Ruth 1

Elimelèk ɨ ndù ilaʼ i Mowàb ŋêyn ìsas i ndo nɨ̀ ŋweyn i

^1-2À nà n-ghɨ ɨtuʼ ɨ fɨli, jæ ta ka tɨfôyntɨ̀ zɨtɨ nà saʼ Isìlæ̀, jèŋ î lì ɨ ku. Wul ɨ̀ ndô Efɨ̀là ɨ̀lvì, izɨyn i ŋweyn ɨ ghɨ Elimelèk, wu chî a ntèʼ Betɨ̀làhêm ilaʼ i Judà, ɨ lù sɨ ndù sɨ chitɨ sɨ koʼ ilaʼ i Mowàb. Wù n-læ se sɨ ndù ɨ lì wî ŋweyn Nàwumì nɨ̀ woyn ŋweyn woyn ghɨ lûmnɨ̀ ghɨ̀ bò, azɨyn a àŋena ghɨ Malòn nɨ̀ Kilìyòn. Àŋena ndù tì ɨ nà sɨ chî koʼ afu.

³Elimelèk ɨ læ kfɨ. Nàwumì ɨ faŋ kɨ ŋêyn woyn ŋweyn ghì ghɨ̀bò. ⁴Woyn nâ ghì ɨ ndù ghɨ̀kì a Mowàb, azɨyn a àŋena ghɨ Obà nɨ̀ Lût. Àŋena chi a Mowàb chem ndû bèŋsɨ̀ ìvɨm, ⁵Malòn ŋêyn Kilìyòn ɨ fi boŋ kfɨtɨ, Nàwumì ɨ faŋ bula lum nɨ̀ woyn.

Nàwumì ɨ kasi kfa sɨ a Betɨ̀làhêm ŋêyn Lût

⁶Nàwumì ɨ læ yvɨ na Bôbo Fɨyini boysɨ meyn ghelɨ ŋweyn, ɨ̀ nì ɨfwo ɨ yɨnɨ koʼ sɨ̂ àŋena, wu baʼtɨ ɨ̀fwo ɨ lù sɨ ilaʼ i Mowàb ŋêyn ghɨ̀ki woyn ŋweyn ghì. ⁷Àŋena lù ɨ nà sɨ kasî ndû sɨ a Judà.

⁸Nàwumì ɨ fvɨ chem a dzɨ ɨ bè sɨ̂ àŋena na, “Yì kasi ndù nà chî zɨ̂ ghɨ̀nà ɨ ghi. Bô Fɨyini nɨn tòʼnɨ̀ nɨ̀ zɨ̀ kɨ̀mɨ ta yì tî nà tôʼnɨ̀ nɨ̀ mà, ghesɨ̀ ghelɨ ghèyn a ghɨ ndù meyn tèyn. ⁹Mɨ n-jêm na, Bôbo Fɨyini ni, yì nî fì kèli ghɨ̀lum, nà chî kɨ nô ɨ sisɨ ndosɨ.” Nàwumì ɨ taŋi tì ɨ toŋtɨ àŋena ɨ bè na àŋena faŋ a jûŋ. Mɨtì, àŋena zɨ̀tɨ̀ ɨ nà sɨ dzɨ-à, ¹⁰to-a, bê na, “Ghesɨ̀nà nɨn kasî kfâ kɨ a yi ilaʼ amoʼ, nà chi-à.”

¹¹Nàwumì ɨ tuynsɨ ɨ bè na, “Yì kasi a wôyn ghem. Yi n-yeyn ngeʼ gvî nô sɨ ni gha a ma ibàm a? A mà ti n-ghɨ tèyn ma mà kàʼ a mà fî bzɨ woyn, na yì mala a? ¹²Yì kasi kfa ndù a wôyn ghem, ma dvɨyn meyn chwò sɨ fì sɨ mala. A mà ti nà n-bu kelɨ mɨ ìkfâʼtɨ̀ sɨ fì sɨ mala kɨ̀ nô layn, ɨ̀ chi bzɨ woyn woyn ghɨ lûmnɨ̀, ¹³a yì duʼi nà chîtɨ̀ kɨ chitɨ na àŋena læ̂ lèma koʼ ɨ̀ màla zɨ̀ a? Yì kàʼ yi bû faŋ kɨ̀ têyn tɨ̀ màla. Wôyn ghem, ngeʼ koli meyn mà chwò ta yì kòli zɨ. Bô Fɨyini beyn meyn jɨm sɨ̂ mà.”

