Numbers 15

Bôbo Fɨyini ɨ fu tɨsaʼ kûm ìfu

¹Bôbo Fɨyini nɨ̀n bê meyn sɨ̂ Mosìs na, ²“Taŋi sɨ̂ ghelɨ Isìlæ̀ ɨ bè sɨ̂ àŋena na, ‘Yi ndû zɨ ilaʼ ghè a mɨ n-fu sɨ̂ zɨ̀ na yì na chî ateyn, ³yi fu ifu sɨ̂ Bôbo Fɨyini a ghɨ ìfu ghɨ nyôʼ nyoʼ yi lɨ̂mtɨ̀ fom sɨ̂ Bôbo Fɨyini ghɨ ma yì fvɨ̀sɨ̀ anòyn a nyâmsɨ̀ nɨ̀ zɨ̀ kèsa anòyn a bzɨsɨ. Ifu ateyn i na ghɨ ìfu i nyoʼnɨ-i, kèsa ifu sɨ a nyɨŋ sɨ luynsɨ ichfɨ̂nɨ̀ kèsa ifu ta wùl ɨ̀ chòʼnɨ sɨ fu kèsa à n-ghɨ ìfu ayɨ ta yi n-kelɨ sɨ yɨ a bêŋ. ⁴Wùl ɨ̀ se sɨ gvi nɨ̀ ìfu i sɨ̂ Bôbo Fɨyini wu gvi kɨmɨ nɨ̀ ìfu ɨfwo yɨnɨ a ghɨ ìfûʼ ɨnkfɨ̀ŋ chem ndû kilù sɨ̀ bò ma ghɨ gva meyn mɨ̀ faytɨ kfɨ ghɨ fyes mɨ̀vɨl ateyn mɨ chem ndû lità ìmòʼ. ⁵Wùl ɨ̀ na se sɨ fu nô mɨ wâyn njɨ̀ ɨ̀ kfà sɨ ifu i nyoʼnɨ-i kèsa ifu sɨ a nyɨŋ, wu baʼsɨ nsàl mɨ̀lùʼ ɨn tô sɨ a ifu i nyvɨnɨ-i.’”

⁶“Wùl ɨ̀ na fu àyaʼ, wu fu baʼsɨ ìfûʼ ɨnkfɨ̀ŋ ma ghɨ gva meyn mɨ̀ faytɨ kfɨ ɨ̀ gwòtɨ̀ ɨlwêʼ ìvɨm ɨ̀ lì ɨ̀lwêʼ ɨ̀ bwò ɨ̀ fu sɨ ifu ɨfwo ɨ yɨnɨ ma ghɨ fyes meyn nɨ̀ mɨ̀vɨ̂l mɨ̀ olìfsɨ̀ mɨ chem ndû lità ìmòʼ nɨ̀ àbeʼa. ⁷Wù n-kelɨ sɨ fu kɨmɨ nsàl mɨ̀lùʼ ìmòʼ nɨ̀ àbeʼa sɨ ifu i nyvɨnɨ-i. Ifu nâ yèynì ɨ lɨ̂mtɨ̀ fom sɨ̂ Bôbo Fɨyini.”

⁸Wùl ɨ kæ nà fu wâyn nyàm mbòloʼ ɨ lûmnɨ̀ sɨ ifu i nyoʼnɨ-i kèsa sɨ ifu sɨ a nyɨŋ sɨ luynsɨ ichfɨ̂nɨ̀ kèsa sɨ ifu sɨ̂ Bôbo Fɨyini sɨ nà chî nɨ̀ mbôynɨ̀, ⁹wu fu baʼsɨ ìfûʼ ɨnkfɨ̀ŋ ma ghɨ gva meyn mɨ̀ faytɨ kfɨ ɨ̀ gwòtɨ̀ ɨlwêʼ ìvɨm ɨ̀ lì ɨlwêʼ ɨ̀ twal, ma ghɨ fyes meyn nɨ̀ mɨ̀vɨ̂l mɨ̀ olìfsɨ̀ mɨ chem ndû lità sɨ̀ bò. ¹⁰Wu n-fu kɨmɨ nsàlsɨ mɨ̂lùʼ sɨ̀ bò sɨ a ifu i nyvɨnɨ-i, a ghɨ ìfu ghɨ nyôʼ nyoʼ yi lɨ̂mtɨ̀ foma sɨ̂ Bôbo Fɨyini. ¹¹Wùl na se sɨ fu nô mɨ wâyn nyàm mbòloʼ ɨ̀ kfà kèsa ayaʼ kèsa wù n-fu wâyn njɨ̀ ma wâyn bzɨ ndoŋ a, wu fu kɨ a dzɨ nâ ghàyn. ¹²Yì na nî kɨ tèyn nô mɨ nɨ̀ nyàm ì kà ta yì bàʼtɨ sɨ fu sɨ ifu.

