Genesis 18

Fɨyini fɨ ɨ chfɨ̀nɨ̀ wayn sɨ̂ Abɨ̀làhâm ŋêyn Sèla

¹À n-læ meyn nà ghɨ nɨ̀nchuè achi a li-a, ɨlwêʼ ɨ lumà, ma Abɨ̀làhâm fvɨ meyn dùʼì a ŋweyn ɨchfɨ ɨtwò a ngùŋ ɨ̀nkàʼ mɨ̀ ôksɨ̀ nɨ̀ Mamlè. Bôbo ɨ fvɨ̀ a ŋweyn ikèʼ. ²Abɨ̀làhâm ɨ se sɨ ki sɨ ndù a dzɨ ɨ gvɨ̀tɨ yeyn ghɨ̀lumnɨ̀ ghɨ li ghɨ̀ tal ghɨ ti afu. Wu yeyn tî ɨ nyàŋsɨ̀ ɨ làli kɨ lali ɨ ndù sɨ toŋtɨ àŋena ɨ tɨm alvɨ a ŋweyn a àŋena asɨ ɨ kfɨsɨ ìkêʼ i ŋweyn a nse, ³ɨ bè na, “Wà kæ yeyn ma kfeynɨ-à a Bôbo ka wa n-chwò bula wà mutɨ̀ mà. Mɨ n-ghɨ wul ɨ̀ felɨnɨ nɨ̀ và. ⁴Mɨ n-gvî nɨ̀ àlêʼ a mu-a, a yì sutɨ ɨvɨ ɨ̀vzɨ ateyn ɨ̀ dùʼì yvɨ̀tɨ̀ isas i fɨ̂kàʼ afêyn. ⁵Ta yì gvì meyn sɨ mùtɨ wul ɨ̀ felɨnɨ nɨ̀ zɨ̀, mɨ n-gvî nɨ̀ àfo a, a yì chɨl ibol ateyn ɨ̀ keli àdyaʼ nà ndû sɨ a yi alèʼ.” Àŋena bè na, “Àyòŋnɨ̀ à kya. Ni kɨ ta wà bè.”

⁶Abɨ̀làhâm ɨ nyɨŋ zɨ ɨtwò ɨ bè sɨ̂ Sèla na, “Myel gvi nɨ̀ ɨ̀nkfɨ̀ŋ ɨ̂n jùŋ nɨ̀ và ɨ̀n lì nô sɨ chem ɨwu ɨ̀ twal ɨ nyàŋsɨ lamtɨ gvì nɨ̀ àbayn a ateyn.”

⁷Ta wù tàŋi tî ɨ fi nyɨŋ ndù antêynɨ̀ nyàmsɨ nɨ̀ ŋweyn ɨ choʼ fvɨ̀sɨ̀ nô wâyn nyàm ɨ̂ jùŋ ɨ fu sɨ̂ wùl ɨ̀ felɨnɨ nɨ̀ ŋweyn wu nyàŋsɨ sɨ kɨ têyn ɨ faytɨ mbàs ateyn. ⁸A nà sɨ ghɨ ta ghɨ kfè meyn mèsì ɨ̀fwo ɨ yɨnɨ ateyn, Abɨ̀làhâm ɨ lì ìgheyn i nyâm ma yi tabtɨ meyn nɨ ili ma ghɨ kam kɨ̀ sɨ ɨlvɨ ɨ baʼsɨ a ngùŋ àteyn ɨ gvi tom asɨ nɨ̀ àŋena. Àŋena se sɨ yɨ wu timi sɨ isas i fɨ̂kàʼ a ngùŋ nɨ̀ àŋena.

⁹Àŋena ɨ kæ bɨf sɨ̂ Abɨ̀làhâm na, “Wi vâ Sèla ba?” Wu bèynsɨ̀ ɨ bè na, “Wù vzɨ ɨtwò.” ¹⁰Bôbo ɨ kæ bè sɨ̂ Abɨ̀làhâm na, “Mà læ̀ kasi gvî mɨ lvɨ̂yn a bêŋ ì gvinɨ a wù keli wayn ɨlumnɨ̀.” Wu nà n-taŋî tì Sèla nyaʼ yvɨtɨ-à, ti ɨchfɨ ɨtwò ibàm nɨ̀ Abɨ̀làhâm. ¹¹À nà n-ghɨ tì ma Abɨ̀làhâm ŋêyn Sèla sɨ ghɨ ma ghɨ lema meyn nô sɨ a ŋaŋ, Sèla chwô àleŋ sɨ fì sɨ bzɨ wayn. ¹²Sèla ɨ yvɨ tî ɨ chyeʼ kɨ sɨ a ŋweyn a ngeŋ ta wù sɨ kayn nâ, “Ghesɨ̀ lum wom ti n-ghɨ ma ghɨ dvɨyn meyn tèyn, a mà ti kàʼ a mà fî kèli iwo nâ yèyni a?”

