Psalms 27
This book is a draft. It has been translated but has not yet finished checking, and is published here so the community can read and respond to it.
Yì na yeʼtɨ̂ kɨ ɨwùyn nɨ̀ Bôbo Fɨyini
Njàŋ Devìt
1Bôbo Fɨyini nɨn ghɨ ìbayn ì yemi, ghɨ mbœ̀sɨ̀ yem.
Mà ti kàʼ a mà na fî fâyn nô ndà?
Bôbo Fɨyini nɨn ghɨ àlêʼ a leytɨnɨ-a nɨ̀ mà.
À ti kàʼ a à na fì fu nô ghà ngeʼ sɨ̂ mà a?
2Mbàynɨ̀sɨ ti meyn kèʼ mà dvɨ̂ kɨ tèyn
nà kɨŋ sɨ mzɨ ma
À kasi dyamtɨ kɨ ghelɨ awo a bɨ-a nâ ghi nà felɨ-à.
3Nô mɨ ta ndvɨ̀ ghèl jɨ̀ŋ kàli ma ɨ̀ kèʼ mà
Mɨ n-kelɨ wi ifâyn;
Ghɨ tas meyn ìwoŋ nà nû mà
Mɨtì iwo ateyn i ɨ fu wi ngeʼ sɨ̂ mà.
4Mɨ n-bɨf kɨ ìwo ìmòʼ sɨ̂ Bôbo Fɨyini,
Kɨŋ kɨ ìwo nâ yèynì ìmòʼ:
Na wù ni mà faŋ kɨ̀ a ŋweyn a ndo kɨ̀ samoʼ
Ɨ̀ nà ki kɨ ŋweyn,
kêʼtɨ̀ ŋweyn.
5Samoʼ ngeʼ læ̀ kolî mà mɨ achi à kà,
A BÔBO leytɨ ma isas i tɨ̂wò nɨ̀ ŋweyn
A wù leytɨ ma a ŋweyn a ndo,
A wù koʼsɨ tòm ma atû ìwù.
6Wu nì lâysɨ̀ lêm mà alèʼ a ngaŋtɨnɨ-a
A mà na ki suʼsɨ̂ sùʼsɨ nɨ̀ mbàynɨ̀ semsɨ, ɨ mbàynɨ̀ sìsɨ̀ a sɨ jɨŋ kàli ma;
Mɨ nì nà fu tɨ̀fu sɨ̂ BÔBO a ŋweyn a ndo
Yem njàŋsɨ̀ sɨ̂ BÔBO,
gyà yem ɨ lâytɨ̀-à, ma buʼ ɨ̀fwo.
7Yvɨ gyâ yem a BÔBO, mɨ n-dzɨ̂ sɨ̂ và
Koynsɨ isuyn sɨ̂ mà ɨ bèynsɨ̀ ìjêm ì yemi.
8Mɨ n-kfâʼtɨ̀ mɨ ɨlvɨ gha sɨ nà duʼ ghesɨ̀và,
Ma nà kɨŋ gvì kɨ gvi nɨ̀ và.
9Ka wâ n-lèytɨ ìkêʼ ì zæ sɨ̀ mà a BÔBO,
Ka wâ n-nyòʼsɨ̀ ɨ̀toŋ ɨ̀ sàŋ wul ɨ̀ fèlɨnɨ nɨ̀ và;
Ka wa n-màʼì mà a BÔBO
Wà n-ghɨ ngàmtɨ̀ yem
Ka wa n-bèyn jɨm sɨ̂ mà a Fɨyini femfɨ, mbœ̀sɨ̀ yem.
10Ghɨ kæ màʼi ma nô ghɨ̀ jɨ̀m, Nô bò wom nɨ̀ nà wom maʼì sɨ ateyn,
A Bôbo Fɨyini na tôʼnɨ̀ kɨ toʼnɨ nɨ̀ mà.
11Yeʼi ma nɨ̀ dzɨ shyasɨ a BÔBO
Dyèyn dzɨsɨ àtì-ati nɨ̀ và sɨ̂ mà;
Mbàynɨ̀ sem sèynsɨ n-gvɨ ma.
12Ka wa n-màʼì mà sɨ̂ mbàynɨ̀ semsɨ a BÔBO
Nchwòsɨ nsaʼ sɨ ànkaŋsɨ ghalɨ meyn mà kɨ̀ isèʼ
Nà bê na mɨ n-yeyn ìwo.
13Mɨ n-kya kɨ ìwo yèynì ìmòʼ a BÔBO:
Na mà læ̀ yeyn njùŋ zyâ
kɨ̀ nô a nse afêyn.
14Yì chimi moŋ nà yvɨtɨ̂ kɨ sɨ̂ Bôbo Fɨyini;
Yì kul mɨtem nà to kɨ tèyn nteŋ.
Yì chimi kɨ̀ têyn moŋ nà yvɨtɨ̂ kɨ sɨ̂ Bôbo Fɨyini.