Numbers 9

Ayɨ iyaʼsɨ

¹Bôbo Fɨyini nɨ̀n taŋi meyn sɨ̂ Mosìs a nse iyum a Sinày a njoŋ ɨyî àsɨ a ànkùmtɨ̀ a bêŋ ta ghelɨ Isìlæ̀ fvɨ̀ sɨ a Ijìb ɨ bè na, ²“Bè sɨ̂ ghelɨ Isìlæ̀ na àŋena nɨn kelɨ sɨ nà yɨ ayɨ iyaʼsɨ kɨ ɨ̀lvɨ ghê a ghɨ n-kelɨ sɨ nà yɨ ateyn. ³Àŋena nɨn kelɨ sɨ nà yɨ ayɨ nâ kèynà kɨ̀ ɨlvɨ ghê a àŋena nɨn kelɨ sɨ yɨ ateyn aleŋ ɨlvɨ ikfa a mɨchi njvàsɨ̀ kæ̀ a njoŋ abìb. Àŋena na se sɨ yɨ, ghɨ nà lêm tɨ̀saʼ tìtɨ̀ a mà fu kûm àyɨ nâ kèyna nô tɨ̀ jɨ̀m.”

⁴Mosìs ɨ kæ bè sɨ̂ ghelɨ Isìlæ̀ na àŋena na yɨ ayɨ iyaʼsɨ. ⁵Wù n-bè tî àŋena ɨ yɨ ayɨ nâ kèynà a nse iyum a Sinày aleŋ ɨlvɨ ikfa a mɨchi njvàsɨ̀ kæ̀ a njoŋ ɨyî àsɨ a bêŋ. Ghelɨ Isìlæ̀ nɨ̀n læ ni kɨ ighel ta Bôbo Fɨyini nɨ̀n læ bè sɨ̂ Mosìs.

⁶Mɨtì ghelɨ ghɨ li nà n-ghɨ ma ghɨ kàʼ ghɨ bû yɨ ayɨ iyaʼsɨ achi nâ ghè bòm ta àŋena nà n-ghɨ ma ghɨ kum meyn ìgvɨyn i wûl, nà layn wi ta isaʼi nɨn dyêyn. Àŋena ɨ ndu yeyn Mosìs ŋêyn Alòyn achi nâ ghè, ⁷ɨ bè sɨ̂ Mosìs na, “Ghèsɨ kûm meyn ìgvɨyn i wûl nà layn wi ta isaʼi nɨn dyêyn. Bòm ghà ta ghèsɨ̀ kàʼ ghɨ bû fu ifu sɨ̂ Bôbo Fɨyini ghesɨ̀ ghelɨ Isìlæ̀ ɨlvɨ ateyn a?”

⁸Mosìs ɨ bè sɨ̂ àŋena na, “Yì visi mà bɨf ɨ̀ yvɨ na Bôbo Fɨyini nɨn bè na gha kûm zɨ̀ a?”

⁹Bôbo Fɨyini ɨ kæ be sɨ̂ Mosìs na, ¹⁰“Bè sɨ̂ ghelɨ Isìlæ̀ na, ‘Wùl ɨ̀ Isìlæ̀ kèsa wul ɨ̀ wayn nɨ̀ ŋweyn kæ kùm igvɨyn i wûl, nà bu fì layn wi ta isaʼi nɨn dyêyn kèsa wù ndù ìjêl, wù kâʼ a wù yɨ ayɨ Iyaʼsɨ nɨ̀ Bôbo Fɨyini. ¹¹Àŋena nɨn kelɨ sɨ yɨ ayɨ ateyn a mɨchi njvàsɨ̀ kæ̀ aleŋ ɨlvɨ ikfa a ànkumtɨ̀ a njoŋ a bêŋ. Àŋena nɨn kelɨ sɨ kfɨl njwò wayn njɨ̀ àyɨ nâ yèyn kɨ̀ ɨlvɨ nâ ghè nɨ̀ àghi a nɨ̀ àbayn a bula ghɨ we fɨ̀shɨ̀k ateyn. ¹²Yi n-kelɨ sɨ kfɨl njwò àteyn nô ì jɨ̀m jæ ta ka ɨtuʼ layn, kelɨ wi sɨ beʼ avɨf ateyn. Àŋena nɨn kelɨ sɨ nà lêm tɨsaʼ tɨ ayɨ nâ tèyntɨ̀ nô tɨ̀ jɨ̀m. ¹³Wùl kæ nà layn ta isaʼi nɨn dyêyn, bula wù ndû ìjêl, ɨ̀ faŋ tɨ̀ yɨ ayɨ iyaʼsɨ nâ kèynà, a ghɨ na kelɨ sɨ sàŋ sɨ fvɨ̀sɨ ŋweyn sɨ antêynɨ̀ nɨ̀ ghelɨ Fɨyini. Ghɨ n-kelɨ sɨ sàŋ sɨ fvɨ̀sɨ ŋweyn bòm ta wù bû fu ifu i Bôbo Fɨyini ɨlvɨ ghê a wù n-kelɨ sɨ fu ateyn. Wùl àteyn nɨn kelɨ sɨ yeyn ngeʼ bòm mbɨ zɨ̀ a wù nì.’”