¹³“‘Nô mɨ wul ɨ̀ Isìlæ̀ ɨ̀ kfà nɨn kelɨ sɨ nà fu kɨ a dzɨ nâ ghàyn ɨlvɨ ta wù n-fu ifu a ghɨ ìfu ghɨ nyôʼ nyoʼ yi lɨ̂mtɨ̀ fom sɨ̂ Bôbo Fɨyini. ¹⁴Wùl àtum kæ nà chî a yi antêynɨ̀ ɨ̀ nà kɨŋ sɨ fu ifu a ghɨ ìfu ghɨ nyôʼ nyoʼ yi lɨ̂mtɨ̀ fom sɨ̂ Bôbo Fɨyini, a wù fu kɨ̀ a dzɨ nâ ghàyn. ¹⁵Isaʼ nâ yèynì nɨn ghɨ sɨ̂ zɨ̀ ghelɨ Isìlæ̀ nɨ̀ woyn ghì a ghɨ læ koʼ ibàm baʼsɨ̂ nɨ̀ ɨ̀tum vzɨ̀ a wu n-chi a yi antêynɨ̀. Isaʼ ateyn i nɨn ghɨ ma yi faŋ meyn kɨ̀ samoʼ bòm ta zɨ̂ àŋena nɨn ghɨ kɨ ighel asɨ nɨ̀ Bôbo Fɨyini. ¹⁶Tɨsaʼ nâ tèyntɨ̀ nɨn ghɨ kɨ ighel sɨ̂ zɨ̀ nɨ̀ ghelɨ ɨtum ghì a ghɨ n-chi a yi antêynɨ̀.’”

¹⁷Bôbo Fɨyini nɨn fi meyn bè sɨ̂ Mosìs na, ¹⁸“Taŋi sɨ̂ ghelɨ Isìlæ̀ ɨ bè sɨ̂ àŋena na, ‘Yi læ̂ zɨ ilaʼ ghè a mɨ n-lî ndû nɨ̀ zɨ̀ ateyn, ¹⁹ɨ̀ se sɨ yɨ ɨfwo ɨ yɨnɨ vzɨ̀ a wu n-koʼ ilaʼ nâ ghè, yi nà lêm ɨlvɨ sɨ ifu sɨ̂ Bôbo Fɨyini. ²⁰Yi n-fu ìfu sɨ a nyɨŋ sɨ̂ Bôbo Fɨyini nɨ̀ ìghef abayn i ma ghɨ lam nɨ̀ ɨ̀nkfɨ̀ŋ mɨ̀ àsaŋ a kɨ asɨ-a. Yi n-fu ìfu nâ yèynì na à n-ghɨ ìfu asaŋ zɨ̀ a yì leŋ. ²¹À na koʼ nô mɨ àjâŋ à kà, kɨ nà fu ìfu nâ yèynì sɨ̂ Bôbo Fɨyini a ghɨ àbayn ma ghɨ lam nɨ̀ ɨ̀nkfɨ̀ŋ mɨ̀ àsàŋ a kɨ asɨ-a.’”

