1 Samuel 6

Ghelɨ Fìlisìyà ɨ kasi ɨ gvì nɨ̀ àntayntayn a mɨ̂kàyn nɨ̀ Bôbo a Isìlæ̀

¹Àntayntayn a mɨ̂kàyn nɨ̀ Bôbo nɨn chi meyn ilaʼ i Fìlisìyà sɨ a njoŋsɨ nsòmbo. ²Sɨ ibàm ateyn ghelɨ Fìlisìyà ɨ jàŋtɨ̀ ngàŋsɨ mɨ̂yini nɨ̀ àŋena nɨ̀ ghelɨ mɨnyaʼ ɨ bɨf sɨ̂ àŋena nâ, “Ghesɨ̀nà ti n-nî ghà nɨ̀ àntayntayn a mɨ̂kàyn nɨ̀ Bôbo kèyn a? Yì feʼtɨ nâ ghesɨ̀nà nɨn jelɨ̀ ti sɨ tsɨynsɨ na kɨ kasi ndù alèʼ ghè a kɨ n-kelɨ sɨ nà ghɨ ateyn a?”

³Àŋena bè na, “Yi na ghɨ sɨ kasi sɨ tsɨynsɨ àntayntayn a mɨ̂kàyn nɨ̀ Fɨyini fɨ Isìlæ̀ nâ kì, ka yi n-tsɨ̀ynsɨ bula ifu a ngùŋ àteyn. Ka yi n-faŋ tɨ̀ tsɨ̀ynsɨ ifu ateyn sɨ dyèyn na yi fe meyn ìsaʼ i ŋweyn. Yì tsɨynsɨ ta ka ngeʼ yèyn mæ. Yì kæ tsɨynsɨ a Fɨyini fɨ ateyn fɨ chuʼ zɨ, a yì fî kèli ìwo zɨ̀ a wù tî màʼ ikoʼi nâ yèynì a yi ɨwùyn sɨ ateyn, yi faŋ kɨ̀ faŋ.”

⁴Ghelɨ Fìlisìyà ɨ bɨf nâ, “Ghèsɨ ti n-tum nô ìnkì ifu ì kà sɨ dyèyn na ghèsɨ fe meyn a?” Àŋena ɨ bè na, “Yì li aso ɨkwo ɨ̀ fàytɨ ɨ̀nfyèʼsɨ̀ ɨfwo vzɨ̀ a wu tî nà koʼlɨ a ghelɨ ɨwùyn tî ɨ̀twâyn nɨ̀ ɨ̀nfyèʼsɨ chwokùʼsɨ̀ kɨ̀mɨ ɨ̀twâyn kɨ̀ ighel ta ghɨ̀bo ntèʼsɨ nɨn ghɨ a Fìlisìyà bòm ta ikoʼi nâ yèynì tî kù zɨ têyn boŋ ku kɨ̀mɨ àŋena. ⁵Yì faytɨ ɨ̀nfyèʼsɨ̀ ɨfwo nâ wèyn a wu n-bebsɨ ilaʼ yèynì têyn ɨ̀ fu ikoʼsɨ sɨ̂ Fɨyini fɨ Isìlæ̀ fɨ̀ ateyn. Yì kæ ni têyn lvɨfɨli a fɨ faŋ tɨ̀ fì tɨ̀ fù ngeʼ sɨ̂ zɨ̀ nɨ̀ mɨyini mɨ̀ ìlaʼ nɨ̀ zɨ̀, a ilaʼ ì zɨ-i na kelɨ mbôynɨ̀. ⁶Bòm ghà ta yi n-to nɨ̀ àtu a fî tòsɨ mɨ̀tem mzɨ̂ ta Fòyn Ijìb nɨ̀n læ tosɨ ŋêyn ghelɨ ŋweyn a?” Ba Fɨyini fɨ Isɨlæ fɨ̀ nɨ̂n læ meyn fu ngeʼ sɨ̂ àŋena nô sɨ a ŋaŋ, àŋena kæ visi ghelɨ Isìlæ̀ na ghɨ lu?

