1 Samuel 5

Àntayntayn a mɨ̂kàyn nɨ̀ Bôbo ɨ fu ngeʼ sɨ̂ ghelɨ Fìlisìyà

¹Ghelɨ Fìlisìyà nɨ̂n ghal fsɨ àntayntayn a mɨ̂kàyn nɨ̀ Fɨyini fɨ̀ asɨ iwòŋ a Ebènezà tì ɨ li ndù nɨ̀ ànkeyna a ntèʼ Ashdòd. ²Àŋena nɨn li ndù nɨ̀ ànkeyna tî, ɨ zɨ nɨ̀ ànkeyna a ndo nɨ̀ fɨyini fɨ àŋena fɨ lifɨ ghɨ toŋtɨ̂ na Dagòn ɨ tom a ngùŋ àteyn. ³Ɨtuʼ bɨs layn, ghelɨ ntèʼ Ashdòd ɨ se sɨ ndù ɨ yeyn kɨ ma Dagòn fe meyn àkfɨ̀-akfɨ ɨchfɨ antayntayn a mɨ̂kàyn nɨ̀ Bôbo. Àŋena làysɨ̀ ɨ kasi tom a alèʼ ghè a wu tî nà ti ateyn. ⁴Mɨtì ɨtuʼ ɨ fi layn, àŋena làlì ɨ se sɨ ndù ɨ fi yeyn kɨ ma Dagon fi meyn fe àkfɨ̀-akfɨ ɨchfɨ antayntayn a mɨ̂kàyn nɨ̀ Bôbo, ma atu a nɨ̀ àkœ teyntɨ meyn ɨ̀ nà sɨ nyɨŋ dzɨ ɨchfɨ ɨ ndo à faŋ kɨ̀ ɨwuyn. ⁵À ti iwo zɨ̀-ì a à n-ghɨ mɨ sɨ chem layn, ngàŋsɨ Dagòn sìsɨ̀ a sɨ n-ghɨ a ntèʼ Ashdòd nɨ̀ ghelɨ ghɨli nɨn se sɨ zɨ a ndo nɨ̀ Dagòn nâ ghè ghɨ chàʼ ɨ yaʼi kɨ yaʼi ɨchfɨ ndo.

⁶Bôbo nɨn bu læ fi visi na ghelɨ Ashdòd nɨ̀ ghelɨ ntèʼ sîsɨ̀ a sɨ nà n-baʼsɨ afu nyvɨ kùl mu. Wù n-læ meyn fu ngeʼ sɨ̂ àŋena nô sɨ a ŋaŋ ɨ fi nì ɨfwo nà koʼlɨ̂ a àŋena ɨwùyn. ⁷Ghelɨ Ashdòd ɨ yeyn tî ɨ bè na, “Ghesɨ̀nà kàʼ ghɨ bû nà fî lêm àntayntayn a mɨ̂kàyn nɨ̀ fɨyini fɨ ghelɨ Isìlæ̀ kèyn. Fɨ fu meyn ngeʼ sɨ̂ ghesɨ̀nà nô sɨ a ŋaŋ ɨ̀ fì fu kɨ̀mɨ sɨ̂ fɨyini fɨ ghesɨ̀nà fɨ.” ⁸Àŋena taŋi tì ɨ yvɨ̀ŋtɨ̀ ghelɨ ghɨ saʼnɨ a Fìlisìyà nô ghɨ̀ jɨ̀m ɨ bɨf sɨ̂ àŋena nâ, “Ghesɨ̀nà ti n-nî ghà nɨ̀ àntayntayn a mɨ̂kàyn nɨ̀ Fɨyini fɨ Isìlæ̀ kèynà a?” Àŋena bè na, “Yi n-jofɨ̀ na ghɨ li ndù nɨ̀ ànkeyna a ntèʼ Gât.” Ghɨ lì ɨ ndù nɨ̀ ànkeyna afu.

⁹Mɨtì a nà sɨ ghɨ ta ghɨ lì ndù nɨ̀ àntayntayn ateyn a a ntèʼ Gât, Bôbo fi fu ngeʼ ìkaynɨ sɨ̂ ghelɨ afu ɨ nì ɨfwo ɨ nà koʼlɨ ɨwùyn nɨ̀ ghɨ̀lema fî koʼlɨ ɨwùyn nɨ̀ woynda. Ifayn ighaʼnɨ-i ku àŋena. ¹⁰Ghelɨ ntèʼ Gât ɨ lì àntayntayn a mɨ̂kàyn nɨ̀ Fɨyini fɨ̀ ɨ fitsɨynsɨ ndù nɨ̀ ànkeyna a Eklòn, a ghɨ kɨmɨ ntèʼ ìlì a Fìlisìyà. Ghelɨ Eklòn ɨ nà yeyn gvî nɨ̀ ànkeyna têyn ɨ nà sɨ byaytɨ̂ kɨ byaytɨ bê na, “Ghɨ kal meyn kɨ nɨ̀ àntayntayn a mɨ̂kàyn nɨ̀ Fɨyini fɨ ghelɨ Isìlæ̀ kì têyn ɨ̀ nà sɨ gvî nɨ̀ ànkeyna afêyn. Ghɨ sɨ kɨŋ sɨ boŋ sɨ zuetɨ ghesɨ̀nà.” ¹¹Àŋena taŋi tì ɨ kæ tum sɨ jàŋtɨ ghelɨ ghɨ tisɨnɨ a Fìlisìyà sɨ be sɨ̂ àŋena na, “Yì kasi tsɨ̀ynsɨ àntayntayn a mɨ̂kàyn nɨ̀ Fɨyini fɨ Isìlæ̀ nâ kì alèʼ ghè a kɨ n-kelɨ sɨ nà ghɨ ateyn bu tì a kɨ zuetɨ mèsì ghès nô ghɨ̀ jɨ̀m.” Àŋena nà n-bê tì bòm ta Fɨyini fɨ nà n-ghɨ ma fɨ fu meyn kɨ̀ nô ngeʼ ìkaynɨ sɨ̂ ghelɨ a ntèʼ afu. Àŋena nɨ̀n læ meyn kfɨtɨ kɨ̀ sɨ idvɨ̀. Ɨghî a ghɨ faŋ ɨ nà sɨ chî kɨ nɨ̀ ìfaynì, ¹²ɨfwo koʼlɨ̂ a àŋena ɨwùyn, idzɨ-i koʼ kɨ a ntèʼ têyn.