¹³Bôbo Fɨyini ɨ bɨf sɨ̂ Abɨ̀làhâm na, “Sèla chyèʼ gha nà bɨfɨ na, a yì ti kàʼ a yì fî bzɨ wayn ma yi lema meyn tèyn a? ¹⁴A iwo i ti kàʼ a yi to ghaʼ Bôbo Fɨyini a? Ma ni meyn bè na, mà læ̀ kasi gvî mɨ lvɨ̂yn a bêŋ ìgvinɨ a wî vâ Sèla keli wayn ɨlumnɨ̀.”

¹⁵Ta Bôbo tàŋi tî, Sèla nà sɨ fàynà ɨ wam bè na, “Ma bu nì chyeʼ.” Mɨtì Bôbo bè na, “Wà ni meyn chyeʼ.”

Abɨ̀làhâm ɨ chwotɨ Bôbo Fɨyini na ka wu n-bèbsɨ Sodòm

¹⁶À nà n-ghɨ ta ghelɨ nâ ghì ghɨ̀ tal yɨ mèsì ɨ̀ làlì sɨ lù, Abɨ̀làhâm ɨ ndù sɨ tsɨynsɨ àŋena, àŋena timi ɨ ki kàysɨ̀ nɨ̀ Sodòm. ¹⁷Bôbo Fɨyini ɨ bè kɨ sɨ a ŋweyn a ngeŋ na, “Mɨ n-lèytɨ̀ wì iwo zɨ̀ a mɨ n-kɨŋ sɨ nì sɨ̂ Abɨ̀làhâm. ¹⁸Abɨ̀làhâm kàʼ wu bû læ̀ faŋ tɨ̀ nà ghɨ bò woyn ghɨ dvɨnɨ. Woyn ŋweyn læ̀ nà ghɨ kɨ nô ghelɨ ilaʼ i to-i. Nô ghelɨ tɨ̂laʼ tɨ̀ jɨ̀m a mbzɨ læ̀ kelî ìboysɨ toynɨ̂ kɨ a ŋweyn. ¹⁹Ma choʼ meyn Abɨ̀làhâm na wù na tisɨ̂ woyn ŋweyn nɨ ɨghî a ghɨ læ̀ koʼ ibàm nô ghɨ̀ jɨ̀m ta ka àŋena na yvɨnɨ̂ mà. Wù na tisɨ̂ àŋena, àŋena nî kɨ àwo kì a kɨ n-ghɨ àtì-ati sɨ̂ mà. A mà ni nô mɨ ghà vzɨ̂ a mà chfɨ̀nɨ̀ meyn sɨ̂ ni sɨ̂ ŋweyn.”

²⁰Bôbo Fɨyini ɨ kfàʼtɨ̀ tì ɨ fi kæ bè sɨ̂ Abɨ̀làhâm na, “Ma yvɨ meyn chwòsɨ̀ àwo a bɨ-a kì a ghelɨ Sodòm nɨ̀ ghelɨ Gòmolà nɨn môm, nɨ̀ mbɨsɨ bemnɨ sìsɨ̀ a àŋena nɨn nî.” ²¹Mɨ n-kàlì afu ɨ̀ yeyn nâ, a awo nâ kèynà a mà yvɨ̀ têyn ti n-ghɨ kɨ nô samoʼ ta ghɨ n-bê ma à n-ghɨ ànkaŋ a?

²²A nà sɨ ghɨ ta wù tàŋi tî, ghelɨ ghɨli ghì ghɨ̀bo ɨ lù ɨ nà sɨ kalì ndû dzɨ a Sodòm. Mɨtì Abɨ̀làhâm ɨ timi faŋ kɨ asɨ nɨ̀ Bôbo. ²³Abɨ̀làhâm nɨ̀n kɨŋtɨ meyn baʼsɨ sɨ̂ Bôbo ɨ bɨfɨ na, “Wa ti ndû se sɨ bebsɨ ghelɨ ghɨ bɨ nâ ghì ɨ̀ bèbsɨ bàʼsɨ kɨ̀mɨ nɨ̀ ghelɨ àtì-ati ma? ²⁴Wà ti kæ ndù yèyn ghelɨ àtì-ati afu mɨ̀vɨm ɨ̀n tâyn a wà fî bèbsɨ ghelɨ ntèʼ nâ ghì a? Wà ti kæ ndù yeyn a wà fî bèbsɨ kɨ̀ bebsɨ ntèʼ àteyn ɨ̀ faŋ tɨ̀ koynsɨ̂ kɨ nô ìsuyn bòm ghelɨ àtì-ati nâ ghì mɨ̀vɨm ɨ̀n tâyn a? ²⁵Mɨ n-kya na wà kàʼ wa bû mòm ìnkì iwo tì. Wà kàʼ wa bû se sɨ zuetɨ ghelɨ ghɨ bɨ ɨ̀ zuètɨ bàʼsɨ kɨ nɨ̀ ghelɨ ghɨ jûŋ. Wà nì tî, a yi na dyêyn na àŋena nɨn ghɨ kɨ ighel ghɨ̀ jɨ̀m. Mɨ n-kya na wà kàʼ wa bû mòm ìwo nâ zɨ̀-ì bòm ta wà nsaʼ mbzɨ ì jɨ̀m kɨ àtì-ati.”

