1 Kings 17

Elajà ɨ fèʼtɨ̀ ìyum i ɨlwèʼ

¹Elìjà nà n-ghɨ ma wù lù a ntèʼ Tishbè ilaʼ i Gilèd. Wu gvì ɨ be sɨ̂ Ahàb na, “Mɨ n-taŋî nɨ̀ àdyaʼ a Bôbo ɨ Fɨyini fɨ Isìlæ̀ fìfɨ̀ a mɨ n-felɨ̀ sɨ̂ ɨnfeynfɨ. Amyaʼà nɨn gvɨ̀ wì, a ivɨ-i faŋ tɨ̀ sùʼi a bêŋsɨ̀ afêyn asɨ tèyn a bu kɨ na à bè mà.”

²Ta wù tàŋi tî, Bôbo ɨ bè sɨ̂ Elajà na, ³“Lù sɨ alèʼ nâ ghàyn ɨ ndù dzɨ-a abàs ghè a ɨchfɨ̂ iyvɨ i nɨn sal ateyn. Ndu lèytɨ afoŋlɨ a Kelìt ghè a ghɨ n-lû a Jvâ Jodàn ghɨ fvɨ ndù ateyn abàs ghè a ɨchfɨ̂ iyvɨ nɨn sal ateyn. ⁴Mu nɨn ghɨ afoŋlɨ nâ ghè ta ka wà na nyvɨ-a. Mɨ nì-à a ìŋòʼi ngumi na gvì fu ɨ̀fwo ɨ yɨnɨ sɨ̂ và afu.”

⁵Elajà ɨ ni kɨ tî ta Bôbo bè ɨ ndu nà sɨ chî afoŋlɨ nâ ghè. ⁶Wu nà n-yvɨ mu afoŋlɨ afu, ìŋòʼi ngumi bɨsɨ gvî fu ɨ̀fwo ɨ yɨnɨ sɨ̂ ŋweyn, fu aleŋ ɨlvɨ ikfa. ⁷Ɨ se sɨ chitɨ sɨ koʼ, jvà ɨ yum sɨ afoŋlɨ nâ ghè bòm ta ivɨ-i nà n-bu fi suʼî wì.

Elajà ɨ gàmtɨ̀ wî nkfɨ.

⁸Bôbo bè sɨ̂ Elajà na, ⁹“Lù lvɨ̂yn ɨ ndù a ntèʼ Zalefàt, ɨ ntèʼ zɨ̀ a yì n-baʼsɨ sɨ̂ Sidòn tì ɨ nà chî afu. Ma taŋi meyn sɨ̂ wî nkfɨ ɨ̀lvɨ̀ afu na wù na yɨsɨ̂ và.” ¹⁰Elajà ɨ lù ɨ ndù a ntèʼ Zalefàt ɨ nà zɨ̂ ndû kɨ ɨchfɨ mbàyn ɨ yeyn wî nkfɨ wu sɨ ɨ̀nkâʼ, wu bè sɨ̂ ŋweyn na, “Mɨ n-chwotɨ̂ và, fu mu a bom mà nyvɨ.” ¹¹Wu nà sɨ ndù sɨ gvi nɨ̀ mu mɨ̀ àteyn, Elajà ɨ jàŋ ɨ bè sɨ̂ ŋweyn na wù se sɨ gvì wu baʼsɨ àlêʼ afo a yɨnɨ-a.”

¹²“Wî nkfɨ àteyn ɨ bèynsɨ̀ ɨ bè na, “Mɨ n-chfɨ̂nɨ̀ sɨ̂ và asɨ nɨ̀ Fɨyini fyafɨ fì a fɨ n-nchi na mɨ n-kelɨ ìfvɨ i ɨnkfɨ̀ŋ a ndo nɨ̀ àlêʼ a mɨ̂vɨl mɨ̀ Olìf a fɨ̂nshɨ̀ŋ. Mɨ n-sɨ mɨ̀nkâʼtɨ̀ mèyn ndù fàytɨ àfo kì aka ghesɨ̀ wàyn yɨ gòʼsɨ̀ nà chîtɨ̀ læ̂ sɨ kfɨ bòm ta afo bu fì ghɨ wi sɨ yɨ.