⁷“Yì faytɨ fɨnchaʼ fɨ kelɨ àkal à kæ̀ ɨ̀ kìni nyamsɨ mbòloʼ sɨ̀ bò ma sɨ kùʼ bzɨ kɨ̀ bzɨ bùla sɨ timi gùfɨ̀ fɨ̀nchaʼ ɨ̀ kul ateyn ta ka sɨ na gufà. Yi ni yi fò woyn ateyn a mbàyn. ⁸Yi nî mèsì, yi koʼsɨ àntayntayn a mɨ̂kàyn nɨ̀ Bôbo atû fɨ̀nchaʼ nâ ghè baʼsɨ̂ nɨ̀ fɨ̀ntayntayn fìfɨ̀ a yì we ɨ̀nfyèʼsɨ̀ ɨfwo vzɨ̀ a yi n-tum sɨ ifu tì. Yi nî yi tsɨynsɨ nyam sìsɨ̀ sɨ na gufɨ̀ ndû kɨ nɨ̀ fɨ̀nchaʼ fɨ ateynfɨ tî, wùl ɨ tisɨ̂ wì. ⁹Nyamsɨ ateyn sɨ se sɨ ndù yi nà ki kɨ ki. Sɨ kæ ndu dzɨ a ntèʼ Bet Shemèsh a yi na dyêyn na à tî fù Bôbo Fɨyini fù ngeʼ ìghaʼnɨ nâ yèyn sɨ̂ ghesɨ̀nà. Mɨtì sɨ faŋ tɨ̀ ndu dzɨ a afu, a yi na dyêyn na ngeʼ nâ yèyn bu tî fu Bôbo sɨ̂ ghesɨ̀nà. A à na ghɨ na yì tî bɨm gàyn kɨ̀ gayn.”

¹⁰Nô mɨ ɨlvɨ gha, àŋena ni kɨ tî ɨ kul nyamsɨ ateyn a fɨ̂nchaʼ afu ɨ fò woyn ateyn a mbàyn, ¹¹ɨ kæ koʼsɨ àntayntayn a mɨ̂kàyn nɨ̀ Bôbo nɨ̀ fɨ̀ntayntayn fìfɨ̀ a ghɨ we ɨ̀fyèʼsɨ chwokùʼsɨ̀ vzɨ̂ nɨ̀ ɨ̀nfyèʼsɨ̀ ɨfwo ɨkoʼlɨnɨ vzɨ̀ atû àteyn. ¹²Nyamsɨ ateynsɨ ɨ lù ɨ nàyn ɨ ndu kɨ dzɨ a Bet Shemèsh, ndû tì dzɨ̂ woyn ɨ̀nseynsɨ. Ghɨbo ntèʼsɨ nɨ̀ ghelɨ Fìlisìyà ɨ jùmtɨ̀ nyamsɨ ateyn têyn ɨ ndu chem nô ighami i ntèʼ Bet Shemèsh.

¹³À nà n-ghɨ tì ghelɨ ntèʼ Bet Shemèsh ɨ sɨ wît àŋena ibal afu. A nà sɨ ghɨ ta àŋena làysɨ̀ àsɨ ɨ̀ ki yeyn àntayntayn a mɨ̂kàyn nɨ̀ Bôbo, àŋena nà saŋlɨ̂ nô sɨ a ŋaŋ. ¹⁴Fɨ̀nchaʼ fɨ ateyn fɨ ndu zɨ a gvêyn nɨ̀ Joshwà ɨ̀lvì a wu nà n-chî a ntèʼ Bet Shemèsh ɨ timi a ngùŋ ngòʼ ìghaʼnɨ ìlì afu. Ghelɨ ateyn ɨ gvi choʼtɨ ɨ̀nkâʼ mzɨ̀ a ghɨ fàytɨ fɨ̀nchaʼ nâ fìfɨ̀ ateyn tì ɨ bàytɨ̀ ɨ kwò, ɨ sɨ nyam sìsɨ̀ ɨ nyòʼ sɨ ifu sɨ̂ Bôbo. ¹⁵À nà n-ghɨ tì ma ghelɨ isas i ndo nɨ̀ Levì ni meyn sùʼsɨ àntayntayn a mɨ̂kàyn nɨ̀ Bôbo nɨ̀ fɨ̀ntayntayn fìfɨ̀ a ghɨ nì we ɨ̀nfyèʼsɨ chwokùʼsɨ vzɨ̂ nɨ̀ ɨ̀nfyèʼsɨ̀ ɨfwo ɨ koʼlɨnɨ vzɨ̀ ateyn ɨ̀ tom atû ngòʼ ìghaʼnɨ afî. Ghelɨ ntèʼ Bet Shemèsh nɨn læ meyn fu tɨfu tɨ nyoʼnɨtɨ kɨ̀mɨ nɨ̀ tɨ̀fu tɨlitɨ sɨ̂ Bôbo achi nâ ghè. ¹⁶A nà n-ghɨ ta ghɨ̀bo ntèʼ nɨ̀ ghelɨ Fìlisìyà ghì ghɨ̀ tâyn yeyn iwo zɨ̀-ì a yi gàyn, àŋena ɨ kasi ndù a ntèʼ Eklòn kɨ̀ achi nâ ghè.

