Psalms 90

ŋwàʼlɨ̀ 4

Ichi i wul ì nɨn kfeynɨ̂ wì iwo

Ijêm zɨ̀ a Mosìs ɨ wul ɨ̀ ntum nɨ̀ Fɨyini fɨ̀ nɨ̂n læ jèm.

¹Wà n-ghɨ àlêʼ a leytɨnɨ-a nɨ̀ ghès a BÔBO Kɨ̀ sɨ a mɨlvɨ ɨ̀n jɨ̀m

²Wà n-læ se sɨ faytɨ kfɨynsɨ ghɨ Fɨyini Wà n-læ se sɨ faytɨ mbzɨ nô nɨ̀ ɨ̀fwo ɨ̀ jɨ̀m, ghɨ Fɨyini Wà n-ghɨ Fɨyini kɨ̀ sɨ a mɨlvɨ ɨ̀n jɨ̀m

³Wà n-ni-à ghelɨ ɨ kasî ndû kɨ a nse A nse afî a wà n-læ faytɨ àŋena nɨ̀ ɨ̀nyeyn Wa n-læ bè na, wùl ɨ̀ mɨ̀sòŋ læ̀ kasî ndû kɨ abɨ̀l Abɨ̀l ghè a wu n-læ lù ateyn

⁴Bèŋsɨ̀ nkam nɨn ghɨ kɨ sɨ̂ và ta achi àmòʼ Bèŋ nâ sèynsɨ̀ nɨn nyâŋsɨ̀ chwô kɨ tèyn sɨ̂ và Chwô kɨ ta fɨlêʼnɨ̀ fɨ ɨlvɨ têyn nɨ̀ntuʼ.

⁵Wà ni-à ikfɨ-i lî wul kɨ̀ ta à n-chɨ jem Ghelɨ nɨn nî ghɨ nà yvɨ̂lɨ̀ kɨ ta afûʼ nɨ̀ bɨsì bɨsì

⁶Afuʼà nɨn lalì nɨ̀ bɨsì bɨsì kɨ nà yvɨ̂lɨ̀ kɨ tèyn, Ɨtuʼ se sɨ jɨ, kɨ yum ɨ yàlà

⁷Wà n-nyôʼsɨ̀ ɨ̀toŋ, wa mèsi kɨ mesi ghes Ghès nɨn fâyn ɨ̀toŋ ɨ yafɨnɨ nɨ̀ và nô sɨ a ŋaŋ.

⁸Wà n-yeyn mbɨ seysɨ kɨ mɨlvɨ ɨ̀n jɨ̀m Ghès nɨn nî ìwo, nyaʼtɨ̂ mɨ nyaʼtɨ, wa nà yeyn kɨ yeyn

⁹Wà n-nyôʼsɨ̀ ɨ̀toŋ sɨ̂ ghès, wa teyn mɨchi ɨ̀mês kɨ ɨ̀n jɨ̀m Ghɨ n-se sɨ mɨ̀ytɨ̀ isɨ, A nà sɨ ghɨ kɨ ma mɨ̀chi mɨ̀ àteyn mæ meyn

¹⁰Mɨ̀chi ɨ̀mês a nse nɨ̀n koʼ chem kɨ bèŋ mɨ̀vɨ̂m nsòmbo Wùl ɨ̀ totɨ, wu chitɨ chem bèŋ mɨ̀vɨ̂m nfama Mɨtì mɨ̀chi mɨ̀ àteyn nî mɨ nà ghɨ mɨ tì, Ɨ̀ndvɨnɨ̂ ɨ ghɨ, wu ghɨ kɨ a mɨ̂lùmchuŋ, chî kɨ a ngeʼ Mɨ̀chi mɨ̀ àteyn nɨn nî mɨ nyàŋsɨ̀ ɨ chwo kɨ têyn, wùl ɨ kfɨ

¹¹Wùl bû tìmi nà kya ngeʼ zɨ̀ a wà n-nyòʼsɨ̀ ɨtoŋ a yì koli ŋweyn Wùl nɨ̀n kya wi na wà nyòʼsɨ̀ ɨtoŋ, a iwo ateyn i ndu chèm wo a.

¹²Yeʼi ghes, ghès keli na mɨ̀chi mês a nse nɨ̀n dvɨ̂ wì

¹³Ta ka ghès keli sɨ nà chî nɨ̀ ìtof i.

¹⁴Kasi kfàʼtɨ ghes a BÔBO Wà ti læ̀ nyôʼsɨ̀ ɨ̀toŋ sɨ̂ ghès ndù chèm ti-a? Koynsɨ isuyn sɨ̂ ghelɨ ghɨ felɨnɨ nɨ̀ và.

¹⁵Ni ghès na làlì mɨ achi à kà ikôŋ i mɨ̂kàyn nɨ̀ và i kfeynɨ̂ sɨ̂ ghès Ta ka ghès na yem njàŋsɨ̀ saŋlɨ-a sɨ chem ta ka ghès læ̂ kfɨ.

¹⁶Wà ni meyn ghèsɨ yeyn ngeʼ sɨ a bèŋsɨ̀ a BÔBO Ni ghès kasi sàŋlɨ sɨ ɨlvɨ wu chem kɨmɨ tì

¹⁷Ni awo a kaynɨ-a sɨ̂ ghelɨ ghɨ felɨnɨ nɨ̀ và, Ni woyn ghesɨ yeyn njùŋ zyâ