Numbers 16

Kolà ŋêyn ghelɨ ghɨ li ɨ to nɨ̀ àtu a sɨ̂ Mosìs ŋêyn Alòyn

¹À n-læ meyn nà ghɨ achi a li-a Kolà ŋêyn Ôn ɨ kulɨ mɨ̀nàŋ sɨ nà to nɨ̀ àtu a sɨ̂ Mosìs ŋêyn Datàn baʼsɨ̂ nɨ̀ Abilàm. Kolà nà n-ghɨ wâyn Izà, bò Izà ɨ ghɨ Kohàt ɨ wâyn Levì. Datàn ŋêyn Abilàm ɨ ghɨ woyn Elìyàb, Ôn ɨ ghɨ wâyn Belèt a ghɨ wul ìsas i ndo nɨ̀ Lubèn. ²Àŋena nɨn tfɨtɨ meyn ghelɨ Isìlæ̀ ghɨ li ighɨ ì bò nɨ̀ ghelɨ mɨ̀vɨm ɨ̀n tâyn a ghɨ ghelɨ ghɨ tisɨnɨ a Isìlæ̀ ta ghɨ n-læ choʼtɨ, àŋena chɨ̀yntɨ̀ ɨ nà sɨ to nɨ̀ àtu a sɨ̂ Mosìs. ³Àŋena nɨn timi meyn ɨchfɨ̂ ɨ̀mòʼ ɨ keʼ Mosìs ŋêyn Alòyn ɨ bè na, “Yi ni meyn chwòsɨ̀, ghelɨ ghɨ̀ jɨ̀m a Isìlæ̀ nɨ̀n ghɨ ghelɨ Fɨyini, Fɨyini fɨ ghɨ ŋêyn àŋena. Bòm ghà ta yi n-lêm na yi n-ngaŋtɨ̂ chwô ghelɨ Isìlæ̀ ghɨ li a?”

⁴A nà ghɨ ta Mosìs yvɨ iwo zɨ̀ a àŋena nɨn bê ɨ fe kfɨsɨ ìkêʼ a nse, ⁵ɨ bè sɨ̂ Kolà ŋêyn tɨ̀bam tɨ ŋweyntɨ na, “À læ̀ nà ghɨ nɨ̀ bɨsì bɨsì a libɨs a Bôbo Fɨyini dyeyn wul ɨ vzɨ̀ a wù n-layn kfeynɨ sɨ nà ghɨ wul ɨ̀ ŋweyn. À læ̀ kɨŋtɨ̂ baʼsɨ̂ kɨ wul ɨ vzɨ̀ a wù choʼ a ŋweyn a ngùŋ. ⁶Kolà zɨ̂ ghelɨ̀ ghya nô ghɨ̀ jɨ̀m nɨ̀n kelɨ sɨ li ɨkfaŋ vzɨ̀ a yi n-nyôʼ ileŋ ateyn, ⁷na à na ghɨ a libɨs yì nyòʼ ileŋ ateyn asɨ nɨ̀ Bôbo Fɨyini a ghesɨ̀nà kæ yeyn wul ɨ vzɨ̀ a Bôbo Fɨyini choʼ na wù n-layn kfeynɨ-à? Wu n-bè tî ɨ fi bè na zɨ̀ ghelɨ ndo nɨ̀ Levì ni meyn chwòsɨ̀.”

