Psalms 138
This book is a draft. It has been translated but has not yet finished checking, and is published here so the community can read and respond to it.
Àyòŋnɨ̀ sɨ̂ Fɨyini fɨ
Njàŋ Devìt
1Mà na koʼsɨ̂ và a BÔBO kɨ nɨ̀ àtem à kema à jɨ̀mà Mà na yem njàŋsɨ̀ buʼ ɨ̀fwo koʼsɨ̂ và nô mɨ asɨ nɨ̀ mɨyini.
2Mà na ngvɨmlɨ̂ và, ki ndûsɨ̀ kɨ nɨ̀ àlêʼ a laynɨ-a nɨ̀ và à Mà na koʼsɨ̂ ìzɨyn ì zæ Bòm ìkôŋ i mɨ̂kàyn nɨ̀ và Bòm ta wà n-taŋî kɨ samoʼ Iwo ì zæ nɨn ngaŋtɨ̂ chwô nô mɨ ghà Izɨyn ì zæ ɨ ngaŋtɨ̂ chwô nô mɨ ghà.
3Ma jêm meyn wà yvɨ ìjêm ì yemi Wà fu meyn àtem a to-a sɨ̂ mà Ɨ̀ kfèynsɨ àdyaʼ à kema.
4Tɨfôyn tɨ mbzɨtɨ læ̀ nà koʼsɨ̂ và a BÔBO Tɨfôyn tɨ mbzɨtɨ nɨn yvɨ ìwo ì zæ nà koʼsɨ̂ và.
5Àŋena na yem ta àŋena yèyn meyn dzɨ, A ghɨ dzɨ zɨ̀ a yì n-gvî sɨ̂ và a BÔBO Àŋena na yem kûm ìbayn i ghaʼnɨ-i nɨ̀ và a BÔBO.
6Wà n-ngaŋtɨ̂ chwô mbzɨ ì jɨ̀m a BÔBO Mɨtì kinî kɨ kini ghelɨ ghɨ bolɨ Wà n-fu wi ikêʼ sɨ̂ ghelɨ ghì a ghɨ n-ghaŋsɨ ɨwuyn.
7Mɨ n-jɨ̂ŋ mɨ a ngeʼ tèyn wa kinî mà Mbaynɨ̀ semsɨ na nyôʼsɨ̀ mɨ ɨ̀toŋ Kelɨ wi iwo i li sɨ ni sɨ̂ mà Wà naysɨ meyn àwu adyaʼ nɨ̀ và ɨ̀ bœ̀sɨ̀ mà.
8Wà læ̀ nî kɨ ìwo zɨ̀ a wà bàʼtɨ kûm mà Bòm ta ikôŋ i mɨ̂kàyn nɨ̀ và i faŋ meyn sɨ̂ mà a BÔBO Ka wa n-màʼì mà bòm ta à bòm vâ bòm ma.