Ifu ɨlvɨ ta wùl ɨ̀ jas ɨ̀ nì mbɨ

²²Wùl ɨ̀ kæ jas ɨ̀ fe isaʼ antêynɨ̀ tɨ̀saʼ ghè a Bôbo Fɨyini nɨn fu sɨ̂ Mosìs, ²³à kæ læ̀ fe woyn woyn ghi isaʼ nâ yèynì a Bôbo Fɨyini nɨn fu sɨ̂ Mosìs, ²⁴ma ghɨ jàs jasɨ, ghelɨ Isìlæ̀ ɨ kya wi, a ghelɨ Isìlæ̀ nô ghɨ̀ jɨ̀m na kelɨ sɨ gvi nɨ̀ wâyn nyàm mbòloʼ ilûmnɨ̀ sɨ ifu i nyoʼnɨ-i yi lɨ̂mtɨ̀ fom sɨ̂ Bôbo Fɨyini. Ghɨ n-fu-a ɨ̀ bàʼsɨ nɨ̀ ifu ɨfwo ɨ yɨnɨ kɨ̀mɨ nɨ̀ ìfu i nyvɨnɨ-i kɨ̀ ighel ta isaʼi ndô Fɨyini nɨn dyêyn. Ghɨ n-se sɨ fu ɨ̀ bàʼsɨ ìfef na Bôbo Fɨyini lesɨ fù mbɨsɨ. ²⁵Ghɨ n-gvi-à, a ngàŋ ndô Fɨyini fu sɨ ifu alèʼ nɨ̀ ghelɨ Isìlæ̀ ɨ̀ yuyn atu a àŋena a Bôbo Fɨyini lesɨ fù mbɨsɨ àŋena bòm ta àŋena bu tî nà kya, ɨ̀ gvì nɨ̀ ìfu i bòm mbɨ àŋena a ghɨ ìfu ghɨ nyôʼ nyoʼ ɨ̀ gvì kɨ̀mɨ nɨ̀ ìfu i na Bôbo Fɨyini lesɨ fù mbɨsɨ àŋena. ²⁶Bôbo Fɨyini nɨn lèsɨ̀ fu ghelɨ Isìlæ̀ nô ghɨ̀ jɨ̀m baʼsɨ̂ nɨ̀ ɨ̀tum vzɨ̀ a wu n-chi a àŋena antêynɨ̀. Yi n-ghɨ tèyn bòm ta ghelɨ ghɨ̀ jɨ̀m ti meyn nà ghɨ antêynɨ̀ nɨ̀ mbɨ nâ ghè a ghelɨ Isìlæ̀ tî jasɨ nì tî.

²⁷“Mɨtì, à kæ jas kɨ wul ɨ̀mòʼ ɨ̀ nì mbɨ a wù na kelɨ sɨ fu ikfɨ i bzɨ yi ghɨ kɨ bèŋ sɨ ifu na Fɨyini fɨ lesɨ fu mbɨ ŋweyn. ²⁸Wu n-gvì nɨ̀ ìfu ateyn i a ngàŋ ndô Fɨyini fu ifu ateyn alèʼ nɨ̀ wùl ɨ̀ vzɨ̀ a wù jasɨ nì mbɨ ɨ yuyn atu a ŋweyn, a Bôbo Fɨyini lesɨ fù mbɨ ŋweyn. ²⁹Isaʼ nâ yèynì nɨn ghɨ kɨ ighel nô mɨ sɨ̂ ndà ɨlvɨ ta wù jasɨ nì mbɨ kèsa à n-ghɨ wul ɨ̀ Isìlæ̀ ma wul àtum a.”

³⁰“‘Mɨtì ma wùl kæ choʼnɨ sɨ ni mbɨ, kèsa à n-ghɨ wul ɨ̀ Isìlæ̀ ma wul àtum a, a à na ghɨ ma wù te meyn Bôbo Fɨyini ghɨ kelɨ sɨ sàŋ sɨ fvɨ̀sɨ ŋweyn sɨ antêynɨ̀ nɨ̀ ghelɨ Fɨyini. ³¹Ghɨ na kelɨ sɨ sàŋ sɨ fvɨ̀sɨ wul àteyn na mbɨ àteyn faŋ kɨ̀ a ŋweyn atu bòm ta wù chasɨ isaʼ i Bôbo ɨ̀ faŋ tɨ̀ yvɨ̀nɨ ŋweyn.’”