⁸Mosìs nɨn fi meyn bè sɨ̂ Kolà na, “Zɨ̀ ghelɨ ndo nɨ̀ Levì faytɨ yvɨ̀tɨ! ⁹Ba yi ti n-ghɨ na Fɨyini fɨ Isìlæ̀fɨ̀ chòʼ zɨ sɨ antêynɨ̀ nɨ̀ ghelɨ Isìlæ̀ à na yì na felɨ̀ a fɨndo nɨ̀ Bôbo baʼsɨ̂ a ŋweyn a ngùŋ, fî tôʼnɨ̀ nɨ̀ ghelɨ ŋweyn à na ghɨ wi iwo sɨ̂ zɨ̀ ma? ¹⁰Bôbo Fɨyini fu meyn ìfêl sɨ̂ và zɨ̂ ghelɨ ndo nɨ̀ Levì na yì na felɨ̀ a fɨndo nɨ̀ Bôbo, mɨtì yi na sɨ fì kɨŋ sɨ nà ghɨ ngàŋsɨ ndô Fɨyini. ¹¹Yi n-to nɨ̀ àtu a sɨ̂ Alòyn a ghɨ wi sɨ̂ Bôbo Fɨyini. Alòyn nɨ̀n ghɨ nô ndà na yì na dɨ̂mlɨ̀ kûm ŋweyn a?”

¹²Mosìs ɨ kæ tum sɨ jàŋ Dotàn ŋêyn Abilàm ɨ woyn Elìyàb, mɨtì àŋena ɨ bè na, “Ghès nɨn gvì wì. ¹³Ba yi ti n-ghɨ na wà tî lì fvɨ̀ nɨ̀ ghès a Ijìb a ghɨ ìlaʼ ɨfwo ɨ yɨnɨ ɨ koʼ ateyn nô a jûŋ ɨ gvì nɨ̀ ghès sɨ zuetɨ a nse ìyum afêyn nà sɨ ghɨ lvɨ̂yn kɨŋ sɨ nà yeʼtɨ ghes. ¹⁴Wà bu duʼ tɨ̀ zɨ nɨ̀ ghès ilaʼ ɨfwo ɨ yɨnɨ ɨ koʼ ateyn nô a jûŋ, bu duʼ tɨ̀ fu gveynsɨ ɨfwo ɨ yɨnɨ nɨ̀ gveynsɨ mɨtàmsɨ ta ka ghès na kelɨ-a. Ka wa n-fì lɨ̀sɨ ghès, ghès nɨn gvî wì.” ¹⁵Mosìs ɨ yvɨ iwo ateyn i ɨ nyòʼsɨ̀ ɨ̀toŋ nô sɨ a ŋaŋ ɨ bè sɨ̂ Bôbo Fɨyini na, “Ka n-fsɨ ifu i àŋena. Ma bû bèbsɨ ìwo sɨ̂ àŋena, ɨ̀ faŋ tɨ̀ fsɨ njàkâs sɨ̂ wul sɨ ateyn.”

¹⁶Mosìs nɨ̀n fi meyn be sɨ̂ Kolà na, “Zɨ̂ ghelɨ̀ ghya nô ghɨ̀ jɨ̀m nɨn kelɨ sɨ bɨs sɨ gvì asɨ nɨ̀ Bôbo Fɨyini. Alòyn læ̀ nà ghɨ kɨmɨ zɨ̂ àŋena. ¹⁷Nô mɨ ndà antêynɨ̀ nɨ̀ ghelɨ ghya ghì ighɨ ì bò nɨ̀ ghelɨ mɨ̀vɨm ɨ̀n tâyn nɨn kelɨ sɨ li akaŋ ileŋ sɨ we ileŋ ateyn sɨ gvi nɨ̀ ànkeyna asɨ nɨ̀ Bôbo Fɨyini. Zɨ̂ Alòyn nɨ̀n kelɨ sɨ gvi kɨmɨ nɨ̀ ɨ̀kfaŋ ileŋ nɨ̀ zɨ̀.” ¹⁸Àŋena nô ghɨ̀ jɨ̀m ɨ kæ li ɨkfaŋ ileŋ nɨ̀ àŋena sɨ we ɨkfêtɨ̀ ɨvɨ̀s ateyn nɨ̀ ìleŋ i sɨ timi ɨchfɨ fɨndo nɨ̀ Bôbo ŋêyn ghɨ̀ Mosìs nɨ̀ Alòyn. ¹⁹À nà ghɨ ta Kolà jàŋtɨ̀ meyn ghelɨ ŋweyn na ghɨ timi kèʼ Mosìs ŋêyn Alòyn ɨchfɨ fɨndo nɨ̀ Bôbo, iŋwâʼ i Bôbo Fɨyini ɨ fvɨ asɨ nɨ̀ ghelɨ Isìlæ nô ghɨ̀ jɨ̀m. ²⁰Bôbo Fɨyini ɨ bè sɨ̂ Mosìs ŋêyn Alòyn na, ²¹“Yì kɨŋtɨ sɨ a ngùŋ nɨ̀ ghelɨ ghèyn mà mesi àŋena kɨ̀ ɨlvɨ ɨ̀mòʼ.”

