Psalms 7
This book is a draft. It has been translated but has not yet finished checking, and is published here so the community can read and respond to it.
Ijêm I wûl ta wù n-kɨŋ na Fɨyini fɨ saʼ fù nsaʼ ŋweyn
Njàŋ Shìgàyôn ta Devìt nɨ̀n læ nà yema dzɨ̂ ngeʼ ŋweyn sɨ̂ Bôbo kûm wul ɨ̀ ndô Benjamìn ɨ̀lvì ghɨ toŋtɨ̂ na Kûsh.
1Bôbo Fɨyini! Fɨyini femfɨ! Wà n-ghɨ àlêʼ a leytɨnɨ-a nɨ̀ mà;
Fsɨ ma sa ɨwu nɨ̀ ghelɨ ghèyn. Àŋena nɨn nyɨŋ a ma ibàm, bœ̀sɨ ma!
2Bùla tì a àŋena saytɨ ma kɨ̀ ta nyam àbo,
Ɨ̀ sàytɨ̀ mà kɨ̀ isàʼ isàʼ, wùl ɨ ghɨ wi sɨ bœ̀sɨ ma.
3Bôbo Fɨyini! Fɨyini femfɨ, à kæ nà ghɨ ma ma bebsɨ meyn ìwo,
À kæ nà ghɨ ma ma beyʼlɨ meyn wul,
4À kæ nà ghɨ ma ma laʼ meyn njùŋ sûyn yem nɨ̀ mbɨ,
À kæ nà ghɨ ma ma fsɨ meyn àfo a mbàynɨ̀ yem sɨ adyaʼ
5À kæ nà ghɨ ma ma ni meyn àwo nâ kèyna, Mbàynɨ̀ semsɨ nyɨŋ a ma ibàm Mbàynɨ̀ semsɨ nyɨŋ teyn ma;
Mbàynɨ̀ semsɨ jèylɨ̀ mà,
mà kfɨ lè.
Yì toʼ yvɨ̀tɨ
6Wà nyoʼsɨ meyn ɨ̀toŋ a BÔBO, làli keʼ mbàynɨ semsɨ;
Mbàynɨ̀ semsɨ nɨn bâŋsɨ̀ àsɨ sɨ̂ mà.
Làli keʼ àŋena; làli teyn nsaʼ yèyn sɨ̂ mà a Fɨyini femfɨ.
7Mɨ n-jêm na ghelɨ mbzɨ yvɨŋtɨ a wa asɨ
Wà duʼi alèʼ ɨfòyn nɨ̀ và nà saʼ àŋena.
8Bôbo Fɨyini nɨn saʼ ghelɨ mbzɨ.
Saʼ fu nsaʼ yem a BÔBO bòm nchînɨ̀ àtì-ati nɨ̀ mà.
Wà n-ghɨ Fɨyini fìfɨ̀ a fɨ ngàŋtɨ chwò. Dyèyn na mɨ n-ghɨ àtì-ati.
9Wà n-ghɨ Fɨyini fɨ àtì-ati,
Wà n-ki yeyn tɨ̀kfâʼtɨ̀ tɨ ghêl nɨ̀ mɨ̀tem mɨ̀ àŋena,
Ni awo a bɨ-a nɨ̀ ghelɨ ghɨ bɨ kèynà mæ.
Tòʼnɨ nɨ̀ ghelɨ àtì-ati.
10Fɨyini fɨ ngaŋtɨnɨ fɨ nɨn ghɨ àbâʼ a ma atu,
Wù n-bœ̂sɨ̀ ghelɨ àtì-ati.
11Fɨyini fɨ̀ nɨn saʼ kɨ àtì-ati.
Fɨyini fɨ nɨn nyôʼsɨ̀ ɨ̀toŋ sɨ̂ ghelɨ awo a bɨ-a kɨ̀ mɨchi ɨ̀n jɨ̀m.
12Wùl ɨ̀ kæ faŋ tɨ̀ kàsi sɨ a ibàm i mbɨ,
A Fɨyini fɨ̀ se ifô i ŋweyn;
A Fɨyini fɨ̀ gufɨ fɨ̀nchya fɨ ŋweyn nà gvɨ̂tɨ̀-à.
13Wù baʼtɨ meyn ɨ̀fwo iwòŋ ɨ bemnɨ nɨ̀ ŋweyn;
Gvɨ̂tɨ̀ sɨ tɨm mɨ̀nchya mɨ bâŋ kɨ tèyn nkàŋ.
14Samoʼ! À bòŋ mɨ ndà mbɨ sɨ a wayn
A yì na lum kɨmɨ ŋweyn ta wayn A wàyn vzɨ̂ a ka wù bzɨ na ghɨ kɨ ànkaŋ.
15À kæ tɨm mɨ ndà ibɨ sɨ̂ wùl Ɨ̀ làf ta ka yi faytɨ sœ
A à kasi fe kɨ̀ ŋweyn ateyn.
16À bàʼtɨ mɨ ndà mbɨ a yì kasi fe kɨ̀ a ŋweyn atu;
Nchînɨ̀ ì to nɨ̀ wùl nɨ̀n kasî fê kɨ a ŋweyn ifèm atu.
17Mà na fu àyòŋnɨ̀ sɨ̂ Bôbo Fɨyini bòm ta wù n-saʼ kɨ àtì-ati
Mà na yema koʼsɨ̂ Bôbo Fɨyini, ɨ Fɨyini fìfɨ̀ a fɨ ngàŋtɨ kfeyn.