Leviticus 26

Iboysɨ i wûl vzɨ̀ a wù n-yvɨnɨ Fɨyini.

¹Bôbo Fɨyini nɨ̀n be meyn sɨ̂ Mosìs na, “Ka wùl nɨ̂n læ̀ fàytɨ mɨyini kèsa ànfèʼsɨ̀ afo nà koʼsɨ-à. Ka wùl nɨ̂n læ̀ tom ngòʼ kèsa chùyn chuyn ngòʼ nà koʼsɨ-à. À n-ghɨ mà Bôbo Fɨyini ɨ fɨyini fifɨ.”

²“Yì na bam mɨ̀chi mɨ̀ ɨ̀tuʼ ilaʼ nɨ̀ mà, ngvɨmlɨ̂ àlêʼ kì a ghɨ n-koʼsɨ ma ateyn. À n-ghɨ mà Bôbo Fɨyini.”

³“Yì kæ nà lêm tɨ̀saʼ temtɨ, nî àwo kì a mà bè, ⁴a mà suʼsɨ ivɨ a yi a gvêynsɨ̀ kɨ̀ ɨlvɨ ghê a yi n-kelɨ sɨ suʼi ateyn a ɨfwo ɨ yɨnɨ koʼ, a mɨ̀tam fî kòla ɨnkàʼ. ⁵Yi læ̀ nà sɨ kɨ sɨ asaŋ leŋa sɨ chem ta ka mɨ̀tam mɨ̀ gɨ̀lebsɨ̀ baŋ a yì na kœ̂ kɨ kœ mɨtam mɨ̀ àteyn sɨ chem ta ka ɨlvɨ ɨ toʼnɨ kfeyn. Yì na yɨ nô mɨ ghà ta yi n-kôŋ, chî a yi ilaʼ nɨ̀ mbôynɨ̀.”

⁶“Mɨ n-fu mbôynɨ̀ a yi ilaʼ, a yì na nyɨŋì-à fâyn wì afo. Mɨ n-fvɨ̀sɨ̀ nyamsɨ abo sɨ a yi antêynɨ̀, a nô wùl faŋ tɨ̀ fì tɨ̀ nu zɨ. ⁷Yi nì tɨm yɨ mbàynɨ̀ sisɨ a sɨ felɨ kɨ̀ nô a yi asɨ. ⁸Yì na fvɨ̂ ghɨ̀ tâyn, yi tɨm yɨ ghelɨ ɨvɨ, ɨ̀ fvɨ̀ ɨvɨ, yi yi tɨm yɨ ghelɨ nkamsɨ ìvɨm a mbàynɨ̀ sisɨ felɨ kɨ̀ nô a yi asɨ.”

⁹“Mɨ n-nì dyêyn àtem a juŋà sɨ̂ zɨ̀ ɨ̀ nì a yì bzɨ woyn kɨ̀ sɨ dvɨ̀ a mà luynsɨ ichfɨ̂nɨ̀ ì yemi sɨ̂ zɨ̀. ¹⁰Yi n-nì nà bu yɨ kɨ ɨ̀fwo ɨ yɨnɨ ɨ mu, kɨŋ àlêʼ sɨ lem ɨfɨ̂ ateyn. ¹¹Mɨ n-nì nà ghɨ kɨ nô ghesɨ̀nà amoʼ a fɨndo fɨ laynɨ fɨ nɨ̀ mà, ɨ̀ læ̀ faŋ tɨ̀ visi zɨ. ¹²Mà na ghɨ kɨ ghesɨ̀nà, ghɨ Fɨyini fifɨ yi ghɨ ghelɨ ghem. ¹³À n-ghɨ mà Bôbo Fɨyini ɨ fɨyini fifɨ fì a fɨ n-læ fvɨ̀sɨ zɨ sɨ a Ijìb. Mɨ n-læ teyntɨ nchaʼsɨ sɨ a yi akœ a dzɨ nâ ghàyn ta ka yì na bu fèlɨ̀ wì akôs sɨ̂ ghelɨ Ijìb, ghɨ sɨ a yi a ngeŋsɨ, bu fì ghɨ wi isas nɨ̀ wùl.”