²²Mɨtì Mosìs ŋêyn Alòyn ɨ fe ɨ kfɨsɨ àkêʼ a nse ɨ nà dzɨ-à bê na, “À n-fu và ichi sɨ̂ ghelɨ ghɨ̀ jɨ̀m a Fɨyini. A ti bè na wùl ɨ̀ mòʼ nɨn nì mbɨ wà nyoʼsɨ ɨtoŋ kɨ̀ sɨ̂ ghelɨ ghɨ̀ jɨ̀m a?”

²³Bôbo Fɨyini ɨ kæ bè sɨ̂ Mosìs na, ²⁴“Bè sɨ̂ ghelɨ ghɨ̀ jɨ̀m na àŋena lu sɨ a ngùŋ ɨ̀twò nɨ̀ Kolà ɨ̀ lù sɨ a ngùŋ ɨ̀two nɨ̀ Datàn ɨ̀ lù kɨ̀mɨ sɨ ateyn nɨ ɨwu Abilàm.”

²⁵Bôbo nɨn bè tî, Mosìs ɨ lali kɨ ɨlvɨ nâ ghè ɨ nyɨŋ ndù ɨchfɨ ɨtwò nɨ̀ Datàn ŋêyn Abilàm. Wù nà n-ndû tî chyeʼsɨ Isìlæ̀sɨ̀ ɨ ndû a ŋweyn ibàm. ²⁶Wu n-dù tî ɨ bè sɨ̂ ghelɨ na, “Yì lù sɨ a ngùŋ mɨ̀two nɨ̀ ghelɨ ghɨ bɨ ghèyn. Ka wùl nɨ kùm àfo a àŋena. À kùm nô mɨ ndà a wù kfɨ bòm mbɨsɨ àŋena.” ²⁷Wu n-bè tî, ghelɨ ghɨ̀ jɨ̀m ɨ lù sɨ a ngùŋ ɨ̀twò nɨ̀ Kolà ɨ lù sɨ a ngùŋ ɨ̀twò nɨ̀ Dotàn ɨ lu kɨmɨ sɨ ateyn nɨ ɨwu Abilàm. À nà n-ghɨ tì ma Datàn ŋêyn Abilàm fvɨ meyn ɨ̀ tìmi achfɨ̀ a mɨ̂twò nɨ̀ àŋena nɨ̀ ghɨ̀ki àŋena baʼsɨ̂ nɨ̀ woyn àŋena ghɨ lema nɨ̀ ghɨ telâ.

²⁸Mosìs ɨ bè sɨ̂ àŋena na, “A ti ta yi n-kelɨ na Bôbo Fɨyini tum meyn mà na mà na nî àwu nâ kèynà, na mɨ n-nî wì sɨ a ma ngeŋ. ²⁹Ghelɨ nâ ghèyn kæ boynɨ kfɨ kɨ ta nô mɨ ndà nɨn kelɨ sɨ kfɨ, a à na ghɨ bula Bôbo Fɨyini tum mà. ³⁰Mɨtì ma Bôbo Fɨyini ti kæ ni iwo ifɨ-i nse mzɨ̂ àŋena baʼsɨ̂ nɨ̀ ɨ̀fwo àŋena nô ɨ̀ jɨ̀m, àŋena zɨ kàlì ilaʼ i nse ghɨ to, a yì kæ keli na ghelɨ ghèyn to meyn nɨ̀ àtu a sɨ̂ Bôbo Fɨyini.”

