Numbers 4

Ifêl i ghelɨ Kohàt.

¹Bôbo Fɨyini nɨn bè meyn sɨ̂ Mosìs ŋêyn Alòyn na, ²Yì taŋ ghelɨ ndo nɨ̀ Levì ɨ chfɨ ndo nɨ̀ Kohàt, kɨ̀ asas ndosɨ asas ndosɨ, ɨ̀ taŋ achfɨ a ndo achfɨ a ndo. ³Yi taŋ ghɨ̀lûmnɨ̀ ghì nô ghɨ̀ jɨ̀m a ghɨ n-ghɨ bèŋsɨ̀ mɨ̀vɨm ɨ̀n tal sɨ chem a bèŋsɨ̀ mɨ̀vɨm ɨ̀n tâyn kfeynɨ̂ sɨ nà felɨ̀ a fɨndo nɨ̀ Bôbo Fɨyini. ⁴Ifêl i ghelɨ Kohàt nâ ghèyn nɨn ghɨ sɨ nà tôʼnɨ̀ nɨ̀ ɨ̀fwo vzɨ̀ a wu layn kfèynɨ a fɨndo nɨ̀ Bôbo Fɨyini. ⁵Ghelɨ Isìlæ̀ na se sɨ lu sɨ alèʼ ghè a ghɨ bɨ̀ ateyn, Alòyn ŋêyn woyn ŋweyn ɨ zɨ à fɨndo nɨ̀ Bôbo ɨ suʼsɨ àbâs a ndzɨsɨ kì a kɨ n-ghaŋlɨ asɨ antayntayn a mɨ̂kàyn nɨ̀ Bôbo Fɨyini ɨ chɨytɨ àntayntayn ateyn nɨ̀ ànkeyna. ⁶Ghɨ chɨytɨ, ghɨ lèm gvɨ̂ nyàm atû àteyn ma nyàm àteyn fvɨ̀ a jvâ ɨ zɨ̀sɨ̀ àbâs a ndzɨsɨ a nyemnɨ-a atû àteyn ɨ tuŋtɨ mbàŋ sîsɨ̀ a ghɨ n-ghalɨ châʼsɨ̀ ateyn ɨlwèʼ ateyn.

⁷“Yì zɨsɨ abâs a ndzɨsɨ a nyêmnɨ-a atû àbaŋ ghè a ghɨ tom abayn a laynɨ-a ateyn ɨ̀ tòmtɨ ɨ̀kfaŋ àlèlalel baʼsɨ̂ nɨ̀ ɨ̀kfaŋ ɨ mbvɨktɨnɨ, nɨ̀ ɨ̀kfaŋ ɨ ghaʼlɨnɨ, kɨmɨ nɨ̀ ngɨ̀sɨ̀, sɨ nà wê ifu i nyvɨnɨ ateyn. Abayn a nɨn kelɨ sɨ nà ghɨ atû abaŋ nâ ghè kɨ̀ mɨlvɨ ɨ̀n jɨ̀m. ⁸Àŋena tomtɨ, ghɨ chɨytɨ ɨ̀fwo ateyn nɨ̀ àbâs a ndzɨsɨ a kɨ bɨ̂ylɨ̀ bâŋ baŋ ɨ lèm gvɨ̂ nyàm atû àteyn ma nyàm àteyn fvɨ̀ a jvâ ɨ tuŋtɨ mbàŋ sìsɨ̀ a ghɨ n-ghalɨ châʼsɨ̀ ateyn ɨlwèʼ ateyn.”

⁹“Àŋena nɨn lì kɨmɨ àbâs a ndzɨsɨ a nyêmnɨ-a ɨ̀ chɨl lâmsɨ̀ bàʼsɨ nɨ̀ afo kì a ghɨ n-tomtɨ lâmsɨ̀ atû àteyn nɨ àfo kì a ghɨ n-bâʼ lisì abvɨ ateyn a nkfɨ̀sɨ lâm, kɨmɨ nɨ̀ àfo kì a ghɨ n-we abvɨ ateyn, baʼsɨ̂ nɨ̀ ɨ̀fwo vzɨ̀ a ghɨ n-we mɨvɨl mɨ̀ lâmsɨ̀ nâ mzɨ̀ ateyn. ¹⁰Ghɨ chɨytɨ ghɨ lɨm ɨfwo ateyn nô ɨ̀ jɨ̀m nɨ̀ gvɨ̂ nyàm ma nyàm àteyn fvɨ̀ a jvâ, ɨ lèm atû àfo ghè a ghɨ n-beʼì ateyn.”

