Psalms 21

Isaŋlɨ i fòyn ta Fɨyini fɨ̀ fvɨ̀sɨ̀ ŋweyn sɨ a ngeʼ

Njàŋ ta Devìt nɨn læ betɨ na nchfɨ̀ njàŋ na fu-a ghɨ yema

¹Fòyn nɨ̀n saŋlɨ-à kûm àdyaʼ à kya a BÔBO.

Fòyn nɨ̀n saŋlɨ̂ nô sɨ a ŋaŋ bòm ta wà bœ̀sɨ̀ ŋweyn.

²Wà fu meyn nô mɨ ghà ta fòyn nɨn kɨŋ

Wà bû lèʼsɨ àfo sɨ̂ ŋweyn ta wù bɨf.

Yì tôʼ yvɨtɨ

³Wà boysɨ meyn ŋweyn nɨ̀ ɨ̀fwo ɨ jûŋ

Wà su meyn àfol a tɨ̂fòyn a ŋweyn atu kɨ jofà.

⁴Wù loyn meyn ìchi idyâ-ì sɨ̂ và

Wà fu ìchi zɨ̀ sɨ̂ ŋweyn a yi læ̀ mæ̂ wi.

⁵Wà bœsɨ meyn ŋweyn ɨ̀ làysɨ̀ ŋweyn iyvɨ;

Wà dyeyn meyn ɨ̀foyn ŋweyn sɨ̂ mbzɨ.

⁶Wà ni meyn wù na ghɨ ìboysɨ i ghaʼnɨ-i sɨ̂ ghelɨ ŋweyn.

Wù n-saŋlɨ̂ nô sɨ a ŋaŋ bòm ta wà n-ghɨ zɨ̂ ŋweyn kɨ̀ mɨlvɨ ɨ̀n jɨ̀m.

⁷Samoʼ samoʼ fòyn kèli ìboysɨ nâ yèynì bòm ta wù sàmsɨ Bôbo Fɨyini;

Afo a læ̀ nêʼsɨ̀ wi fòyn bòm ìkoŋi mɨ̂kàyn nɨ̀ BÔBO vzɨ̀ a wù ngàŋtɨ̂ chwò.

⁸Wa nì kɨŋ fvɨsɨ̀ mbàynɨ̀ shyasɨ nò sɨ̀ jɨ̀m,

Wa nì kɨŋ fvɨsɨ̀ mbàynɨ̀ shyasɨ sɨ a ɨbùʼ.

⁹Wà læ̀ fvɨ̂ ɨchfɨ iwòŋ a àŋena na fɨ kɨ ta ɨvɨs ichɨ.

BÔBO nì nyôʼsɨ̀ ɨ̀toŋ ɨ̀ mèsì kɨ̀ mesi àŋena ɨvɨ̀s.

¹⁰Wà læ̀ zuetɨ̂ woyn àŋena ɨ̀ faŋ tɨ̀ vìsi nô ɨ̀mòʼ atû nse.

Wàyn læ̀ faŋ wi antêynɨ̀ woyn nɨ̀ àŋena.

¹¹Àŋena nɨn baʼtɨ̂ àwo a bɨ-a kûm và kɨ ghɨ wi sɨ kfeyn.

Àŋena nɨn baʼtɨ̂ nô mɨ ngeʼ ì kà kûm và yi ghɨ wi sɨ kfeyn.

¹²Wà læ̀ fvɨ̂ kêʼ àŋena,

A àŋena kasi kɨ nɨ̀ ìnyɨŋ i.

¹³Gvì læ̂ ɨ dyèyn àdyaʼ à kya a BÔBO.

Ghès na yema koʼsɨ̂ và bòm àdyaʼ à kya.