Numbers 31

Ghelɨ Isìlæ̀ ɨ tɨm yɨ ghelɨ Midìyàn

¹Bôbo Fɨyini nɨ̀n be meyn sɨ̂ Mosìs na, ²“Sɨ̀sɨ iwo zɨ̀ a ghelɨ Midìyàn tî nì sɨ̂ ghelɨ Isìlæ̀. Wa n-sɨ̀sɨ̀ nô mɨ ɨlvɨ gha ɨ̀ kfa ndù yeyn ghɨ̀bo ghya.”

³Mosìs ɨ kæ be sɨ̂ ghelɨ Isìlæ̀ na, “Yì baʼtɨ ɨ̀ seʼ iwoŋ, Bôbo Fɨyini nɨn fu àdyaʼ a yì nu ghelɨ Midìyàn ɨ̀ sɨ̀sɨ̀ ìwo zɨ̀ a àŋena tî nì sɨ̂ ghelɨ Isìlæ̀. ⁴Choʼtɨ sugèyʼsɨ̀ nkam nkam nô mɨ isas i ndo ì kà a Isìlæ̀ àŋena seʼ ɨtwaʼ iwòŋ.” ⁵Àŋena kæ chɨ̀yntɨ̀ sɨ choʼtɨ sugèyʼsɨ̀ nkam njvàsɨ̀ bò asas a ndosɨ a Isìlæ̀ na sɨ seʼ ɨtwaʼ iwòŋ. ⁶Mosìs nɨn tum sugèyʼsɨ̀ nkam nkam nô mɨ isas i ndo ì kà a Isìlæ̀ na sɨ seʼ ɨtwaʼ iwoŋ, a tisɨ̂ Finehàs ɨ wâyn Elezà ɨ ngàŋ ndô Fɨyini. Finehàs nɨn læ meyn lì ɨ̀fwo ɨ laynɨ fɨndo nɨ̀ Bôbo Fɨyini baʼsɨ̂ nɨ̀ tɨ̀soŋtɨ sɨ nà toŋ ɨlvɨ ta ghɨ sɨ kɨŋ sɨ zɨ̀tɨ inû.

⁷Ghelɨ Isìlæ̀ nɨn ndu meyn nù ghelɨ Midìyàn kɨ̀ ighel ta Bôbo Fɨyini nɨ̀n læ bè sɨ̂ Mosìs ɨ zuetɨ ghɨ̀lûmnɨ̀ nô ghɨ̀ jɨ̀m. ⁸Àŋena nɨn zuetɨ meyn kɨmɨ tɨ̀fôyn tɨ̀ tâyn a ghɨ fòyn Evì nɨ̀ Lekèm nɨ̀ Zûl nɨ̀ Hûl baʼsɨ̂ nɨ̀ Lebà. Ghɨ n-zue meyn kɨmɨ Balàm ɨ wâyn Beyò nɨ̀ fɨ̀nyuèfɨ. ⁹Sugèysɨ Isìlæ̀sɨ̀ nɨn læ meyn ghaytɨ ghɨ̀ki Midìyàn baʼsɨ̂ nɨ̀ woynda ɨ lì nyamsɨ nɨ̀ bzɨsɨ baʼsɨ̂ nô mɨ nɨ̀ ɨ̀fwo ɨ jûŋ ɨ̀ kfà ta ghelɨ Midìyàn nà n-kelɨ sɨ ɨfwo ghè a ghɨ yɨ iwòŋ. ¹⁰Àŋena nɨn lì tî, ɨ nyòʼtɨ̀ ntèʼ sɨ ghaʼnɨ sìsɨ̀ a ghelɨ Midìyàn nà chi ateyn baʼsɨ̂ nɨ̀ ɨ̀lwêʼ vzɨ̀ a àŋena nɨ̂n bɨ̀ ateyn nô ɨ̀ jɨ̀m. ¹¹Àŋena nɨn li meyn ghelɨ baʼsɨ̂ nɨ̀ nyamsɨ, nô mɨ nɨ̀ ghà ta ghelɨ Midìyàn nà n-kelɨ. ¹²Àŋena nɨn kfa tî ɨ ndu nɨ̀ ɨ̀fwo ateyn sɨ̂ Mosìs ŋêyn Elezà nɨ̀ ghelɨ Isìlæ̀ ghì nô ghɨ̀ jɨ̀m a ghɨ nà n-ghɨ alèʼ ghè a ghɨ bɨ̀ ateyn ibal i Mowàb a ngùŋ jvà Jodàn injɨyn i Jèlikò.

