Genesis 17

Nchwæ mɨ̀kàyn nɨ̀ Fɨyini fɨ ŋêyn Ablàm

¹À nà n-ghɨ ta Ablàm lèma nà sɨ ghɨ bèŋ mɨ̀vɨm bulamòʼ njvàsɨ̀ bulamòʼ, Bôbo ɨ gvì sɨ̂ ŋweyn ɨ bè na, “À n-ghɨ mà Bôbo Fɨyini ɨ bò ɨ̀dwaʼ ɨ̀ jɨ̀m. Wa yvɨnɨ̂ mà fî chî nchînɨ̀ àtì-ati. ²Mɨ n-yɨ mɨ̀kâyn ghesɨ̀và ɨ̀ fù woyn sɨ̂ và ghɨ dvɨ̂ kɨ tèyn.”

³Ablàm ɨ fe ɨ kfɨsɨ ìkêʼ a nse asɨ nɨ̀ Fɨyini fɨ. Fɨyini fɨ ɨ fi kæ be sɨ̂ ŋweyn na, ⁴“Mɨ n-yɨ mɨ̀kâyn ghesɨ̀và, a wà læ nà ghɨ bæ̀ sɨ̂ ghelɨ tɨ̂laʼ tɨ dvɨ̂ kɨ tèyn. ⁵Ghɨ na bu fì toŋtɨ̂ wì vâ na Ablàm. Izɨyn ì zæ sɨ ghɨ Abɨ̀làhâm bòm ta ma ni meyn na wà na ghɨ bæ̀ sɨ̂ ghelɨ tɨ̀laʼ tɨ dvɨnɨtɨ. ⁶Mɨ n-fu woyn sɨ̂ và ghɨ dvɨ̂ kɨ tèyn a àŋena lema kòʼ sɨ a tɨ̂laʼ. Tɨfôyntɨ̀ læ̀ fvɨ̂ kɨmɨ antêynɨ̀ nɨ̀ àŋena. ⁷Mɨ n-yɨ mɨ̀kâyn ghesɨ̀và mɨ ghɨ sɨ faŋ kɨ samoʼ. Mà na ghɨ Fɨyini fyafɨ zɨ̂ woyn ghya nɨ ɨghî a ghɨ læ̀ koʼ ibàm nô ghɨ̀ jɨ̀m. ⁸Mɨ n-fu ìlaʼ i Kenàn yèynì a wà n-ghɨ kɨ wul ɨ̀ gvinɨ ateyn tèyn sɨ̂ và. Mɨ n-fu ìlaʼ ateyn sɨ̂ và zɨ̂ woyn ghya ghì a wa n-bzɨ lvɨ̂yn nɨ ɨghî a ghɨ læ̀ koʼ ibàm. Ilaʼ nâ yèynì nɨn faŋ kɨ sɨ a yi ilaʼ sɨ a mɨlvɨ ɨ̀n jɨ̀m a mà na ghɨ kɨ ghɨ Fɨyini fifɨ.”

