Psalms 55
This book is a draft. It has been translated but has not yet finished checking, and is published here so the community can read and respond to it.
Idzɨ̂ i wûl ɨlvɨ ta sûyn ŋweyn bèyʼlɨ ŋweyn
Njàŋ ta Devìt nɨn læ faytɨ betɨ ɨ̀ fù sɨ̂ nchfɨ̀ njàŋ na wù na fu-a ghɨ yema, buʼ tɨ̀luŋ.
1Mɨ ndzɨ̂ sɨ̂ và a Fɨyini fɨ̀ Yvɨ idzɨ̂ ì yemi,
ka wa n-bèyn jɨm sɨ̂ mà.
2Yvɨ ijêm ì yemi ɨ bèynsɨ̀ mà.
Mɨ n-ghɨ a mɨ̂lùmchuŋ, ma jiŋi meyn
3Bòm ta mbàynɨ̀ semsɨ nɨn byaytɨ̂ kɨ byaytɨ a ma atu
Ghelɨ awo a bɨ-a nɨn bɨmî wì na mà nyvɨ kùl mu
Àŋena nɨn fu ngeʼ sɨ̂ mà, telɨ̂ kɨ telɨ ma
Àŋena nɨn nyôʼsɨ̀ ɨ̀toŋ sɨ̂ mà
4Ikfâʼtɨ̀ ì yemi nɨn fɨmsɨ̂ mà nô sɨ a ŋaŋ
Mɨ n-chî kɨ a mɨ̂wùm mɨ̀ ìkfɨ
5Alɨmalɨma nɨn bâytɨ̀ mà
Mɨ n-fâyn nô sɨ a ŋaŋ
6Ndà kya ndà ma mɨ n-kelɨ tɨ̀wo a
A mà tayn kɨ̀ ta Fɨ̀nlàynɨ̀ Ɨ̀ leʼ ndù dùʼì alèʼ nà yvɨ̂tɨ̀-à
7Samoʼ, a mà leʼ ndù nô a ndyèyn
Leʼ ndù lèytɨ̀ a nse iyum
Yì toʼ yvɨ̀tɨ
8A mà nyaŋsɨ leʼ ɨ̀ kɨŋ alêʼ ɨ̀ lèytɨ̀ ateyn
A mà lèʼ afyef ato-a kèynà
9Mɨ n-yeyn kɨ àngùmnɨ̀ nɨ̀ ìnu-i ilaʼ a BÔBO
Ni àŋena jiŋi a BÔBO, fyes itaŋi i àŋena
10Awo a bɨ-a nɨn chwônɨ̀ kɨ a ntèʼ têyn nɨ̀nchuè nɨ̀ntuʼ
Ntèʼ sɨ chî kɨ antêynɨ̀ àwo a bɨ-a
11Avɨŋà nɨn jêl chwô a ntèʼ nâ ghàyn
À n-ghɨ mɨ afàf à kà ghɨ wam kɨ ànkaŋ, yeʼtɨ̂ ghelɨ.
12À nà n-lûʼsɨ mbàynɨ̀ yem lûʼsɨ̀ mà
Ma iwo ateyn i nɨn fu wi ngeʼ sɨ̂ mà
À nà n-wêysɨ mbàynɨ̀ yem wêysɨ̀ mà
A mà keli sɨ lèytɨ̀
13Mɨtì à na sɨ ghɨ kɨ nô và tèyn, kɨ̀mɨ wul ta ma
Ɨ suyn mɨ̀kàyn nɨ̀ mà, ɨ wul ghesɨ̀ ŋweyn ɨ tom kɨ amoʼ
14À ti nà ghɨ a ndo nɨ̀ Mbom,
Ghèsɨ̀và ɨ lum bêysɨ̀ kɨ àwo amoʼ Koʼsɨ̂ Fɨyini, tom kɨ avɨ àmòʼ
15Mɨ n-jêm na àŋena kfɨtɨ tɨ̀ kòʼi
Mɨ n-jêm na àŋena ndu ilaʼ i nse kɨ̀ ghɨ to
Bòm ta àŋena nɨn chî antêynɨ̀ àwo a bɨ-a
16Mɨtì mɨ n-dzɨ̂ kɨ sɨ̂ Fɨyini fɨ̀
BÔBO nɨn bœ̀sɨ̀ mà
17Mɨ n-gvî nɨ̀ ngeʼ semsɨ sɨ̂ và a Bôbo
Dzɨ̂ sɨ̂ và nɨ̀nchuè dzɨ̂ nɨ̀ntuʼ
Wa yvɨ ìjêm ì yemi
18Nô mɨ ta ghelɨ ghɨ dvɨnɨ nɨn choʼ avɨ a kema
Bôbo nɨn bœ̂sɨ̀ kɨ bœsɨ ma antêynɨ̀ ìwòŋ nâ ghàyn
19Fɨyini fìfɨ̀ a fɨ n-nsaʼ sɨ a mɨlvɨ ɨ̀n jɨ̀m
nɨn yvɨ mà ɨ̀ fù ngeʼ sɨ̂ àŋena
Bòm ta àŋena nɨn leʼ sɨ kfɨnɨ nchînɨ̀sɨ àŋena,
fâyn wi Fɨyini
Yì toʼ yvɨ̀tɨ
20Suyn mɨ̀kàyn nɨ̀ ma kasi meyn kèʼ suynsɨ ŋweyn
Wù chas meyn mɨ̀kâyn mzɨ̀ a wù tî yɨ̀ ŋêyn àŋena
21Itaŋi ɨchfɨ̀ nɨ̀ ŋweyni nɨn tof kɨ tèyn nshwaŋ
Mɨtì wu duʼ mɨlvɨ ɨ̀n jɨ̀m baʼtɨ̂ kɨ ìnû
Itaŋi i ŋweyni nɨn leyn kɨ tèyn ntus
Mɨtì wu duʼ mɨ ɨlvɨ gha baʼtɨ̂ kɨ ìwoŋ
22Gvi nɨ̀ àfɨm à kya sɨ̂ Bôbo Fɨyini
Wu n-fu àdyaʼ sɨ̂ và
Wu læ̀ visî wì na wul àtì-ati leyn fe ɨ̀ fàŋ a nse
23Samoʼ a Fɨyini fɨ̀, wa n-suʼsɨ̂ mâʼ àŋena alèʼ i bebsɨ
Ghelɨ ghì a ghɨ n-zue ghelɨ, lɨsɨ̂ ghelɨ læ̀ kfɨ kɨ nɨ̀ dzɨ̀
Mɨtì ma samsɨ̂ kɨ và a Bôbo Fɨyini.