¹⁷Ɨ̀nfyeʼsɨ̀ ɨfwo ɨ koʼlɨnɨ vzɨ̀ a ghelɨ Fìlisìyà nɨn tsɨynsɨ sɨ ifu sɨ̂ Bôbo sɨ dyèyn na àŋena fe meyn tì nà n-ghɨ àmòʼ a lî àlêʼ a bò ntèʼ Ashdòd, àmòʼ a lî àlêʼ a bò ntèʼ Gazà, a li-a lî àlêʼ a bò ntèʼ Ashkelòn, a li-a fî lî àlêʼ a bò ntèʼ Eklòn. ¹⁸Ɨ̀nfyèʼsɨ chwokùʼsɨ̀ nâ vzɨ̀ ɨ̀twâyn nà n-ghɨ kɨ ighel ta ntèʼsɨ Fìlisìyà sîsɨ̀ sɨ̀tâyn a nô mɨ ì kà nà n-kelɨ bò ntèʼ tî. Ɨ̀nfyèʼsɨ̀ ateyn nà n-lî àlêʼ a ntèʼ sɨ ghaʼlɨnɨ nâ sìsɨ̀ sɨ̀tâyn a sɨ nà n-ghɨ antêynɨ̀ mbàynsɨ̀ tî kɨ̀mɨ nɨ̀ mɨ̀ntèʼtɨ̂ mzɨ̀ a mɨ̀ nà n-kelɨ wi mbàynsɨ̀. Ngòʼ ìghaʼnɨ zɨ̀ a ghelɨ ndo nɨ̀ Levì nɨn læ tom àntayntayn a mɨ̂kàyn nɨ̀ Bôbo ateyn tì bu ghɨ kɨ a gvêyn nɨ̀ Joswà ɨ wul ɨ̀ Bet Shemèsh vzɨ̀ sɨ koʼ sɨ chem layn sɨ a nchwò nsaʼ (nchwæ) kûm ìwo zɨ̀-ì a yi n-gàyn afu.

¹⁹Mɨtì Bôbo Fɨyini nɨ̂n læ meyn zuetɨ ghelɨ a Bet Shemèsh mɨ̀vɨm nsòmbo bòm ta àŋena ki àntêynɨ̀ antayntayn a mɨ̂kàyn nɨ̀ Bôbo. Ghelɨ ntèʼ nâ ghì ɨ dzɨ̀ nô sɨ a ŋaŋ bòm ìwo zɨ̀-ì a Bôbo nì sɨ̂ àŋena. ²⁰Àŋena nà n-dzɨ-a bɨf nâ, “À ti kàʼ a timi nô ndà asɨ nɨ̀ Bôbo Fɨyini fɨ laynɨfɨ kûm ìwo antayntayn nâ yèynì a? Ghesɨ̀nà ti kàʼ a ghɨ li lem nô wo àntayntayn ateyn ta ka kɨ na bu fì ghɨ wi a ntèʼ afêyn a?”

²¹Ta àŋena tàŋi tî ɨ kæ tum ghelɨ a ntèʼ Keliyat-jelìm na ghɨ ndu bè na ghelɨ Fìlisìyà kasi meyn gvì nɨ̀ àntayntayn a mɨ̂kàyn nɨ̀ Bôbo kì, yi jofɨ̀ na àŋena kali ɨ̀ lì koʼ nɨ̀ ànkeyna sɨ a àŋena ntèʼ.