¹³Mosìs ŋêyn Elezà ɨ ngàŋ ndô Fɨyini baʼsɨ̂ nɨ̀ ghelɨ ghɨ tisɨnɨ a Isìlæ̀ nô ghɨ̀ jɨ̀m ɨ fvɨ̀ sɨ alèʼ ghè a àŋena bɨ̀ ateyn sɨ kòynɨ nɨ̀ sugèyʼsɨ̀. ¹⁴Mosìs ɨ nyòʼsɨ̀ ɨ̀toŋ sɨ̂ ɨ̀tu sugèyʼsɨ̀ vzɨ̀ a wu n-tisɨ inôyn i sugèyʼsɨ̀ nkamsɨ nɨ̀ ɨvzɨ̂ a wu n-tisɨ inôyn i sugèyʼsɨ̀ ighɨ ta àŋena nɨn kasî kfa sɨ a ɨtwaʼ iwòŋ.

¹⁵Wu n-nyòʼsɨ ɨtoŋ tî ɨ bɨf sɨ̂ àŋena na, “Bòm ghà ta yì faŋ tɨ̀ zuètɨ ghɨ̀ki Midìyàn ghêyn nô ghɨ̀ jɨ̀m a? ¹⁶À n-læ nà jûmtɨ̀ àŋena iyeʼi Balàm a Beyò ɨ nì ghelɨ Isìlæ̀ ɨ nà bu yvɨnɨ̂ wi Fɨyini ikoʼi i bemnɨ-i ɨ ku ghelɨ Bôbo Fɨyini. ¹⁷Yì zuetɨ woyn ghɨ lûmnɨ̀ nô ghɨ̀ jɨ̀m lvɨ̂yn baʼsɨ̂ nô mɨ nɨ̀ wùl ɨ wi ɨ̀ kfà ta wù sɨ kya wùl ɨ lûmnɨ̀, ¹⁸ɨ lì nô mɨ wayn ɨ wi ɨ̀ kfà ta wù bu duʼ tɨ̀ nà kya wùl ɨ lûmnɨ̀.”

¹⁹“Nô mɨ ndà a yi antêynɨ̀ ta wù zuè wul, kèsa wù kùm ìgvɨyn i wûl ta ghɨ zuè iwòŋ nɨn kelɨ wi sɨ zɨ alèʼ ghè a ghɨ bɨ̀ ateyn nô ta ka mɨchɨ chwo nsòmbo. À na ghɨ a mɨchi ɨ̀n tal nɨ̀ mɨ̀chi nsòmbo wu sù ɨ̀wuyn ŋweyn, ɨ su kɨmɨ ghelɨ ghì a wù kfa nɨ̀ àŋena ɨtwaʼ iwòŋ kɨ̀ ta isaʼi nɨn dyêyn. ²⁰Wù n-kelɨ sɨ su ndzɨsɨ ŋweyn nô sɨ̀ jɨ̀m baʼsɨ̂ nô mɨ nɨ̀ ghà ta wù tî seʼ iwòŋ nɨ̀ ànkeyna ma ghɨ fàytɨ nɨ̀ gvɨ̂ nyàm kèsa nɨ̀ ìwî i bzɨ-i kèsa nɨ̀ fɨ̀kâʼfɨ̀.”

