Numbers 18

Ifêl i ngàŋsɨ ndô Fɨyini nɨ̀ ìfêl i ghelɨ ndo nɨ̀ Levì

¹Bôbo Fɨyini nɨ̀n læ meyn bè sɨ̂ Alòyn na, “À nì bèbsɨ nô mɨ ndà iwo a fɨndo nɨ̀ Bôbo a ngeʼ àteyn fe kɨ̀ a wa atu zɨ̂ woyn ghya baʼsɨ̂ nɨ̀ ghelɨ ndo nɨ̀ bò vâ. Wùl ɨ̀ kæ nì bèbsɨ ìwo antêynɨ̀ àwo ghè a ngàŋsɨ ndô Fɨyinisɨ̀ nɨn kelɨ sɨ nì, a ngeʼ àteyn fe kɨ̀ atu nɨ̀ zɨ̂ woyn ghya. ²Lì ghelɨ ndo nɨ̀ Levì ma à ti ghelɨ ndo nɨ̀ ghɨ̀bo ghya àŋena na gâmtɨ̀ và zɨ̂ woyn ghya ɨlvɨ ta yi nî ifêl a fɨndo nɨ̀ Bôbo. ³Àŋena na nî ìfêl zɨ̀ a wà fù sɨ̂ àŋena fî nî nô mɨ ìfêl ì kà a fɨndo nɨ̀ Bôbo, mɨtì ka wùl sɨ̂ àŋena na ndû baʼsɨ̂ a ngùŋ ɨ̀fwo ɨ laynɨ kèsa a ngùŋ àbaŋ ifu, bu tì a zɨ̂ àŋena kfɨtɨ kɨ ghɨ̀ jɨ̀m. ⁴Àŋena nɨn kelɨ sɨ nà gâmtɨ vâ, tôʼnɨ̀ nɨ̀ fɨndo fɨ Bôbo fɨ mɨtì ka wùl ɨ wûlù nɨ̂n gvì sɨ gàmtɨ zɨ ifèl ghè a yi n-felɨ̀.”

⁵“Yi n-kelɨ sɨ nà tôʼnɨ̀ nɨ fɨ̀ndo fɨ nɨ̀ Bôbo Fɨyini fɨ̀ nɨ̀ àbaŋ ifu a. Yì na nì tèyn ta ka mà læ̂ faŋ tɨ̀ fì tɨ̀ nyòʼsɨ ɨ̀toŋ sɨ̂ ghelɨ Isìlæ̀. ⁶À choʼ kɨ̀ nô mà ghelɨ ndo nɨ̀ Levì antêynɨ̀ nɨ̀ ghelɨ Isìlæ̀ na àŋena na ghɨ sɨ a nyɨŋ sɨ̂ Bôbo Fɨyini. Àŋena nɨn ghɨ ta ifu ta mà fù sɨ̂ zɨ̀ na àŋena na gâmtɨ̀ zɨ̀ felɨ̀ a fɨndo nɨ̀ Bôbo.”

⁷“Mɨtì à n-kelɨ kɨ sɨ nà felɨ vâ zɨ̂ woyn ghya ta ngàŋsɨ ndô Fɨyini kûm nô mɨ ìfêl ì kà ta ghɨ n-kelɨ sɨ nì abaŋ ifu nɨ̀ àlêʼ kì a kɨ layn gòʼsɨ̀. Mɨ n-fu ìfêl i ngàŋ ndô Fɨyini nâ yèynì sɨ̂ zɨ̀ sɨ ifu. Wùl ɨ wû lù kæ ndù bàʼsɨ a ngùŋ alèʼ a laynɨ-a a ghɨ na kelɨ sɨ zue ŋweyn.”