¹¹“Àŋena nî ghɨ chɨytɨ àbâs a ndzɨsɨ a nyêmnɨ-a atû àbaŋ ifu ghè a ghɨ fàytɨ nɨ̀ àso ɨkwo a baŋnɨ-a tî, ɨ fi zɨ̀sɨ̀ gvɨ̂ nyàm atu àteyn, ma nyàm àteyn fvɨ̀ a jvâ, ɨ tuŋtɨ mbàŋ sîsɨ̀ a ghɨ n-ghalɨ châʼsɨ̀ ateyn ɨlwèʼ ateyn.”

¹²“Àŋena nɨn kelɨ sɨ li nô mɨ ghà ta ghɨ n-nî ifêl ateyn a fɨndo nɨ̀ Bôbo sɨ lɨmtɨ abàs a ndzɨsɨ a nyemnɨ-a sɨ chɨytɨ nɨ̀ gvɨ nyàm ma nyàm àteyn fvɨ̀ a jvâ, sɨ lèm atû àfo ghè a ghɨ n-beʼì ateyn.”

¹³“Àŋena nî ghɨ tafi àbvɨ ichɨ sɨ abaŋ ifu ghè a ghɨ faytɨ nɨ̀ ìdyayn i tî ɨ chɨytɨ àbaŋ ateyn nɨ̀ abâs a ndzɨsɨ a kɨ bâŋ nyêm ndû ndu. ¹⁴Àŋena chɨl ghɨ lèm ɨ̀fwo vzɨ̀ nô ɨ̀ jɨ̀m a ghɨ n-fêl nɨ̀ ɨ̀ŋweyn atû àbaŋ ifu nâ ghè. Ghɨ n-kelɨ kɨmɨ sɨ lem ɨkfaŋ vzɨ̀ a ghɨ n-we ɨkfêtɨ̀ ɨvɨ̀s ateyn atû àbaŋ nâ ghè nɨ̀ àntàs kì a ghɨ n-chuʼ njwò ateyn kɨ̀mɨ nɨ̀ fɨ sìsɨ̀ a ghɨ n-tafi abvɨ ichɨ ateyn nɨ̀ ɨ̀kfaŋ ɨ ghaʼlɨnɨ vzɨ̀ a ghɨ n-we mu ateyn ghɨ nà mɨsì-à, sɨ chɨytɨ nɨ̀ gvɨ̂ nyàm ma nyàm àteyn fvɨ̀ a jvâ ɨ tuŋtɨ mbàŋ sìsɨ̀ a ghɨ n-ghalɨ châʼsɨ̀ ateyn ɨlwèʼ ateyn.”

¹⁵“Ghelɨ Isìlæ̀ na se sɨ lu sɨ alèʼ ghè a àŋena bɨ̀ ateyn, Alòyn ŋêyn woyn ŋweyn ɨ chɨytɨ ɨ̀fwo ɨ laynɨ baʼsɨ̂ nɨ̀ ɨ̀fwo vzɨ̀ a wu n-ghɨ a ngùŋ ateyn nô ɨ̀ jɨ̀m. Àŋena chɨytɨ mèsì, ghelɨ ndo nɨ̀ Kohàt ɨ bèʼì ɨ̀fwo ateyn. Mɨtì ka àŋena nɨ̂n kùm ɨ̀fwo ɨ laynɨ nâ wèyn a bu tì a àŋena kfɨtɨ. À n-kelɨ sɨ nà beʼi ghelɨ Kohàt ɨfwo vzɨ̀ a wu n-ghɨ a fɨndo nɨ̀ Bôbo.”

¹⁶“Elezà ɨ wâyn Alòyn ɨ ngàŋ ndô Fɨyini nɨn kelɨ sɨ nà tôʼnɨ̀ nɨ̀ mɨ̀vɨ̀l mzɨ̀ a ghɨ n-we a lâmsɨ̀, tôʼnɨ̀ kɨmɨ nɨ̀ ɨ̀fwo ɨ lɨmtɨnɨ ɨ jûŋ, tôʼnɨ̀ nɨ̀ ìfu ɨfwo ɨ yɨnɨ zɨ̀ a ghɨ n-fu kɨ mɨchi ɨ̀n jɨ̀m tì, tôʼnɨ̀ nɨ̀ mɨvɨl mzɨ̀ a ghɨ n-yisi ngàŋsɨ ndo Fɨyini ateyn. Wù n-kelɨ kɨmɨ sɨ nà tôʼnɨ̀ nɨ̀ fɨ̀ndo fɨ Bôbo fɨ baʼsɨ̂ nɨ̀ ɨ̀fwo ɨ laynɨ vzɨ̀ a wu n-ghɨ ateyn nô ɨ̀ jɨ̀m.”

