Numbers 32

Lubèn ŋêyn Gâd ɨ bɨ̀ injɨyn i jvâ Jodàn

¹Ghelɨ isas i ndo nɨ̀ Lubèn nɨ̀ Gâd nà n-kelɨ nyamsɨ nô sɨ idvɨ̀, ɨ yeyn na ntèʼ Jazà nɨ̀ ntèʼ Gilèd nɨn ghɨ àlêʼ a juŋà sɨ maʼ nyamsɨ ateyn. ²Àŋena kæ ndù sɨ be sɨ̂ Mosìs ŋêyn Elezà ɨ ngàŋ ndô Fɨyini baʼsɨ̂ nɨ̀ ghelɨ ghɨ tisɨnɨ a Isìlæ̀ na, ³“Ntèʼ Atalòt nɨ̀ ntèʼ Dibòn nɨ̀ ntèʼ Jazà kɨ̀mɨ nɨ̀ ntèʼ Nimlà nɨ̀ ntèʼ Heshbòn nɨ̀ ntèʼ Elìyalè nɨ̀ ntèʼ Sebàm nɨ̀ ntèʼ Nebò baʼsɨ̂ nɨ̀ ntèʼ Beyòn, ⁴nɨn ghɨ ntèʼ sìsɨ̀ a Bôbo Fɨyini nɨn læ gàmtɨ ghelɨ Isìlæ̀ ghɨ tɨm yɨ sɨ jôf nô a jûŋ sɨ maʼ nyamsɨ ateyn, ghelɨ ghɨ felɨnɨ nɨ̀ và ɨ kelɨ nyamsɨ. ⁵Wà kæ nà koŋà wa fu ɨlwêʼ nâ wèyn sɨ̂ ghès à na kelɨ kɨ nô ghès. Ka wa n-vìsi ghès dyaŋ jvâ Jodàn.”

⁶Mosìs ɨ bɨf sɨ̂ ghelɨ ndo nɨ̀ Gâd nɨ̀ ghelɨ ndo nɨ̀ Lubèn na, “Ba à ti n-ghɨ na woynà ghi nɨn ndù nà tɨm ìwoŋ yi duʼ kɨ afêyn? ⁷Yi n-kuêsɨ̀ ghelɨ Isìlæ̀ na ka àŋena dyaŋ jvâ Jodàn ɨ ndù ilaʼ ghè a Bôbo Fɨyini fù sɨ̂ àŋena bòm ghà? ⁸À ti kɨmɨ ìwo zɨ̀ a ghɨ̀bo ghi nɨn læ nì ta mɨ n-læ tum àŋena na ghɨ lu a Kadèsh Banìyà ndu nyàʼtɨ ki ilaʼ i Kenàn. ⁹Àŋena nɨn koʼ ɨfyayn Eshkòl ɨ ki ilaʼ ateyn ɨ kasi kàlì ɨ nà kuêsɨ̀ ghelɨ Isìlæ̀ na ka àŋena zɨ ilaʼ afî a Bôbo Fɨyini nɨn fu sɨ̂ àŋena. ¹⁰Bôbo Fɨyini ɨ nyòʼsɨ̀ ɨ̀toŋ achi nâ ghè ɨ chfɨ̀nɨ̀ na, ¹¹‘Nô wùl ɨ̀ mòʼ ta wu n-læ fvɨ̀ a Ijìb ma wù chem meyn bèŋsɨ̀ mɨ̀vɨ̂m ɨ̀n bò sɨ ndù asɨ læ̀ yeyn wi ilaʼ zɨ̀ a mɨ n-læ chfɨ̀nɨ ɨ yɨ mɨkâyn sɨ fu sɨ̂ Abɨ̀làhâm ŋêyn Yisàk nɨ̀ Jàkôb bòm ta àŋena nà n-yvɨnɨ̂ wì ma nɨ̀ mɨ̀tem mɨ̀ àŋena ɨ̀n jɨ̀m. ¹²À læ̀ zɨ̂ kɨ Kalèb ɨ wâyn Jefunè ɨ wul ɨ̀ Kenìz nɨ̀ Joshwà ɨ wâyn Nûn bòm ta àŋena nà n-yvɨnɨ Bôbo Fɨyini nɨ̀ mɨ̀tem mɨ̀ àŋena ɨ̀n jɨ̀m.’ ¹³Ɨtoŋ Bôbo Fɨyini nɨn yafɨ meyn nô sɨ a ŋaŋ sɨ̂ ghelɨ Isìlæ̀ wu nì àŋena jɨ̀ŋ a nse ìyum sɨ a bèŋsɨ̀ mɨ̀vɨm ɨ̀n kæ̀ nô ta ka ajâŋ kì a kɨ nì mbɨ sɨ̂ ŋweyn kfɨtɨ mèsì.”

