Psalms 22

Idzɨ̂ i wûl ta wù n-yvɨ iyaf mɨtì yem njàŋ, koʼsɨ̂ Fɨyini

Njàŋ ta Devìt nɨn læ betɨ ɨ fu sɨ̂ nchfɨ̀ njàŋ na wù na fu-a ghɨ yem a gyâ “Njàŋ fɨ̀chuè fɨ nlâyn ɨ̀tùʼ.”

¹Fɨyini femfɨ, Fɨyini femfɨ, bòm ghà ta wà màʼi ma a?

Bòm ghà ta wà ndu ndyèyn ma na dzɨ-à wa gâmtɨ̀ wì ma a?

²Fɨyini femfɨ, mɨ n-dzɨ sɨ̂ và nɨ̀nchùe, wa bêynsɨ̀ wì ma,

Kfâ dzɨ̂ nɨ̀ntuʼ, dzɨ̂ kɨ tèyn ɨtuʼ layna.

³A ghɨ tì, wa layna, duʼ alèʼ a ngaŋtɨnɨ-a;

Ghelɨ Isìlæ̀ ɨ koʼsɨ̂ và.

⁴À n-ghɨ và vzɨ̀ a ghɨ̀bo ghesɨ nɨ̀n læ samsɨ;

À n-ghɨ và vzɨ̀ a àŋena nɨ̂n læ samsɨ, wa fvɨ̀sɨ̀ àŋena sɨ a ngeʼ.

⁵Àŋena nɨ̂n læ meyn dzɨ̀ sɨ̂ và, wa bœ̀sɨ̀ àŋena;

À n-ghɨ và vzɨ̂ a àŋena nɨ̂n læ samsɨ, iwumi-i læ faŋ tɨ̀ ku àŋena.

⁶Mɨtì ma ghɨ wi afo, mɨ n-ghɨ wi wul,

Ghelɨ nɨn chyeʼ mà, kesɨ̂ mà.

⁷À n-yeyn mɨ ndà ma, wêsɨ̀ kɨ wesɨ;

À n-yeyn mɨ ndà ma, mâʼ kɨ ndi,

À n-yeyn mɨ ndà ma, sôʼ kɨ nɨ̀ ɨ̀chfɨ̂.

⁸Bê na, “Wù bè na yi n-samsɨ̂ Bôbo Fɨyini,

Bôbo Fɨyini fvɨsɨ læ̂ ŋweyn lvɨ̂yn sɨ a ngeʼ, Bôbo Fɨyini gamtɨ læ̂ ŋweyn,

Bòm ta wù n-kôŋ ŋweyn.”

⁹Mɨtì ma à n-læ bɨmi vâ na mà fvɨ̀ sɨ ɨlvà nɨ̀ nà wom,

Wà n-læ meyn nì ma nà samsɨ̂ và,

Ghɨ bu duʼ tɨ̀ teyn mɨ mà sɨ igheyn.

¹⁰Mɨ n-yeʼtɨ̂ a vâ kɨ̀ sɨ ɨtuʼ ta ghɨ n-bzɨ ma;

Wà n-ghɨ Fɨyini femfɨ kɨ̀ sɨ achi ta mà fvɨ̀ sɨ ɨlvà.

¹¹Ka wa ndù ndyèyn a Bôbo,

Ngeʼ nɨn kɨŋ sɨ koli ma

Wùl ɨ ghɨ wi sɨ gàmtɨ ma.

¹²Nyamsɨ ndoŋsɨ jɨŋ meyn kàli mà, dvɨ̂ kɨ tèyn

Nyamsɨ Bashàn sɨ bemnɨsɨ gvɨ meyn a ma atu.

¹³Sɨ n-yem achfɨ̂ kɨ̀ ta nyamsɨ abo

Sɨ n-dɨmà, kɨŋ sɨ sàytɨ̀ ma.

¹⁴Iwo i bu ghɨ wi a ma ɨchfɨ̀,

Nô àvɨf a bu ghɨ wi a ma ɨwùyn.

Ɨwuyn wom leʼ meyn kɨ ɨ̀ jɨ̀m.

¹⁵Ma yum meyn nà sɨ ghɨ kɨ ta ntòyn àchàʼ,

Mɨ̀nchya yum meyn sɨ a ma ɨchfɨ̀;

Wà tòm ma kɨ̀ ɨchfɨ̀ isè.

¹⁶Bɨsɨ jɨŋ meyn kàli mà;

Ghelɨ awo a bɨ-a gvɨ meyn a ma atu,

Nà chuʼlɨ̂ mà ɨvɨ̀, chuʼlɨ̂ ɨwu.

