Numbers 10

Tɨsoŋ ma ghɨ faytɨ nɨ̀ àso ɨkwo a fɨfâ

¹Bôbo Fɨyini nɨ̀n be meyn sɨ̂ Mosìs na, ²“Bè na ghɨ leŋ màmtɨ àso ɨkwo a fɨfâ ɨ̀ fàytɨ tɨ̀soŋ tɨ̀ bò ateyn nà toŋ ɨlvɨ ta ghɨ n-kɨŋ na ghelɨ Isìlæ̀ yvɨŋtɨ, toŋ kɨmɨ ɨlvɨ ta ghɨ kɨŋ na ghelɨ Isìlæ̀ lu sɨ alèʼ ghè a àŋena bɨ̀ ateyn. ³Ghɨ na toŋ àsoŋ nâ kèyn à bò kɨ̀ ɨlvɨ ɨ̀mòʼ ghelɨ Isìlæ̀ ɨ gvi yvɨ̀ŋtɨ̀ a wa asɨ ɨchfɨ fɨndo nɨ̀ Bôbo. ⁴Ghɨ kæ toŋ kɨ isoŋ ìmòʼ, a yvɨ̀ŋtɨ kɨ ghelɨ ghɨ tisɨnɨ ghì a ghɨ n-tisɨ asas a ndosɨ a Isìlæ̀. ⁵Ghɨ toŋ ìsoŋ kɨ̀ sɨ a fɨ̂nkèbtɨ̀ tèyn na ghelɨ Isìlæ̀ lu sɨ alèʼ ghè a ghɨ bɨ̀ ateyn, asas a ndosɨ kì a kɨ bɨ̀ abàs a fɨndo nɨ̀ Bôbo ghè a ɨchfɨ̂-iyvɨ i nɨn sal ateyn ɨ lù sɨ asɨ. ⁶Ghɨ kæ fì kùmtɨ̀ toŋ isoŋ kɨ̀ sɨ a fɨ̂nkèbtɨ̀ tèyn, a asas a ndosɨ kì a kɨ bɨ̀ abàs itsɨyn ɨ lù. Isoŋ nâ yèynì a ghɨ n-toŋ kɨ sɨ a fɨ̂nkèbtɨ̀ tèyn nɨn ghɨ sɨ dyèyn na ghɨ lu. ⁷Mɨtì ghɨ se sɨ toŋ isoŋ na ghelɨ Isìlæ̀ yvɨŋtɨ nô ghɨ̀ jɨ̀m, ghɨ toŋ ɨ lòtɨ̀.”

⁸“À n-kelɨ woyn Alòyn ɨ ngàŋsɨ ndô Fɨyini sɨ nà toŋ àsoŋ ateyn. À n-ghɨ ìsaʼ ma yi faŋ meyn kɨ̀ samoʼ sɨ̂ zɨ̀ nɨ̀ àjâŋ kì a kɨ læ̀ koʼ ibàm. ⁹Yi se sɨ seʼ iwoŋ sɨ nu mbàynɨ̀ sìsɨ̀ a sɨ n-yeʼtɨ zɨ̀ a yi ilaʼ, yi toŋ isoŋ ɨ lòtɨ kɨ lotɨ. Yì na toŋa, Bôbo Fɨyini ɨ Fɨyini fifɨ ɨ bètɨ̀ zɨ̀ ɨ fsɨ zɨ sɨ ɨwu nɨ̀ mbàynɨ̀ sisɨ. ¹⁰Yì na toŋ kɨmɨ tɨ̀soŋ nâ tèyntɨ̀ ɨlvɨ ta yi n-saŋlɨ, tèyn ta mɨ̀chi mɨ̀ àyɨ a bêŋ, toŋ kɨmɨ ɨlvɨ ta yi n-yɨ ayɨ ɨchfɨ njoŋ. Yì n-kelɨ sɨ nà toŋ isoŋ ɨlvɨ ta yi n-fu ifu i nyoʼnɨ-i, toŋ kɨmɨ ɨlvɨ ta yi n-fu ifu sɨ nà chi nɨ̀ mbôynɨ̀.”