¹⁷Bôbo Fɨyini nɨ̀n be meyn sɨ̂ Mosìs ŋêyn Alòyn na, ¹⁸“Yì na tôʼnɨ̀-à ka ghelɨ asas a ndosɨ nɨ̀ ghelɨ Kohàt le sɨ a isas i ndo nɨ̀ Levì. ¹⁹Alòyn ŋêyn woyn ŋweyn nɨn kelɨ sɨ nà zɨ a fɨndo nɨ̀ Bôbo ghɨ fu nô mɨ ìfêl i nda nɨ̀ àfo kì a wù n-kelɨ sɨ bèʼì ta ka àŋena faŋ tɨ̀ ndù sɨ baʼsɨ̂ a ngùŋ ɨ̀fwo ɨ laynɨ sɨ kfɨtɨ. ²⁰Mɨtì ka wùl ɨ̀ ndo nɨ̀ Kohàt nɨn læ̀ mòm sɨ zɨ sɨ ki ɨfwo ɨ laynɨ nâ wèyn. Wù kæ ki kɨ ki a wu n-kfɨ.”

Ifêl i ghelɨ Geshòn

²¹Bôbo Fɨyini nɨn fi meyn bè sɨ̂ Mosìs na, ²²Taŋ kɨmɨ ghelɨ Geshòn isas i ndo isas i ndo ɨ taŋ ɨchfɨ ndo ɨchfɨ. ²³Taŋ ghɨ̀lûmnɨ̀ nô ghɨ̀ jɨ̀m ta ghɨ chem beŋsɨ̀ mɨ̀vɨm ɨ̀n tal sɨ koʼ sɨ chem a bèŋ mɨ̀vɨm ɨ̀n tâyn ma ghɨ kàʼ a ghɨ fel a fɨndo nɨ̀ Bôbo. ²⁴Àŋena na felɨ̀ a fɨndo nɨ̀ Bôbo Fɨyini fî beʼì ɨ̀fwo. ²⁵Àŋena nɨn kelɨ sɨ nà beʼi fɨ̀ndo fɨ Bôbo Fɨyini nɨ̀ ɨ̀byâs ɨ ndzɨsɨ vzɨ̀ a ghɨ ghàŋsɨ kal ateyn. Àŋena nɨn kelɨ kɨmɨ sɨ nà beʼi ɨfwo vzɨ̀ a ghɨ chɨ̀l atu fɨ̀ndo nɨ̀ Bôbo nɨ̀ gvɨ̂ nyàm zɨ̀ a ghɨ chɨl atu àteyn baʼsɨ̂ nɨ̀ ɨ̀byâs ɨ ndzɨsɨ vzɨ̀ a ghɨ n-ghaŋsɨ ɨchfɨ fɨndo nâ ghè, ²⁶Àŋena na bèʼì kɨmɨ ɨ̀byâs ɨ ndzɨsɨ vzɨ̀ a ghɨ ghàŋsɨ jɨ̀ŋ kal ɨwe fɨndo nɨ̀ Bôbo ateyn nɨ̀ àbaŋ ifu a kɨ̀mɨ nɨ̀ àbâs a ndzɨsɨ kì a ghɨ n-ghaŋsɨ ɨchfɨ ɨwe fɨndo nɨ̀ Bôbo nɨ̀ nkfɨ̀sɨ ateynsɨ baʼsɨ̂ nô mɨ nɨ̀ gha ta ghɨ nî ifêl ateyn. Ghelɨ Geshòn nɨn kelɨ sɨ nà nî nô mɨ ìfêl ì kà ta ghɨ n-kelɨ sɨ ni nɨ̀ ɨ̀fwo nâ wèyn. ²⁷Alòyn ŋêyn woyn ŋweyn nɨn kelɨ sɨ nà tisɨ ifêl i ghelɨ Geshòn nô ì jɨ̀m kèsa ghɨ n-beʼi ɨ̀fwo kèsa ghɨ n-nî nô mɨ ìfêl ì kà a. Àŋena nɨn kelɨ sɨ nà fu ifêl sɨ̂ ghelɨ Geshòn, fî dyêyn ɨ̀fwo vzɨ̀ a àŋena nɨn kelɨ sɨ nà beʼì-à. ²⁸À ti awo kì a ghelɨ Geshòn nɨn kelɨ sɨ nà ni-à a fɨndo nɨ̀ Bôbo Fɨyini. À na tisɨ̂ Itamà ɨ wâyn Alòyn ɨ ngàŋ ndô Fɨyini tisɨ̂ ìfêl i àŋena.

