Numbers 30

Tɨsaʼ kûm ìchfɨ̂nɨ̀

¹Mosìs nɨ̀n bê meyn sɨ̂ ghelɨ ghɨ tisɨnɨ asas a ndosɨ a Isìlæ̀ na, “Ɨtêyntɨ̀ nɨn ghɨ tɨ̀saʼ tìtɨ̀ a Bôbo Fɨyini fù sɨ̂ zɨ̀. ²Wùl ɨ̀ kæ chfɨ̀nɨ̀ iwo sɨ̂ Bôbo Fɨyini kèsa wù yɨ mɨkâyn, a wù na kelɨ sɨ ni nô mɨ ghà ta wù bè.

³“Waynda ngòyn kæ nà bu chî a àŋena abe, ɨ̀ chfɨ̀nɨ̀ ìwo sɨ̂ Bôbo Fɨyini kèsa wù yɨ mɨkâyn, ⁴bò ŋweyn yvɨ ìchfɨ̂nɨ̀ ateyn kèsa mɨkâyn mɨ̀ àteyn ɨ̀ faŋ tɨ̀ bè iwo, a wù na kelɨ sɨ ni nô mɨ ghà ta wù chfɨ̀nɨ̀ sɨ nì kèsa wù yɨ mɨkâyn. ⁵Bò ŋweyn kæ yvɨ ɨ̀ tùynsɨ na wu n-luynsɨ̂ wì ichfɨ̂nɨ̀ nâ zɨ̀-ì nɨ̀ mɨ̀kàyn mzɨ̀ a wù yɨ, a wù na kelɨ wi sɨ luynsɨ. Wu n-faŋ tɨ̀ lùynsɨ a Bôbo Fɨyini lesɨ fù ŋweyn bòm ta à tùynsɨ bò ŋweyn.

⁶“Waynda ngòyn kæ bɨmi lum ma wù chfɨnɨ meyn ìwo kèsa wù bɨm bè kɨ̀ be iwo, ⁷lûm ŋweyn kæ yvɨ, ɨ̀ faŋ tɨ̀ tùynsɨ a wù na kelɨ sɨ luynsɨ ichfɨ̂nɨ̀ ateyn nɨ̀ mɨ̀kâyn mzɨ̀ a wù tî yɨ. ⁸Mɨtì ma lûm ŋweyn kæ yvɨ iwo ateyn ɨ̀ tùynsɨ na wu n-luynsɨ̂ wì ichfɨ̂nɨ̀ nâ zɨ̀ nɨ̀ ìwo zɨ̀ a wù tî bɨm bè, a wù faŋ tɨ̀ lùynsɨ, a Bôbo Fɨyini lesɨ fù ŋweyn.

⁹“Wî nkfɨ kèsa wul ɨ wi ma wù fvɨ meyn malâ kæ chfɨ̀nɨ iwo ɨ̀ yɨ mɨkâyn, a wù na kelɨ kɨ sɨ luynsɨ ichfɨ̂nɨ̀ ateyn.

¹⁰“Wùl ɨ wi kæ nà ghɨ a ndô lum, ɨ̀ chfɨ̀nɨ ìwo ɨ̀ yɨ mɨkâyn, ¹¹lûm ŋweyn yvɨ ɨ̀ faŋ tɨ̀ bè iwo sɨ̂ ŋweyn, ɨ̀ faŋ tɨ̀ tùynsɨ, a wù na kelɨ sɨ luynsɨ ichfɨ̂nɨ̀ ateyn nɨ̀ mɨ̀kâyn mzɨ̀ a wù yɨ. ¹²Mɨtì ma lûm ŋweyn kæ yvɨ iwo ateyn ɨ̀ tùynsɨ kɨ̀ achi nâ ghè, a Bôbo Fɨyini lesɨ fù ŋweyn bòm ta à tùynsɨ lûm ŋweyn. ¹³Lûm ŋweyn nɨn kelɨ àdyaʼ sɨ bɨmi kèsa sɨ tuynsɨ na ka wî ŋweyn luynsɨ ichfɨ̂nɨ̀ ta wù nì. ¹⁴Mɨtì ma lûm ŋweyn kæ yvɨ ichfɨ̂nɨ̀ ateyn ɨ̀ faŋ tɨ̀ bè iwo, mɨ̀chi chwô, a yi na dyêyn na wù bɨmi meyn. ¹⁵Mɨtì ma lûm ŋweyn kæ yvɨ iwo ateyn ɨ̀ faŋ tɨ̀ tùynsɨ kɨ achi ghè a wù yvɨ̀ ateyn, a wù beʼi ngeʼ zɨ̀ a Fɨyini nì nà ghɨ sɨ fu sɨ̂ wî ŋweyn.”

¹⁶À ti tɨsaʼ tìtɨ̀ a Bôbo Fɨyini nɨn læ fu sɨ̂ Mosìs kûm wâynda ngòyn wu bu chî kɨ a àŋena abe ŋêyn bò ŋweyn, kɨmɨ nɨ̀ wul ɨ̀ lûmnɨ̀ ŋêyn wî ŋweyn.