Numbers 23
Balàm ɨ làʼì ntum ɨyî àsɨ
1Balàm nɨ̀n be meyn sɨ̂ Balàk na, “Bàʼlɨ ɨbwaŋ ifu afêyn sɨ̂ mà nsòmbo, ɨ gvì nɨ̀ nyamsɨ mbòloʼ sɨ lûmnɨ̀sɨ̀ nsòmbo baʼsɨ̂ nɨ̀ ɨ̀ywaʼ nsòmbo.” 2Balàk ɨ ni kɨ ta Balàm bè, ŋêyn ŋweyn ɨ fu nyam mbòloʼ ilûmnɨ̀ ìmòʼ nɨ̀ àyaʼ àmòʼ a nô mɨ atû àbaŋ ifu à kà.
3Àŋena nɨn fù tî, Balàm ɨ bè sɨ̂ Balàk na, “Timi kɨ a ngùŋ ìfu i nyoʼnɨ-i nɨ̀ và, mà ndu alèʼ a kɨlu-à ɨ̀ yèyn na Bôbo Fɨyini nɨn koli mà afu a. Wù kæ koli ɨ̀ bè bàynsɨ nô mɨ ghà sɨ̂ mà a mà feʼtɨ sɨ̂ và.” Wu n-bè tî ɨ koʼ ndù atû kfɨ̀yn alèʼ afo ɨ koʼ wi ateyn.
4Fɨyini fɨ ɨ gvi koli Balàm, wu bè na, “Ma baʼlɨ meyn ɨ̀bwaŋ ifu nsòmbo ɨ̀ fù nyâm mbòloʼ ilûmnɨ̀ nɨ̀ àyaʼa nô mɨ atû àbaŋ ifu à kà.”
5Bôbo Fɨyini ɨ bè ìwo zɨ̀ a ka Balàm ndù bè sɨ̂ Balàk. Wu n-bè tî ɨ kæ be sɨ̂ Balàm na, “Kasi ndu fèʼtɨ iwo zɨ̀ a mà bè sɨ̂ và sɨ̂ Balàk.”
6Balàm ɨ kæ kasi sɨ ndù sɨ yeyn Balàk wu bu ti kɨ a ngùŋ ìfu i nyoʼnɨ-i nɨ̀ ŋweyn, baʼsɨ̂ nɨ̀ ghelɨ ghɨ tisɨnɨ Mowàb ghì nô ghɨ̀ jɨ̀m. 7Balàm ɨ làʼì ntûm Bôbo na,
“Balàk ɨ fòyn Mowàb tî tum jàŋ mà a Alàm ilaʼ i kfɨynsɨ abàs ghè a ɨchfɨ̂-iyvɨ i nɨn sal ateyn,
ɨ bè na, ‘Gvi te Jàkôb sɨ̂ mà,
gvi bè àwo a bɨ-a kûm ghelɨ Isìlæ̀.’
8Mà kàʼ a mà te ti ghelɨ bula Fɨyini fɨ te àŋena a?
Mà ti kàʼ ma bè ti awo a bɨ-a kûm ghelɨ bula Bôbo Fɨyini bê a?
9Mɨ n-ti atû tɨ̀wu yeyn àŋena,
tɨ ɨlwèʼ ɨ ngaŋtɨnɨ faytɨ̂ yeyn àŋena.
Mɨ n-yeyn ìlaʼ yi chî kɨ sɨ àŋena ngeŋ,
chɨ̂yntɨ̀ wì ŋêyn tɨ̀laʼtɨ litɨ.
10À ti kàʼ a taŋ nda woyn Jàkôb a?
Kèsa sɨ taŋ nô mɨ ànôyn àmòʼ ɨlvɨ ta ghɨ gwòtɨ̀ àŋena inôyn ì kæ̀ a?
Mɨ n-kôŋ sɨ kfɨ kɨ ta ghelɨ àtì-ati.
Mɨ n-jêm na ngòʼsɨ yem na ghɨ kɨ ta ɨyî àŋena.”
11Balàm nɨn làʼi ntum àteyn tì, Balàk ɨ bè sɨ̂ ŋweyn na, “Wà mòm ghà sɨ̂ mà teyna, mà tî jàŋ và na wà gvi maʼ ngeʼ atu nɨ̀ mbàynɨ̀ semsɨ wà gvî ɨ̀ kwo bòysɨ boysɨ àŋena a?”
12Balàm ɨ bèynsɨ̀ ɨ bè na, “Mà bè kɨ iwo zɨ̀ a Bôbo Fɨyini bè na mà be.”
Balàm ɨ fi làʼì ntum
13Balàk nɨn fi meyn bè sɨ̂ Balàm na, “Gvi ghesɨ̀và ndu alèʼ a kɨ lu-à ma wà kàʼ a wà ki yèyn ghelɨ Isìlæ̀ ghɨ li ɨ̀ te àŋena sɨ̂ mà.” 14Wu n-bè tî, ɨ li ndù nɨ̀ Balàm alèʼ ɨtwaʼ a li-a a Zofìm atû kfɨ̂yn Bisgà, ɨ bàʼlɨ̀ ɨ̀bwaŋ ifu afu nsòmbo ɨ fu nyâm mbòloʼ ilûmnɨ̀ nɨ̀ àyaʼa nô mɨ atû àbaŋ ifu à kà.
