Psalms 112
This book is a draft. It has been translated but has not yet finished checking, and is published here so the community can read and respond to it.
Fɨyini fɨ̀ nɨn boysɨ̂ ghelɨ ghì a ghɨ n-gvɨmlɨ ŋweyn
1Hàlìluyà Njùŋ nɨ̀n ghɨ sɨ̂ wùl ɨ̀ vzɨ̀ a wù n-gvɨmlɨ Bôbo Fɨyini, Kôŋ kɨ sɨ nà nî ta Bôbo Fɨyini bè.
2Woyn ŋweyn læ̀ nà kelɨ àdyaʼ Ajâŋ a ŋweyna læ̀ nà kelɨ ìboysɨ.
3Ndô ŋweyn nɨn ghɨ ma yì luyn meyn nɨ̀ ìghaʼi Nchînɨ̀ àtì-ati nɨ̀ ŋweyn faŋ meyn sɨ a mɨlvɨ ɨ̀n jɨ̀m.
4Wùl àtì-ati nɨn kelɨ àtem a juŋà, koynsɨ̂ ìsuyn sɨ̂ ghelɨ Wù n-ghɨ ta ibayn sɨ̂ ghelɨ ghɨ li antêynɨ̀ àbe a fɨmnɨ-a.
5Awo a juŋa ni-à gâyn sɨ̂ wùl ɨ̀ vzɨ̀ a awu a ŋweyna nɨn fvɨ̂, Wù ni-à fu ɨ̀fwo sɨ̂ ghelɨ kɨŋ wi sæ, nî àwo kɨ àtì-ati.
6Samoʼ, iwo i læ̀ nêʼsɨ̀ wì wul àtì-ati Ghɨ læ̀ lêsɨ̀ wì ŋweyn nô ta ka ghɨ̀ læ̂ ghɨ̀.
7Wù n-fàyn wì saʼgha ibɨ Iwo i lum nêʼsɨ̀ wì ikfâʼtɨ̀ i ŋweyn Wù n-samsɨ̂ kɨ Bôbo Fɨyini.
8Wù lum kelɨ kɨ àtem ato-a, fâyn wì afo À læ̀ nà ghɨ a ngòʼsɨ a wù keʼ mbàynɨ̀sɨ ŋweyn, ɨ̀ tɨm yɨ.
9Wùl àtì-ati nɨn nî wu nà fu ɨ̀fwo sɨ̂ ghelɨ ànfɨf, ghêʼnɨ̀ wì Nchînɨ̀ àtì-ati nɨ̀ ŋweyn faŋ meyn sɨ a mɨlvɨ ɨ̀n jɨ̀m Adyaʼ a ŋweyna nɨn gvî kɨ nɨ̀ ɨ̀kfɨm sɨ̂ ŋweyn.
10Wùl ɨ bɨ nɨn nî wu nà ki wul àtì-ati, nyôʼsɨ̀ kɨ ɨ̀toŋ, Wù nî wu nà lum kɨ àwu, iwo ateyn i ɨ zuetɨ̂ kɨ zuetɨ ŋweyn Mɨtì ikfâʼtɨ̀ i bzɨ-i nɨ̀ ŋweyn nâ zɨ̀-ì ɨ chwô kɨ salû.