Nehemiah 9

Ghelɨ Isìlæ̀ ɨ loyn ilêsɨ̀ ifu

¹À n-læ nà ghɨ a mɨchi njvàsɨ̀ kæ̀ a njoŋsɨ nsòmbò, ghelɨ Isìlæ̀ ɨ yvɨ̀ŋtɨ̀ ɨ nà bam ɨ̀chfɨ̂, ma ghɨ mâʼ meyn fɨ̀ntsɨ̀ ɨ̀ fuʼ abvɨ a àŋena ɨtu. ²Ghelɨ Isìlæ̀ ɨ fvɨ̀ sɨ antêynɨ̀ nɨ̀ ghelɨ ɨtum ɨ ndu timi sɨ a nyɨŋ ɨ nà loyn ìlêsɨ̀ ifu kûm mbɨsɨ àŋena nɨ̀ ɨsɨ ghɨ̀bo àŋenasɨ. ³Àŋena nà n-ti kɨ iyvɨ sɨ a chuê sɨ̀ tal, yvɨtɨ̂ ta ghɨ n-taŋ ŋwàʼlɨ̀ ìsaʼ nɨ̀ Bôbo Fɨyini ɨ Fɨyini fɨ àŋena. Àŋena nɨn fi meyn timi sɨ a chuê sɨ̀ tal loyn ìlêsɨ̀ ifu kûm mbɨsɨ àŋena fî koʼsɨ̂ Bôbo Fɨyini ɨ Fɨyini fɨ àŋena.

⁴Ghelɨ ndo nɨ̀ Levì ɨ Jeshùwà nɨ̀ Banì nɨ̀ Kadmìyèl nɨ̀ Shèbànayà kɨ̀mɨ nɨ̀ Bunì nɨ̀ Shèlebaya baʼsɨ̂ nɨ̀ Kenanì nà n-ti atû àbaŋ ghè a ghelɨ ndo nɨ̀ Levì nà n-timi ateyn, jêm sɨ̂ Bôbo Fɨyini ɨ Fɨyini fɨ àŋena no nɨ̀ gyasɨ tosɨ. ⁵Jeshùwà nɨ̀ Kadmìyèl nɨ̀ Banì nɨ̀ Hashàbneyà nɨ Shèlebayà nɨ̀ Hodayà nɨ̀ Shèbànayà nɨ̀ Batahaya a ghɨ ghelɨ isas i ndo nɨ̀ Levì nɨn jèm tî ɨ bè na, “Yì timi nà koʼsɨ̂ Bôbo Fɨyini ɨ Fɨyini fifɨ fì a Fɨ n-chi, ghɨ sɨ læ̀ sɨ na ghɨ kɨ̀ sɨ a mɨlvɨ ɨ̀n jɨ̀m.”

Ikoʼsɨ i ghaʼnɨ-i nɨn ghɨ ìzɨyn ì zæ, yi ngàŋtɨ chwò nô mɨ ghà. ⁶Ghelɨ Isìlæ̀ ɨ bè na, “À n-ghɨ kɨ và Bôbo Fɨyini. À n-læ faytɨ vâ iyvɨ nɨ̀ mɨ̀njèyn, nô mɨ nɨ̀ ghà ɨ̂lvɨ̀ ta kɨ n-ghɨ ateyn. À n-læ faytɨ kɨmɨ và nse nô nɨ̀ ɨ̀fwo ɨ̀ jɨ̀m vzɨ̀ a wu n-ghɨ ateyn nɨ̀ jvasɨ ghaʼnɨsɨ baʼsɨ̂ nɨ̀ ɨ̀fwo vzɨ̀ a wu n-ghɨ ateyn nô ɨ̀ jɨ̀m. À nî và na ɨfwo ɨ̀ jɨ̀m na chi-à, Nchìsɨ Fɨyini sìsɨ a sɨ n-ghɨ iyvɨ ɨ koʼsɨ̂ và.