Ifu zɨ̀ a ghɨ n-fu sɨ̂ ngàŋsɨ ndô Fɨyini nɨ̀ ghelɨ Levì

⁸Bôbo Fɨyini nɨn fi meyn bè sɨ̂ Alòyn na, “Ma lem meyn và atû tɨ̀fu tɨ laynɨ ghê a ghelɨ Isìlæ̀ nɨn gvî nɨ̀ ɨ̀nteyntɨ sɨ̂ mà. Ma fu meyn tɨ̀fu tɨ laynɨtɨ nô tɨ̀ jɨ̀m ta ghelɨ Isìlæ̀ nɨn gvî nɨ̀ ɨ̀nteyntɨ sɨ̂ mà sɨ̂ và zɨ̂ woyn ghya na à na lum kelɨ kɨ zɨ̀. ⁹Ɨbyâs ɨ Tɨfu tɨ laynɨ tìtɨ̀ a ghɨ faŋ tɨ̀ nyòʼ, kèsa à ghɨ ìfu ɨfwo ɨ yɨnɨ ma ifu na Bôbo Fɨyini lesɨ fù mbɨ, kèsa à n-ghɨ ìfu sɨ dyèyn na wùl ɨ̀ ni meyn mbɨ, nɨn kelɨ và zɨ̂ woyn ghya. ¹⁰Yi n-kelɨ sɨ nà yɨ ifu i laynɨ-i nâ yèynì alèʼ a laynɨ-a, a yɨ kɨ ghɨ̀lûmnɨ̀, kelɨ sɨ nà lî na wu n-layn kfeynɨ-à.

¹¹“À na kelɨ kɨmɨ và nô mɨ ìfu ì kà ta ghelɨ Isìlæ̀ fu ghɨ làysɨ̀ iyvɨ sɨ ifu sɨ̂ mà, ma fu meyn sɨ zɨ̂ woyn ghya ghɨ lûmnɨ̀ nɨ̀ ghɨki kɨ̀ samoʼ, nô mɨ wul ɨ̀ ndo nɨ̀ và ɨ̀ kfa ta wù n-layn kfeynɨ ta isaʼi nɨn dyêyn kàʼ a wù yɨ ifu nâ yèynì.

¹²“Mɨ n-fu mɨ̀vɨl mɨ̀ olìfsɨ̀ ɨ̂n jùŋ nô ɨ̀n jɨ̀m nɨ̀ mɨ̀lùʼ ɨ̀n jùŋ baʼsɨ̂ nɨ̀ ifu ɨfwo ɨ yɨnɨ zɨ̀ a ghɨ n-fu sɨ̂ Bôbo Fɨyini sɨ a mɨtam mɨ̀ àsɨ sɨ̂ zɨ̀. ¹³Mɨ̀tam mɨ̀ àsɨ nô ɨ̀n jɨ̀m ta àŋena kfì a àŋena gvêynsɨ̀ fù sɨ ifu sɨ̂ Bôbo Fɨyini nɨn kelɨ và, ma nô mɨ wul ɨ̀ ndo nɨ̀ và ɨ̀ kfà ta wu n-layn kfeynɨ ta isaʼi nɨn dyêyn kàʼ a wù yɨ ɨfwo nâ wèyn.

¹⁴“Nô mɨ ghà a Isìlæ̀ ta kɨ n-ghɨ ma ghɨ fu meyn sɨ a nyɨŋ sɨ̂ Bôbo Fɨyini kɨ̀ samoʼ nɨ̀n kelɨ và.” ¹⁵Nô mɨ wayn àsɨ ɨ̀ kfà a Isìlæ̀ ta ghɨ fù sɨ̂ Bôbo Fɨyini kèsa à n-ghɨ wâyn wùl ma wayn nyàm a nɨn kelɨ và. Mɨtì wa kelɨ sɨ fsɨ ɨkwo vzɨ̀ a ghɨ n-kasi yuyn atu a wayn ɨ lûmnɨ̀ ɨwû àsɨ nɨ̀ ɨvzɨ̂ a ghɨ n-kasi yuyn atu a wâyn nyàm ɨ lûmnɨ̀ ɨ yî àsɨ zɨ̀ a yì n-layn wi ta isaʼi nɨn dyêyn. ¹⁶Wàyn ɨ lûmnɨ̀ na chem njoŋ, ghɨ kasi yuyn atu a ŋweyn nɨ̀ àso ɨkwo a fɨfâ kɨ chem ndû kilù kɨ̀ ta ɨfyêʼ ɨ ndô Fɨyini nɨn dyêyn.

