Ruth 2

Lût ɨ seʼ sɨ sayntɨ asaŋ a gvêyn nɨ̀ Bowàs

¹À nà n-ghɨ tì wùl ɨ ghaʼnɨ ɨ̀lvì ɨ ghɨ a Betɨ̀làhêm izɨyn i ŋweyni ghɨ Bowàs, a ghɨ wul isas i ndo nɨ̀ nkfɨ Elimelèk, ɨ lûm Nàwumì.

²Ɨtuʼ ɨ layn achi a li-a, Lût ma à ti wâyn wùl ɨ̀ Mowàb vzɨ̀ ɨ bɨf sɨ̂ Nàwumì nâ, “Mà kàʼ a mà seʼ ibal ɨ̀ ndù sàyntɨ àsaŋ a? Ɨlvɨ fɨli, a mà ndu a wul ɨ̀lvì visi a mà sayntɨ a ŋweyn a gvêyn.” Nàwumì ɨ bè kɨ na, “Seʼ a nì.” ³Lût ɨ fvɨ̀ ɨ seʼ sɨ yeyn nâ yì kàʼ a yì na sayntɨ̂ ndû nɨ̀ àsaŋ a ibàm nɨ̀ ghelɨ ghɨ felɨnɨ-a. Atu a ɨ jòf, wu seʼ ɨ fvɨ̀ kɨ a gvêyn nɨ̀ Bowàs, ɨ wul isas i ndo nɨ̀ Elimelèk vzɨ̀.

⁴Kɨ̀ têyn nô Bowàs ɨ lù a Betɨ̀làhêm ɨ seʼ gvì ɨ toŋtɨ ghelɨ ghɨ felɨnɨ nɨ̀ ŋweyn ɨ bè na, “Bô Fɨyini boysɨ zɨ ô.” Àŋena bèynsɨ̀ kɨ na, “Fɨ boŋ bòysɨ kɨ̀mɨ và ô.”

⁵Bowàs ɨ se sɨ ki sɨ ndù ɨ yeyn Lût, ɨ bɨf sɨ̂ àtu a ghelɨ ghɨ felɨnɨ-a nɨ̀ ŋweyn nâ, “Ɨvzɨ nɨn ghɨ wâyn ndà?”

⁶Atu a ghelɨ ghɨ felɨnɨ nâ kì-à ɨ bèynsɨ̀ na, “À n-ghɨ wâyn wùl ɨ̀ Mowàb vzɨ̀ a wù tî gvì ŋêyn Nàwumì tì. ⁷Wù læ̀ seʼ gvì chwòtɨ mà na mà visi yì na jelɨ̀ sayntɨ̂ àsaŋ ibàm nɨ̀ ghelɨ ghɨ felɨnɨ, ma bɨmi, wù zɨ̂tɨ̀ nô nɨ̀ bɨsì bɨsì, ɨ̀ dùʼì kɨ̀ lvɨ̂yn ɨtwò sɨ yvɨ̀tɨ̀.”

⁸Bowàs ɨ yvɨ tî ɨ ndu yeyn Lût ɨ bè sɨ̂ ŋweyn na, “Yvɨtɨ a wayn wom, ka wa n-fì lù a gvêyn afêyn sɨ ndù a gvêyn ɨ yîlù. Wa jelɨ̀ sayntɨ̂ kɨ ibàm nɨ̀ woyn ghɨ̂kì ghêyn a gvêyn afêyn mbò. ⁹Wa ki kɨ ta àŋena nɨn jelɨ̀, ndû kɨ a àŋena ibàm. Ma be meyn na ka wùl ɨ̀ nɨ̂n fu ngeʼ sɨ̂ và. Ɨtoŋ ɨ mu yumtɨ và, wa ndu nyvɨ mu a ntòynsɨ̀ ghê a ghɨ tòmtɨ afi.”

¹⁰Lût ɨ nguʼtɨ ndù kɨ têyn ɨ kùm ɨ̀chfɨ̂ atu nɨ̀ ŋweyn a nse ɨ bɨf sɨ̂ Bowàs nâ, “Wà lù wo a wà n-toʼnɨ̀ têyn, ma bɨm ghɨ kɨ wul àtum a?”

¹¹Bowàs ɨ bè sɨ̂ ŋweyn na, “Ma yvɨ meyn nô mɨ ghà ta wà nì sɨ̂ nà lum nɨ̀ và sɨ ifeli ta lum vâ kfɨ. Ghɨ bè na wà vìsi ghelɨ̀ ghya, fì fvɨ̀ nô ìlaʼ ì zɨ-i gvì sɨ nà chi afêyn zɨ̂ ghelɨ bùla wà timi nà kya. ¹²Bô Fɨyini fɨ judà fìfɨ̀ a wà gvì sɨ lèytɨ̀ a ŋweyn isas i tɨ̂wò nɨn lâʼ và kɨ ighel sɨ awo ghè a wà nì.”