Ngeʼ ghelɨ ghì a ghɨ n-yvɨnɨ wi Fɨyini.

¹⁴“Wùl kæ nà yvɨnɨ̂ wì ma, nî wì awo kì a mɨ n-bê, ¹⁵chas iyeʼi ì yemi, lem wì tɨsaʼ temtɨ, nî wì awo kì a mɨ n-bê, ma wù ti n-tuynsɨ̂ mɨ̀kâyn mzɨ̀ a mɨ n-yɨ ghesɨ̀nà, ¹⁶a mà fu ngeʼ sɨ̂ zɨ̀ a awo na gvɨ̂tɨ̀ gâyn sɨ̂ zɨ̀ bem kɨ tèyn. Mɨ n-nì ni-à, a tɨkoʼi tɨ ku zɨ ma ghɨ kàʼ ghɨ bû chuʼ, a agvɨl ato-a ku zɨ ɨ̀ nì a yì fef ɨ̀ fì zuètɨ zɨ̀. Yì na yeyn kɨ ngeʼ tôʼ ɨ̀fwo mɨtì mbàynɨ̀ sisɨ yɨ kɨ yɨ. ¹⁷Mɨ n-nì bêyn jɨm sɨ̂ zɨ̀, ta ka mbàynɨ̀ sisɨ tɨm yɨ̀ zɨ ɨ̀ nà saʼ zɨ̀, a yì nî nà nyɨŋ a, wùl ɨ nyɨŋ wi a yi ibàm.”

¹⁸“Awo nâ kèynà nô à jɨ̀m kæ gàyn sɨ̂ zɨ̀, yi faŋ tɨ̀ yvɨ̀nɨ ma, a mà kfeynsɨ ngeʼ sisɨ ìngal nsòmbo. ¹⁹Mɨ n-nì ni-à a atu a tonɨ-a nɨ̀ ìghaŋsɨ ɨwùyn nɨ̀ zɨ̀ i mæ, ɨ̀ nì a ivɨ i na bu suʼî wì, a nse yum nà to kɨ tèyn nteŋ. ²⁰Yì na kfɨ̀yn kɨ ɨ̀wuyn salû, bòm ta ɨfwo ɨ yɨnɨ na bu fì koʼ wi, mɨ̀tam ɨ bu kolâ wì a gvêynsɨ̀.”

²¹“Yì kæ faŋ nà bu to kɨ nɨ̀ àtu a sɨ̂ mà, yvɨ wi iwo zɨ̀ a mɨ n-bê, a mà fî kfèynsɨ ngeʼ sisɨ ìngal nsòmbo kɨ̀ ighel ta mbɨ sisɨ nɨn dyêyn. ²²Mɨ n-tum nyamsɨ ɨtwaʼ a sɨ zuetɨ woyn ghi, ɨ̀ zuètɨ nyâm sisɨ, a ghelɨ na sɨ læ̂ kɨ tèyn dzɨsɨ ɨ ghɨ kɨ sɨ yum.”

²³“Awo nâ kèynà kæ gàyn nô à jɨ̀m yi na bu to kɨ nɨ̀ àtu a sɨ̂ mà, ²⁴a mà fu ngeʼ ì bemnɨ sɨ̂ zɨ̀ ɨ̀ fì chwò nô ìngal nsòmbo. ²⁵Mɨ n-nì-à a sugèyʼsɨ̀ nu zɨ bòm ta yì tùynsɨ meyn mɨ̀kâyn mzɨ̀ a mɨ n-yɨ ghesɨ̀nà. Yi kæ leʼnɨ ɨ̀ ndù nô mɨ a yi a ntèʼsɨ a mà maʼ tɨkoʼi tɨ bemnɨtɨ a yi ɨwùyn, ɨ̀ nì a mbàynɨ̀ sisɨ tɨm yɨ̀ zɨ. ²⁶Mɨ n-ni-à a jèŋ î bemnɨ ì lì ku zɨ, a ghɨ̀kì ìvɨm na nyòʼ àbayn ichɨ ìmòʼ gwôtɨ̀-à yi yɨ kulɨ wi.”

