Isaiah 17

Saʼgha i bɨ kûm ghelɨ Dàmaskùs

¹Ìsayà nɨn fi meyn bè na, “Bôbo Fɨyini bè na,

‘Yì faytɨ yvɨ̀tɨ, mà læ̀ ni-a à Dàmaskùs na bu ghɨ wi ntèʼ ìghaʼnɨ. Ntèʼ àteyn læ̀ nà ghɨ kɨ ta alêʼ kì a ghɨ n-mâʼ ilɨŋ ateyn.

²Ghelɨ læ̀ leʼ visî ntèʼ sîsɨ̀ a sɨ n-baʼsɨ a ngùŋ ntèʼ Alowà, a nyamsɨ mbòloʼsɨ nɨ̀ bzɨsɨ na yɨ ɨtwaʼ afu, nyiŋì-à yvɨ̂tɨ̀-à nô wùl ɨ ghɨ wi sɨ sàŋ na sɨ lu.

³Bôbo Fɨyini ɨ Bò Ɨ̀dwaʼ ɨ̀ jɨ̀m bè na, “Ghɨ læ̀ bɨ̂ytɨ̀ mbàyn zɨ̀ a yì jɨ̀ŋ kal ntèʼ Efɨ̀lèm baʼsɨ̂ nɨ̀ Isìlæ̀ nô ì jɨ̀m a adyaʼ a ntoʼ Dàmaskùs mæ. Ghelɨ Alàm ghì a ghɨ faŋ læ̀ wumî kɨ ta ghelɨ Isìlæ̀.

⁴À læ̀ nà ghɨ ɨtuʼ nâ ghè, a ghelɨ Isìlæ̀ ɨ koʼnɨ̂ wì nô sakos. Ghelɨ Isìlæ̀ læ̀ nà ghɨ ta ghelɨ ànfɨf ma ighaʼi àŋena i mæ meyn.

⁵Ilaʼ i Isìlæ̀ i nô ì jɨ̀m læ̀ nà ghɨ kɨ ta gveyn àsàŋ ɨlvɨ ta ghɨ kfì asaŋ sɨ ateyn, ghɨ kɨ ta gvêyn i bal i Lefèm a ghɨ kfì asaŋ sɨ ateyn, ghelɨ ànfɨf gvî nà sayntɨ̂ akî a ghelɨ ghɨ felɨnɨ tî chwòsɨ̀.

⁶Ghelɨ Isìlæ̀ læ̀ kfɨtɨ-à, a à faŋ kɨ̀ asɨ a ghêl tèyn. Isìlæ̀ læ̀ nà ghɨ kɨ ta ɨnkâʼ mɨ̀ olìfsɨ̀ a ghɨ kœ̀ mɨtam sɨ ateyn mɨ̀ faŋ kɨ ɨ̀n bò kèsa ɨ̀n ta a tɨ̂fyas ghè a tɨ koʼ gòʼsɨ̀ iyvɨ faŋ kɨ ɨ̀n kæ̀ kèsa ɨ̀n tâyn a tɨ̂fyas ghè a tɨ kàlì gòʼsɨ̀ a nse. À bè mà Bôbo Fɨyini ɨ Fɨyini fɨ ghelɨ Isìlæ̀.

⁷À læ̀ nà ghɨ ɨtuʼ nâ ghè a ghelɨ Kasi bèynlɨ̀ nà samsɨ̂ Fɨyini fìfɨ̀ a fɨ bom àŋena na fɨ gamtɨ àŋena, ɨ Fɨyini fɨ laynɨfɨ nɨ̀ ghelɨ Isìlæ̀.

⁸Àŋena læ̀ nà bu samsɨ̂ wi ɨ̀nfyèʼsɨ̀ na wu gamtɨ àŋena, a ghɨ ɨ̀fwo ma à fàytɨ àŋena. Àŋena læ̀ nà bu koʼsɨ̂ wi ɨ̀nfyèʼsɨ̀ a fɨyini fɨ Ashelà, bu nyôʼ wì ileŋ ɨbwaŋ ileŋ ghè a àŋena fàytɨ.

⁹À læ̀ nà ghɨ ɨtuʼ nâ ghè, a àŋena/ghɨ leʼ vìsi ntèʼ sîsɨ̀ a ghɨ tɨm mbàynsɨ̀ jɨ̀ŋ kàli a sɨ faŋ kɨ̀ ɨtwaʼ ta ntèʼ sîsɨ̀ a ghelɨ Hîf nɨ̀ ghelɨ Amò nɨn læ leʼ visi ta ghelɨ Isìlæ̀ nɨn læ gvi (sɨ) keʼ àŋena.

¹⁰(Yi læ̀ gâyn tèyn bòm ta) yi chasɨ meyn Fɨyini fi fì a fɨ bœ̀sɨ zɨ, ɨ̀ lèsɨ̀ ìwu zɨ̀ a yi n-lêytɨ̀ ateyn. Yi n-kwo tôʼ ɨ̀fwo ɨ jûŋ a yi a gvêynsɨ̀, yelɨ gɨ̀lêb sɨ jûŋsɨ̀ a ghɨ dzɨ ì lì ta yi n-koʼsɨ mɨyini mɨ̀ ɨ̀tum ateyn.

¹¹Ɨfwo ateyn kæ (a wu) fvɨ̀, lèma koʼ bùs kɨ nɨ̀ bɨsì bɨfì achi ghè a yì tòʼ ateyn, a yi faŋ tɨ̀ kfì nô mɨ àfo ateyn, yi læ̀ nà yeyn kɨ ngeʼ, tɨkoʼitɨ ɨ ku zɨ̀ ma ghɨ kàʼ ghɨ bû læ̀ chuʼ.

¹²Ngeʼ læ̀ nà ghɨ sɨ̂ sugèyʼsɨ tɨ̂laʼ tɨ litɨ, sɨ læ̀ nà neʼ kɨ ta jva i ghaʼnɨ ɨlvɨ ta afyef a to-a nɨn chwô. Ngeʼ læ̀ nà ghɨ sɨ̂ ghelɨ kɨ̀ sɨ idvɨ̀, àŋena læ̀ nà dɨ̂m kû ta jvasɨ tosɨ ɨlvɨ ta ànkuŋa fvɨ̀ sɨ na ku-à.

¹³Tɨlaʼ tɨ læ̀ nà nû/kû mɨ ta jvasɨ tosɨ a sɨ n-kàlì, Bôbo Fɨyini læ̀ kâyntɨ̀ àwo/byalɨ sɨ̂ àŋena, a àŋena leʼ ndù nô ndyèyn kɨ̀ ta ɨwaf ɨlvɨ ta afyefa nɨn tâynsɨ̀ a kfɨynsɨ leʼ kɨ ta ɨnfûʼ ɨlvɨ ta mɨ̀ yum afyef ato-a na tâynsɨ̀-à.

¹⁴Àŋena nɨn kfâ kêʼ ghelɨ nɨ̀ntuʼ ghɨ nà faynà ɨtuʼ se sɨ layn, àŋena kɨ̀ ma àŋena kfɨtɨ meyn. À ti iwo zɨ̀ a yi n-gâyn sɨ̂ ghelɨ ghì a ghɨ lì lu nɨ̀/choŋ lù nɨ̀ ɨ̀fwo ɨ jûŋ nɨ̀ ghèsɨ. À ti ɨmyaʼtɨ àŋena