Ifêl i ghelɨ Mèlalì

²⁹Bôbo Fɨyini nɨn bè meyn sɨ̂ Mosìs ŋêyn Alòyn na, “Taŋ ghelɨ Mèlalì asas a ndosɨ asas a ndosɨ, ɨ taŋ achfɨ a ndo achfɨ a ndo. ³⁰Taŋ ghɨ̀lûmnɨ̀ nô ghɨ̀ jɨ̀m ta ghɨ chem beŋsɨ̀ mɨ̀vɨm ɨ̀n tal sɨ koʼ sɨ chem a bèŋ mɨ̀vɨm ɨ̀n tâyn ma ghɨ kàʼ a ghɨ fel a fɨndo nɨ̀ Bôbo. ³¹Àŋena nɨn kelɨ sɨ nà beʼì tɨwuwu nɨ̀ mɨ̀mbêʼsɨ̀ nɨ̀ mbàŋsɨ dyaŋsɨnɨsɨ nɨ̀ mɨ̀kfɨ̀s baʼsɨ̂ nɨ̀ ɨ̀byâŋ ɨfwo vzɨ̀ a ka mɨ̀ na ti atû àteyn a fɨndo nɨ̀ Bôbo Fɨyini. ³²Àŋena nɨn kelɨ kɨmɨ sɨ nà beʼi mɨkfɨ̂s mzɨ̀ a mɨ̀ jɨ̀ŋ kàli ɨwe fɨndo nɨ̀ Bôbo nɨ̀ ɨ̀byâŋ ɨfwo vzɨ̀ a mɨ̀ n-ti atu àteyn nɨ̀ mɨ̀chôʼ baʼsɨ̂ nɨ̀ nkfɨ̀sɨ ateynsɨ nô mɨ nɨ̀ gha vzɨ̂ a ghɨ n-nî ifêl ateyn, fî dyêyn ɨ̀fwo vzɨ̀ a nô mɨ ndà nɨn kelɨ sɨ nà beʼì-à. ³³À ti awo kì a ghelɨ Mèlalì nɨn kelɨ sɨ nà ni-à a fɨndo nɨ̀ Bôbo Fɨyini. À na tisɨ̂ Itamà ɨ wâyn Alòyn ɨ ngàŋ ndô Fɨyini tisɨ̂ ìfêl i àŋena.”

