Numbers 5

Tɨsaʼ kûm ghelɨ ghì a ghɨ n-layn wi ta isaʼi nɨn dyêyn.

¹Bôbo Fɨyini nɨ̀n be meyn sɨ̂ Mosìs na, ²“Bè sɨ̂ ghelɨ Isìlæ̀ na, àŋena saŋ fvɨ̀sɨ̀ nô mɨ ndà sɨ alèʼ ghè a ghɨ bɨ̀ ateyn ta wù n-kelɨ ikoʼi a ŋweyn ɨwùyn ma yi kàʼ a yi dyaŋ sɨ̂ wùl. À na ghɨ nô mɨ wul ta mu n-bɨm fvɨ̀ kɨ fvɨ a ŋweyn ɨwùyn, kèsa wù n-layn wi ta isaʼ nɨn dyêyn bòm ta wù kùm igvɨyn i wûl, àŋena saŋ fvɨ̀sɨ̀ ŋweyn. ³Isaʼ nâ yèynì nɨn ghɨ sɨ̂ ghɨ̀lûmnɨ̀ nɨ̀ ghɨ̀ki. Yi n-kelɨ sɨ sàŋ sɨ fvɨ̀sɨ àŋena ka ghɨ bebsɨ alêʼ kì a yì bɨ̀ ateyn, ma ghɨ ghesɨ̀nà afu.” ⁴Ghelɨ Isìlæ̀ nɨ̀n læ meyn saŋ fvɨ̀sɨ̀ ghelɨ nâ ghì sɨ alèʼ ghè a àŋena bɨ̀ ateyn kɨ̀ ighel ta Bôbo Fɨyini nɨ̀n læ bè sɨ̂ Mosis.

Isaʼ sɨ kasi sɨ làʼ mbɨ ta wùl ɨ̀ nì

⁵Bôbo Fɨyini nɨn fi meyn bè sɨ̂ Mosìs na, ⁶“Bè sɨ̂ ghelɨ Isìlæ̀ na, wùl ɨ̀ lûmnɨ̀ kèsa ɨ wi kæ nì iwo i bzɨ-i sɨ̂ wâynà ŋweyn a à na ghɨ ma wù ni meyn mbɨ sɨ̂ Bôbo Fɨyini. ⁷Yi gàyn tî a wùl àteyn na kelɨ sɨ taŋ ɨchfɨ ŋweyn kûm mbɨ zɨ̀ a wù nì. Wù na fî kelɨ sɨ laʼ mbɨ zɨ̀ a wù nì sɨ fì sɨ yomtɨ nɨ̀ àfo àmòʼ antêynɨ̀ ɨ̀fwo ɨ̀ twâyn atû àfo ghè a wù làʼ nɨ̀ ànkeyna. ⁸Mɨtì wùl ɨ̀ vzɨ̀ a ghɨ nì mbɨ àteyn sɨ̂ ŋweyn kæ nà ghɨ ma wù kfɨ meyn, wùl ɨ̀ ndo nɨ̀ àŋena ɨ ghɨ wi ta ghɨ kàʼ a ghɨ laʼ sɨ̂ ŋweyn, a à na kelɨ Bôbo Fɨyini. Ghɨ na kelɨ sɨ fu sɨ̂ ngàŋ ndô Fɨyini baʼsɨ̂ nɨ̀ àyaʼ kì a ghɨ n-kelɨ sɨ fu sɨ ifu na Bôbo Fɨyini lesɨ fù mbɨ wùl àteyn. ⁹Nô mɨ̀ ìfu i laynɨ-i ì kà ta ghelɨ Isìlæ̀ nɨn gvî nɨ̀n ìnyeyni sɨ̂ Bôbo Fɨyini nɨn kelɨ ngàŋ ndô Fɨyini. ¹⁰Nô mɨ ìfu i laynɨ-i ì kà ta wùl gvì nɨ̀n ìnyeyni sɨ̂ Bôbo Fɨyini nɨn kelɨ ngàŋ ndô Fɨyini.”