¹⁴“Ajâŋ a bɨ-a kèyn yì sɨ nî kɨmɨ ta ghɨ̀bo ghi, nî na ɨtoŋ Bôbo Fɨyini na yafɨ sɨ̂ ghelɨ Isìlæ̀ nô ghɨ̀ jɨ̀m. ¹⁵Yì kæ faŋ tɨ̀ nà yvɨnɨ ŋweyn lvɨ̂yn, a wù visi ghelɨ nâ ghèyn nô ghɨ̀ jɨ̀m a nse iyum, a à na ghɨ ma à nì zɨ̀ na Bôbo Fɨyini zuetɨ àŋena nô ghɨ̀ jɨ̀m.”

¹⁶Mosìs nɨn taŋi tî, àŋena bè na, “Ghès nɨn bàʼlɨ̀ mbàynsɨ̀ sɨ̂ nyâm seysɨ afêyn, ɨ̀ bàʼlɨ̀ kɨ̀mɨ ntèʼsɨ sɨ̂ ghɨ̀ki ghes baʼsɨ̂ nɨ̀ woyn ghes. ¹⁷Mɨtì ghès nɨn lì ɨ̀fwo iwòŋ nɨ̀ ghès nà ndû asɨ nɨ̀ ghelɨ Isìlæ̀ sɨ chem ta ka àŋena zɨ ɨlwèʼ nɨ̀ àŋena. Ghès na ndû tì ghɨ̀ki ghes nɨ̀ woyn ghes ɨ chî a ntèʼsɨ ma ghɨ faytɨ meyn kɨ̀ŋtɨ̀, ma ghelɨ ilaʼ nâ ghèyn kàʼ ghɨ bû zɨ sɨ fu ngeʼ sɨ̂ àŋena. ¹⁸Ghès nɨn kasî kfâ wì nô ta ka ghelɨ Isìlæ̀ nô ghɨ̀ jɨ̀m nî kèli ɨlwêʼ àŋena. ¹⁹Ghès nɨn bu fì fsɨ wi ɨlwêʼ injɨyn i jvâ Jodàn bòm ta ghèsɨ keli meyn ɨlwêʼ wes abàs ghè a ɨchfɨ-iyvɨ i nɨn sal ateyn a Jodàn.”

²⁰Mosìs ɨ kæ be sɨ̂ àŋena na, “Yi n-kelɨ sɨ ni kɨ ta yì bè, kelɨ sɨ baʼtɨ ɨfwo iwòŋ sɨ ndù sɨ nù sɨ adyaʼ nɨ̀ Bôbo Fɨyini. ²¹Sugèyʼ sisɨ nô sɨ̀ jɨ̀m nɨn dyâŋ jvâ Jodàn, nà nu-à sɨ chem ta Bôbo Fɨyini saŋ fvɨ̀sɨ̀ mbàynɨ̀sɨ ŋweynsɨ. ²²Ghɨ kæ tɨm yɨ ilaʼ ateyn yi kasi kfa a Bôbo Fɨyini faŋ tɨ̀ ghàm zɨ̀ a ghelɨ Isìlæ̀ faŋ tɨ̀ gham zɨ, a alêʼ nâ kèynà na sɨ kelɨ kɨ nô zɨ̀ ma à fu kɨ̀ nô Bôbo Fɨyini.

²³“Mɨtì yì kæ faŋ tɨ̀ lèm ichfɨ̂nɨ̀ nâ yèynì, a à na ghɨ ma yi nî meyn mbɨ sɨ̂ Bôbo Fɨyini, wu ghɨ sɨ fu ngeʼ sɨ̂ zɨ̀ bòm mbɨ̂ sisɨ. ²⁴Yì baʼlɨ ntèʼsɨ sɨ̂ ghɨ̀ki ghi nɨ̀ wôyn ghi ɨ̀ tɨm mbàynsɨ̀ sɨ̂ nyâm sisɨ, mɨtì ɨ̀ lùynsɨ ìchfɨ̂nɨ̀ zɨ-i.”

²⁵Mosìs nɨn bè tî, ghelɨ Gâd nɨ̀ ghelɨ Lubèn ɨ bè na, “Ghèsɨ̀ ghelɨ ghɨ felɨnɨ nɨ̀ và nɨn nì kɨ ta wà bè a bô. ²⁶Woyn ghes nɨ̀ ghɨ̀ki ghes baʼsɨ̂ nɨ̀ nyâm seysɨ nɨ̀ bzɨ seysɨ nɨn faŋ kɨ a ntèʼsɨ Gilèd afêyn. ²⁷Mɨtì ghelɨ ghɨ felɨnɨ nɨ̀ và nô ghɨ̀ jɨ̀m nɨn baʼtɨ̂ ɨ̀fwo iwòŋ ɨ̀ dyàŋ tɨm iwoŋ adyaʼ nɨ̀ Bôbo Fɨyini ɨ̀ ighel ta wà bè a bô.”