Ghelɨ Isìlæ̀ ɨ lù sɨ a Sinày

¹¹À nà n-ghɨ a mɨchi mɨ̀vɨm ɨ̀m bò a njoŋ sɨ̀ bò a ànkùmtɨ̀ a bêŋ ta ghelɨ Isìlæ̀ fvɨ̀ sɨ a Ijìb, mbàʼsɨ̀ ɨ làlì sɨ atû fɨ̀ndo nɨ̀ Bôbo Fɨyini. ¹²Sɨ n-làli tî, ghelɨ Isìlæ̀ ɨ lù sɨ a nse Ìyum a Sinày ɨ nà jelɨ̀ ndû kɨ alêʼ nɨ̀ àleʼà, nô ta ka mbàʼsɨ ateynsɨ nî gvɨ̀ a nse ìyum a Balàn. ¹³Àŋena nɨ̀n læ fvɨ̀ sɨ asɨ kɨ̀ ighel ta Bôbo Fɨyini nɨ̂n bè sɨ̂ Mosìs.

¹⁴Ghɨ nà n-se sɨ lu sɨ alèʼ ghè a ghɨ bɨ̀ ateyn, inôyn i ghelɨ Judà ɨ fvɨ̀ sɨ asɨ ɨ nà jelɨ̀ isas afo ghè a kɨ n-dyêyn isas i ndo nɨ̀ ghelɨ Judà. Wùl ɨ̀ vzɨ̀ a wù nà n-tisɨ àŋena nà n-ghɨ Nashòn ɨ wâyn Àminadàb. ¹⁵Wùl ɨ̀ vzɨ̀ a wu nà n-tisɨ anôyn isas i ndo nɨ̀ Isakà nà n-ghɨ Nètanèl ɨ wâyn Zuwà, ¹⁶ɨvzɨ̂ a wu nà n-tisɨ anôyn isas i ndo nɨ̀ Zebulòn ɨ ghɨ Elìyàb ɨ wâyn Helòn, ¹⁷ghelɨ Geshòn nɨ̀ ghelɨ Mèlalì ɨ kæ choʼtɨ fɨ̀ndo fɨ Bôbo sɨ bèʼì sɨ nà ndû a àŋena ibàm.

¹⁸Ghɨ nà n-beʼì-à ɨ̀ se sɨ ndù, inôyn i ghelɨ Lubèn ɨ nà ndû a àŋena ibàm isas afo ghè a kɨ n-dyêyn isas i ndo nɨ̀ ghelɨ Lubèn. Wùl ɨ̀ vzɨ̀ a wù nà n-tisɨ àŋena nà n-ghɨ Elizù ɨ wâyn Shedù. ¹⁹Wùl ɨ̀ vzɨ̀ a wu nà n-tisɨ anôyn isas i ndo nɨ̀ Simìyòn nà n-ghɨ Shèlumèl ɨ wâyn Zùlishadày, ²⁰ɨvzɨ̂ a wu nà n-tisɨ anôyn isas i ndo nɨ̀ Gâd, ɨ ghɨ Elìyasàf ɨ wâyn Duwèl. ²¹Àŋena nà n-fvɨ-à, ghelɨ Kohàt ɨ fvɨ̀ a àŋena ibàm ma ghɨ beʼi meyn ɨ̀fwo laynɨ. Ghɨ nà n-beʼì-à ɨ̀ se sɨ chem alèʼ ghè a ka ghɨ fî bɨ̀ ateyn, à na sɨ ghɨ ma ghɨ kasi meyn bàʼlɨ̀ fɨ̀ndo fɨ Bôbo.

²²Inôyn zɨ̀ a yi nà ndû a àŋena ibàm nà n-ghɨ ghelɨ Eflèm isas afo ghè a kɨ n-dyêyn na à n-ghɨ ìsas i ndo nɨ̀ Eflèm. Wùl ɨ̀ vzɨ̀ a wu nà n-tisɨ àŋena nà n-ghɨ Elishamà ɨ wâyn Amihùd. ²³Wùl ɨ̀ vzɨ̀ a wu nà n-tisɨ anôyn isas i ndo nɨ̀ Mànasè nà n-ghɨ Gàmalèl ɨ wâyn Bèdazù, ²⁴ɨvzɨ̂ a wu nà n-tisɨ anôyn isas i ndo nɨ̀ Benjamìn ɨ ghɨ Abidàn ɨ wâyn Gidiyonì.

