Genesis 46

Jàkôb ɨ ndù a Ijìb

¹Isìlæ̀ nɨn læ meyn baʼtɨ ɨ̀fwo ŋweyn nô ɨ̀ jɨ̀m ɨ nà sɨ ndù a Ijìb, ɨ ndu chem a Beshebà ɨ fu tɨfu sɨ̂ Fɨyini fìfɨ̀ a bò ŋweyn Yisàk nɨn læ nà koʼsɨ. ²A ni nà ghɨ nɨ̀ntuʼ Fɨyini fvɨ̀ a ŋweyn ikèʼ ta wù fvɨ̀ a jem ɨ toŋtɨ ŋweyn na, “Jàkôb, Jàkôb, wu bèynsɨ̀ na, mà wêyn!” ³Fɨyini fɨ ɨ bè na, “À n-ghɨ mà Fɨyini fɨ bò vâ Yisàk, ka wâ n-fàyn sɨ ndù a Ijìb bòm ta mà læ̀ ni-à a wôyn ghya koʼ sɨ ilaʼ i to i afu. ⁴Ghesɨ̀và nɨn kàlì kɨ a Ijìb amoʼ, a mà læ̂ kàsi ɨ̀ lì koʼ nɨ̀ và afêyn. Wà læ̀ kfɨ kɨ nô awu nɨ̀ Josèf a Ijìb.”

⁵Fɨyini fɨ nɨn taŋi tî, Jàkôb ɨ lù sɨ a Beshebà. Woyn Jàkôb nɨn læ lì ŋweyn nɨ̀ ghɨ̀ki àŋena baʼsɨ̂ nɨ̀ woyn àŋena, atû mɨ̀nchaʼ ghè a fòyn Ijìb nɨn læ tum na ghɨ gvi lì Jàkôb ateyn ɨ̀ ndù nɨ̀ ŋweyn a Ijìb tì. ⁶Àŋena nɨn læ meyn li kɨmɨ nyamsɨ nɨ̀ ɨ̀fwo vzɨ̀ a àŋena nɨn læ keli a Kenàn nô ɨ̀ jɨ̀m, ŋêyn ghɨ̀bò àŋena ɨ lu ɨ kàlì a Ijìb. ⁷Jàkôb nɨn læ ndù a Ijìb ŋêyn woyn ŋweyn baʼsɨ̂ nɨ̀ woyn woyn ghɨki nɨ ghɨ lûmnɨ̀ nô ghɨ̀ jɨ̀m.

⁸Akêynà nɨn ghɨ àzɨyn a woyn Jàkôb ta ghɨ nà n-toŋtɨ kɨmɨ na Isìlæ̀ tì, ta ŋêyn àŋena nɨn læ kàli a Ijìb.

Wù n-læ kàli ŋêyn Lubèn ɨ wayn ɨ wû àsɨ nɨ̀ ŋweyn.

⁹Woyn ghɨ lûmnɨ̀ nɨ̀ Lubèn nà n-ghɨ

Hanòk nɨ̀ Balù nɨ̀ Hezlòn ŋêyn Kamì.

¹⁰Woyn ghɨ lûmnɨ̀ nɨ̀ Simìyòn ɨ ghɨ

Jemwèl nɨ̀ Jamìn nɨ̀ Ohàd nɨ̀ Jakìn nɨ̀ Zohà kɨ̀mɨ nɨ̀ Shôl ɨ wâyn wul ɨ wî Kenàn.

¹¹Woyn ghɨ lûmnɨ̀ nɨ̀ Levì nà n-ghɨ

Geshòn nɨ̀ Kohàt ŋêyn Mèlalì.

¹²Woyn ghɨ lûmnɨ̀ nɨ̀ Judà ɨ ghɨ El nɨ̀ Onàn nɨ̀ Shelà nɨ̀ Bèlêz ŋêyn Zelà. El ŋêyn Onàn nɨn læ kfɨ àŋena bu ghɨ kɨ a Kenàn.

Woyn ghɨ lûmnɨ̀ nɨ̀ Bèlêz nɨn læ nà ghɨ

Hezlòn ŋêyn Hamùl.

¹³Woyn ghɨ lûmnɨ̀ nɨ̀ Isakà ɨ ghɨ

Tolà nɨ̀ Buwà nɨ̀ Jashùb ŋêyn Shimlòn.

¹⁴Woyn ghɨ lûmnɨ̀ nɨ̀ Zebulùn ɨ ghɨ

Selèd nɨ̀ Elòn ŋêyn Jalìl.

¹⁵À ti woyn ghɨ lûmnɨ̀ ghì a Liyà nɨn læ bzɨ ŋêyn Jàkôb a Badan Alàm baʼsɨ̂ nɨ̀ wayn ɨ wi izɨyn i ŋweyni ɨ ghɨ Dinà. Woyn ŋweyn nâ ghèyn nà n-chɨ̂yntɨ̀ ghɨ mɨ̀vɨm ɨ̀n tal njvàsɨ̀ tal.

¹⁶Woyn ghɨ lûmnɨ̀ nɨ̀ Gâd nà n-ghɨ

Zefòn nɨ̀ Hagày nɨ̀ Shunì nɨ̀ Ezbòn nɨ̀ Elì nɨ̀ Alodì ŋêyn Alelì.

¹⁷Woyn ghɨ lûmnɨ̀ nɨ̀ Ashà ɨ ghɨ Imnà nɨ̀ Ishvà nɨ Ishvì ŋêyn Belyà. Ashà nɨ̀n læ meyn nà kelɨ kɨmɨ wayn ɨ wi izɨyn i ŋweyn ɨ ghɨ Selà. Woyn ghɨ lûmnɨ̀ nɨ Bèlayà ɨ ghɨ Hebà ŋêyn Malkìyèl.

