Numbers 19

Mu mzɨ̀ a ghɨ n-sû ghelɨ ateyn na ghɨ na layna

¹Bôbo Fɨyini nɨn bê meyn sɨ̂ Mosìs ŋêyn Alòyn na, ²“À ti isaʼ i li ta Bôbo Fɨyini fu. Bè sɨ̂ ghelɨ Isìlæ̀ na, àŋena gvi nɨ̀ nyàm mbòloʼ iki ɨ̀ fù sɨ̂ và, yi kelɨ wi nseʼi bula ghɨ timi kul afo ɨtoŋ nɨ̀ nyeyn bàʼsɨ nɨ̀ ì lì na yì na felɨ̀-à. ³Ghɨ n-gvì nɨ̀ ɨ̀nyeyn a wà fu sɨ̂ Elezà ɨ ngàŋ ndô Fɨyini a ghɨ fvɨ nɨ̀ ɨ̀nyeyn sɨ alèʼ ghè a ghɨ bɨ̀ ateyn ɨ̀ sɨ a ŋweyn asɨ. ⁴Ghɨ sɨ, Elezà ɨ ngàŋ ndô Fɨyini ɨ lì mɨ̀luŋ mɨ̀ nyàm àteyn ɨ̀n lì ɨ mɨ̀sì dzɨ asɨ a fɨndo nɨ̀ Bôbo ìngal nsòmbo. ⁵Wù mɨsì-à, a ghɨ nyoʼ gvɨ̂ nyàm àteyn nɨ̀ njwò àteyn nɨ̀ mɨ̀lûŋ baʼsɨ̂ nɨ̀ ɨ̀fwo ɨlvà kɨ̀ a ŋweyn asɨ. ⁶Ngàŋ ndô Fɨyini ɨ nì lî àbâs a fɨ̂kàʼ fɨ sedà nɨ̀ ɨ̀fyas ɨ isòb baʼsɨ̂ nɨ̀ àmbyèyn a kɨ bɨ̂ylɨ̀ bâŋ baŋ ɨ̀ chɨ̀yntɨ̀ màʼ atû nyàm nâ ghè a ghɨ nyôʼ tî. ⁷Ghɨ n-mèsì-à a ngàŋ ndô Fɨyini na kelɨ sɨ su ndzɨsɨ ŋweyn sɨ sù ɨwuyn. Wu n-sù-à ɨ̀ kæ kasi sɨ zɨ alèʼ ghè a àŋena bɨ̀ ateyn. Wu n-zɨ̂ mɨtì nà layn wi ta isaʼi nɨn ndyêyn sɨ chem aleŋ ɨlvɨ ikfa. ⁸Wùl ɨ̀ vzɨ̀ a wù nyòʼ nyam àteyn nɨn kelɨ sɨ su kɨmɨ ɨ̀wuyn ŋweyn nɨ̀ ndzɨsɨ ŋweynsɨ. Wu n-sù mɨtì nà layn wi ta isaʼi nɨn dyêyn sɨ chem aleŋ ɨlvɨ ikfa.”

⁹“Wùl ɨ̀ vzɨ̀ a wù n-layn ta isaʼi nɨn dyêyn nɨn tafî àbvɨ a nyâm nâ kì a ghɨ nyòʼ tî ɨ̀ lèm alèʼ a laynɨ-a abe. Ghelɨ Isìlæ̀ nɨn lèmà nà wê a mu ɨlvɨ ta ghɨ n-sû ghelɨ na ghɨ na layna. ¹⁰Wùl ɨ̀ vzɨ̀ a wù tàfi abvɨ a nyâm nâ kì nɨn kelɨ sɨ su ndzɨsɨ ŋweynsɨ sɨ nà layn wi ta isaʼi nɨn dyêyn sɨ chem aleŋ ɨlvɨ ikfa. Isaʼ nâ yèyni faŋ meyn kɨ̀ samoʼ sɨ̂ ghelɨ Isìlæ̀ baʼsɨ̂ nɨ̀ ghelɨ ɨtum ghì a ghɨ n-chi a àŋena antêynɨ̀.

¹¹“À kæ kùm nô mɨ ndà igvɨyn i wûl a wù na layn wi ta isaʼi nɨn dyêyn sɨ a mɨchi nsòmbo. ¹²Wùl àteyn nɨn kelɨ sɨ su ɨwuyn ŋweyn a mɨnchi ɨ̀n tal sɨ fì sɨ sù a mɨchi nsòmbo sɨ kæ sɨ nà layn ta isaʼi nɨn dyêyn. Mɨtì ma wù kæ faŋ tɨ̀ sù a mɨ̀chi ɨ̀n tal ɨ̀ faŋ tɨ̀ sù a mɨchi nsòmbo a wù na layn wi ta isaʼi nɨn dyêyn. ¹³À kùm mɨ ndà igvɨyn i wûl ɨ̀ faŋ tɨ̀ sù ngêŋ ŋweyn sɨ nà layna ta isaʼi nɨn dyêyn a à na ghɨ ma wù bebsɨ meyn fɨ̀ndo fɨ Bôbo Fɨyini, a ghɨ na kelɨ sɨ fvɨ̀sɨ ŋweyn sɨ alèʼ ghè a ghɨ bɨ̀ ateyn bòm ta ghɨ bû mɨ̀sì ŋweyn nɨ̀ mu mzɨ̀ a ghɨ n-sû ghelɨ ateyn na ghɨ na layna.