²⁵À nà n-lû gôʼsɨ̀ Inôyn i ghelɨ Dân isas afo ghè a kɨ n-dyêyn na à n-ghɨ ìsas i ndo nɨ̀ àŋena. Wùl ɨ̀ vzɨ̀ a wu nà n-tisɨ àŋena nà n-ghɨ Ahizà ɨ wâyn Amishadày. ²⁶Wùl ɨ̀ vzɨ̀ a wu nà n-tisɨ anôyn isas i ndo nɨ̀ Ashà nà n-ghɨ Bagìyèl ɨ wâyn Oklàn, ²⁷ɨvzɨ̂ a wu nà n-tisɨ anôyn isas i ndo nɨ̀ Naftalì ɨ ghɨ Ahilà ɨ wâyn Enàn. ²⁸À ti dzɨ zɨ̀ a ghelɨ Isìlæ̀ nà n-fvɨ̂ sɨ alèʼ ghè a ghɨ bɨ̀ ateyn a mbaŋi a mbaŋi.

²⁹À n-læ nà ghɨ achi a li-a Mosìs ɨ bè sɨ̂ wâynà wi nɨ̀ ŋweyn ɨ Hobàb na, “Ghèsɨ̀ sɨ ndû alèʼ ghè a Bôbo Fɨyini nɨ̀n læ chfɨ̀nɨ na yi læ̀ fu sɨ̂ ghès. Bôbo Fɨyini chfɨnɨ meyn ìboysɨ i kaynɨ-i sɨ̂ ghelɨ Isìlæ̀. Hobàb nâ wèyn nà n-ghɨ wâyn Lewèl ɨ bò wì nɨ̀ Mosìs, a ghɨ wul ɨ̀ Midìyàn.”

³⁰Hobàb ɨ bèynsɨ na, “Ɨ̀ngaŋ, mɨ n-ndù wì, mɨ n-kasî ndû a ghès ilaʼ ɨ̀ yèyn ghelɨ̀ ghem.”

³¹Mosìs ɨ chwotɨ ŋweyn ɨ bè na, “Wà n-kya ɨ̀lwêʼ vzɨ̀ a ghèsɨ̀ kàʼ a ghɨ bɨ ateyn a nse ìyum. Ka wa n-vìsi ghès, wa tisɨ̂ ghes. ³²Wà kæ gvì ghesɨna ndû, a ghèsɨ̀ gwotɨ ɨfwo ɨ jûŋ vzɨ̀ a Bôbo nɨn fu sɨ̂ ghès ɨ̀ fù vâ.”

³³Àŋena ɨ kæ lù sɨ a kfɨyn nɨ̀ Bôbo Fɨyini sɨ jèlɨ sɨ a mɨchi ɨ̀n tal. Àŋena nà n-jelɨ̀ tì, àntayntayn a mɨ̂kàyn nɨ̀ Bôbo ɨ ndû àŋena asɨ sɨ dyèyn alêʼ kì a ka àŋena bɨ ateyn ɨ̀ yvɨ̀tɨ̀. ³⁴Àŋena nà n-se sɨ lu sɨ alèʼ ghè a ghɨ bɨ̀ ateyn, mbàʼ Bôbo Fɨyini ɨ na ndû atu nɨ̀ àŋena nɨ̀nchuè.

³⁵Àntayntayn a mɨ̂kàyn nɨ̀ Bôbo nà n-se sɨ lu sɨ alèʼ ghè a ghɨ bɨ̀ ateyn, Mosìs ɨ byal ɨ bè na,

“Làli a Bôbo Fɨyini

ɨ saysɨ mbàynɨ̀ shyasɨ

ɨ nì àŋena leʼnɨ sɨ a wa asɨ.”

³⁶Ghɨ nà n-suʼsɨ̂ àntayntayn a mɨ̂kàyn nɨ̀ Bôbo nô mɨ ɨlvɨ gha, Mosìs ɨ bè na,

“O Bôbo Fɨyini kasi gvi

wa ghɨ zɨ̂ ghelɨ Isìlæ̀ ghèyn a ghɨ n-dvɨ̂ têyn ghɨ taŋ lê ɨ̀tu.”