Numbers 22

Fòyn Mowàb ɨ tum jàŋ Balàm

¹Ghelɨ Isìlæ̀ nɨn jelɨ meyn ɨ ndu ibal i Mowàb ɨ bɨ̀ a mbæ̀ jvà Jodàn abàs ghè a ɨchfɨ-iyvɨ nɨn sal ateyn injɨyn i Jèlikò.

²Fòyn Mowàb ɨ wâyn Zibò nà n-ghɨ ma wù yeyn meyn nô mɨ ghà ta ghelɨ Isìlæ̀ nì sɨ̂ ghelɨ Amòn. ³Balàk ɨ yeyn na ghelɨ Isìlæ̀ nɨn dvɨ-à, ŋêyn ghelɨ ŋweyn ɨ nà fâyn nô sɨ a ŋaŋ.

⁴Ghelɨ Mowàb ɨ bè sɨ̂ chyeʼsɨ Midìyànsɨ̀ na, “Ghelɨ ghèyn a ghɨ n-dvɨ̂ têyn nɨn bebsɨ nô mɨ ghà a ghesɨ̀nà a ngùŋ kɨ̀ ta mbòŋsɨ nî sɨ kfɨl afûʼ ɨtwaʼ.”

Àŋena nɨn bè tî Balàk ɨ fòyn Mowàb vzɨ̀ a wu nà n-saʼ ɨtuʼ nâ ghè, ⁵ɨ tum ghelɨ ntum na àŋena ndu jàŋ Balàm ɨ wâyn Beyò. Wu nà n-chi a Betòl a mbæ̀ jvà Yuflèt a àŋena ilaʼ. Àŋena ɨ ndù bè sɨ̂ Balàm na,

“Ghelɨ ghɨ li lu meyn a Ijìb dvɨ̂ kɨ tèyn ɨ gvì bɨ̀ a ma a ngùŋ kɨŋ sɨ fsɨ nsê ghes. ⁶Àŋena nɨn to chwò mà, gvi kɨ lvɨ̂yn ɨ̀ màʼ ngeʼ a àŋena atu ɨlvɨ fili a ghesɨ̀nà tɨm yɨ àŋena ɨ̀ sàŋ fvɨ̀sɨ̀ àŋena sɨ ilaʼ afêyn. Mɨ n-kya na wà kæ boysɨ wul a wùl àteyn na kelɨ ìboysɨ ɨ̀ màʼ ngeʼ a wùl atu a wù keli ngeʼ.”

⁷Chyeʼsɨ Mowàbsɨ̀ nɨ̀ chyeʼsɨ Midìyànsɨ̀ ɨ lì ɨ̀kwo sɨ ndù sɨ laʼ Balàm ateyn na wù maʼ ngeʼ atu nɨ̀ ghelɨ Isìlæ̀, àŋena ɨ ndù ɨ làʼì ntum zɨ̀ sɨ̂ Balàm a Balàk nì tum àŋena nɨ̀ ɨ̀nyeyn.

⁸Balàm ɨ bè sɨ̂ àŋena na, “Yì chi ɨtuʼ layn mà feʼtɨ iwo zɨ̀ a Bôbo Fɨyini bè na mà be sɨ̂ zɨ̀.” Chyeʼsɨ Mowàb nâ sìsɨ̀ ɨ kæ chi ŋêyn Balàm.

⁹A ni nà ghɨ nɨ̀ntuʼ, Fɨyini fɨ ɨ gvì ɨ bɨf sɨ̂ Balàm nâ, “À ghɨ ghɨ̀ ndà ghêyn a zɨ̂ àŋena nɨn ghɨ têyn a?”

¹⁰Balàm ɨ bè sɨ̂ Fɨyini fɨ na, “À tùm Balàk ɨ wâyn Zibò ɨ̀ tùm na ghɨ gvi làʼì ntum sɨ̂ mà. ¹¹Wù bè na, ‘Ghelɨ lu meyn a Ijìb gvì lùyn a yi ilaʼ na mà gvi mà ngeʼ atu nɨ̀ àŋena ɨlvɨ fili a yì tɨm yɨ̀ ghelɨ ateyn ɨ̀ sàŋ a àŋena lu.’”

¹²Mɨtì Fɨyini fɨ ɨ bè sɨ̂ Balàm na, “Ka ndù zɨ̂ àŋena. Wà n-kelɨ wi sɨ màʼ ngeʼ atu nɨ̀ ghelɨ nâ ghì bòm ta ma boysɨ meyn àŋena.”

¹³Ɨtuʼ ɨ layn, Balàm ɨ bè sɨ̂ ghelɨ ntum nɨ̀ Balàk ghì na, “Yì kasi nà ndû sɨ a yi ilaʼ. Bôbo Fɨyini tuynsɨ meyn na ka mɨ n-dù.”