⁷Wà n-ghɨ Bôbo Fɨyini ɨ Fɨyini fìfɨ̀ a fɨ n-læ choʼ Ablàm ɨ li fvɨ̀ nɨ̀ ŋweyn sɨ a Ûl, a ghɨ ilaʼ i ghelɨ Chaldìyàn ɨ kfɨnɨ ìzɨyn i ŋweyn ɨ fu na Abɨ̀làhâm. ⁸Wa n-læ meyn yeyn na wù n-samsɨ̂ và, wa yɨ mɨkâyn zɨ̂ ŋweyn ɨ chfɨnɨ̀ na wà læ fu ìlaʼ i ghelɨ Kenàn nɨ̀ iyi ghelɨ Hît nɨ̀ iyi ghelɨ Amò kɨ̀mɨ nɨ̀ iyi ghelɨ Belìz nɨ̀ iyi ghelɨ Jebùs baʼsɨ̂ nɨ̀ iyi ghelɨ Gilgàsh sɨ̂ woyn ŋweyn. Wà luynsɨ meyn ìchfɨ̂nɨ̀ ateyn bòm ta wà n-bê nô mɨ na gha nî kɨ tì.

⁹“Wà n-læ meyn yeyn ta ghɨ̀bo ghesɨ nɨn jɨ̂ŋ a ilaʼ i Ijìb ɨ fi yvɨ ta àŋena nà n-dzɨ̂ na wà gamtɨ àŋena ɨchfɨ jvâ ì baŋnɨ. ¹⁰Wà n-yeyn meyn dzɨ zɨ̀ a Fòyn Ijìb ŋêyn ghelɨ ŋweyn nà n-fu ngeʼ sɨ̂ ghɨ̀bo ghesɨ ateyn, ɨ dyèyn nchwæsɨ awo a kaynɨ-a sɨ̂ fòyn ŋêyn ghelɨ ghɨ tisɨnɨ nɨ̀ ŋweyn baʼsɨ̂ nɨ̀ ghelɨ ilaʼ nɨ̀ ŋweyn nô ghɨ̀ jɨ̀m. Izɨyn ì zæ ɨ bem faŋ kɨ faŋ sɨ koʼ sɨ chem layn. ¹¹Wà n-gwosɨ meyn jva i ghaʼnɨ a àŋena asɨ, àŋena dyaŋ kɨ nô a kî jvà iyum ɨ nì jvà ɨ chɨytɨ ghelɨ ghì a ghɨ nà n-nyɨŋ ibam nɨ̀ àŋena, ghɨ lɨmi kɨ ta ngòʼ isas i mu. ¹²À nà nî nà ghɨ nɨ̀nchuè, wa nà ndû a àŋena asɨ a nseŋ mbàʼsɨ̀ sɨ ghɨ tèyn ta atuŋ, à nî nà ghɨ nɨ̀ntuʼ wa nà n-ndû asɨ nɨ̀ àŋena ɨvɨ̀s wu ghɨ tèyn ta atuŋ, dyêyn ndû nɨ̀ dzɨ̀ sɨ̂ àŋena.

¹³“Wà n-læ lù iyvɨ ɨ suʼi a kfɨ̂yn Sinày ɨ taŋi sɨ̂ àŋena, ɨ fu tɨsaʼ nɨ̀ ìyeʼi ì zæ sɨ̂ àŋena, yi ghɨ àti-ati, ghɨ samoʼ fî jofà. ¹⁴Wà n-yeʼi meyn àŋena kûm àchi ɨtuʼ ilaʼ nɨ̀ và ɨ fu tɨsaʼ tyatɨ nɨ̀ ìyeʼi izæ sɨ̂ àŋena toynɨ̂ a wul ɨ̀ felɨnɨ nɨ̀ và ɨ Mosìs. ¹⁵Jeŋsɨ nà n-yaf àŋena, wa fu ɨfwo ɨ yɨnɨ sɨ̂ àŋena ma wu lù iyvɨ. Ɨtoŋ mu nà yumtɨ̂ àŋena wa fvɨ̀sɨ̀ mu iwu àŋena nyvɨ. Wà n-bè meyn na àŋena ndù lì ìlaʼ zɨ̀ a wà n-læ chfɨ̀nɨ ɨ yɨ mɨkâyn sɨ fu sɨ̂ àŋena.

