Ruth 3

Lût ɨ keli lum

¹Ɨtuʼ ɨ layn achi a li-a Nàwumì ɨ bè sɨ̂ Lût na, “Mà kàʼ ma bû faŋ tɨ̀ kɨŋ lum sɨ̂ và a wayn wom ta ka wà na chî kɨ nô ɨ zyâ ndo. ²Ka wa n-lèysɨ̀ sɨ nà kya na Bowàs wèyn a wà tî seʼ zɨ̂ ghɨ̀ki ŋweyn na felɨ̀ a gvêyn nɨ̀n ghɨ wâynì sɨ̂ nkfɨ Elimelèk. Wa kya na wu nì kfa layn nɨ̀ntùʼ nà fyef àsaŋ a balì kì a ghɨ sɨ ghɨ ma ghɨ leŋ meyn. ³Wa nì sû ɨ̀wuyn ɨ̀ va ɨ̀ yìsi ɨ̀ lɨ̀mtɨ ndzɨsɨ ɨ̀ kàlì ndù alèʼ ghè a wù n-leŋ asaŋ ateyn. Wà nî ndù, ka wa n-nì wù yeyn vâ nô ta ka wù yɨ mèsì. ⁴Wù yɨ ɨ̀ se sɨ nyɨ̀ŋì wa tòʼ ɨ ki nâ wù n-nyɨ̂ŋì wo a. Wù buni wa ndù ɨ ŋaʼsɨ ndzɨ sìsɨ̀ a wù chɨ̀ytɨ dzɨ a ɨvɨ̀ ɨ nyɨ̀ŋì afu. Wu nì yeyn và nô mɨ ɨlvɨ gha ɨ̀ fèʼtɨ̀ ìwo zɨ̀ a ka wà ni.”

⁵Nàwumì nɨ̂n bè têyn nô mɨ ɨlvɨ gha, Lût ɨ bèynsɨ̀ kɨ sɨ̂ ŋweyn na, “Mɨ n-ndù nî kɨ ta wà bè.” ⁶Lût nɨ̀n kali meyn alèʼ ghè a ghɨ nà n-leŋ asaŋ ateyn ɨ ndu ni kɨ ta nà lum nɨ̀ ŋweyn nì bè.

⁷Bowàs nɨ̀n læ meyn yɨ têyn ɨ kul ɨ fi nyvɨ mɨlûʼ ɨ nà ku kɨ nô a jûŋ ɨ kæ ndù sɨ nyɨ̀ŋì sɨ baʼsɨ alèʼ ghè a ghɨ nì yvɨ̀ŋ asaŋ ateyn ɨ nà sɨ bunî-à. Lût ɨ ndù kɨ àtsɨ̀ atsɨ ɨ ŋaʼsɨ ndzɨsɨ sɨ ɨvɨ̀ nɨ̀ ŋweyn ɨ boŋ nyɨ̀ŋì sɨ afu. ⁸Bowàs ɨ ni chɨyl gvɨ̀tɨ̀ antêynɨ̀ àsɨ ɨ bèynsɨ̀ ɨ̀wuyn ɨ se sɨ ki ɨ nà ghɨ nɨ̀ ìkayni na wul ɨ wi nɨn nyɨŋ a ŋweyn isas afyeyn a.

⁹Wu bɨf sɨ̂ ŋweyn nâ, “À n-ghɨ và nda a?” Wu bèynsɨ̀ na, “À n-ghɨ mà Lût a Bòbè. Chɨytɨ ma ɨ nà tôʼnɨ̀ nɨ̀ mà bòm ta à n-ghɨ kɨ nô và vzɨ̀ a wà n-ti a ma atu.”

¹⁰Bowàs ɨ bè sɨ̂ ŋweyn na, “Bô Fɨyini boysɨ vâ a wayn wom. Wà fi meyn nì ìwo, yi koʼnɨ̂ chwô izɨ̂-ì a wà tî nì sɨ asɨ sɨ̂ nà lum nɨ̀ và. Wa nà n-kôŋ ma wà tî kɨŋ ndù kɨ nɨ̀ wayndà ɨ̀kùŋ ɨ̀lvì ta wu n-kelɨ ɨkwo ɨ̀ màla, ɨ̀ fàŋ tî, ma wà tî kɨŋ ndù nɨ̀ ɨ̀lvì wu kelɨ wi nô mɨ ɨ̀kwo kɨ̀ nô bòm ìkôŋ. ¹¹Nô mɨ ndà a ntèʼ afêyn nɨn kya a wâyn wom na wà n-ghɨ kɨ nô chɨ̀ynsɨ̀ wul ɨ wi. Ka wa n-fàyn, mɨ n-nî nô mɨ ghà vzɨ̂ a wà n-kɨŋ na mà ni. ¹²Yi n-ghɨ kɨ nô samoʼ na mɨ n-ti a wa atu, mɨtì wul ɨ̀lvì ɨ bu ghɨ a ma asɨ. ¹³Kasi nyɨ̀ŋi kɨ tî ɨtuʼ ɨ layn mèsì. Ɨtuʼ ɨ kæ bɨs layn, wùl àteyn bɨmi na yì na tôʼnɨ̀ nɨ̀ và a yi na jofà. Wù kæ teyn, a nô mà li vâ ta ànkùmtɨ̀ a wûl, ɨlvɨ nâ ghè, ɨ̀ nà tôʼnɨ̀ nɨ̀ và. Mɨ n-bê samoʼ fâyn ìzɨyn i Bô Fɨyini.”

¹⁴Lût ɨ kasi ɨ nyɨ̀ŋì kɨ tî ɨvɨ̀ nɨ̀ Bowàs ɨ ni bɨs làlì abe a bu fɨ̀m kɨ tèyn bòm ta Bowàs nà n-kôŋ wì na wùl na kya na wù ti meyn chi afu.

¹⁵Lût nɨ̂n làli tî Bowàs ɨ bè sɨ̂ ŋweyn na wù yas ndzɨ sɨ li sìsɨ̀ a wù nì lɨ̀mtɨ ɨ̀ teʼ gvì nɨ̀ seynsɨ tî. Wu teʼ, Bowàs ɨ fèʼ ɨ we àsaŋ a balì ateyn, kɨ dvɨ̂ kɨ tèyn ɨ gàmtɨ̀ ɨ bèʼsɨ̀ ŋweyn, wu kasi kfa.

¹⁶À nà n-ghɨ ta Lût kàsi kfa gvì, nà lum nɨ̀ ŋweyn ɨ bɨf sɨ̂ ŋweyn na, “Wà tî ndù ìjêl a wayn wom awo a na ghɨ ti a?” ¹⁷Lût ɨ kæ fèʼtɨ̀ nô mɨ ghà vzɨ̂ a Bowàs nì sɨ̂ ŋweyn ɨ fi dyèyn àsaŋ a balì kì a Bowàs nì fèʼ ɨ̀ fù sɨ̂ ŋweyn tì ɨ bè na wù nì bè sɨ̂ zɨ̀ na, “Yi n-jofɨ̀ wì na wà kasi kfa kɨ nɨ̀ ɨ̀wu bùla afo sɨ̂ nà lum nɨ̀ và.”

¹⁸Ta Lût tàŋi tî, Nàwumì ɨ kæ bèynsɨ̀ na, “Boynɨ dùʼi a wàyn sɨ̂ mà ɨ yeyn dzɨ zɨ̀ a ka iwo ateyn i jelɨ ateyn bòm ta Bowàs nɨn bu fì nyvɨ kulɨ wi mu layn, a bu kɨ na wù faytɨ iwo ì zæ nâ yèynì.”