¹³Elajà ɨ bè sɨ̂ ŋweyn na, “Ka iwo-i nɨn fì fù ngeʼ sɨ̂ và. Ndu ni kɨ iwo zɨ̀ a mà bè. Ndu faytɨ fɨlêʼnɨ̀ fɨlifɨ sɨ asɨ ɨ gvi fu mà yɨ wà kæ faytɨ fɨlifɨ na zɨ̂ wâyn vâ yɨ.” ¹⁴Bòm ta Bôbo ɨ Fɨyini fɨ Isìlæfɨ̀ be meyn na, “Ifvɨ i ɨnkfɨ̀ŋ nâ zɨ̀ nɨn mæ̀ wì sɨ a kel a alêʼ a mɨ̂vɨ̀l nâ kì faŋ tɨ̀ mæ̀ sɨ a nshɨ̀ŋ sɨ chem ta ka Bôbo læ̂ nì a ivɨ-i suʼi atû nse.”

¹⁵Wî nkfɨ àteyn ɨ ndu ni kɨ ta Elajà bè ɨ faytɨ àfo Elajà ɨ yɨ ŋêyn wâyn ŋweyn ɨ yɨ ɨ nà bu kelɨ kɨ kelɨ ɨfwo ɨ yɨnɨ nô sɨ ɨlvɨ ɨ dyâ. ¹⁶Ɨ̀nkfɨ̀ŋ ɨ læ faŋ tɨ̀ mæ sɨ a kel nɨ̀ ŋweyn, mɨ̀vɨ̂l ɨ faŋ tɨ mæ̂ sɨ a nshɨ̀ŋ nɨ̀ ŋweyn kɨ̀ ighel ta Bôbo nɨn taŋi toynɨ̂ a Elijà.

¹⁷Yi gàyn na ikoʼi nɨn ku meyn wâyn wùl ɨwi nâ wèyn a wu nà n-kelɨ ndo, wu nà koʼi nô sɨ a ŋaŋ, ɨ koʼi tì ɨ kfɨ. ¹⁸Wî nkfɨ nâ wèyn ɨ bè sɨ̂ Elajà na, “Nfèʼtɨ̀ ì ghaʼnɨ mɨ n-kelɨ ghà sɨ nì sɨ̂ và a? Wà gvì afêyn sɨ bètɨ awo a bɨ-a kì a mà nì sɨ zue wâyn wom wèyn ma?”

¹⁹Wu bè sɨ̂ ŋweyn na, “Fu igvɨyn i wayn nɨ̀ và nâ zɨ̀ sɨ̂ mà. Wùl ɨwi àteyn ɨ chàʼsɨ̀ wayn àteyn sɨ ɨwu nɨ̀ ŋweyn ɨ fu sɨ̂ Elajà, wu koʼ nɨ̀ ŋweyn a ndo ìyvɨ̀ alèʼ ghè a wu nà n-chi ateyn ɨ ndu nyɨ̀ŋsɨ̀ ɨkuyn nɨ̀ ŋweyn. ²⁰Ɨ jèm ɨ taŋi a gyâ ìto ɨ bè na, “Bôbo Fɨyini femfɨ, wà nì ìwo i bemnɨ-i yèynì sɨ̂ wî nkfɨ wèyn bòm ghà? Wù ntôʼnɨ̀ nɨ̀ mà, ma chî a ndo nɨ̀ ŋweyn. Wà ni meyn lvɨ̂yn wâyn ŋweyn kfɨ.” ²¹Ta wù tàŋi tî ɨ nyɨ̀ŋì ɨ nàytɨ̀ ɨ̀wuyn ŋweyn atu nɨ̀ wà nâ wèyn ingal ì tal ɨ jèm nɨ̀ gyà ito sɨ̂ Bôbo ɨ bè na, “Ni a Bôbo Fɨyini femfɨ, wàyn wêyn kasi làlì nà chi-à.”

²²Bôbo ɨ bèynsɨ̀ ìjêm i Elajà ɨ nì wayn àteyn ɨ kasi làlì ɨ nà chi-à ma wù to meyn. ²³Elajà ɨ lì wayn àteyn ɨ kasi kàlì ɨ fu sɨ̂ nà ŋweyn ɨ bè sɨ̂ ŋweyn na, “À n-ghɨ wâyn vâ tèyn. Wù sɨ kasî chi-a.”

²⁴Mà ti faytɨ meyn kèli lvɨ̂yn na wà n-ghɨ kɨ nô nfèʼtɨ̀ ì ghaʼnɨ, fì kèli na iwo i Bôbo zɨ̀ a wù n-taŋi toynɨ ɨchfɨ̀ nɨ̀ và nɨ̀n ghɨ samoʼ.