Sɨ keli na wùl ɨ wi nɨ̀n jelà ma wù n-jelɨ̀ wì-a

¹¹Bôbo Fɨyini nɨ̀n be meyn sɨ̂ Mosìs na, ¹²“Taŋi sɨ̂ ghelɨ Isìlæ̀ ɨ bè sɨ̂ àŋena na, wùl ɨ wi kæ lè dzɨ nà jelà, ¹³ɨ̀ chi ŋêyn wùl ɨ lûmnɨ̀ ɨwû lù lûm ŋweyn ɨ kya wi, nô wùl ɨ kya wi, a à na ghɨ ma wù bebsɨ meyn ngêŋ ŋweyn nô mɨ ta ghɨ bû kù ŋweyn.”

¹⁴Lum ŋweyn kæ keli ikfâʼtɨ̀ na wî ŋweyn nɨn jelà nà kôŋ sɨ nà kya na wù n-layna ma wù n-layn wi a, ¹⁵wu ndù nɨ̀n ŋweyn sɨ̂ ngàŋ ndô Fɨyini. Wù se sɨ ndù wu ndù nɨ̀ ìfûʼ ɨnkfɨ̀ŋ mɨ̀ balì ma ghɨ gwòtɨ ɨlwêʼ ìvɨm ɨ̀ lì alêʼ àmòʼ ɨ fu alèʼ nɨ̀ wî ŋweyn. Ka wu n-we mɨ̀vɨl mɨ̀ olìfsɨ̀ ateyn kèsa ileŋ bòm ta à n-ghɨ ìfu ɨfwo ɨ yɨnɨ, wu fu bòm ìkfâʼtɨ̀ zɨ̀ a wù n-kelɨ kûm wî ŋweyn kɨŋ sɨ nà kya nà wù chi meyn ŋêyn wùl ɨ lûmnɨ̀ ɨwû lù ma wù bû chi a.

¹⁶“Wu ndù-à a ngàŋ ndô Fɨyini be a wù timi asɨ nɨ̀ Bôbo Fɨyini. ¹⁷Wù timi, wu we mu ɨ̀nlaynɨ̂ a ntòyn àchàʼ ɨ myèytɨ̀ àbɨ̂l a ki fɨ̀ndo nɨ̀ Bôbo ɨ we ateyn. ¹⁸À na ghɨ ta wù tìmi, a ngàŋ ndô Fɨyini yas atu a ŋweyn ɨ̀ we ifu ɨfwo ɨ yɨnɨ zɨ̀ a ŋweyn awu a lûm ŋweyn fu, kɨŋ sɨ nà kya nà wù chi meyn ŋêyn wùl ɨ lûmnɨ̀ ɨwû lù ma wù bû chi a.” Wu n-fu tì ɨ̀ lì mu ɨ̀nluenɨ̂ mzɨ̀ a mɨ̀ n-gvi nɨ̀ ngeʼ tì, ¹⁹ɨ̀ bè a wùl ɨ wi àteyn taŋ njva, a wù kæ bè na, “À kæ nà ghɨ bula wùl ɨ lûmnɨ̀ ɨwû lù timi chi nɨ̀ và wa ghɨ bula wà lê dzɨ ɨ̀ bèbsɨ ngêŋ zyâ a malâ nɨ̀ và, ka mu ɨ̀nluenɨ̂ mèyn nɨ̂n fù ngeʼ sɨ̂ và.” ²⁰Mɨtì wà kæ nà ghɨ ma wà lê meyn dzɨ, ɨ chi zɨ̂ wùl ɨ lûmnɨ̀ ɨwû lù ɨ̀ bèbsɨ ngêŋ zyâ bu ghɨ a malâ, ²¹a ngàŋ ndô Fɨyini te vâ ɨ̀ bè na, “Mɨ n-jêm na Bôbo Fɨyini te vâ ɨ̀ nì wà læ̂ faŋ tɨ̀ bzɨ, ɨlvâ vâ koʼ, ghelɨ̀ ghya yeyn na ndòyn Fɨyini nɨn ghɨ a wa atu ɨ̀ mò vâ. ²²Mɨ n-jêm na mu nâ mèyn a mɨ̀ n-gvî nɨ̀ ngeʼ a ghelɨ atu tèyn zɨ a wa ɨwuyn ɨ̀ nì wà læ̂ faŋ tɨ̀ bzɨ, ɨlvâ vâ koʼ.”