²⁶Bôbo Fɨyini ɨ bè na, “Mà kæ yeyn ghelɨ àtì-ati a ntèʼ Sodòm mɨ̀vɨm ɨ̀n tâyn, ma bû fì bèbsɨ ntèʼ àteyn kɨ̀ nô bòm àŋena.”

²⁷Abɨ̀làhâm ɨ fi taŋi ɨ bè na, “Mɨ n-kya na ma ni meyn to nɨ̀ àtu a ɨ̀ tàŋi sɨ̂ và a Bôbo nô mɨ ta mɨ n-ghɨ kɨ nkàyn àbɨ̀l nɨ̀ àbvɨ-a, kfeynɨ̂ wì iwo nô sakos. Mɨtì ka wa n-yòʼsɨ̀ ɨ̀toŋ sɨ̂ mà. ²⁸Wà ti kæ ndù yeyn kɨ̀ ghelɨ àtì-ati afu mɨ̀vɨm ɨ̀n kæ̀ njvàsɨ̀ tâyn, a wà fî bèbsɨ kɨ̀ bebsɨ ntèʼ àteyn kɨ bòm ta ghelɨ bùla ghɨ̀ tâyn a?” Bôbo ɨ bèynsɨ̀ ɨ bè na, “Mà kæ sɨ yeyn ghelɨ mɨ̀vɨm ɨ̀n kæ̀ njvàsɨ̀ tâyn, ma bû bèbsɨ ntèʼ àteyn.”

²⁹Abɨ̀làhâm ɨ fi bɨf kfeynsɨ na, “Wà ti kæ ndù yeyn kɨ ghelɨ mɨ̀vɨm ɨ̀n kæ̀ afu, a wà bebsɨ a?” Bôbo ɨ bè na, “Mà ndù yeyn ma bû bèbsɨ ntèʼ àteyn kɨ̀ nô bòm ghelɨ nâ ghì mɨ̀vɨm ɨ̀n kæ̀.”

³⁰Abɨ̀làhâm ɨ fi taŋi ɨ bè na, “Mɨ n-chwotɨ̂ và. Ka wa nyòʼsɨ̀ ɨ̀toŋ sɨ̂ mà a Bôbo, mà fî bɨf kfèynsɨ ìwo. Wà ti kæ ndù yeyn kɨ ghelɨ àtì-ati mɨ̀vɨ̂m ɨ̀n tal afu a wà bebsɨ a?” Bôbo bèynsɨ̀ na, “Mà ndù yeyn kɨ ghelɨ àtì-ati mɨ̀vɨ̂m ɨ̀n tal afu ma bû bèbsɨ ntèʼ àteyn.”

³¹Abɨ̀làhâm ɨ fi bè na, “Mɨ n-kya na ma to meyn nɨ̀ àtu a ɨ̀ nà taŋî sɨ̂ Bôbo. Wà ti kæ ndù yeyn kɨ̀ ghelɨ àtì-ati afu mɨ̀vɨ̂m ɨ̀n bò?” Bôbo ɨ bè na, “Mà kæ ndù yeyn ghelɨ àtì-ati afu mɨ̀vɨ̂m mbò, ma bû bèbsɨ̀ ntèʼ àteyn kɨ̀ nô bòm àŋena nâ ghì mɨ̀vɨ̂m mbò.”

³²Abɨ̀làhâm ɨ fi bè na, “Mɨ n-chwotɨ̂ a Bôbo. Ka ɨtoŋ vâ nɨ̂n yaf, mà bɨfɨ̀ gòʼsɨ̀ ìwo. Wà ti kæ ndù yeyn ghelɨ àtì-ati afu ìvɨm?” Bôbo ɨ bè na, “Mà kæ ndù yeyn ghelɨ àtì-ati afu ìvɨm, ma bû fì bèbsɨ ntèʼ àteyn kɨ̀ nô bòm àŋena.”

³³A nà ghɨ ta Bôbo tàŋi mèsì ŋêyn Abɨ̀làhâm, wu lù. Abɨ̀làhâm ɨ kasi kfa sɨ a ŋweyn abe.