Psalms 10

Ijêm i wûl ta ghelɨ awo a bɨ-a nɨn fu ngeʼ sɨ̂ ŋweyn

¹Wà beyn meyn jɨm sɨ̂ mà a BÔBO.

Wà lèytɨ̀ ìkêʼ ì zæ sɨ̂ mà ma ghɨ a ngeʼ ta ghɨ̀ gha?

²Ghelɨ awo a bɨ-a nɨn ghaŋsɨ̂ ɨ̀wuyn, choʼ àvɨ a ghelɨ ghɨ bolɨ.

Ni a BÔBO àŋena kasî lì kɨ ɨtwam ghê a àŋena bèyntɨ̀.

³Àŋena nɨn ghaŋsɨ̂ ɨ̀wuyn awo a bɨ-a ghê a àŋena nɨn kôŋ.

Bêŋ ghelɨ ghì a ghɨ n-ghaytɨ fsɨ ɨfwo ghêl fi chasɨ và a BÔBO.

⁴Ghelɨ awo a bɨ-a nɨn dyalɨ ghaʼ sɨ ndu sɨ̂ Fɨyini fɨ̀

Àŋena nɨn nî kɨ tèyn ta Fɨyini fɨ nɨn ghɨ wi mɨ ghɨ.

⁵Àŋena nɨn chyeʼ kɨ chyeʼ mbàynɨ̀sɨ àŋena;

Nî mɨtì awo a lum ndù kɨ a jûŋ sɨ̂ àŋena;

Mɨ̀tì kya wi izɨ-ì a wà bàʼtɨ sɨ̂ àŋena.

⁶Àŋena nɨn be kɨ na, “Ngèʼ læ̀ kolî wì ghes;

Achi a li-a nɨn ghɨ wi a ngeʼ læ̀ koli ghes.”

⁷Achfɨ̂ a àŋena nɨn ghɨ ma à luyn kɨ ànkaŋ nɨ̀ ìtaŋi i bzɨ-i.

Àŋena nɨn kâyntɨ̀ kɨ ngeʼsɨ nɨ̀ àwo a bɨ-a kì a ghɨ bàʼtɨ.

⁸Àŋena nɨn fvɨ̂ ndû lêytɨ̀ a tɨ̂taʼ ghɨ nà gvɨ̂ ghelɨ.

Chîtɨ̀ kɨ wul afu ta àŋena nɨn kɨŋ sɨ zue.

⁹À n-ghɨ nyamsɨ abo ta sɨ n-gvɨ̂ ghelɨ ghɨ bolɨ

Kɨŋ sɨ kutɨ àŋena ɨtwam ta ghɨ bèyntɨ̀.

¹⁰Àŋena nɨn zuetɨ̂ ghelɨ ghì a iwo i nɨn bu a àŋena ɨchfɨ̀;

Ghelɨ ghɨ bolɨ nɨn chî kɨ isas isaʼ nɨ̀ àŋena.

¹¹Ghelɨ awo a bɨ-a nɨn bê kɨ na, “Fɨyini fɨ̀ nɨn ki wi ghes”;

Àŋena nɨn bê na, “Fɨ bɨytɨ meyn àsɨ nà ki wi ghes”.

¹²Fvɨ timi a BÔBO ɨ nù ghelɨ awo a bɨ-a.

Ka wa n-lèsɨ̀ ghelɨ ghɨ bolɨ a Fɨyini fɨ.

¹³Ghelɨ awo a bɨ-a nɨn chêysɨ̀ Fɨyini.

Kfaʼ kɨ na Fɨyini fɨ læ̀ bɨf wi iwo sɨ̂ àŋena.

¹⁴Wà n-yeyn ngeʼ ìkaynɨ zɨ̀ a ghelɨ ghɨ bolɨ nɨn yeyn a BÔBO.

Wà n-ki yeyn ngeʼ àŋena ghɨ sɨ ni iwo, Ghelɨ ghɨ bolɨ nɨn yeʼtɨ̂ kɨ a vâ.

Samsɨ̂ kɨ và vzɨ̀ a wà n-toʼnɨ nɨ̀ ghelɨ ghɨ bolɨ.

¹⁵Kòytɨ akœ a ghelɨ awo a bɨ-a a BÔBO,

Ghaytɨ kɨ ghɨ̀ jɨ̀m ka wa n-vìsi wul sɨ ateyn.

¹⁶BÔBO na saʼ kɨ saʼ nô sɨ a mɨlvɨ ɨ̀n jɨ̀m

Ghelɨ tɨlaʼ tɨ mbzɨ læ̀ mæ̂ nô ghɨ̀ jɨ̀m.

¹⁷Wà yvɨ meyn ta ghelɨ ghɨ bolɨ nɨn dzɨ̂

Wà yvɨ meyn àŋena, ghɨ sɨ beynsɨ àŋena.

¹⁸Wa nì saʼ fu nsaʼ woyn nkfɨ nɨ̀ nsaʼ ghelɨ ghɨ bolɨ,

Ka nkàyn wùl mɨ̀sòŋ læ̂ fì fàynsɨ̀ àŋena.