²⁸Mosìs ɨ kæ fu tɨsaʼ kûm ghelɨ Lubèn nɨ̀ ghelɨ Gâd sɨ̂ Elezà ɨ ngàŋ ndô Fɨyini nɨ̀ Joshwà ɨ wâyn Nûn baʼsɨ̂ nɨ̀ ghelɨ ghɨ tisɨnɨ asas a ndosɨ nɨ̀ ghelɨ Isìlæ̀. ²⁹Wu n-bè sɨ̂ àŋena na, “Ghelɨ ndo nɨ̀ Gâd nɨ̀ ghelɨ ndo nɨ̀ Lubèn kæ dyàŋ jvâ Jodàn zɨ̂ àŋena tɨm ìwoŋ, adyaʼ nɨ̀ Bôbo Fɨyini, yi fu ntèʼ Gilèd sɨ̂ àŋena à na kelɨ kɨ nô àŋena. ³⁰Mɨtì ma àŋena kæ faŋ tɨ̀ dyàŋ sɨ nu zɨ̂ àŋena amoʼ a àŋena na kelɨ sɨ li ɨwu àŋena ɨlwêʼ ilaʼ i Kenàn zɨ̂ àŋena.”

³¹Ghelɨ Gâd nɨ̀ ghelɨ Lubèn ɨ bè na, “Ghelɨ ghɨ felɨnɨ nɨ̀ và nɨn nì kɨ ta Bôbo Fɨyini bè a bô. ³²Ghès nɨn baʼtɨ-à ɨ̀ dyàŋ jvâ Jodàn sɨ adyaʼ nɨ̀ Bôbo Fɨyini ɨ̀ zɨ ilaʼ i Kenàn ɨ̀ nù, mɨtì ghɨ sɨ li kɨ ɨlwêʼ wes abàs a jvâ afêyn.”

³³Àŋena nɨn tàŋi tî, Mosìs ɨ fu ilaʼ i Amò fòyn àŋena ɨ ghɨ Sihòn nɨ̀ ìlaʼ i Bashàn fòyn àŋena ɨ ghɨ Ôg sɨ̂ ghelɨ ndo nɨ̀ Gâd nɨ̀ ghelɨ ndo nɨ̀ Lubèn nɨ̀ ghelɨ isas i ndo nɨ̀ Mànasè ghɨ li, Mànasè ɨ ghɨ wâyn Josèf. Wù n-læ nà fu baʼsɨ kɨ nɨ̀ ntèʼsɨ ateynsɨ kɨ̀mɨ nɨ̀ mɨ̀ntèʼtɨ̂ ɨ̀n lì a mbæ̀sɨ ateyn.

³⁴Ghelɨ isas i ndo nɨ̀ Gâd nɨ̀n læ meyn kasi faytɨ bàʼlɨ̀ ntèʼsɨ Dibòn nɨ̀ Atalòt nɨ̀ Alowà, ³⁵nɨ̀ Atlot Sofàn nɨ̀ Jazà kɨ̀mɨ nɨ̀ Jogbehà ³⁶nɨ̀ Bet Nimlà nɨ̀ Bet Halàn. Àŋena nɨn tɨm meyn mbàyn ɨ jɨŋ kal ntèʼsɨ àŋena nô sɨ̀ jɨ̀m, ɨ fi tɨm kɨmɨ mbàyn sɨ̂ nyamsɨ àŋenasɨ. ³⁷Ghelɨ isas i ndo nɨ̀ Lubèn ɨ kasi bàʼlɨ̀ Heshbòn nɨ̀ Elìyalè nɨ̀ Kìlìyatèm, ³⁸ɨ bàʼlɨ kɨmɨ Nebò nɨ̀ Bal Meyòn nɨ̀ Sibmà. À nà n-ghɨ ta àŋena kàsi bàʼlɨ Nebò nɨ̀ Bal Meyòn, àŋena fu azɨyn a fɨ-a sɨ̂ ntèʼ nâ sèynsɨ̀.

³⁹Ghelɨ isas i ndo nɨ̀ Makì ɨ wâyn Mànasè nɨn læ meyn ndu tɨm yɨ ghelɨ Gilèd ɨ saŋ fvɨ̀sɨ̀ ghelɨ Amò ghì a ghɨ nà n-chi afu. ⁴⁰Mosìs ɨ kæ fu ilaʼ i Gilèd sɨ̂ ghelɨ Makì ɨ woyn Mànasè àŋena nà sɨ chî afu. ⁴¹Jayì ɨ wâyn Mànasè ɨ ndu tɨm yɨ mɨ̀ntèʼtɨ̂ mɨ̀ Gilèd ɨ̀n lì ɨ kfɨnɨ àzɨyn ateyn ɨchfɨ̀ na Havot Jayì. ⁴²Wùl ghɨ toŋtɨ̂ na Nobà ɨ ndù ɨ tɨm yɨ ntèʼ Kenàt nɨ̀ mɨ̀ntèʼtɨ̂ mzɨ̀ a mɨ nà n-ghɨ a mbæ̀sɨ̀ ɨ chfɨ̀ nɨ̀ ìzɨyn i ŋweyn na Nobà.