²⁷“Awo nâ kèynà kæ gàyn, yi na bu to kɨ nɨ̀ àtu a sɨ̂ mà, ²⁸a mà nyoʼsɨ ɨtoŋ ɨ̀ dyèyn ɨ̀toŋ ɨ yafɨnɨ nɨ̀ mà sɨ̂ zɨ̀ ɨ̀ fì fu ngeʼ ì bemnɨ sɨ̂ zɨ̀ chwò nô ìngal nsòmbo. ²⁹Jèŋ î bemnɨ nâ yèyn ɨ nì ni-à a yì na kasî zuetɨ̂ wôyn ghi kfɨl a. ³⁰Mɨ n-bɨ̂ytɨ̀ ɨ̀lwêʼ vzɨ̀ a yi n-koʼsɨ mɨyini ateyn atû kfɨ̀ynsɨ, ɨ̀ kòytɨ̀ ɨ̀bwaŋ vzɨ̀ a yi n-nyôʼ ileŋ ateyn ɨ̀ kuʼ tɨgvɨ̂yn titɨ atû ɨ̀nfyèʼsɨ̀ ɨ mɨyini nɨ̀ zɨ̀, ɨ̀ bèyn jɨm sɨ̂ zɨ̀. ³¹Mɨ n-bebsɨ̂ ntèʼ sisɨ nô sɨ̀ jɨ̀m ɨ̀ nɨ̀ ɨ̀lwêʼ vzɨ̀ a yi n-koʼsɨ mɨyini ateyn a wùl na bu chwô wì avɨ alèʼ nâ ghè, yi nyôʼ tɨ̀fu titɨ ma fsɨ wi. ³²Mɨ n-bebsɨ̂ ìlaʼ ì zɨ-i nô ì jɨ̀m, ta ka mbàynɨ̀ sisɨ sì a sɨ n-chi ateyn yeyn nà ghɨ nɨ̀ ìkayn i. ³³Mbàynɨ̀ sisɨ ɨ nì tɨm yɨ zɨ̀, a yì gwosɨ ndù a tɨlaʼ tɨ ɨtum. Mɨ n-bebsɨ̂ ìlaʼ ì zɨ-i a ntèʼ sisɨ na sɨ ghɨ kɨ ɨ̀twaʼ. ³⁴Yi nì gwôsɨ̀ tì, a gvêyn sisɨ chwotɨ kɨ̀ ta sɨ tî nà kelɨ sɨ chwòtɨ̀ a bêŋ ghè a ghɨ n-yɨ ayɨ ateyn, yi ghɨ kɨ a tɨlaʼ nɨ̀ mbàynɨ̀ sisɨ. ³⁵Gvêyn sisɨ ɨ nì chwôtɨ̀ tì, a nse zɨ yvɨtɨ kɨ̀ ta yì tî nà kelɨ sɨ yvɨ̀tɨ a bêŋ àyɨ mɨtì yi faŋ tɨ̀ vìsi.”