²¹Mosìs nɨn tàŋi tî, Elezà ɨ ngàŋ ndô Fɨyini ɨ bè sɨ̂ sugèyʼ sìsɨ̀ a sɨ n-kàsi kfa sɨ a ɨtwaʼ iwòŋ na, “Iyeynì nɨn ghɨ ìsaʼ zɨ̀ a Bôbo Fɨyini nɨ̀n læ fu sɨ̂ Mosìs: ²²Wu n-bè na wù li aso ɨkwo a baŋnɨ-a nɨ̀ a fɨfâ nɨ̀ idyayn nɨ̀ ɨ̀kfasɨ, ²³baʼsɨ̂ nô mɨ nɨ̀ ghà ta ghɨ nyòʼ kɨ bû fɨ, ɨ nyòʼ ɨvɨs ta ka kɨ na layna ta isaʼi nɨn dyêyn. Wù n-kelɨ kɨmɨ sɨ mɨ̀si mu mzɨ̀ a ghɨ n-sû ɨfwo ateyn na wu na layn ta isaʼ nɨn dyêyn ɨfwo nâ ghàyn. Wù n-kelɨ sɨ mɨ̀si mu nâ mèyn nô mɨ a gha ta ghɨ nyòʼ ɨvɨ̀s a kɨ fɨ. ²⁴À na ghɨ a mɨchi nsòmbo wu sù ndzɨsɨ ŋweyn ɨ̀ nà layna, ɨ kæ sɨ nà ghɨ ma wù kàʼ a wù zɨ alèʼ ghè a ghɨ bɨ̀ ateyn.”

Ghɨ gwòtɨ̀ ɨ̀fwo vzɨ̀ a ghɨ kfa nɨ̀ ɨ̀ŋweyn ɨtwaʼ iwòŋ.

²⁵Bôbo Fɨyini nɨn fi meyn bè sɨ̂ Mosìs na, ²⁶“Zɨ̂ Elezà ɨ ngàŋ ndô Fɨyini nɨ̀ ghelɨ ghì a ghɨ n-tisɨ asas a ndosɨ a Isìlæ̀ nɨn kelɨ sɨ taŋ ghelɨ ghì a ghɨ tî ghaytɨ iwòŋ nô ghɨ̀ jɨ̀m baʼsɨ̂ nɨ̀ nyamsɨ. ²⁷Yi taŋ yi gwòtɨ ɨfwo ateyn ɨbyâs ɨ̀ bwò ɨ̀ fu abâs a li-a sɨ̂ sugèyʼ sìsɨ̀ a sɨ tî seʼ iwoŋ, ɨ fu abâs a li-a sɨ̂ ghelɨ Isìlæ̀. ²⁸À na ghɨ antêynɨ̀ ɨ̀fwo ghè a à n-kelɨ sugèyʼ sìsɨ̀ a sɨ tî sèʼ ɨtwaʼ iwòŋ, wa choʼ ɨlvɨ ateyn sɨ̂ Bôbo Fɨyini. Wa choʼ àfo àmoʼ àmòʼ antêynɨ̀ ɨ̀fwo ighɨ ì tâyn, kèsa à n-nghɨ ghelɨ ma à n-ghɨ njàkâysɨ̀ nɨ̀ njɨ̀sɨ̀ ma à n-ghɨ bzɨsɨ ndoŋ a. ²⁹Wà choʼtɨ, wa fu ɨvzɨ̂ a à n-kelɨ Bôbo Fɨyini ɨ fu sɨ̂ Elezà ɨ ngàŋ ndô Fɨyini. ³⁰À na ghɨ antêynɨ̀ ɨ̀fwo nɨ̀ ghelɨ Isìlæ̀, yi nà choʼ àfo àmòʼ antêynɨ̀ ɨ̀fwo mɨ̀vɨm ɨ̀n tâyn kèsa a n-ghɨ ghelɨ ma à n-ghɨ njàkâysɨ̀ nɨ̀ njɨ̀sɨ̀ ma à n-ghɨ bzɨsɨ ndoŋ a baʼsɨ̂ nɨ̀ nyamsɨ lisɨ. Yi choʼtɨ yi fu sɨ̂ ghelɨ ndo nɨ̀ Levì ghì a ghɨ n-toʼnɨ nɨ̀ fɨ̀ndo fɨ Bôbo fɨ.” ³¹Mosìs ŋêyn Elezà ɨ ngàŋ ndô Fɨyini nɨn ni meyn kɨ̀ ighel ta Bôbo Fɨyini nɨn bè sɨ̂ Mosìs.