¹⁶“Mɨtì atu a tonɨ-a nɨ̀ ghɨ̀bo ghesɨ nɨ̀ ìghaŋsɨ i ɨwùyn i ɨ nì àŋena faŋ tɨ̀ yvɨ̀nɨ tɨsaʼ tyatɨ. ¹⁷Àŋena leʼ na ghɨ n-yvɨnɨ̂ wì iwo zɨ̀ a wà bè, ɨ faŋ tɨ̀ kfàʼtɨ̀ awo a kaynɨ-a kì a wà n-læ nì sɨ̂ àŋena. Àŋena ɨ to nɨ̀ ɨ̀tu ɨ choʼ wul ɨ̀ tisɨnɨ na wù kàsi lì ndù nɨ̀ àŋena a ndo àkòs a Ijìb. Mɨtì wa ghɨ Fɨyini fìfɨ̀ a fɨ n-lêsɨ̀ fu mbɨsɨ, tôʼnɨ-à, kelɨ ìkoynsɨ isuyn, fî kelɨ àtem a juŋà, nyàŋsɨ̀ nyôʼsɨ̀ wì ɨtoŋ. Ikoŋ i mɨ̂kàyn nɨ̀ và ɨ nì wa faŋ tɨ̀ beyn jɨm sɨ̂ àŋena. ¹⁸Wà n-bû læ beyn jɨm sɨ̂ àŋena nô mɨ ta àŋena nɨ̀n læ faytɨ ànfèʼsɨ̀ a nyâm ɨ nà bê na, “Ɨfêynfɨ̀ nɨn ghɨ fɨyini fifɨ fì a fɨ n-fvɨ̀sɨ̀ zɨ sɨ a Ijìb tèyn.” Àŋena nà n-telɨ̂ và nɨ̀ ndisɨ sɨ bef nô sɨ a ŋaŋ.

¹⁹“Mɨtì wà n-bu læ bèyn jɨm sɨ̂ àŋena a nse iyum bòm ìkoynsɨ isuyn nɨ̀ và. Nseŋ mbàʼsɨ̀ zɨ̀ a yi nà n-ndû asɨ nɨ̀ àŋena nɨ̀nchuè ghɨ ta atuŋ nɨ̀ ìlemi ɨvɨ̀s zɨ-ì a yi nà n-ndû a àŋena asɨ nɨ̀ntuʼ ghɨ ta atuŋ ɨ nà tisɨ̂ kɨ tisɨ àŋena. ²⁰Wà n-læ meyn tum ayvɨs à kya na kɨ na tisɨ̂ àŋena. Wà n-bu læ faŋ tɨ̀ yɨ̀sɨ àŋena nɨ̀ manà, ɨtoŋ mu ɨ nà yumtɨ̂ àŋena wa fu mu àŋena nyvɨ. ²¹Wà n-læ meyn tòʼnɨ̀ nɨ̀ àŋena a nse iyum sɨ a bèŋsɨ̀ mɨ̀vɨm ɨ̀n kæ̀ àŋena wo wi afo. Ndzɨsɨ àŋenasɨ nɨn bu læ jes, ɨvɨ àŋena læ faŋ tɨ̀ mùytɨ̀.

²²“Wà n-læ meyn nì àŋena tɨm yɨ tɨfôyn nɨ̀ tɨ̀laʼtɨ, wa fu ɨlwêʼ ɨ ghelɨ tɨlaʼ nâ ghì nô ɨ̀ jɨ̀m sɨ̂ àŋena. Àŋena nɨn tɨm meyn yɨ fòyn Sihòn ɨ lì ìlaʼ i Heshbòn zɨ̀ a wu nà n-saʼ ɨ tɨm yɨ fòyn Ôg ɨ lì ìlaʼ i Bashàn zɨ̀ a wu nà n-saʼ. ²³Wà n-læ meyn fu woyn sɨ̂ àŋena ghɨ dvɨ̂ kɨ ta mɨnjêyn iyvɨ ma ghɨ kàʼ ghɨ bû taŋ ɨ nì àŋena tɨm yɨ ɨ lì ìlaʼ zɨ̀ a wà n-læ chfɨ̀nɨ sɨ fu sɨ̂ ghɨ̀bo àŋena. ²⁴Woyn àŋena nɨn zɨ meyn ɨ lì ìlaʼ ateyn. Wà n-ni meyn àŋena to chwò ghelɨ Kenàn ghì a ghɨ nà n-chi afu, ɨ fu adyaʼ na àŋena tɨm yɨ̀ ghelɨ Kenàn nɨ̀ tɨ̀fôyntɨ àŋenatɨ ɨ̀ nì nô mɨ ghà sɨ̂ àŋena ta ghɨ n-kôŋ. ²⁵Àŋena nɨn tɨm meyn yɨ ntèʼsɨ sɨ ghɨ antêynɨ̀ mbàynsɨ̀, ɨ ghal fsɨtɨ gveynsɨ jûŋsɨ̀ nɨ̀ ndosɨ ma sɨ luyn meyn nɨ̀ ɨ̀fwo ɨ jûŋ kɨ tɨ̀nki tɨ̀ jɨ̀m nɨ̀ tɨ̀bɨ tɨ mutɨ nɨ̀ gveynsɨ mɨtàmsɨ kɨ̀mɨ nɨ̀ ɨ̀nkàʼ mɨ̀ olìfsɨ̀ baʼsɨ̂ nɨ̀ ɨ̀nkâʼ mɨ̀ mɨ̀tàm kɨ tɨ̀nki tɨ̀ jɨ̀m. Àŋena nɨn yɨ meyn kfeyn kɨ ta ghɨ n-kôŋ. Àŋena nɨn læ meyn yɨ ɨwuyn àŋena nɨ̀ ɨ̀fwo ɨ jûŋ vzɨ̀ a Fɨyini fɨ bòysɨ àŋena nɨ̀ ɨ̀ŋweyn.