¹⁴“Iyeynì nɨn ghɨ ìsaʼ zɨ̀ a yi n-kelɨ sɨ nà lemà ɨlvɨ ta wùl ɨ̀ kfɨ̀ ɨtwò. Wùl ɨ̀ kæ kfɨ ɨtwò wùl ɨ ghɨ ateyn kèsa wù kfɨ wùl ɨ̀ lû abe ɨ̀ zɨ ɨtwò nâ ghè, a wù na bu layn wi ta isaʼi nɨn dyêyn sɨ a mɨchi nsòmbo, ¹⁵a nô mɨ ghà ta kɨ n-ghɨ ɨtwò nà ghè bula ghɨ chɨytɨ na boŋ layn wi ta isaʼi nɨn dyêyn.

¹⁶“Wùl ɨ̀ kæ kùm igvɨyn i wûl a gvêyn ma ghɨ zue nɨ̀ fɨ̀nyuèfɨ kèsa wù kfɨ kɨ̀ nô kfɨ-a kèsa wù kùm àvɨf a wûl ma wù kùm ìsê a, a wù na layn wi ta isaʼi nɨn dyêyn sɨ a mɨchi nsòmbo.”

¹⁷“Ghɨ na kɨŋ sɨ su wul ta wù n-layn wi, ghɨ myèytɨ̀ àbvɨ a nyâm ìfu zɨ̀ a ghɨ nyòʼ tî ɨ we a bom i ghaʼnɨ ɨ̀ we mu ɨ̀nsaynɨ̂ atû àteyn. ¹⁸Ghɨ n-we tì a wùl ɨ̀ vzɨ̀ a wù n-layn ta isaʼi nɨn dyêyn na kelɨ sɨ li ɨfyas ɨ isòb sɨ chfɨ̀ a mu nâ ghè sɨ mɨ̀sì ɨtwo nâ vzɨ̀ ateyn nô mɨ nɨ̀ ghà ta kɨ n-ghɨ ateyn baʼsɨ̂ nɨ̀ ghelɨ ghì a ghɨ n-ghɨ ɨtwò nâ ghè. Wu n-mɨ̀sì kɨmɨ wul ɨ vzɨ̀ a wù kùm avɨf a wûl kèsa wù kùm ìsê kèsa wù kùm igvɨyn i wûl. ¹⁹Wùl ɨ̀ vzɨ̀ a wù n-layn nɨn kelɨ sɨ mɨ̀si mu nâ mèyn ɨwuyn nɨ̀ wùl ɨ̀ vzɨ̀ a wù n-layn wi a mɨchi ɨ̀n tal sɨ fì sɨ mɨ̀sì a mɨchi nsòmbo. À na ghɨ a mɨchi nsòmbo, a wùl ɨ̀ vzɨ̀ a ghɨ sù ŋweyn su ndzɨsɨ ŋweyn ɨ̀ sù ɨwuyn ŋweyn. Wu n-sù-à a à na ghɨ aleŋ ɨlvɨ ikfa a wù na layn ta isaʼi nɨn ndêyn. ²⁰Mɨtì wùl kæ nà layn wi ta isaʼi nɨn dyêyn ɨ̀ faŋ tɨ̀ su ngêŋ ŋweyn, a ghɨ na kelɨ sɨ saŋ sɨ fvɨ̀sɨ̀ ŋweyn sɨ a antêynɨ̀ nɨ̀ ghelɨ Isìlæ̀ bòm ta wù bebsɨ meyn fɨ̀ndo fɨ Bôbo Fɨyini. Yi n-ghɨ tì bòm ta ghɨ bu mɨ̀sì ŋweyn nɨ̀ mu mzɨ̀ a mɨ n-nî na wù na layn ta isaʼi nɨn dyêyn. ²¹Isaʼ nâ yèyni faŋ meyn kɨ̀ samoʼ sɨ̂ ghelɨ Isìlæ̀.

“Wùl ɨ̀ vzɨ̀ a wù n-mɨsì mu mzɨ̀ a ghɨ n-su ghelɨ ateyn nɨn kelɨ kɨmɨ sɨ su ndzɨsɨ ŋweyn. À kùm nô mɨ ndà mu mzɨ̀ a ghɨ n-su ghelɨ ateyn na ghɨ na layna, a wù na layn wi sɨ chem aleŋ ɨlvɨ ikfa. ²²Wùl kæ nà layn wi ta isaʼi nɨn ndyêyn ɨ̀ kùm àfo a afo ateyn a na layn wi, ma wùl ɨ̀ lvɨ̀ kæ kùm àfo ateyn a wù na layn wi sɨ chem aleŋ ɨlvɨ ikfa.”