Ngeʼ zɨ̀ a ghɨ n-fu sɨ̂ wùl ɨlvɨ ta wù fèl achi ɨtuʼ ilaʼ

³²A n-læ nà ghɨ achi a li-a ta ghelɨ Isìlæ̀ nà n-ghɨ a nse iyum, àŋena ɨ yeyn wul wu sɨ ɨ̀nkâʼ achi ɨtuʼ ilaʼ. ³³Ghelɨ ghì a ghɨ n-yeyn ta wù n-sɨ ɨ̀nkâʼ ɨ ghal ɨ ndù nɨ̀ ŋweyn asɨ nɨ̀ Mosìs ŋêyn Alòyn nɨ̀ ghelɨ Isìlæ̀ nô ghɨ̀ jɨ̀m. ³⁴Ghɨ n-dù tî, ɨ lèm ŋweyn alèʼ ɨ nà chi-à bòm ta ghɨ nà n-kya wi iwo zɨ̀ a ka ghɨ ni nɨ̀ ŋweyn. ³⁵Bôbo Fɨyini ɨ bè sɨ̂ Mosìs na, “Wùl àteyn nɨn kelɨ sɨ kfɨ, ghɨ n-kelɨ sɨ lì sɨ fvɨ nɨ̀ ŋweyn sɨ alèʼ ghè a ghɨ bɨ̀ ateyn na ghelɨ Isìlæ̀ nô ghɨ̀ jɨ̀m tɨmlɨ zue ŋweyn.” ³⁶Ghelɨ Isìlæ̀ ɨ kæ li sɨ fvɨ̀ nɨ̀ ŋweyn sɨ alèʼ ghè a ghɨ bɨ̀ ateyn sɨ tɨmlɨ sɨ zue kɨ̀ ighel ta Bôbo Fɨyini nɨ̂n bè sɨ̂ Mosìs.

Njeŋlɨ sìsɨ̀ a ghɨ wê achfɨ̀ a ndzɨsɨ

³⁷Bôbo Fɨyini nɨ̀n be meyn sɨ̂ Mosìs na, ³⁸“Taŋi sɨ̂ ghelɨ Isìlæ̀ ɨ bè sɨ̂ àŋena na, ‘Yi n-kelɨ sɨ nà tɨm ndzɨsɨ wê njeŋlɨsɨ achfɨ̀ ateyn, a koʼ nô mɨ àjâŋ à kà kɨ nà nî kɨ tì. Nô mɨ njeŋlɨ ì kà na kelɨ nkfɨ̀ ì nyemnɨ ateyn. ³⁹Yì na yeyn n-jeŋlɨsɨ ateyn nô mɨ ɨlvɨ gha, yi nà bêtɨ̀ tɨ̀saʼ tɨ Bôbo Fɨyini nô tɨ̀ jɨ̀m yvɨnɨ-à. Yì na yvɨnɨ-à, bu fì chî wì ta ikfâʼtɨ̀ ì zɨ-i nɨn ndyêyn ta ka yì na ghɨ àtì-ati asɨ nɨ̀ Fɨyini fɨ. ⁴⁰Njeŋlɨsɨ ateynsɨ na gâmtɨ̀ na yì na bêtɨ̀ tɨsaʼ temtɨ yvɨnɨ-à, fî layn kfeynɨ̂ asɨ nɨ̀ Fɨyini fifɨ. ⁴¹À n-ghɨ mà Bôbo Fɨyini ɨ Fɨyini fi fìfɨ̀ a fɨ n-fvɨ̀sɨ zɨ sɨ a Ijìb ta ka yì na ghɨ ghelɨ̀ ghem. À n-ghɨ mà Bôbo Fɨyini ɨ Fɨyini fifɨ.’”