Ngàŋ ndô Fɨyini nɨn bê tì, a wul ɨ wi àteyn be na, “Yi na ghɨ kɨ tì.”

²³Wu n-bè tì, a ngàŋ ndô Fɨyini nyaʼ ndi nâ sìsɨ̀ abàŋ afo ɨ̀ sù sùʼsɨ a mu ɨ̀nluenɨ̂ afî. ²⁴Wu n-sù-à ɨ̀ fù mu mzɨ̀ a mɨ̀ n-gvî nɨ̀n ngeʼ tì a wùl ɨ wi àteyn nyvɨ a mɨ̀ fu ngeʼ i bemnɨ sɨ̂ ŋweyn. ²⁵Wu n-se sɨ nyvɨ ma ngàŋ ndô Fɨyini fsɨ meyn ìfu ɨfwo ɨ yɨnɨ zɨ̀ sɨ a ŋweyn awu, a ghɨ ìfu bòm ìkfâʼtɨ̀ zɨ̀ a lûm ŋweyn nɨn kelɨ kɨŋ sɨ nà kya nà wù chi meyn ŋêyn wùl ɨ lûmnɨ̀ ɨwû lù ma wù bû chi a. Ngàŋ ndô Fɨyini nɨn fsɨ-a, ɨ̀ làysɨ̀ iyvɨ asɨ nɨ̀ Bôbo Fɨyini ɨ̀ gvì nɨ̀ ìnyeyni abaŋ ifu. ²⁶Wu n-ndù-à ɨ̀ myèytɨ̀ àwu ɨnkfɨ̀ŋ mɨ̀ ìfu ɨfwo ɨ yɨnɨ ɨ̀ nyòʼ atû àbaŋ ifu sɨ dyèyn na à n-kelɨ Bôbo Fɨyini ifu ateyn nô ì jɨ̀m, ɨ̀ kæ fu mu ɨ̀nluenɨ̂ nâ mzɨ̀ na wùl ɨ wi àteyn nyvɨ. ²⁷Wùl ɨ wi àteyn kæ nà ghɨ ma wù bebsɨ meyn ngêŋ ŋweyn, ɨ̀ chi ŋêyn wùl ɨ lûmnɨ̀ ɨwû lù, wù nyvɨ mu mɨ̀ àteyn a ngeʼ i bemnɨ koli ŋweyn a wù læ faŋ tɨ̀ bzɨ wayn, a ɨlva ŋweyn koʼ a wù na sɨ ghɨ ndi antêynɨ̀ nɨ̀ ghelɨ ŋweyn. ²⁸Mɨtì ma wù kæ nà ghɨ bula wù bebsɨ ngêŋ ŋweyn, a ngeʼ faŋ tɨ̀ kòli ŋweyn a wù na ghɨ ma wù kàʼ a wù bzɨ wayn.

²⁹“À ti isaʼ zɨ̀ a ghɨ n-kelɨ sɨ nà lemà ɨlvɨ ta wùl ɨ lûmnɨ̀ nɨn kelɨ ikfâʼtɨ̀ na wî ŋweyn le meyn dzɨ ɨ̀ bèbsɨ ngêŋ ŋweyn nà chî ŋêyn ghɨ̀lûmnɨ̀ ɨ ghɨlû bu ghɨ a malâ. ³⁰Isaʼ ateyn nɨn ghɨ kɨmɨ tì ɨlvɨ ta wùl ɨ lûmnɨ̀ kfàʼtɨ̀ kɨ̀ kfaʼtɨ na wî ŋweyn nɨn chî ŋêyn ghɨ̀lûmnɨ̀ ɨ ghɨlû. Wù kfâʼtɨ̀, ngàŋ ndô Fɨyini ɨ bè wùl ɨwi àteyn timi asɨ nɨ̀ Bôbo Fɨyini, wù ni kɨ̀ ta isaʼi nɨn dyêyn na wù ni sɨ̂ ŋweyn. ³¹Wùl ɨ wi àteyn kæ nà ghɨ ma wù bebsɨ meyn ngêŋ ŋweyn ɨ̀ chi ŋêyn wùl ɨ lûmnɨ̀ ɨwû lù a ngeʼ fe a ŋweyn atu mɨtì a lûm ŋweyn na kelɨ wi ngeʼ.”