¹⁸À ti woyn ghì a Zilbà nɨn læ bzɨ ŋêyn Jàkôb. Zɨlbà nà n-ghɨ wayn ɨ wi vzɨ̀ a Labàn nɨn læ fu sɨ̂ wâyn ŋweyn Liyà tì. Woyn ateyn nà n-chîyntɨ̀ ghɨ njvàsɨ̀ ntufa.

¹⁹Woyn ghɨ lûmnɨ̀ nɨ̀ Lashèl ɨ wî Jàkôb nà n-ghɨ

Josèf ŋêyn Benjamìn. ²⁰Josèf ŋêyn wî ŋweyn Asenàt nɨn læ bzɨ Mànasè ŋêyn Eflèm a Ijìb. Asenàt nà n-ghɨ wâyn Bòtifelà ɨ ngàŋ ndo fɨyini fɨ lifɨ a ntèʼ Ôn. ²¹Woyn ghɨ lûmnɨ̀ nɨ̀ Benjamìn nà n-ghɨ Belà nɨ̀ Bekà nɨ̀ Ashbèl nɨ̀ Gelà nɨ̀ Namàn nɨ̀ Ehì nɨ̀ Lôsh nɨ̀ Mubìm nɨ̀ Hubìm ŋêyn Âld. ²²Ɨghêyn nà n-ghɨ woyn ghɨ lûmnɨ̀ nɨ̀ Lashèl ghì a wu n-læ bzɨ ŋêyn Jàkôb. Àŋena nà n-chɨ̂yntɨ̀ ghɨ njvàsɨ̀ kæ̀. ²³Wâyn ɨ lûmnɨ̀ nɨ̀ Dan nà n-ghɨ Hushìm. ²⁴Woyn ghɨ lûmnɨ̀ nɨ̀ Naftalì ɨ ghɨ Jazìyèl nɨ̀ Gunì nɨ̀ Jezà ŋêyn Shilèm. ²⁵À ti woyn ghì a Bilhà nɨn læ bzɨ ŋêyn Jàkôb. Bilhà nà n-ghɨ wayn ɨ wi vzɨ̀ a Labàn nɨn læ fu sɨ̂ wâyn ŋweyn Lashèl tì. ²⁶Jàkôb nɨn læ ndù a Ijìb ŋêyn woyn ŋweyn mɨ̀vɨm ntufa njvàsɨ̀ ntufa, ghɨ taŋ wi ghɨ̀ki woyn ateyn. ²⁷Josèf nà n-ghɨ ma wù n-bzɨ meyn woyn ghɨ lûmnɨ̀ ghɨ̀bò a Ijìb. À ti n-ghɨ na ghelɨ Jàkôb nà n-chɨ̂yntɨ̀ ghɨ a Ijìb mɨ̀vɨm nsòmbo. ²⁸Jàkôb nɨ̀n læ meyn tum wâyn ŋweyn Judà na wù ndu sɨ asɨ ɨ̀ bɨf abâs kì a Goshèn nɨ̀n ghɨ ateyn sɨ̂ Josèf. A nà ghɨ ta àŋena ndù chem a Goshèn, ²⁹Josèf ɨ bè ghɨ baʼtɨ fɨ̀nchaʼ fɨ ŋweyn fìfɨ̀ a wu nà n-jêl ateyn, wu lù ɨ ndù sɨ yeyn bò ŋweyn a Goshèn. Wu n-dù ɨ nà yeyn gvî nɨ̀ bò ŋweyn tèyn ɨ nyɨŋ ndu baʼnɨ ŋweyn ɨ dzɨ̀ nô sɨ ɨlvɨ ɨdyâ. ³⁰Isìlæ̀ ɨ bè sɨ̂ Josèf na, “Ikfɨ-i kòŋ a yi li ma lvɨ̂yn kɨ̀ nô ta mà yèyn meyn và wa bu ghɨ ɨtwo.” ³¹Ta wù taŋi tî, Josèf ɨ kæ bè sɨ̂ woynà ŋweyn nɨ̀ ghelɨ abe nɨ̀ àŋena nô ghɨ̀ jɨ̀m na, “Mɨ n-kasî ndû fêʼtɨ̀ sɨ̂ fòyn na bò wom ŋêyn woynà ghem nɨ̀ ghelɨ ŋweyn nô ghɨ̀ jɨ̀m lu meyn a Kenàn ɨ̀ gvì sɨ yeyn ma. ³²Mɨ n-fèʼtɨ̀ sɨ̂ ŋweyn na yi n-mâʼ nyamsɨ, ma yi gvi meyn nɨ̀ nyâm sisɨ baʼsɨ̂ nɨ̀ ɨ̀fwo ɨ̀ vzɨ nô ɨ̀ jɨ̀m afêyn. ³³Fòyn jâŋ zɨ̀ bɨf na, ‘Atu a ifèl nɨ̀ zɨ-a nɨn ghɨ ghà?’ ³⁴Yi be kɨ sɨ̂ ŋweyn na yì lum màʼ kɨ nyamsɨ kɨ̀ sɨ zɨ̀tɨ̀ sɨ a woynda kɨ̀ ta ghɨ̀bo ghi nà n-nî. Yì kæ sɨ be kɨ tî, a wù visi a yì na chî abàs a Goshèn. Josèf nà n-taŋî tì bòm ta ghelɨ Ijìb nà n-kôŋ wì ghelɨ ghɨ mâʼ nyamsɨ nô sakos.”