yɨ, yi nà gwòtɨ̀ fu ghelɨ ghì a ghɨ n-kelɨ wi afo sɨ yɨ bòm ta achi nâ kèynà nɨn ghɨ àchi a laynɨ-a nɨ̀ Bôbo Fɨyini yi kelɨ wi sɨ nà koynsɨ kêʼ keʼ ateyn. Bôbo Fɨyini nɨn fu àdyaʼ sɨ̂ zɨ̀ ɨ̀ nì a yì na saŋlɨ-à.”

¹¹Ghelɨ isas i ndo nɨ̀ Levì ɨ nà sɨ chɨmsɨ ghelɨ bê na, “Ka yì fî dzɨ̀, ka yì fî kòynsɨ kèʼ bòm ta layn nɨn ghɨ àchi a laynɨ-a nɨ̀ Bôbo Fɨyini.”

¹²Àŋena nô ghɨ̀ jɨ̀m ɨ kæ ndu sɨ nà yɨ-a, nyvɨ-a gwôtɨ̀ ɨ̀fwo fu ghelɨ ghɨ li. Àŋena nà saŋlɨ̂ nô sɨ a ŋaŋ achi nâ ghàyn bòm ta àŋena yvɨ̀ meyn bàynsɨ àwo kì a ghɨ yèʼi sɨ̂ àŋena.

Ayɨ ibàʼlɨ̀ i mɨ̂twò

¹³À nà n-ghɨ a ànkùmtɨ̀ achi a njoŋsɨ nsòmbo, ghelɨ ghì a ghɨ n-tisɨ asas a ndosɨ nô ghɨ̀ jɨ̀m nɨ̀ ngàŋsɨ ndô Fɨyinisɨ baʼsɨ̂ nɨ̀ ghelɨ isas i ndo nɨ̀ Levì ɨ chɨ̀yntɨ ndu yeyn Ezlà na wù faytɨ yèʼi àŋena nɨ̀ ìwo zɨ̀ a isaʼ i Bôbo Fɨyini nɨn bê. ¹⁴Àŋena kæ yeyn sɨ baynsɨ isaʼ ghè a Bôbo Fɨyini nɨn fu sɨ̂ Mosìs na àŋena na se sɨ yɨ ayɨ nâ kèynà a njoŋsɨ nsòmbo, àŋena nà chî kɨ a mɨtwò. ¹⁵Àŋena nɨn kelɨ sɨ làʼi kɨ ntèʼsɨ àŋena sɨ̀ jɨ̀m sɨ làʼi kɨmɨ a Jèlusalèm na, “Yì koʼ ndù a kfɨynsɨ ɨ̀ kàlì nɨ̀ tɨ̀fyas tɨ ɨnkàʼ mɨ̀ olìfsɨ̀ kɨ tɨ̀nki tɨ̀ jɨ̀m nɨ̀ ɨtɨ fɨ̂kàʼ fɨ mitɨ̀l nɨ̀ ɨ̀ywaŋ baʼsɨ̂ nɨ̀ ɨ̀nkàʼ ɨ̀n lì mzɨ̂ a mɨ̀ n-kelɨ tɨfvɨ sɨ idvɨ̀ ɨ bàʼlɨ̀ mɨ̀two ateyn kɨ ighel ta isaʼi bè.

¹⁶Àŋena kæ fvɨ̀ sɨ ndù sɨ gvì nɨ̀ tɨ̀fyas tɨ ɨnkàʼ na nô mɨ ndà na bàʼlɨ̀ ɨ fɨ ŋweynfɨ fɨtwotɨ̂fɨ̀, ghɨli baʼlɨ̀ atû ndosɨ nɨ̀ àŋena, ghɨli bâʼlɨ̀ a àŋena mɨ̂bè, ghɨli bâʼlɨ̀ ɨwe abe a ndô Fɨyini, ghɨli bâʼlɨ̀ kɨmɨ ɨchfɨ ayisi ɨchfɨ mbàyn ghè a ghɨ n-toŋtɨ̂ na ɨchfɨ mbàyn mù. Àŋena nɨn fi meyn bàʼlɨ̀ ɨchfɨ a yisi ɨchfɨ mbàyn ghè a ghɨ n-toŋtɨ̂ na ɨchfɨ mbàyn nɨ̀ Eflèm. ¹⁷Nô ghelɨ ghɨ̀ jɨ̀m ta ghɨ n-læ kasi kfa sɨ a ndo nchaʼ ɨ bàʼlɨ mɨ̀two ɨ nà chî ateyn. Àŋena nà n-saŋlɨ̂ nô sɨ a ŋaŋ bòm ta à nà n-ghɨ bula àŋena timi yɨ ayɨ nâ kèynà a dzɨ nâ ghàyn nô sɨ ɨtuʼ nɨ̀ Joshwà ɨ wâyn Nûn sɨ koʼ sɨ chem achi nâ ghè.

¹⁸Àŋena nɨn yɨ ayɨ ateyn sɨ a mɨchi nsòmbo. À nà n-ghɨ nô mɨ achi à kà, Ezlà ɨ taŋ àlêʼ a ŋwàʼlɨ̀ Fɨyini sɨ zɨ̀tɨ̀ achi a kɨ asɨ-a sɨ koʼ sɨ chem achi a goʼsɨnɨ-a, a se sɨ nà ghɨ a mɨchi nfama, àŋena yvɨ̀ŋtɨ kɨ ighel ta isaʼi nɨn dyêyn.