Psalms 145
This book is a draft. It has been translated but has not yet finished checking, and is published here so the community can read and respond to it.
BÔBO nɨn kelɨ àtem a jùŋà, koynsɨ̂ ìsuyn
Njàŋ ta Devìt nɨ̀n læ betɨ na ghɨ na yema koʼsɨ̂ Fɨyini
1Mà na ghaʼsɨ̂ và Wà n-ghɨ fòyn sɨ̂ mà, ghɨ Fɨyini femfɨ Mà na koʼsɨ̂ ìzɨyn ì zæ nô ta ka ghɨ̀ læ̂ ghɨ̀.
2Mà na koʼsɨ̂ và kɨ̀ mɨchi ɨ̀n jɨ̀m Mà na ghaʼsɨ̂ kɨ ghaʼsɨ izɨyn ì zæ Nô ta ka ghɨ̀ læ̂ ghɨ̀
3Bôbo Fɨyini nɨn ngaŋtɨ-à Ngaŋtɨ̂ kfeynɨ ta ka ghɨ na ko’sɨ ŋweyn Wù n-gaŋtɨ chwô ìtof ì jɨ̀m.
4Ajaŋà læ̀ nà koʼa, kɨ nà fêʼtɨ̀ ìfêl ì zæ sɨ̂ a li-a Àŋena læ̀ nà fêʼtɨ̀ ìfêl i kaynɨ-i nɨ̀ và sɨ̂ ngvaʼ ìbàm.
5Àŋena læ̀ nà taŋî kûm ɨ̀fôyn va nɨ̀ ìbayn i ghaʼnɨ-i nɨ̀ và Mà na duʼa kfâʼtɨ̀ kɨ kfaʼtɨ ifêl i kaynɨ-i nɨ̀ và.
6Ghelɨ læ̀ nà fêʼtɨ̀ àwo a kaynɨ-a kì a wà nì, Awo kì a wà nì nɨ̀ àdyaʼ a bemnɨ-a nɨ̀ và Mà na fèʼtɨ̀ àwo a kaynɨ-a kì a wà n-môm
7Ghelɨ læ̀ nà dyala kûm njùŋ ì kaynɨ nɨ̀ và Yem njàŋsɨ̀ fî saŋlɨ̂ kûm dzɨsɨ àtì-ati nɨ̀ và.
8BÔBO nɨn koynsɨ̂ ìsuyn, kelɨ àtem a juŋa, Nyâŋsɨ̀ nyôʼsɨ̀ wì ɨtoŋ, kelɨ ìkôŋ yi kfeynɨ̂-à.
9BÔBO nɨn kelɨ àtem a juŋà kɨ̀ sɨ̂ ghelɨ ghɨ̀ jɨ̀m Ikoynsɨ isuyn nɨ̀ ŋweyni nɨn nkfeynɨ-à Yi n-kfeynɨ̂ nô mɨ sɨ̂ ndà ta wù fàytɨ.
10Nô mɨ ghà ta wà fàytɨ læ̀ nà koʼsɨ̂ và a BÔBO Ghelɨ ghì a ghɨ n-kya vâ læ̀ nà bemsɨ̂ và.
11Àŋena læ̀ nà fêʼtɨ̀ na ɨfôyn va nɨn ŋwaʼà Àŋena læ̀ nà taŋî kûm àdyaʼ à kya.
12Ta ka ghelɨ ghɨ̀ jɨ̀m keli na wà n-môm àwo a kaynɨ-a Ɨ̀ fì kèli na ɨfôyn va nɨn jofà, ŋwaʼà.
131. Ɨfôyn va faŋ meyn kɨ̀ samoʼ Wà n-saʼ ɨ̀fôyn vâ kɨ̀ ajàŋ ajàŋ Bôbo nɨn bê nô mɨ na gha nî kɨ tì Dyêyn njùŋ ŋweyn awo ghè a wù n-nî nô à jɨ̀m]
14Bôbo nɨn tôʼtɨ̀ nô mɨ ndà ta wù n-kɨŋ sɨ fe Lâysɨ̀ nô mɨ ndà vzɨ̀ a ghɨ n-yeʼtɨ ŋweyn.
15Ghelɨ ghɨ̀ jɨ̀m nɨn ki kɨ và a BÔBO Ɨlvɨ kfeyna, wa fu àfo àŋena yɨ-a.
16Ɨfwo ɨ̀ jɨ̀m nɨ̀n fvɨ̂ a wa awu Wà n-yɨsɨ̂ nô mɨ ghà ta kɨ n-chi.
17BÔBO nɨn nî àwo à jɨ̀m kɨ àtì-ati Dyêyn ìkôŋ i ŋweyn sɨ̂ ghelɨ ghì a wù fàytɨ nô ghɨ̀ jɨ̀m.
18BÔBO nɨn baʼsɨ̂ nô mɨ sɨ̂ ndà vzɨ̀ a wù n-dzɨ̂ sɨ̂ ŋweyn Nô mɨ sɨ̂ ndà vzɨ̀ a wù n-jêm sɨ̂ ŋweyn Dzɨ̂ nɨ̀ àtem a ŋweyn à jɨ̀mà.
19BÔBO nɨn fu ɨ̀fwo sɨ̂ ghelɨ ghì a ghɨ n-gvɨmlɨ ŋweyn. Wù n-yvɨ ìdzɨ̂ i àŋena, bœ̂sɨ̀ àŋena.
20BÔBO nɨn tôʼnɨ̀ nɨ̀ ghelɨ ghì a ghɨ n-kôŋ ŋweyn Mɨtì bebsɨ̂ kɨ bebsɨ ghelɨ awo a bɨ-a nô ghɨ̀ jɨ̀m.
21Mà na yasì ɨ̀chfɨ̂ nô mɨ ɨlvɨ gha koʼsɨ̂ BÔBO Ɨfwo ɨ̀ jɨ̀m na koʼsɨ̂ kɨ koʼsɨ izɨyn i ŋweyn Nô ta ka ghɨ̀ læ̂ ghɨ̀.