Psalms 103

Ikôŋ i kaynɨ-i nɨ̀ Fɨyini fɨ̀

Njàŋ Devìt

¹Mà na koʼsɨ̂ Bôbo Fɨyini Mà na koʼsɨ̂ ŋweyn vzɨ̀ a wù layn kfeynɨ Nɨ̀ àtem à kema à jɨ̀mà.

²Mà na koʼsɨ̂ Bôbo Fɨyini Mà læ̀ lêsɨ wì nô ìwo i juŋì ì moʼ ta wù nì.

³Wù n-lêsɨ̀ fu mbɨ̂ semsɨ nô sɨ̀ jɨ̀m Wù n-chuʼ tɨ̀koʼi temtɨ nô tɨ̀ jɨ̀m.

⁴Wù yuyn meyn mà sɨ̂ ìkfɨ-i Ikôŋ i mɨ̂kàyn nɨ̀ ŋweyni nɨ̀ ìtôʼnɨ̀ i ŋweyni nɨn ghɨ àfol a tɨ̂fòyn a ma atu.

⁵Wù n-fu ɨ̀fwo ɨ jûŋ sɨ̂ mà. Wù n-ni-à ma kelî àdyaʼ a fɨ-a.

⁶BÔBO nɨn dyêyn baynsɨ̂ dzɨsɨ àti-àti sɨ̂ ghesɨ̀nà, BÔBO nɨn saʼ fu nsaʼ sɨ ghelɨ ghì a ghɨ n-yeʼtɨ a ŋweyn ɨwùyn.

⁷Wù n-læ meyn dyèyn dzɨsɨ ŋweyn sɨ̂ Mosìs Wù n-læ meyn dyèyn àwu ifèl nɨ̀ ŋweyn sɨ̂ ghelɨ Isìlæ̀:

⁸BÔBO nɨn tôʼnɨ̀-à, kelɨ àtem a juŋà, weynsɨ-à. Ikôŋ i mɨ̂kàyn nɨ̀ ŋweyni nɨn kelɨ wi ɨfyêʼ.

⁹Wù lum ghàm wì kɨ gham ghesɨ̀nà, nyôʼsɨ̀ wì kɨ nyoʼsɨ ɨtoŋ.

¹⁰Wù lum saʼ wi ghesɨ̀nà ta mbɨsɨ ghesɨ̀nàsɨ nɨn dyêyn Lâʼ wì ghesɨ̀nà ifyeʼ ɨ mbɨsɨ nɨ̀ ghesɨ̀nà.

¹¹Ikôŋ i mɨ̂kàyn nɨ̀ BÔBO i sɨ̂ ghelɨ ghì a ghɨ n-gvɨmlɨ ŋweyn nɨn kelɨ wi ɨfyêʼ.

¹²Wù chyeʼsɨ meyn mbɨsɨ ghesɨ̀nà kɨ̀ samoʼ.

¹³Bò wàyn nɨn tôʼnɨ̀ mɨ ti nɨ̀ woyn, BÔBO ɨ tôʼnɨ̀ kɨ tì nɨ̀ ghelɨ ghì a ghɨ n-gvɨmlɨ ŋweyn.

¹⁴BÔBO bu kya kɨ kya na wù n-læ faytɨ ghesɨ̀nà kɨ nɨ̀ àchaʼ a nse-a.

¹⁵Wùl nɨn ghɨ kɨ ta àmbùs ɨtwaʼ, Bûs kɨ layn,

¹⁶Afyefa kûʼ nèʼsɨ̀ kɨ̀ têyn kɨ yum ɨ yàlà, ghɨ lèsɨ kɨ lesɨ.

¹⁷Mɨtì ikôŋ i mɨ̂kàyn nɨ̀ BÔBO faŋ meyn kɨ̀ faŋ. Yi faŋ meyn kɨ̀ faŋ sɨ̂ ghelɨ ghì a ghɨ n-gvɨmlɨ ŋweyn. Wù n-dyêyn dzɨsɨ àtì-ati sɨ̂ woyn àŋena kɨ̀ ajàŋ ajàŋ.

¹⁸Wù n-dyêyn dzɨsɨ ateyn sɨ̂ woyn ghì a ghɨ n-lêm tɨsaʼtɨ ŋweyn Fî nî àwo kì a wù n-kɨŋ.

¹⁹BÔBO faŋ meyn kɨ̀ faŋ achɨ a tɨ̂fòyn nɨ̀ ŋweyn iyvɨ. Wù n-saʼ kɨ mbzɨ ì jɨ̀m.

²⁰Nchìsɨ Fɨyini sɨ ghaʼnɨsɨ, Yì na koʼsɨ̂ BÔBO.

²¹Nchìsɨ Fɨyinisɨ̀ nɨ̀ ghelɨ ghɨ felɨnɨ nɨ̀ ŋweyn nô ghɨ̀ jɨ̀m iyvɨ, Yì na koʼsɨ̂ ŋweyn.

²²Mà na koʼsɨ̂ Bôbo Fɨyini kɨ nɨ̀ àtem à kema à jɨ̀mà.