¹³Lût ɨ bèynsɨ̀ ɨ bè na, “Wà toʼnɨ meyn nɨ̀ mà nô sɨ a ŋaŋ a Bòbè. Wà taŋi meyn yvɨ̀sɨ̀ àtem à kema. Mɨ n-kfeynɨ̂ wì sɨ a wul ɨ̀ fèlɨnɨ nɨ̀ và.”

¹⁴Ghɨ ni se sɨ yɨ, Bowàs ɨ bè sɨ̂ Lût na, “Gvi li abayn kèyn nɨ̀ mbàs ɨ yɨ.” Lût ɨ kæ gvì sɨ dùʼì sɨ baʼsɨ ŋêyn ghelɨ ghɨ felɨnɨ ɨ nà sɨ yɨ-a. Bowàs ɨ fi chwòsɨ̀ àsaŋ a kaŋnɨ-a sɨ̂ ŋweyn. Wu ni yɨ kfeyn kɨ ta wù n-kôŋ, ɨ bɨsɨ ɨ̀fwo ɨ yɨnɨ ɨlvɨ. ¹⁵Ta wù yɨ tî ɨ ni làlì sɨ nà fî sayntɨ̂ ndû nɨ̀ àsaŋ a, Bowàs ɨ bè sɨ̂ ghelɨ ghɨ felɨnɨ nɨ̀ ŋweyn ghɨ lûmnɨ̀ na ghɨ visi wù na sayntɨ̂ kɨmɨ ɨlwèʼ ghè a ghɨ nì nà kulɨ ɨtweʼ asaŋ mâʼ ateyn, ɨ fi bè na ka wùl ɨ̀ nɨ̂n fu ngeʼ sɨ̂ ŋweyn. ¹⁶Wù n-fi meyn bè kfeynsɨ na, àŋena na choʼtɨ̂ fvɨsɨ̀ ɨ̀tu asaŋ ɨlvɨ mâʼ à wu boŋtɨ̂-à, ɨ fi kùmtɨ̀ na ka wùl ɨ̀ nɨ̂n yòl sɨ̂ ŋweyn.

¹⁷Lût ɨ yisi sayntɨ kɨ têyn ɨtuʼ ɨ jɨ. Wu leŋ, kɨ fvɨ̀ ɨ luyn a nkwò yi ghaʼ kɨ tèyn. ¹⁸Lût ɨ lì àsaŋ ateyn ɨ kasi kfa ɨ dyèyn sɨ̂ nà lum nɨ̀ ŋweyn, ɨ fi fu ɨfwo ɨ yɨnɨ vzɨ̀ a wù nì yɨ wu bɨsɨ tì sɨ̂ ŋweyn.

¹⁹Nàwumì ɨ bɨf sɨ̂ ŋweyn nâ wù yìsi sàyntɨ àsaŋ nâ kèynà a gvêyn nɨ̀ ndà a? Wu n-bɨf tî ɨ bè na yi n-jêm na Bô Fɨyini boysɨ wul ɨ vzɨ̀ a wù nì tòʼnɨ̀ gàmtɨ̀ ŋweyn. Lût ɨ kæ fèʼtɨ̀ sɨ̂ nà lum nɨ̀ ŋweyn na yì nì nà sayntɨ̂ a gvêyn nɨ̀ wùl, izɨyn i ŋweyni ghɨ Bowàs.

²⁰Nàwumì ɨ bè na, “Bô Fɨyini boysɨ ŋweyn. Fɨyini fɨ nɨn lêysɨ̀ wì wul, kèsa wù n-ghɨ ɨtwo kèsa wù kfɨ̀ kfɨ. Bowàs nâ wèyn nɨ̀n ghɨ tèyn a ghɨ kɨ nô wul sɨ̂ ghesɨ̀nà, a ghɨ wi sɨ afi. À n-ti kɨ nô ŋweyn a ghesɨ̀nà atu.”

²¹Lût ɨ fi bè na Bowàs ni meyn fì bè kɨ̀mɨ na yì na seʼ sayntɨ̂ kɨ àsaŋ ibàm nɨ̀ ghelɨ ghɨ felɨnɨ nɨ̀ ŋweyn sɨ yaʼi ta ka ghɨ læ̂ kfì mèsì àsaŋ.

²²Nàwumì ɨ kæ bè sɨ̂ ŋweyn na, “Yi n-ghɨ kɨ nô samoʼ a wàyn sɨ̂ mà. Yi n-jofɨ̀ na wà na seʼ kɨ ibàm nɨ̀ ghɨ̀kì nâ ghì a gvêyn nɨ̀ Bowàs. Ka wa n-fì ndù a gvêyn ɨ yîlù bòm ta ghɨ kàʼ a ghɨ ni iwo i bzɨ-i sɨ̂ và afu.”

²³Lût ɨ nà sɨ seʼ felɨ̀ kɨ ŋêyn ghɨ̀kì ghî a gvêyn nɨ̀ Bowàs nô ta ka ghɨ læ̂ sɨ mèsì àsaŋ a balì fì kfì wît. Wu faŋ ɨ nà sɨ chî kɨ ŋêyn nà lum nɨ̀ ŋweyn.