³²Ɨfwo vzɨ̀ a sugèyʼsɨ̀ nɨn læ kfa nɨ̀ ɨ̀ŋweyn ɨtwaʼ iwòŋ ɨ gwòtɨ̀ wu faŋ nà n-ghɨ nkam ighɨ ntufa nɨ̀ nkamsɨ mɨ̀vɨ̂m nsòmbo jvàsɨ̀ tâyn, ³³nɨ̀ nyamsɨ mbòloʼsɨ nkam mɨ̀vɨ̂m nsòmbo njvàsɨ̀ bò, ³⁴nɨ̀ njàkâysɨ̀ nkam mɨ̀vɨ̂m ntufa jvà ìmòʼ, ³⁵nɨ̀ ghɨ̀kì nkam mɨ̀vɨm ɨ̀n tal njvàsɨ̀ bò àŋena bu duʼ tɨ̀ nà kya wùl ɨ lûmnɨ̀.

³⁶Abâs ɨfwo kì a ghɨ n-læ fu sɨ̂ sugèyʼ sìsɨ̀ a sɨ n-seʼ iwoŋ nà n-ghɨ njɨ̀sɨ̀ nkam ighɨ ì tal nɨ̀ njɨ̀sɨ̀ nkamsɨ mɨ̀vɨm ɨ̀n tal njvàsɨ̀ nsòmbo nɨ̀ njɨ̀sɨ̀ ighɨ ì tâyn, ³⁷ɨ sîsɨ̀ à ghɨ n-fu sɨ̂ Bôbo Fɨyini antêynɨ̀ njɨ̀sɨ̀ nâ ghàyn nà n-ghɨ njɨ̀sɨ̀ ighɨ ntufa nɨ̀ njɨ̀sɨ̀ mɨ̀vɨ̂m nsòmbo njvàsɨ̀ tâyn.

³⁸Nyamsɨ mbòloʼsɨ nà n-ghɨ nkam mɨ̀vɨm ɨ̀n tal njvàsɨ̀ ntufa, ɨ sîsɨ̀ a ghɨ n-fu sɨ̂ Bôbo Fɨyini ɨ ghɨ mɨ̀vɨ̂m nsòmbo njvàsɨ̀ bò.

³⁹Njàkâysɨ̀ nà n-ghɨ nkam mɨ̀vɨm ɨ̀n tal nɨ̀ njàkâysɨ̀ ighɨ ì tâyn, ɨ sîsɨ̀ a ghɨ n-fu sɨ̂ Bôbo Fɨyini ɨ ghɨ mɨ̀vɨ̂m ntufa.

⁴⁰Ghelɨ nà n-ghɨ nkam njvàsɨ̀ ntufa, ɨghî a ghɨ n-fu sɨ̂ Bôbo Fɨyini ɨ ghɨ mɨ̀vɨm ɨ̀n tal njvàsɨ̀ bò.

⁴¹Mosìs nɨn fu meyn ɨ̀fwo vzɨ̀ a à nà n-kelɨ Bôbo Fɨyini sɨ̂ Elezà ɨ ngàŋ ndô Fɨyini kɨ̀ ighel ta Bôbo Fɨyini nɨn læ bè sɨ̂ ŋweyn.

⁴²Ɨfwo vzɨ̀ a Mosìs nɨn læ fu sɨ̂ ghelɨ Isìlæ̀ nà n-ghɨ sɨ a nyɨŋ sɨ̂ ɨ̀fwo vzɨ̀ a ghɨ n-læ fu sɨ̂ sugèyʼsɨ̀. ⁴³Abâs kì a à nà n-kelɨ ghelɨ Isìlæ̀ nà n-ghɨ njɨ̀sɨ̀ nkam ighɨ ì tal nɨ̀ nkamsɨ mɨ̀vɨm ɨ̀n tal njvàsɨ̀ nsòmbo nɨ̀ njɨ̀sɨ̀ ighɨ ì tâyn, ⁴⁴nyamsɨ mbòloʼsɨ ɨ ghɨ nkam mɨ̀vɨm ɨ̀n tal njvàsɨ̀ ntufa, ⁴⁵njàkâysɨ̀ ɨ ghɨ nkam mɨ̀vɨm ɨ̀n tal nɨ̀ njàkâysɨ̀ ighɨ ì tâyn, ⁴⁶ghelɨ ɨ ghɨ nkam njvàsɨ̀ ntufa. ⁴⁷À na ghɨ abàs ɨfwo nɨ̀ ghelɨ Isìlæ̀, Mosìs ɨ choʼ wul ɨ̀mòʼ antêynɨ̀ nɨ̀ ghelɨ mɨ̀vɨm ɨ̀n tâyn ɨ choʼ nyam ìmòʼ antêynɨ̀ nyamsɨ mɨ̀vɨm ɨ̀n tâyn kɨ̀ ighel ta Bôbo Fɨyini bè sɨ̂ ŋweyn. Wu n-choʼ ɨ fu sɨ̂ ghelɨ ndo nɨ̀ Levì ghì a ghɨ n-tôʼnɨ nɨ̀ fɨ̀ndo fɨ Bôbo Fɨyini.