¹⁷“Wà n-kelɨ wi sɨ fsɨ ɨkwo vzɨ̀ a ghɨ n-kasi yuyn atu a wâyn mbòŋ ɨ wû àsɨ nɨ a kɨ njɨ̀-à kèsa a kɨ bzɨ ndoŋ a bòm ta sɨ n-layna. Mɨ̀si mɨluŋ mɨ̀ àteyn atû àbaŋ ifu ɨ nyòʼ ìso ateyn sɨ̂ Bôbo Fɨyini a ghɨ ìfu ghɨ nyôʼ nyoʼ yi lɨ̂mtɨ̀ fom sɨ̂ ŋweyn. ¹⁸Njwò nyàmsɨ̀ ateyn na kelɨ và kɨ ighel ta wà n-kelɨ nkumtɨ nyàm nɨ̀ àbî ɨkœ ɨ two kì a ghɨ n-lâysɨ̀ sɨ ifu, fî kelɨ àbî ɨkœ ɨ two nɨ̀ nyàm zɨ̀ a ghɨ fù sɨ ifu. ¹⁹Mɨ n-fu tɨ̀fu tɨ laynɨ nâ tèyntɨ̀ a ghelɨ Isìlæ̀ nɨn fu sɨ̂ mà nô tɨ̀ jɨ̀m sɨ̂ và zɨ̂ woyn ghya ghɨ lûmnɨ̀ nɨ ghɨki na à na lum kelɨ kɨ zɨ̀. À n-ghɨ mɨ̀kâyn ma mɨ̀ faŋ meyn kɨ̀ samoʼ asɨ nɨ̀ Bôbo Fɨyini sɨ̂ và zɨ̂ woyn ghya.”

²⁰Bôbo Fɨyini nɨ̀n bê meyn sɨ̂ Alòyn na, “Wà læ̀ nà kelɨ wi alêʼ a Isìlæ̀, kelɨ wi afo antêynɨ̀ ɨ̀fwo nɨ̀ àŋena. Mɨ n-ghɨ nô mɨ ghà vzɨ̀ a wà n-kɨŋ sɨ nà kelɨ-a.”

²¹“Ma fu meyn àfo àmòʼ antêynɨ̀ ɨ̀fwo ìvɨm ɨfwo nɨ̀ ghelɨ Isìlæ̀ sɨ̂ ghelɨ ndo nɨ̀ Levì bòm ìfêl zɨ̀ a àŋena nɨn felɨ̀ a fɨndo nɨ̀ Bôbo na à na kelɨ àŋena. ²²Sɨ zɨ̀tɨ layn sɨ ndù asɨ, ka wùl ɨ̀ Isìlæ̀ nɨn læ̀ kɨ̀ŋtɨ bàʼsɨ a ngùŋ fɨ̀ndo nɨ̀ Bôbo bu tì a wù keli ngeʼ ɨ̀ kfɨ bòm mbɨ. ²³À n-kelɨ sɨ nà felɨ kɨ ghelɨ ndo nɨ̀ Levì a fɨndo nɨ̀ Bôbo, ma à bèf mɨ ghà afu a ngeʼ àteyn na ghɨ kɨ atu nɨ̀ àŋena. Isaʼ nâ yèyni faŋ meyn kɨ̀ samoʼ sɨ̂ ɨ̀jwâŋ vzɨ̀ a wu læ̀ koʼ ibàm. Àŋena læ̀ nà kelɨ wi alêʼ antêynɨ̀ nɨ̀ ghelɨ Isìlæ̀. ²⁴Mà kwo fu afo àmòʼ antêynɨ̀ ɨ̀fwo ìvɨm ɨfwo nɨ̀ ghelɨ Isìlæ̀, sɨ̂ ghelɨ ndo nɨ̀ Levì, a ghɨ ìfu zɨ̀ a ghelɨ Isìlæ̀ nɨn fu sɨ̂ mà. À ti iwo zɨ̀ a mà bè na àŋena nɨn kelî wi alêʼ antêynɨ̀ nɨ̀ ghelɨ Isìlæ̀.”