Ghɨ taŋ ghelɨ isas i ndo nɨ̀ Levì

³⁴Mosìs ŋêyn Alòyn nɨ̀ ghelɨ ghɨ tisɨnɨ a Isìlæ̀ nɨn læ meyn taŋ ghelɨ Kohàt isas i ndo isas i ndo, ɨchfɨ ndo ɨchfɨ ndo. ³⁵Ghɨ n-læ taŋ ghɨ̀lûmnɨ̀ nô ghɨ̀ jɨ̀m ta ghɨ chem beŋsɨ̀ mɨ̀vɨm ɨ̀n tal sɨ koʼ sɨ chem a bèŋ mɨ̀vɨm ɨ̀n tâyn ma ghɨ kàʼ a ghɨ fel a fɨndo nɨ̀ Bôbo, ³⁶kɨ̀ isas i ndo isas i ndo ghɨ nà chɨ̂yntɨ̀ ghɨ nkamsɨ̀ bò nɨ̀ ghelɨ ighɨ nsòmbo nɨ̀ ghelɨ mɨ̀vɨm ɨ̀n tâyn. ³⁷À ti akôyn a ghelɨ isas i ndo nɨ̀ Kohàt ghì a ghɨ nà n-chɨ̂yntɨ̀ ghɨ ma ghɨ kàʼ a ghɨ fel a fɨndo nɨ̀ Bôbo Fɨyini. Mosìs ŋêyn Alòyn nɨ̀n læ taŋ kɨ ighel ta Bôbo Fɨyini nɨ̂n bè sɨ̂ Mosìs. ³⁸Ghɨ n-læ taŋ ghelɨ Geshòn isas i ndo isas i ndo ɨ taŋ ɨchfɨ ndo ɨchfɨ ndo. ³⁹Ghɨ n-læ taŋ ghɨ̀lûmnɨ̀ nô ghɨ̀ jɨ̀m ta ghɨ chem beŋsɨ̀ mɨ̀vɨm ɨ̀n tal sɨ koʼ sɨ chem a bèŋ mɨ̀vɨm ɨ̀n tâyn ma ghɨ kàʼ a ghɨ fel a fɨndo nɨ̀ Bôbo, ⁴⁰kɨ̀ isas i ndo isas i ndo ghɨ nà chɨ̂yntɨ̀ ghɨ nkamsɨ̀ bò nɨ̀ ghelɨ ighɨ ntufa nɨ̀ ghelɨ mɨ̀vɨm ɨ̀n tal. ⁴¹À ti akôyn a ghelɨ isas i ndo nɨ̀ Geshòn ghì a ghɨ nà n-chɨ̂yntɨ̀ ghɨ ma ghɨ kàʼ a ghɨ fel a fɨndo nɨ̀ Bôbo Fɨyini. Mosìs ŋêyn Alòyn nɨ̀n læ taŋ kɨ ighel ta Bôbo Fɨyini nɨ̀n læ bè sɨ̂ Mosìs. ⁴²Ghɨ n-læ taŋ ghelɨ Mèlalì isas i ndo isas i ndo ɨ taŋ ɨchfɨ ndo ɨchfɨ ndo. ⁴³Ghɨ n-læ taŋ ghɨ̀lûmnɨ̀ nô ghɨ̀ jɨ̀m ta ghɨ chem beŋsɨ̀ mɨ̀vɨm ɨ̀n tal sɨ koʼ sɨ chem a bèŋ mɨ̀vɨm ɨ̀n tâyn ma ghɨ kàʼ a ghɨ fel a fɨndo nɨ̀ Bôbo, ⁴⁴kɨ̀ isas i ndo isas i ndo ghɨ nà chɨ̂yntɨ̀ ghɨ nkamsɨ̀ tal nɨ̀ ghelɨ ighɨ ì bò. ⁴⁵À ti akôyn a ghelɨ isas i ndo nɨ̀ Mèlalì ghì a ghɨ nà n-chɨ̂yntɨ̀ ghɨ ma ghɨ kàʼ a ghɨ fel a fɨndo nɨ̀ Bôbo Fɨyini. Mosìs ŋêyn Alòyn nɨ̀n læ taŋ kɨ ighel ta Bôbo Fɨyini nɨ̂n bè sɨ̂ Mosìs.

⁴⁶À ti ta Mosìs ŋêyn Alòyn nɨ̀ ghelɨ ghɨ tisɨnɨ a Isìlæ̀ nɨ̀n læ taŋ ghelɨ isas i ndo nɨ̀ levì kɨ̀ isas i ndo isas i ndo ɨ taŋ kɨ ɨchfɨ ndo ɨchfɨ ndo. ⁴⁷Ghɨ n-læ taŋ ghɨ̀lûmnɨ̀ nô ghɨ̀ jɨ̀m ta ghɨ chem beŋsɨ̀ mɨ̀vɨm ɨ̀n tal sɨ koʼ sɨ chem a bèŋ mɨ̀vɨm ɨ̀n tâyn ma ghɨ kàʼ a ghɨ fel a fɨndo nɨ̀ Bôbo, ⁴⁸kɨ̀ isas i ndo isas i ndo ghɨ nà chɨ̂yntɨ̀ ghɨ nkamsɨ nfama nɨ̀ ghelɨ ighɨ ì tâyn nɨ̀ ghelɨ mɨ̀vɨ̂m nfama. ⁴⁹Mosìs ŋêyn Alòyn nɨ̀n læ meyn fu ifêl sɨ̂ ghelɨ ndo nɨ̀ Levì nô ghɨ̀ jɨ̀m. Wù nà n-fu nô mɨ ìfêl i nda, dyêyn àfo kì a ka wù na beʼì-à. À ti ta ghɨ n-læ taŋ ghelɨ Levì kɨ̀ ighel ta Bôbo Fɨyini nɨ̀n læ bè sɨ̂ Mosìs.