²⁶Mɨtì àŋena to atu ɨ faŋ tɨ̀ yvɨ̀nɨ vâ ɨ chas isaʼ zɨ̀ a wà fù sɨ̂ àŋena. Àŋena nɨn zuetɨ meyn nfèʼtɨ̀ sɨ ghaʼnɨ sìsɨ̀ a sɨ n-læ nà fu nfàsì-fàsì na àŋena na nì kɨ ìwo zɨ̀ a wà bè, ɨ faŋ nà têlɨ̂ và nɨ̀ ndisɨ bemnɨsɨ. ²⁷Àŋena nɨn telɨ tî, wa visi mbàynɨ̀sɨ àŋena sɨ tɨm yɨ àŋena ɨ fu ngeʼ sɨ̂ àŋena nô sɨ a ŋaŋ. A nà ghɨ ta ngeʼ nâ yèyn kòli àŋena, ghɨ dzɨ̀ na wà gamtɨ àŋena. Wa yvɨ idzɨ̂ i àŋena iyvɨ ɨ koynsɨ ìsuyn ɨ tum ghelɨ ghɨ fsɨ àŋena sɨ ɨwu nɨ̀ mbàynɨ̀sɨ àŋenasɨ.

²⁸“Mɨtì àŋena keli mbôynɨ̀ sɨ a fɨlêŋnɨ̀ fɨ ɨlvɨ têyn ɨ kasi zɨ̀tɨ sɨ nà nî awo a bɨ-a a wa asɨ. Wa fi visi mbàynɨ̀sɨ àŋenasɨ tɨm yɨ àŋena ɨ nà saʼ àŋena. A nà ghɨ ta àŋena fì dzɨ̀ sɨ̂ và, wa yvɨ idzɨ̂ i àŋena iyvɨ ɨ fi gàmtɨ kɨ gamtɨ àŋena bòm ìkoynsɨ isuyn nɨ̀ và.

²⁹Wa n-fu meyn nfàsi-nfàsì na àŋena kasi nà yvɨnɨ̂ tɨ̀saʼ tyatɨ mɨtì àŋena nà ghaŋsɨ̂ ɨ̀wuyn yvɨnɨ̂ wì. Ghelɨ nɨn yvɨnɨ̂ tɨ̀saʼ tyatɨ àŋena nà chi-à mɨtì àŋena faŋ tɨ̀ yvɨ̀nɨ ɨ to nɨ̀ ɨ̀tu nô sɨ a ŋaŋ, ɨ̀ chas iwo zɨ̀ a wà bè, ɨ faŋ tɨ̀ yvɨ̀tɨ sɨ̂ và. ³⁰Wà n-kulɨ meyn àtem sɨ̂ àŋena sɨ a bèŋsɨ̀ sɨ dvɨ̂ kɨ tèyn, ɨ fu ayvɨs à kya sɨ̂ nfèʼtɨ̀sɨ ghaʼnɨsɨ na sɨ fu nfàsì-fàsì sɨ̂ àŋena. Mɨtì àŋena faŋ tɨ̀ yvɨ̀tɨ sɨ̂ và, wa visi tɨlaʼ tɨ litɨ tɨ tɨm yɨ àŋena. ³¹Mɨtì wa faŋ tɨ̀ bèbsɨ sɨ mèsi àŋena, ɨ faŋ tɨ̀ beyn jɨm sɨ̂ àŋena bòm ìkoynsɨ isuyn nɨ̀ và. Wà n-ghɨ Fɨyini kelɨ àtem a juŋà, kelɨ ìkoynsɨ isuyn.

