Psalms 57

Wa samsɨ̂ Fɨyini ɨlvɨ ngeʼ nɨ̀ và

Njàŋ sɨ a nyɨŋ ta Devìt nɨ̀n læ betɨ na nchfɨ̀ njàŋ na fu-a ghɨ yem a gyâ “Ka wùl nɨ̂n bèbsɨ.” Devìt nɨ̀n læ betɨ njàŋ nâ yèyn ɨtuʼ ghê a wù lèʼ Sôl ndù lèytɨ̀ antêynɨ̀ ìfò.

¹Koynsɨ isuyn sɨ̂ mà a Fɨyini fɨ̀, Koynsɨ isuyn sɨ̂ mà,

Ma leʼ meyn ɨ̀ gvì sɨ lèytɨ̀ a wa ngùŋ

Ma leʼ meyn ɨ̀ gvì lèytɨ̀ a wa isas i tɨ̂wò

Sɨ chem ta ka ngeʼ i bemnɨ yèyn chwo.

²Mɨ n-dzɨ̂ na Fɨyini fɨ ngaŋtɨnɨfɨ gamtɨ ma

Mɨ n-dzɨ̂ sɨ̂ Fɨyini fìfɨ̀ a fɨ n-saʼ fu nsaʼ semsɨ.

³Fɨ nì tum ìgâmtɨ̀ a yi lu iyvɨ ɨ̀ gvì sɨ̂ mà

Ɨ̀ nì a ghelɨ ghì a ghɨ n-nyɨŋ a ma ibàm jɨŋi

Yì toʼ yvɨ̀tɨ

Fɨ dyeyn meyn ìkôŋ i mɨ̂kàyn nɨ̀ ŋweyn sɨ̂ mà Tɨchfɨ̂nɨ̀ tɨ ŋweyntɨ nɨn ghɨ kɨ samoʼ.

⁴Mɨ n-ghɨ antêynɨ̀ nyamsɨ abo

Antêynɨ̀ nyamsɨ, sɨ kɨŋ sɨ mzɨ ma

Asoŋ a mbàynɨ̀ semsɨ-a nɨn ghɨ ta awoŋ,

Asoŋ a àŋena nɨn ghɨ ta mɨ̀nchya

Tɨlemi tɨ àŋenatɨ ɨ ghɨ ta mɨ̀nyuè.

⁵Ni ghɨ na koʼsɨ̂ và alèʼ ghè a kɨ ngàŋtɨ kfeyn iyvɨ a Fɨyini fɨ̀

Ni iŋwâʼ ì zæ̀ na ghɨ kɨ atû mbzɨ ì jɨ̀m!

⁶Àŋena maʼ meyn fɨ̀làm sɨ ku ma afyeyn

Iwo ateyn i na yeʼtɨ̂ mà nô sɨ a ŋaŋ

Àŋena tɨm meyn ìbɨ sɨ̂ mà

À kasi fèlɨ kɨ àŋena ateyn.

Yì toʼ yvɨ̀tɨ

⁷Ma choʼnɨ meyn na mà na samsɨ̂ kɨ và a Fɨyini fɨ̀

Ma choʼnɨ meyn na mà na samsɨ̂ kɨ và

Mà na yem njàŋsɨ̀ buʼ ɨ̀fwo koʼsɨ̂ và.

⁸Yèma a mà, yèma!

Yèma, tɨluŋtɨ na kûm kɨ tɨ̀nki tɨ̀ jɨ̀m

Mɨ n-yèmà a n-layn ɨ̀tùʼ a tɨluŋtɨ na kùmà.

⁹Mà na fu àyòŋnɨ̀ sɨ̂ và antêynɨ̀ nɨ̀ ghelɨ mbzɨ a Bôbo Fɨyini.

Mà na yem njàŋsɨ̀ koʼsɨ̂ và antêynɨ̀ nɨ̀ ghelɨ tɨ̀laʼ tɨ mbzɨ.

¹⁰Ikôŋ i mɨ̂kàyn nɨ̀ và i ngaŋtɨ meyn ɨ̀ koʼ chèm iyvɨ

Tɨchfɨ̂nɨ̀ tyatɨ nɨn ghɨ kɨ samoʼ nô mɨ iyvɨ.

¹¹Ni ghɨ na koʼsɨ̂ và alèʼ ghè a kɨ ngàŋtɨ kfeyn iyvɨ a Fɨyini fɨ

Ni iŋwâʼ ì zæ̀ na ghɨ kɨ atû mbzɨ ì jɨ̀m!