15Balàm ɨ bè sɨ̂ Balàk na, “Timi kɨ a ngùŋ ìfu i nyoʼnɨ-i nɨ̀ và afêyn mà ndu tàŋi ghesɨ̀ Bôbo Fɨyini injɨyn izɨ-i.”
16Bôbo Fɨyini ɨ gvi koli Balàm ɨ bè ìwo zɨ̀ a ka wù kasi ndù bè sɨ̂ Balàk. Wu n-bè tî ɨ kæ be sɨ̂ Balàm na, “Kasi ndu fèʼtɨ iwo zɨ̀ a mà bè sɨ̂ và sɨ̂ Balàk.”
17Balàm ɨ kasi ndù ɨ yeyn Balàk wu ti kɨ a ngùŋ ìfu i nyoʼnɨ-i nɨ̀ ŋweyn ŋêyn ghelɨ ghɨ tisɨnɨ Mowàb ghì. Balàk ɨ bɨf nâ, “Bôbo Fɨyini bè na gha?”
18Balàm ɨ kæ làʼi ntûm ŋweyn na,
“Faytɨ yvɨtɨ a Balàk,
yvɨtɨ iwo zɨ̀ a mɨ n-bê sɨ̂ và a wâyn Zibò.
19Fɨyini fɨ nɨn ghɨ wi wul mɨ̀sòŋ sɨ wam,
ghɨ wi wul ɨ̀ mɨ̀sòŋ sɨ kfɨnɨ ikfâʼtɨ̀ i ŋweyn.
Wù bû timi bè ìwo ɨ̀ faŋ tɨ̀ nì.
Wù bû tìmi chfɨ̀nɨ̀ ìwo ɨ̀ faŋ tɨ̀ nì.
20Bôbo Fɨyini bè na mà boysɨ boysɨ àŋena.
Wù boysɨ meyn àŋena ma mà kàʼ ma bû kfɨ̀nɨ.
21Bôbo Fɨyini ɨ Fɨyini fɨ àŋenafɨ nɨn ghɨ ŋêyn àŋena.
Àŋena nɨn luʼa, fêʼtɨ̀ na Bôbo Fɨyini nɨn ghɨ fòyn àŋena.
Nô ìwo i bzɨ-i i li nɨn gâyn wì sɨ̂ Jàkôb,
a nô ngeʼ ì lì faŋ tɨ̀ kòli ghelɨ Isìlæ̀.
22Fɨyini fɨ nɨn fvɨsɨ meyn àŋena sɨ a Ijìb,
nà nû alèʼ nɨ̀ àŋena ta mbòŋ ɨ̀twaʼ.
23Samoʼ fɨnyaʼ fɨ nɨn ghɨ wi a fɨ kàʼ a fɨ ku Jàkôb,
avɨŋà ɨ ghɨ wi a kɨ kàʼ a kɨ kfɨl ghelɨ Isìlæ̀.
Ghelɨ na taŋî kûm ghelɨ Isìlæ̀ bê na,
yì yeyn iwo zɨ̀ a Fɨyini fɨ̀ nì a.
24Ghelɨ Isìlæ̀ lali meyn ta nyam àbo.
Àŋena lali meyn ta nyàm àbo nî yi làlì,
ɨ nà yvɨ̂tɨ̀ wì nô ta ka yì nî zuè nyam ì lì,
ɨ̀ nyvɨ mɨ̀luŋ mɨ̀ àteyn.”
25Balàk ɨ kæ bè sɨ̂ Balàm na, “Wà na ghɨ wi sɨ màʼ ngeʼ atu nɨ̀ ghelɨ Isìlæ̀, ka wa n-bòysɨ àŋena.”
26Balàm ɨ bèynsɨ̀ ɨ bè sɨ̂ ŋweyn na, “Ma ti meyn bè sɨ̂ và na mɨ n-kelɨ kɨ sɨ ni iwo zɨ̀ a Bôbo Fɨyini bè sɨ̂ mà.”
Balàm ɨ fi làʼi kfeynsɨ ntum ì lì
27Balàk nɨn fi meyn bè sɨ̂ Balàm na, “Gvi ghesɨ̀và fî ndù alèʼ a kɨ lu-à ɨlvɨ fɨli a Fɨyini fɨ visi a wà maʼ ngeʼ atu nɨ̀ àŋena sɨ̂ mà.” 28Balàk nɨn bè tî ɨ lì Balàm ŋêyn ŋweyn ɨ koʼ atû kfɨyn Beyò yi ki ndùsɨ̀ nɨ̀ nse iyum.
29Balàm ɨ bè sɨ̂ Balàk na, “Bàʼlɨ ɨbwaŋ ifu afêyn sɨ̂ mà nsòmbo, ɨ gvì nɨ̀ nyamsɨ mbòloʼ sɨ lûmnɨ̀sɨ̀ nsòmbo baʼsɨ̂ nɨ̀ ɨ̀ywaʼ nsòmbo.” 30Balàk ɨ ni kɨ ta Balàm bè ɨ fu nyâm mbòloʼ ilûmnɨ̀ ìmòʼ nɨ̀ àyaʼ àmòʼa nô mɨ atû àbaŋ ifu à kà.