³²Lvɨ̂yn a Fɨyini feyfɨ fɨngaŋtɨnɨfɨ, wà n-kelɨ àdyaʼ fî bema. Wà n-bê mɨ na gha nî kɨ tì bòm ìkôŋ i mɨ̂kàyn nɨ̀ và. Ka wa n-kèsɨ ngeʼ sìsɨ̀ a ghès nɨn ghɨ ateyn nɨ̀ tɨ̀fôyn tèytɨ nɨ̀ ghelɨ ghɨ tisɨnɨ nɨ̀ ghès kɨ̀mɨ nɨ̀ ngàŋsɨ ndô Fɨyinisɨ̀ nɨ̀ nfèʼtɨ̀ sɨ ghaʼnɨsɨ nɨ̀ ghɨ̀bo ghes baʼsɨ̂ nɨ̀ ghelɨ̀ ghya nô ghɨ̀ jɨ̀m. Ghèsɨ yeyn meyn ngeʼ nâ sèynsɨ̀ kɨ̀ sɨ zɨ̀tɨ̀ ɨtuʼ nɨ̀ tɨ̀fôyntɨ Àsilìyàtɨ̀ sɨ koʼ sɨ chem layn. ³³Samoʼ nô mɨ ghà ta wà vìsi na yi gayn sɨ̂ ghès nɨn ghɨ kɨ àtì-ati. Wà n-bê mɨ na gha nî kɨ tì mɨtì ghèsɨ ni meyn mbɨ. ³⁴Tɨfôyn teytɨ nɨ̀ ghelɨ ghɨ tisɨnɨ nɨ̀ ghèsɨ nɨ̀ ngàŋsɨ ndô Fɨyini nɨ̀ ghèsɨ baʼsɨ̂ nɨ̀ ghɨ̀bo ghesɨ nɨn bû læ chi ta isaʼ ì zæ nɨn dyêyn. Àŋena nɨn bû læ yvɨnɨ tɨsaʼ tyatɨ, ɨ faŋ tɨ̀ yvɨ nfàsì-fàsì zɨ̀ a wa n-fu sɨ̂ àŋena. ³⁵À nà n-ghɨ nô mɨ ta àŋena sɨ kelɨ ilaʼ i àŋena nɨ̀ tɨ̀fôyn tɨ àŋenatɨ, dêŋsɨ̀ ɨfwo ɨ jûŋ afî a wà fù sɨ̂ àŋena ilaʼ nâ ghè a yi n-ghaʼ tî, ɨfwo ɨ yɨnɨ ɨ koʼ ateyn, àŋena faŋ tɨ̀ nà koʼsɨ̂ và, ɨ faŋ tɨ̀ kàsi sɨ a ibàm awo a bɨ-a nɨ̀ àŋena.

³⁶“Yeyn læ̂ a! Ghès nɨn ghɨ ɨ̀kôs lvɨ̂yn, ɨkôs ilaʼ ghè a wà n-læ fu sɨ̂ ghɨ̀bo ghesɨ na àŋena na kfɨl mɨ̀tam yɨ ɨ̀fwo ɨ jûŋ vzɨ̀ a wu n-koʼ ateyn. ³⁷Ghès nɨn kfî ɨ̀fwo kɨ̀ sɨ idvɨ̀ a gvêynsɨ̀ wu ndû kɨ sɨ̂ tɨ̀fôyn tìtɨ̀ a wà lèm tɨ na saʼ ghès bòm àwo a bɨ-a kì a ghèsɨ̀ nì. Àŋena nɨn nyâblɨ̀ nɨ̀ ghès kfɨlɨ nyâm seysɨ kɨ̀ ta àŋena nɨn kôŋ. Ghès nɨn ghɨ a ngeʼ i bemnɨ.

Ghelɨ ɨ timi ɨchfɨ̂ ɨ̀mòʼ sɨ nà yvɨnɨ Bôbo Fɨyini

³⁸Ghelɨ Isìlæ̀ nɨ̀n be meyn na, “Bòm àwo nâ kèynà ghès nɨn yɨ mɨkâyn ɨ̀ nyàʼ a ŋwàʼlɨ̀ a ghelɨ ghɨ tisɨnɨ nɨ̀ ghelɨ ndo nɨ̀ Levì nɨ̀ ngàŋsɨ ndô Fɨyinisɨ̀ nyaʼ àzɨyn a àŋena ɨ tom awu ateyn.”