⁴⁸Ɨtu sugèyʼsɨ̀ vzɨ̂ a wu nà n-tisɨ sugèyʼsɨ̀ ighɨ nɨ̀ ɨ ɨvzɨ̂ a wu nà n-tisɨ sugèyʼsɨ nkamsɨ ɨ kæ ndù sɨ yeyn Mosìs, ⁴⁹ɨ bè sɨ̂ ŋweyn na, “Ghèsɨ taŋ meyn sugèyʼ sìsɨ̀ a sɨ n-ghɨ isas isaʼ nɨ̀ ghès nô sɨ̀ jɨ̀m àŋena ɨ ghɨ kɨ ghɨ̀ jɨ̀m. ⁵⁰À ti iwo zɨ̀ a ghèsɨ̀ gvì nɨ̀ ìfu i sɨ̂ Bôbo Fɨyini nɨ̀ ɨ̀fwo vzɨ̀ a ghes tî kfa nɨ̀ ŋweyn ɨtwaʼ iwòŋ a ghɨ nchaʼsɨ akœsɨ nɨ̀ mɨ̀nchaʼ mɨ̀ àwu nɨ̀ yèlisɨ baʼsɨ̂ nɨ̀ tɨ̀fwotɨ ma ghɨ faytɨ nɨ̀ àso ɨkwo a baŋnɨ-a sɨ yuyn atu à kesa asɨ nɨ̀ Bôbo Fɨyini.”

⁵¹Mosìs ŋêyn Elezà ɨ ngàŋ ndô Fɨyini ɨ fsɨ ɨ̀fwo nâ vzɨ̀ sɨ̂ àŋena a ghɨ faytɨ nɨ̀ àso ɨkwo a baŋnɨ-a tî. ⁵²Aso ɨkwo kì a Mosìs ŋêyn Elezà læ fsɨ sɨ̂ ɨ̀tu sugèyʼsɨ̀ vzɨ̀ a wu nà tisɨ sugèyʼsɨ̀ nkamsɨ nɨ̀ ɨvzɨ̂ a wu nà n-tisɨ sugèyʼsɨ̀ ighɨ ɨ fu sɨ ifu sɨ̀ Bôbo Fɨyini nà dɨlɨ̀ chem ndu kilùsɨ̀ ɨvɨ nɨ̀ kilùsɨ mɨ̀vɨ̂m bulamòʼ. ⁵³Nô mɨ sugèyʼ ì kà ta yì nà n-tisɨ wi anôyn nɨn læ meyn lì ɨ̀fwo iwòŋ ɨlvɨ ɨ lèm sɨ ateyn nɨ ɨwu ŋweyn. ⁵⁴Mosìs ŋêyn Elezà ɨ ngàŋ ndô Fɨyini ɨ fsɨ aso ɨkwo a baŋnɨ-a kì a ɨtu sugèyʼsɨ̀ vzɨ̀ a wu nà n-tisɨ sugèyʼsɨ̀ nkamsɨ nɨ̀ ɨvzɨ̂ a wu n-tisɨ sugèyʼsɨ̀ ighɨ ɨ zɨ nɨ̀ ànkeyna a fɨndo nɨ̀ Bôbo Fɨyini ta ka Bôbo Fɨyini na kfâʼtɨ̀ ghelɨ Isìlæ̀, kɨ̂ŋtɨ̀ àŋena sɨ a ngeʼsɨ.