¹⁴Chyeʼsɨ Mowàb nâ sìsɨ̀ ɨ kæ kasi sɨ ndù sɨ be sɨ̂ Balàk na, “Balàm tuynsɨ meyn na yi n-gvì wì.”

¹⁵Fòyn Balàk ɨ fi tum ghelɨ ntum ghɨ li àŋena dvɨ̂ chwô ɨghî a wù tî tùm sɨ asɨ, a ghɨ nô ghelɨ ghɨ to. ¹⁶Àŋena ndu bè sɨ̂ Balàm na,

“Balàk ɨ wâyn Sibòl bè na yi n-chwotɨ̂ na ka iwo i li nɨ̂n tàysɨ̀ và na ka wà gvi yèyn ŋweyn. ¹⁷Mɨ n-faytɨ̂ lâʼ kɨ nô laʼ vâ, ɨ̀ nì nô mɨ ghà ta wà bè na mà ni. Gvi màʼ ngeʼ atu nɨ̀ ghelɨ nâ ghèyn sɨ̂ mà.”

¹⁸“Mɨtì Balàm ɨ bè sɨ̂ àŋena na Balàk kæ fu nô mɨ ntoʼ ŋweyn sɨ̂ mà, ma yì luyn meyn nɨ̀ àso ɨkwo a fɨfâ nɨ̀ a baŋnɨ-a, ma bû to nɨ̀ àtu a sɨ̂ Bôbo Fɨyini ɨ Fɨyini femfɨ. ¹⁹Wu bè na yì chi kɨ̀ ta ghelɨ ɨ ghɨ asɨ ghì tî chi, mà yvɨ na Bôbo Fɨyini nɨn fì bê na gha sɨ̂ mà a.”

²⁰A ni nà ghɨ nɨ̀ntuʼ Fɨyini fɨ ɨ bè sɨ̂ Balàm na, “Ta ghelɨ ghèyn gvì sɨ li vâ, ndù zɨ̂ àŋena mɨtì ɨ ni kɨ iwo zɨ̀ a mà bè.”

Balàm nɨ̀ njàkâs ŋweyn

²¹Ɨtuʼ nɨn layn meyn, Balàm ɨ làlì ɨ zɨ̀sɨ̀ àchɨ a njàkâs nɨ̀ ŋweyn ŋêyn ghelɨ ntum nɨ̀ fòyn Mowàb ghì ɨ lu nà sɨ ndù-à. ²²Balàm nà n-ndû mɨ tì, Fɨyini fɨ ɨ nyôʼsɨ̀ ɨ̀toŋ sɨ̂ ŋweyn ɨ tum nchì Bôbo Fɨyini yi timi a dzɨ ɨ nà kɨ̂ŋtɨ̀ na ka Balàm chwo. Balàm nà n-ndû atû nyàm, ghelɨ ghɨ felɨnɨ nɨ̀ ŋweyn ɨ gvî a ibàm ghɨ̀ bò. ²³A nà ghɨ ta njàkâs Balàm yeyn nchì Bôbo Fɨyini yi ti a dzɨ nɨ̀ ìfo ì awu, njàkâs àteyn ɨ bɨ̀ ɨ zɨ dzɨ ɨtwaʼ, Balàm ɨ leŋ na yì kasi fvɨ̀ a dzɨ.

²⁴Nchì Bôbo Fɨyini ɨ kæ timi a fɨ̂dzɨ̀tɨ̂ fɨ lifɨ a fɨ nà n-chwô antêynɨ̀ gvèynsɨ mɨtàm ma ghɨ tɨm meyn mbàyn kɨ̀ ɨbyâs ɨ̀ jɨ̀m. ²⁵Njàkâs nâ zɨ̀ ɨ yeyn nchì Bôbo Fɨyini yi ti a dzɨ yi yeʼtɨ ɨ kwòsɨ̀ àvɨ a Balàm ɨwuyn mbàyn, wu fi leŋ kfeynsɨ njàkâs àteyn nô sɨ a ŋaŋ.

²⁶Nchì Bôbo Fɨyini zɨ̀ ɨ fi kɨŋtɨ ndù asɨ alèʼ kɨ falî nô sɨ a ŋaŋ ma njàkâs àteyn kàʼ yi bû chwò ɨkœ ɨ two kèsa chwò ɨkœ nɨ̂nkœ̀. ²⁷A nà ghɨ ta njàkâs àteyn fì yèyn nchì Fɨyini nâ zɨ̀, yi nyɨ̀ŋì a nse Balàm ɨ ghɨ atu àteyn, wu nyòʼsɨ̀ ɨ̀toŋ ɨ leŋ njàkâs àteyn nɨ̀ mbàŋ ŋweyn. ²⁸Bôbo Fɨyini ɨ kæ nì na njàkâs àteyn taŋi ɨ̀ bɨ̀f sɨ̂ Balàm na, “Mà bèbsɨ ghà sɨ̂ và wà leŋ mà têyn ìngal ì tal a?”