⁹Fɨyini fɨ ɨ fi bè sɨ̂ Abɨ̀làhâm na, “Aleŋ à kya nɨn ghɨ na wà n-kelɨ kɨ sɨ nà chî a (atû) mɨ̂kàyn nâ ghàyn zɨ̂ woyn ghya ghì a ghɨ læ̀ koʼ ibàm. ¹⁰Mɨ̀kàyn mzɨ̀ a mɨ n-yɨ ghesɨ̀và zɨ̂ woyn ghya ghì a ghɨ læ̀ koʼ ibàm nɨn ghɨ na, yì na sɨ nô mɨ ànam a wul ɨ̀ lûmnɨ̀ ɨ̀kfà antêynɨ̀ nɨ̀ zɨ̀. ¹¹Yi n-kelɨ sɨ nà sɨ ɨnwam ɨ̀vzɨ sɨ a nchwæ mɨ̀kàyn ghè (mzɨ̀) a ghesɨ̀và yɨ. ¹²Sɨ zɨtɨ lvɨ̂yn sɨ ndù asɨ, ghɨ na bzɨ̂ wayn ɨ̀ lûmnɨ̀ wù chi chem mɨchi nfama ghɨ sɨ anam a ŋweyn. Ghɨ na se sɨ sɨ yaʼî wì wayn, kèsa à n-ghɨ wayn ma ghɨ bzɨ a wa ndo a, kèsa à n-ghɨ wayn ma wà yùyn atum nɨ̀ ɨ̀kwo a. ¹³Ghɨ n-kelɨ sɨ nà sɨ ɨnwam woyn woyn ghɨ lûmnɨ̀ nô ghɨ̀ jɨ̀m kèsa à n-ghɨ wayn ma ghɨ bzɨ a wa a ndo a, kèsa à n-ghɨ wayn ma ghɨ yuyn nɨ̀ ɨ̀kwo a. Yì na sɨ-a alas ateyn a nà ghɨ n-chwæ a yi ɨwùyn sɨ dyèyn na mɨ̀kâyn mɨ̀ àteyn faŋ meyn kɨ̀ samoʼ. ¹⁴Wul kæ sɨ nà ghɨ wul ɨ̀ lûmnɨ̀ bula ghɨ sɨ ànam a ŋweyn wu nà kya na wù bu fì ghɨ wi wul antêynɨ̀ nɨ̀ ghelɨ̀ ghem. A à na ghɨ na wù fe meyn ìsaʼ i mɨ̂kàyn nɨ̀ mà.” ¹⁵Fɨyini fɨ ɨ fi taŋi sɨ̂ Abɨ̀làhâm ɨ bè na, “Wi vâ nɨ̀n ghɨ lvɨ̂yn tèyn wa bu fì ghɨ wi sɨ nà toŋtɨ ŋweyn na Selày. Izɨyn i ŋweyn i sɨ ghɨ Sèla. ¹⁶Mɨ n-boysɨ̂ ŋweyn a wù bzɨ wayn ɨ̀ lûmnɨ̀ sɨ̂ và ɨ̀ bòysɨ ŋweyn a wù na ghɨ nì sɨ̂ ghelɨ tɨ̂laʼ tɨ dvɨ̂ kɨ tèyn. Wù læ̀ bzɨ̂ tɨ̀fôyntɨ mbzɨ.” ¹⁷Abɨ̀làhâm ɨ fe ɨ kfɨsɨ ìkêʼ a nse ɨ nà sɨ nyɨmlɨ-à ta wù sɨ kayn nâ, a wùl ti kàʼ a wù bzɨ wayn ghɨ bèŋ ɨvɨ̂ a, fî kayn nâ a Sèla ti kàʼ a wù fî bzɨ wayn ghɨ bèŋsɨ̀ mɨ̀vɨm bulamòʼ a? ¹⁸Ta wù kàyntɨ tî ɨ kæ be sɨ̂ Fɨyini fɨ na, “Wà faŋ tɨ boysɨ tɨ ndu kɨ nɨ̀ Ishmàyêl na wù læ̂ yɨ̀ ndô yem?” ¹⁹Fɨyini fɨ ɨ bè sɨ̂ Abɨ̀làhâm na, “Ɨ̀ngaŋ. Wî vâ Sèla nɨn bzɨ̂ wayn ɨ lûmnɨ̀ sɨ̂ và a wà chfɨ izɨyn i ŋweyn na Yisàk. Mà læ̀ yɨ mɨ̀kâyn ghesɨ̀ Yisàk nɨ̀ woyn ŋweyn ghì a ghɨ læ̀ koʼ ibàm a mɨ̀ faŋ kɨ̀ samoʼ. ²⁰Ma yvɨ meyn kɨ̀ nô ìwo zɨ̀-ì a wà bè kûm Ishmàyêl. Mɨ n-boysɨ̂ ŋweyn ɨ̀ fù woyn sɨ̂ ŋweyn ghɨ dvɨ̂ kɨ tèyn. Wù læ̀ bzɨ̂ tɨ̀fôyn njvàsɨ̀ bò, a woyn ŋweyn læ̂ lèma kòʼ sɨ a ilaʼ i ghaʼnɨ-i. ²¹Mɨtì ma ghɨ sɨ læ̀ sɨ fì sɨ bètɨ mɨkâyn mêm kɨ̀ ghesɨ̀ Yisàk vzɨ̀ a Sèla læ̀ bzɨ sɨ̂ và mɨ lvɨ̂yn a bêŋ î gvinɨ.” ²²Fɨyini fɨ nɨ̂n tàŋi mèsi sɨ̂ Abɨ̀làhâm tì ɨ lù.

²³A nà ghɨ kɨmɨ achi nâ ghè Abɨ̀làhâm ɨ lì wayn ŋweyn Ishmàyêl nɨ̀ woyn woyn ghɨ lûmnɨ̀ a ŋweyn a ndo nô ghɨ̀ jɨ̀m baʼsɨ̂ nô mɨ nɨ ɨghî a wù yuyn nɨ̀ ɨ̀ kwo ɨ sɨ ɨnwam àŋena kɨ ighel ta Fɨyini fɨ nì bè sɨ̂ ŋweyn. ²⁴Ghɨ n-læ se sɨ sɨ anam a Abɨ̀làhâm ma wù sɨ ghɨ bèŋ mɨ̀vɨm bulamòʼ njvàsɨ̀ bulamòʼ, ²⁵ɨ sɨ a kɨ wayn ŋweyn Ishmàyêl wu ghɨ bèŋsɨ̀ njvàsɨ̀ tal. ²⁶Ghɨ n-læ sɨ anam a Abɨ̀làhâm nɨ a kɨ wayn ŋweyn Ishmàyêl kɨ achi àmòʼ. ²⁷Ghɨ n-sɨ anam a Abɨ̀làhâm nɨ̀ ɨ̀nwam ghɨlûmnɨ̀ a ŋweyn a ndo nô ghɨ̀ jɨ̀m kɨ achi àmòʼ, kèsa à n-ghɨ wul ma ghɨ bzɨ a ŋweyn abe a kèsa à n-ghɨ wul ma ghɨ yùyn sɨ̂ wùl àtum a.