¹⁴“Wùl àtum kæ nà ghɨ a yi antêynɨ̀, nà kôŋ sɨ yɨ ayɨ iyaʼsɨ a wù na kelɨ sɨ lem tɨsaʼ tɨ ayɨ nâ tèyntɨ̀ nô tɨ̀ jɨ̀m. Tɨsaʼ tɨ ateyn tɨ nɨn ghɨ kɨ ighel sɨ̂ ghelɨ ɨtum, ghɨ kɨmɨ tì sɨ̂ zɨ̀ ghelɨ Isìlæ̀.”

Mbàʼsɨ̀ ɨ chɨytɨ fɨ̀ndo fɨ Bôbo Fɨyini

¹⁵À nà n-ghɨ achi ghè a ghɨ bàʼlɨ fɨ̀ndo fɨ Bôbo, mbàʼsɨ̀ ɨ chɨytɨ fɨ̀ndo fɨ ateynfɨ. Sɨ n-chɨ̀ytɨ tî, ɨ nà bâŋ kɨ tèyn ta ɨvɨs atû fɨ̀ndo nâ ghè sɨ zɨ̀tɨ̀ aleŋ ɨlvɨ ikfa sɨ chem ta ka ɨtuʼ nî layn. ¹⁶Mbàʼsɨ ateynsɨ nɨn læ chɨytɨ tî ɨ faŋ kɨ faŋ ɨ nà kfâ nɨ̀ntuʼ sɨ nà bâŋ kɨ ta ɨvɨs. ¹⁷Mbàʼsɨ ateynsɨ nà n-lalì sɨ atû fɨ̀ndo nɨ̀ Bôbo nô mɨ ɨlvɨ gha, ghelɨ Isìlæ̀ ɨ lu kɨ lu sɨ alèʼ ghè a ghɨ bɨ̀ ateyn, mbàʼsɨ ateynsɨ nî sùʼi nô mɨ a wo, àŋena bɨ kɨ afu. ¹⁸Bôbo Fɨyini nà n-bê na ghelɨ Isìlæ̀ lu, àŋena lù, wù nî bè na àŋena bɨ nô mɨ wo àŋena bɨ kɨ afu. Mbàʼsɨ ateynsɨ kæ faŋ kɨ atû fɨ̀ndo nɨ̀ Bôbo Fɨyini, a àŋena faŋ kɨ̀ alèʼ nâ ghè a ghɨ bɨ̀ ateyn. ¹⁹Mbàʼsɨ ateynsɨ nà n-faŋ atû fɨ̀ndo nɨ̀ Bôbo nô mɨ sɨ aleŋ ɨlvɨ à kà, ghelɨ Isìlæ̀ ɨ yvɨnɨ Bôbo Fɨyini ɨ faŋ kɨ afu. ²⁰À nà n-ghɨ ɨlvɨ fɨli, mbàʼsɨ ateynsɨ ɨ chɨytɨ àtu a fɨndo nɨ̀ Bôbo kɨ̀ sɨ a mɨchi ɨ̀nsèʼ têyn, Bôbo Fɨyini bê na àŋena bɨ, ghɨ bɨ̀, ɨ̀ nì bè na àŋena lu, ghɨ lu kɨ lu. ²¹À nà n-gvî ɨlvɨ fɨli, mbàʼsɨ ateynsɨ nà ghɨ atu fɨ̀ndo nâ ghè kɨ̀ sɨ zɨ̀tɨ aleŋ ɨlvɨ ikfa sɨ chem nɨ̀ bɨsì bɨsì. Sɨ nà n-lalì nɨ̀nchuè kèsa nɨ̀ntuʼ, àŋena ɨ lu kɨ lu. ²²Mbàʼsɨ ateynsɨ nà n-chɨytɨ̂ fɨ̀ndo fɨ Bôbo sɨ a mɨchi ɨ̀m bò kèsa njoŋ ma bèŋ a, ghelɨ Isìlæ̀ ɨ nà ghɨ kɨ alèʼ ghè a ghɨ bɨ̀ ateyn. Mɨtì mbàʼsɨ ateyn nî làlì mɨ ɨlvɨ gha, àŋena lu kɨ lu. ²³Bôbo Fɨyini nà n-bê nô mɨ ɨlvɨ gha na àŋena bɨ, àŋena bɨ kɨ bɨ, ɨ̀ nì bè na àŋena lu, àŋena lu kɨ lu. Àŋena nà n-nî nô mɨ ghà kɨ ighel ta Bôbo Fɨyini nɨ̀n bè sɨ̂ Mosìs.