²⁹Balàm ɨ be sɨ̂ njàkâs nâ zɨ̀ na, “Wà nî meyn ma na kèʼ sɨ a àngù. Mɨ nà n-kelɨ fɨ̀nyuè a mà zue vâ lvɨ̂yn.”

³⁰Njàkâs àteyn ɨ bè sɨ̂ Balàm na, “Mɨ n-ghɨ njàkâs zyâ wa lum jelɨ̀ kɨ a ma atu sɨ koʼ sɨ chem layn. Ma timi meyn nì ìnkì iwo tèyn ta iyeynì sɨ̂ và a?”

Balàm ɨ bè na, “Wà bû tìmi nì.”

³¹Bôbo Fɨyini ɨ kæ yàsì asɨ a Balàm na wù yeyn nchì Bôbo Fɨyini yi ti a dzɨ kelɨ fɨ̀nyuè a ɨ̀nyeyn awu. Balàm nà n-yeyn gvî tèyn, ɨ fe kfɨsɨ ìkêʼ a nse asɨ nɨ̀ nchì Bôbo Fɨyini nâ zɨ̀.

³²Nchì Bôbo Fɨyini ɨ bɨf sɨ̂ ŋweyn na, “Wà leŋ njàkâs zyâ ìngal ì tal bòm ghà?” Nchì Bôbo Fɨyini ɨ fi bè sɨ̂ ŋweyn na, “Mà gvì sɨ tàmtɨ̀ na ka wa n-ndù bòm ta wà n-to nɨ̀ àtu a sɨ̂ mà. ³³Njàkâs zyâ yêyn meyn mà ìngal ì tal ɨ̀ leʼ bu tì ma ma nî meyn zuè vâ visi njàkâs àteyn.”

³⁴Balàm ɨ bè sɨ̂ nchì Bôbo Fɨyini nâ zɨ̀ na, “Ma nî meyn mbɨ, ma bû nì nà kya na à n-ti và a dzɨ kɨ̂ŋtɨ̀ na ka mà chwo. Mɨ n-kasi-à ɨlvɨ ta wà n-kôŋ wì na mà ndu afu.”

³⁵Mɨtì nchì Bôbo Fɨyini ɨ bè sɨ̂ Balàm na, “Ndù zɨ̂ ghelɨ̀ nâ ghèyn. Wà n-ndû wa be kɨ iwo zɨ̀ a mà bè na wà be. Balàm ɨ kæ ndu ŋêyn ghelɨ ntum nɨ̀ Balàk nâ ghì.”

³⁶A nà ghɨ ta Balàk yvɨ na Balàm nɨn gvî a dzɨ, wu fvɨ ndù sɨ kòynɨ ŋêyn ŋweyn a ntèʼ nɨ̀ ghelɨ Mowàb a mbæ̀ jvâ Alnòn ighami nɨ̀ Mowàb. ³⁷Balàk ɨ ndu kòynɨ̀ nɨ̀ Balàm ɨ bɨf sɨ̂ ŋweyn na, “Ma tî tùm ntum sɨ̂ và na wà nyaŋsɨ gvì, wà faŋ tɨ gvi kɨ gvi bòm gha? Wà tî nà kfâʼ na wa n-gvì-à a mà faŋ tɨ̀ fàytɨ tɨ̀ laʼ vâ ma?”

³⁸“Balàm ɨ bè sɨ̂ Balàk na, ‘Ma gvî meyn lvɨ̂yn sɨ yeyn vâ, mɨtì kelɨ wi iwo i ngeŋ nɨ̀ mà sɨ bè. Mɨ n-bè kɨ izɨ-ì a Bôbo Fɨyini bè na mà be.’”

³⁹Balàm ŋêyn Balàk ɨ kæ lù sɨ ndù a Kiliyat Huzòt. ⁴⁰Àŋena nɨn ndù tî, Balàk ɨ fu ifu nɨ̀ nyamsɨ mbòloʼsɨ nɨ̀ njɨ̀sɨ̀ ɨ sɨ fu ɨlwêʼ ɨ njwò ɨlvɨ sɨ̂ Balàm ŋêyn chyeʼsɨ Mowàb sìsɨ̀ a ŋêyn àŋena nà n-ghɨ amoʼ. ⁴¹Ɨtuʼ ɨ layn Balàk ɨ lì Balàm ŋêyn ŋweyn ɨ koʼ a Bamot Bâl, Balàm ɨ ki kàysɨ̀ ɨ yeyn ghelɨ Isìlæ̀ ghɨ li ɨlwèʼ ghè a àŋena bɨ̀ ateyn.