³¹Mosìs nà n-taŋî mesì gvî kɨ tèyn nse ɨ kaʼa alèʼ ghè a àŋena nà n-ti ateyn, ³²ɨ yema ɨ mzɨ̀ àŋena nɨ̀ ghelɨ ndo nɨ̀ àŋena nô ghɨ̀ jɨ̀m nɨ̀ tɨ̀bam tɨ Kolà tìtɨ̀ nô tɨ̀ jɨ̀m baʼsɨ̂ nɨ̀ ɨ̀fwo àŋena. ³³Àŋena sœ kàli a nse kɨ̀ ghɨ to baʼsɨ̂ nɨ̀ ɨ̀fwo àŋena nô ɨ̀ jɨ̀m. Nse ɨ chɨl àŋena, àŋena ɨ lè sɨ antêynɨ̀ nɨ̀ ghelɨ Isìlæ̀. ³⁴Àŋena nà n-sœ̂ kalì-à dzɨ-à, ghelɨ ghì a ghɨ nà n-ti afu ɨ làli kɨ nɨ̀ ìnyɨŋ i ɨ nà byala bê na, “Nse àteyn nɨn boŋ mzɨ̀ ghès.”

³⁵Bôbo Fɨyini nɨn læ meyn nì ɨvɨsɨ nyòʼlɨ̀ ghelɨ ghì ighɨ ì bò nɨ̀ ghelɨ mɨ̀vɨm ɨ̀n tâyn a ghɨ nà n-nyôʼ ileŋ sɨ ifu sɨ̂ Bôbo Fɨyini tì.

³⁶Bôbo Fɨyini ɨ bè sɨ̂ Mosìs na, ³⁷“Bè sɨ̂ Elezà ɨ wâyn Alòyn ɨ ngàŋ ndô Fɨyini na wù fvɨsɨ ɨkfaŋ vzɨ̀ a ghɨ nyòʼ ileŋ ateyn sɨ ichɨ bòm ta ɨkfaŋ ateyn nɨn layna. Be kɨmɨ na wù ndu sfɨ̀s ɨkfêtɨ̀ ɨvɨ̀s vzɨ̀ a wu fàŋ ateyn tì nô a ndyèyn. ³⁸Lì ɨkfaŋ ɨ ghelɨ ghèyn a ghɨ kfɨ̀tɨ bom mbɨsɨ àŋena têyn ɨ leŋ mamtɨ ɨ chɨl abaŋ ifu ateyn bòm ta àŋena ni meyn gvì nɨ̀ ɨ̀kfaŋ ateyn asɨ nɨ̀ Bôbo tî wu na sɨ layna. Ghɨ n-chɨl àbaŋ ateyn, a à nà ghɨ nchwæ sɨ̂ ghelɨ Isìlæ̀.”

³⁹Elezà ɨ ngàŋ ndô Fɨyini ɨ kæ kumtɨ ɨkfaŋ ghelɨ ghì a ghɨ fɨ̀ tî, a ghɨ ɨ̀kfaŋ ma ghɨ faytɨ nɨ̀ ìdyayn i sɨ leŋ sɨ mamtɨ sɨ chɨl abaŋ ifu ateyn. ⁴⁰Wù n-læ ni kɨ ighel ta Bôbo Fɨyini nɨ̂n bè sɨ̂ Mosìs. Iwo nâ yèyni na ghɨ sɨ a nfàsì-nfàsì sɨ̂ ghelɨ Isìlæ na ka wùl ɨ̀ læ̂ fì zɨ a fɨndo nɨ̀ Bôbo sɨ fu ifu sɨ̂ Bôbo Fɨyini nɨ̀ ìleŋ i nyoʼnɨ-i, a ghɨ wi wul ìsas i ndo nɨ̀ Alòyn.