¹⁷Ɨvɨf ɨ̀wom sɨ kêʼ kɨ a ndayn.

Ghelɨ nɨn yeyn mà ghɨ nà dûŋ ki kɨ tèyn.

¹⁸Àŋena nɨn gwô ndzɨ semsɨ.

Tɨm bèyʼ sɨ yeyn na a n-kelî nda sɨ̀ kà a.

¹⁹Mɨtì a BÔBO ka wa n-ndù ndyèyn;

Wà n-ghɨ ngàmtɨ̀ yem, nyàŋsɨ gvi ɨ gàmtɨ̀ mà.

²⁰Gàmtɨ ma ka ghɨ kaʼlɨ zuè ma,

Fsɨ ma sɨ a ɨwu nɨ̀ bɨ sèynsɨ̀.

²¹Fvɨ̀sɨ ma sɨ ɨchfɨ̀ nɨ̀ nyamsɨ abo;

Kɨ̀ŋtɨ ma sɨ̂ nyamsɨ bemnɨ sèynsɨ̀.

²²Mà na fèʼtɨ̀ àwo kì a wà nì sɨ̂ ghelɨ̀ ghem;

Ghelɨ̀ ghya na yvɨ̀ŋtɨ̀ mɨ wo, ma nà koʼsɨ̂ và.

²³Zɨ̀ ghî a yi n-fâyn Bôbo Fɨyini, yì na koʼsɨ̂ ŋweyn!

Zɨ̀ woyn Jàkôb nô ghɨ̀ jɨ̀m, yì na koʼsɨ̂ ŋweyn!

Zɨ̀ ghelɨ Isìlæ̀ yì na ngvɨmlɨ̂ ŋweyn.

²⁴Bòm ta Bôbo Fɨyini nɨ̀n bêyn wì jɨ̀m sɨ̂ wùl ɨ̀ ngeʼ,

kesɨ̂ wì wul,

Wù n-buʼsɨ̂ wì isɨ sɨ ɨwùyn nɨ̀ ŋweyn

Wù n-yvɨ îdzɨ̂ i ŋweyn.

²⁵Wà dyêyn meyn sɨ̂ ànôyn à kya na mɨ n-ghɨ wul;

Mà na luynsɨ̂ ìchfɨ̂nɨ̀ ì yemi asɨ nɨ̀ ghelɨ ghì a ghɨ n-fâyn ŋweyn.

²⁶Ghelɨ ghì a ghɨ n-ghɨ a ngeʼ læ̀ nà yɨ kula;

Njùmtɨ̀ sɨ ibam nɨ̀ Bôbo Fɨyinisɨ̀ læ̀ nà koʼsɨ̂ ŋweyn.

Mɨ n-jêm na yì na saŋlɨ̂ kɨ saŋlɨ mɨlvɨ ɨ̀n jɨ̀m.

²⁷Ghelɨ læ̀ fvɨ̂ a tɨghaŋ tɨ mbzɨ nô tɨ̀ jɨ̀m,

Ɨ̀ kfàʼtɨ̀ Bôbo Fɨyini ɨ̀ ndù sɨ̂ ŋweyn,

Ghelɨ læ̀ fvɨ̂ a tɨlaʼ tɨ mbzɨ nô tɨ̀ jɨ̀m nà koʼsɨ̂ và.

²⁸Fòyn samoʼ nɨn ghɨ kɨ Bôbo Fɨyini

Wù n-saʼ kɨ tɨ̀laʼ tɨ̀ jɨ̀m.

²⁹Ghelɨ ghì a ghɨ n-faytɨ kya Fɨyini læ̀ nà yɨ-a ngvɨmlɨ̂ ŋweyn;

Ghelɨ ghɨ̀ jɨ̀m læ̀ tɨm àlvɨ a ŋweyn asɨ,

Bòm ta nô wùl nɨ̀n ghɨ wi a wù læ̀ chi faŋ.

³⁰Woyn ghì a ghɨ læ̀ koʼ ibàm læ̀ nà felɨ̀ sɨ̂ ŋweyn;

Àŋena læ̀ yvɨ ìwo kûm Bôbo Fɨyini.

³¹Àŋena læ̀ nà fêʼtɨ̀ sɨ̂ ngvaʼ ìbàm na Bôbo Fɨyini nɨn ghɨ Fɨyini fɨ àtì-ati,

Na, samoʼ Bôbo Fɨyini nɨ̀n bœ̂sɨ̀ ghelɨ ŋweyn.