¹⁴Ta wù tàŋi tî, àŋena fi bɨ̀sà kɨ nɨ̀ ìdzɨ-ì. Yi ghaʼ Obà ɨ toŋtɨ nà lum nɨ̀ ŋweyn ɨ kasi kfa, mɨtì Lût ɨ to ndu kɨ a ŋweyn ibàm. ¹⁵Nàwumì ɨ kæ bè sɨ̂ Lût na, “Ba wà yeyn meyn ta fɨ̀f ɨ̀ zyâ kàsi meyn ndù sɨ nà chî ŋêyn ghelɨ ŋweyn, koʼsɨ̂ mɨyini mɨ̀ àŋena? Ndù a ŋweyn ibàm.”

¹⁶Mɨtì, Lût ɨ bèynsɨ̀ na, “Ka wa n-fì bè na mà kasi sɨ a wa ibàm. Wà n-ghɨ mɨ sɨ ndù wo a ghesɨ̀và ndu kɨ̀ amoʼ, wà na chi nô mɨ ɨ wo, a ghesɨ̀và na chî kɨ afu, ghelɨ̀ ghya ɨ ghɨ ghelɨ̀ ghem, Fɨyini fyafɨ ɨ ghɨ kɨ Fɨyini femfɨ. ¹⁷Ghɨ læ̀ gvɨ̀mì nô mɨ wo vâ, a ghɨ gvɨmi ma kɨ̀ afu. Iwo i yilû-ì læ̂ gwòsɨ̀ ghesɨ̀và, a bu kɨ ikfɨ, njvâ Bô Fɨyini ɨ ku ma.” ¹⁸Nàwumì ɨ yeyn tî ta Lût sɨ kâyntɨ̀ kɨ akfɨtɨ ɨ visi ndù nɨ̀ ŋweyn.

¹⁹Àŋena jelɨ kɨ têyn ɨ dyàŋ chem a Betɨ̀làhêm. Ntèʼ ɨ nèʼà kɨ ì jɨ̀m. Ghɨ̀ki ɨ nà bɨf nâ, “A ti bè na ɨwêyn nɨ̀n ghɨ kɨ nô Nàwumì tèyn a?”

²⁰Wu bè sɨ̂ àŋena na, “Ka yì fî tòŋtɨ mà na Nàwumì, yì na kwo toŋtɨ̂ kɨ mà na Màwumi bòm ta Bò ɨ̀dwaʼ ɨ̀ jɨ̀m beyn meyn jɨm sɨ̂ mà.” ²¹“Mɨ n-læ lù afêyn kelɨ kɨ ɨ̀fwo ɨ̀ jɨ̀m, Bôbo Fɨyini nî, ma kasi kfa kɨ nɨ̀ ɨ̀wu ɨ yum. Yì ti kàʼ a yì na fî toŋtɨ̂ ti ma na Nàwumì a, ma Bô Fɨyini ɨ Bò ɨ̀dwaʼ ɨ̀ jɨ̀m te meyn mà ɨ̀ vìsi ngeʼ i ghaʼnɨ koli mà a?”

²²À ti dzɨ zɨ̀ a Nàwumì nɨ̂n læ lù sɨ a Mowàb ɨ kfa ateyn a Betɨ̀làhêm ŋêyn wâyn wùl ɨ̀ Mowàb, ma à ti Lût, ɨ wî wayn ŋweyn. Àŋena nɨ̂n læ kfa, ghɨ bu zɨ̂tɨ̀ gvî gvi sɨ nà sɨ asaŋ a balì.