⁴¹Mɨtì ɨtuʼ ɨ bɨs layn, ghelɨ Isìlæ̀ nô ghɨ̀ jɨ̀m ɨ na sɨ fì dɨ̂mlɨ̀ kûm Mosìs ŋêyn Alòyn bê na, “Yi zuetɨ meyn ghelɨ Bôbo Fɨyini.”

⁴²A nà ghɨ ta ghelɨ Isìlæ̀ nô ghɨ̀ jɨ̀m bàʼtɨ sɨ keʼ Mosìs ŋêyn Alòyn, àŋena bèynlɨ̀ ɨ nà ki ndûsɨ̀ dzɨ abàs a fɨndo nɨ̀ Bôbo ɨ yeyn ma mbàʼsɨ chɨytɨ meyn fɨ̀ndo fɨ ateyn, iŋwâʼ i Bôbo Fɨyini ɨ bayn asɨ nɨ̀ àŋena. ⁴³Mosìs ŋêyn Alòyn ɨ kæ kɨŋtɨ sɨ ndù sɨ timi ɨchfɨ fɨndo nɨ̀ Bôbo Fɨyini. ⁴⁴Bôbo Fɨyini ɨ bè sɨ̂ Mosìs na, ⁴⁵“Yì lu sɨ a ngùŋ nɨ̀ ghelɨ ghèyn mà mesi àŋena kɨ̀ ɨlvɨ ɨ̀mòʼ.” Àŋena ɨ fe ɨ kfɨsɨ àkêʼ a àŋena a nse.

⁴⁶Mosìs ɨ bè sɨ̂ Alòyn na, “Nyàŋsɨ ndu li akaŋ ileŋ nɨ̀ và ɨ chuf ɨvɨ̀s abaŋ ifu ɨ we ateyn ɨ we kɨmɨ ìleŋ ɨ ndù alèʼ ghè a ghɨ bɨ̀ ateyn sɨ yuyn ɨtu ghêl bòm mbɨsɨ àŋena. Bôbo Fɨyini nyoʼsɨ meyn ɨ̀toŋ sɨ̂ àŋena nô sɨ a ŋaŋ ikoʼi i bemnɨ-i zɨtɨ̀ meyn sɨ ku àŋena.” ⁴⁷Alòyn ɨ ni kɨ ta Mosìs bè ɨ lì àkaŋ ileŋ ateyn ɨ nyɨŋ zɨ nɨ̀ ànkeyna antêynɨ̀ nɨ̀ ghelɨ Isìlæ̀. Wu n-se sɨ ndu tî ɨ yeyn ma ikoʼi i bemnɨ-i zɨtɨ meyn sɨ zuetɨ ghelɨ, Alòyn ɨ nyòʼ ìleŋ ateyn ɨ yuyn ɨtu àŋena. ⁴⁸Alòyn nɨn ndù tî ɨ timi antêynɨ̀ àntêynɨ̀ nɨ̀ ghelɨ ghì a ghɨ nà n-bu ghɨ to nɨ̀ ɨghî a ghɨ kfɨ̀tɨ meyn, ikoʼi ateyn i ɨ mæ kɨ mæ. ⁴⁹Mɨtì ghelɨ ɨ kfɨ nkam njvasɨ̀ kæ̀ nɨ̀ ghelɨ ighɨ nsòmbo bòm ìkoʼi i bemnɨ-i nâ yèynì sɨ baʼsɨ sɨ̂ ɨghî a ghɨ n-kfɨ bòm Kolà. ⁵⁰Ikoʼi ateyn i nɨ̂n mæ̀ mɨ ɨlvɨ gha, Alòyn ɨ kasi ndu yeyn Mosìs ɨchfɨ fɨndo nɨ̀ Bôbo.