²⁵Bôbo Fɨyini nɨn fi meyn bè sɨ̂ Mosìs na, ²⁶“Bè sɨ̂ ghelɨ ndo nɨ̀ Levì na, ‘Yi fsɨ àfo àmoʼ àmòʼ antêynɨ̀ ɨ̀fwo ìvɨm nɨ̀ ghelɨ Isìlæ̀ ghè a mà fù na à na kelɨ kɨ nô zɨ̀, yi chɨ̀yntɨ gwòtɨ̀ ɨlwêʼ ìvɨm ɨ fu alêʼ àmòʼ sɨ ifu sɨ̂ Bôbo Fɨyini. ²⁷Yi n-fu-a a yi na ghɨ kɨmɨ ta ifu ɨfwo ɨ yɨnɨ-i zɨ̀ a ghelɨ Isìlæ̀ nɨn nî ghɨ fu ɨlvɨ ta ghɨ lèŋ asaŋ kèsa mɨlûʼ mzɨ̀ a ghɨ kàm a mɨtàm ghê a mɨ̀ kfa a gvêynsɨ̀ nɨ̀ àŋena. ²⁸À ti ta yi n-kelɨ sɨ nà fu kɨmɨ ìfu sɨ̂ Bôbo Fɨyini nɨ̀ àfo àmòʼ antêynɨ̀ ɨ̀fwo ìvɨm ghè a ghelɨ Isìlæ gvì nɨ̀ ɨ̀ŋweyn sɨ ifu. Abâs ifu nâ kèyna nɨn ghɨ ìfu sɨ a nyɨŋ sɨ̂ Bôbo, yi kelɨ sɨ fu sɨ̂ Alòyn ɨ ngàŋ ndô Fɨyini. ²⁹Antêynɨ̀ ɨ̀fwo ghè a ghɨ n-fu sɨ̂ zɨ̀ nô ɨ̀ jɨ̀m, yi n-kelɨ sɨ fu ɨvzɨ̂ a wu n-jôf nô a jûŋ fî layna sɨ̂ Bôbo Fɨyini.’”

³⁰“Be kɨmɨ sɨ̂ ghelɨ ndo nɨ̀ Levì na, ‘Yi na fu ɨ̀fwo vzɨ̀ a wu n-jôf nô a jûŋ sɨ̂ Bôbo Fɨyini, yi na ghɨ kɨmɨ ta ifu ɨfwo ɨ yɨnɨ-i zɨ̀ a ghelɨ Isìlæ̀ nɨn nî ghɨ fu ɨlvɨ ta ghɨ lèŋ asaŋ kèsa mɨlûʼ mzɨ̀ a ghɨ kàm a mɨtàm ghê a mɨ̀ kfa a gvêynsɨ̀ nɨ̀ àŋena. ³¹Zɨ̀ ghelɨ ndo nɨ̀ Levì na fu-a, a nà ghɨ ma yì kàʼ a yì yɨ abes ateyn nô mɨ wo bòm ta à n-ghɨ ɨ̀mwaʼtɨ ifèl nɨ̀ zɨ̀ a fɨndo nɨ̀ Bôbo. ³²Yì kæ nà fu ɨ̀fwo ɨ jûŋ sɨ̂ Bôbo Fɨyini, a yì faŋ tɨ̀ bèbsɨ ifu laynɨ-i nɨ̀ ghelɨ Isìlæ̀ ɨ̀ faŋ tɨ̀ kfɨ̀tɨ.’”