Psalms 88
This book is a draft. It has been translated but has not yet finished checking, and is published here so the community can read and respond to it.
Ijêm i wûl ta wù n-ghɨ antêynɨ̀ ànjɨ̀ŋ
Njàŋ ta Hemàn ɨ wâyn Ezɨ̀là nɨ̀n læ betɨ ɨ fu sɨ̂ nchfɨ̀ njàŋ na wù na fu-a ghɨ yema a gyâ “Njàŋ ànjɨ̀ŋ.”
1O Bôbo Fɨyini, mbœ̀sɨ̀ yem
Mɨ n-dzɨ̂ sɨ̂ và nɨ̀nchuè dzɨ̂ nɨ̀ntuʼ.
2Yvɨ ijêm ì yemi a BÔBO,
Yvɨ idzɨ̂ ì yemi.
3Ngeʼ semsɨ dvɨ meyn ghàʼ ma
Mà sɨ jelɨ̀ kɨ a mɨ̂wùm mɨ̀ ìkfɨ.
4Mà sɨ ghɨ kɨ àkfɨ afo, ti kɨ ɨchfɨ̀ isè.
Nô ìwo-i bu ghɨ wi a ma ɨchfɨ̀.
5Ma sɨ ghɨ kɨ ta mà kfɨ̀ kfɨ.
Mɨ n-ghɨ ta wul a ghɨ zue gvìmì.
Yi sɨ kêʼ na wà lesɨ meyn mà
Yi sɨ kêʼ na wà beyn meyn jɨm sɨ̂ mà.
6Wà maʼ meyn mà kɨ̀ nô ibɨ
Mà sɨ duʼ kɨ a nfinisɨ.
7Wà nyoʼsɨ meyn ɨ̀toŋ sɨ̂ mà
Iwo ateyn i na yeʼtɨ̂ mà nô sɨ a ŋaŋ Ɨtoŋ ɨ yafɨnɨ nɨ̀ và lì kɨ̀ ma ta ànkuŋ.
Yì toʼ yvɨ̀tɨ.
8Wà ni meyn suyn semsɨ leʼnɨ mà
Mɨ n-chaʼnɨ̂ kɨ tèyn sɨ̂ àŋena.
Mà sɨ ghɨ kɨ ta ghɨ kfɨ̀sɨ mà isas i nkwò.
9Ma dzɨ meyn jìŋi,
Mɨ n-dzɨ̂ sɨ̂ và kɨ̀ mɨchi ɨ̀n jɨ̀m a BÔBO
Mâʼ ɨ̀wu a wa asɨ kɨ̀ mɨchi ɨ̀n jɨ̀m.
10A wùl ti kfɨ a wù na fì yeyn awo a kaynɨ-a kì a wà ni a?
A wùl ɨ kfɨnɨ ti kàʼ a wù fî làlì nà koʼsɨ̂ và a?
Yì toʼ yvɨ̀tɨ.
11A wùl ti kfɨ a wù na fì fêʼtɨ̀ ìkôŋ i mɨ̂kàyn nɨ̀ và a?
A wùl ti kfɨ a wù fî fèʼtɨ̀ na wà n-nî kɨ àwo kì a wà chfɨ̀nɨ̀ a?
12A wùl ti n-ghɨ a nfinɨsɨ a wù fî yeyn awo ɨchfɨ̀ ɨyumnɨ-a nɨ̀ và a?
A wùl ti n-ghɨ isè a wù fî yeyn nchînɨ̀ àtì ati nɨ̀ và a?
13Mɨ n-dzɨ̂ kɨ sɨ̂ và na wà gamtɨ ma a BÔBO
Mɨ n-lalì mɨ achi à kà dzɨ̂ na wà yvɨ ijêm ì yemi.
14Bòm ghà ta wà màʼi ma a BÔBO?
Bòm ghà ta wà bèyn jɨm sɨ̂ mà a?
15Ma yeyn meyn ngeʼ kɨ̀ sɨ ɨtuʼ ɨ wayndà nɨ̀ mà, Mɨ n-chî kɨ a mɨ̂wùm mɨ̀ ìkfɨ.
Mɨ n-yvɨ kɨ ìlûm a wa awu, iwo i bu ghɨ wi a ma ɨchfɨ̀.
16Ɨtoŋ ɨ yafɨnɨ nɨ̀ và lì kɨ̀ ma ta nkeylɨ,
Wà ni meyn àwo a bemnɨ-a kɨ kôytɨ̀ mà.
17Mɨ n-yisî kɨ a ngeʼsɨ nâ ghàyn, Sɨ chɨl kɨ̀ ma ta ànkuŋ.
Dzɨ na ghɨ wi sɨ leʼ.
18Wà ni meyn ghelɨ̀ ghem leʼnɨ mà,
Mà sɨ chî kɨ a nfinisɨ.