³⁶“Mɨ n-ni-à a zɨ̀ ghî a ghɨ bu ghɨ a tɨlaʼ nɨ̀ mbàynɨ̀ sisɨ na fàyn a, afyef a nêʼ nô mɨ ìfvɨ, yi nà leʼa. Yi n-nì na nyɨŋ kɨ ta yi n-leʼ ìwoŋ felɨ̀-à, mɨ̀tì wùl ɨ nyɨŋ wi a yi ibàm. ³⁷Yi n-nì nà nyɨŋa dyamtɨ̂ atu nɨ̀ woynà ghi kɨ̀ ta yi n-leʼ ìwoŋ mɨtì nô wùl ɨ nyɨŋ wi a yi ibàm. Yi n-nì nà ghaʼ kɨ nô zɨ̀ sɨ timi sɨ nu mbàynɨ̀ sisɨ. ³⁸Yi nì kfɨtɨ̂ a tɨ̂laʼ nɨ̀ mbàynɨ̀ sisɨ a ghɨ gvimi kɨ̀ zɨ afu. ³⁹Zɨ̀ ghî a yì faŋ ɨ nì kfɨtɨ̂ kɨ a tɨlaʼ nɨ̀ mbàynɨ̀ sisɨ bòm mbɨ sisɨ baʼsɨ̂ nɨ̀ mbɨsɨ ghɨ̀ bo ghi.”

⁴⁰“Mɨtì, ma àŋena kæ dzɨ̀ ikumi ɨwùyn kûm mbɨsɨ àŋena nɨ ɨ sɨ ghɨ bo àŋenasɨ ta àŋena nɨn læ to nɨ̀ àtu a sɨ̂ mà ɨ kasi kèʼ mà, ⁴¹ma dyèyn ɨ̀toŋ ɨ yafɨnɨ nɨ̀ mà sɨ̂ àŋena ɨ nì àŋena leʼnɨ zɨ ilaʼ nɨ̀ mbàynɨ̀sɨ̀ àŋena. Àŋena kæ visi atu a tonɨ-a ɨ̀ yuyn atu a àŋena sɨ a mbɨsɨ nɨ̀ àŋena, ⁴²a mà betɨ mɨkâyn mzɨ̀ a mɨ n-læ yɨ ghesɨ Jàkôb ŋêyn Yisàk baʼsɨ̂ nɨ̀ Abɨ̀làhâm, ɨ̀ bètɨ̀ ilaʼ zɨ a mɨ n-chfɨ̀nɨ sɨ fu sɨ̂ àŋena. ⁴³Mɨtì àŋena kelɨ sɨ fvɨ̀ sɨ visi ilaʼ ateyn ta ka gveyn sɨ àŋena sɨ chwotɨ kɨ̀ ta sɨ tî nà kelɨ sɨ chwòtɨ̀ a bêŋ àyɨ. Àŋena nɨn yuyn àtu a àŋena kûm mbɨsɨ àŋena bòm ta àŋena bu tî lèm tɨ̀saʼ temtɨ, nà nî wì awo kì a mɨ n-bê. ⁴⁴Awo nâ kèynà nɨn gàynà, nô mɨ ta àŋena nɨn ghɨ ilaʼ nɨ̀ mbàynɨ̀sɨ àŋena, a mà faŋ tɨ̀ beyn jɨm sɨ̂ àŋena, ɨ̀ faŋ tɨ̀ bèbsɨ sɨ mèsi àŋena, ɨ̀ faŋ tɨ̀ tùynsɨ mɨkâyn mzɨ̀ a mɨ n-yɨ ghesɨ̀ àŋena. À n-ghɨ mà Bôbo Fɨyini ɨ fɨyini fɨ àŋena. ⁴⁵Mɨ n-nî bêtɨ̀ mɨkâyn mzɨ̀ a mɨ n-læ yɨ ghesɨ̀ ghɨ̀ bo àŋena ghì a mɨ n-læ fvɨ̀sɨ sɨ a Ijìb bòm ta mɨ n-kôŋ wì na àŋena læ̂ lè ta ka ghelɨ mbzɨ ì jɨ̀m yeyn na mɨ n-ghɨ Fɨyini fɨ àŋena. À n-ghɨ mà Bôbo Fɨyini.”

⁴⁶À ti tɨsaʼ tìtɨ̀ nɨ̀ ìyeʼi zɨ̀ a Bôbo Fɨyini nɨn fu sɨ̂ ghelɨ Isìlæ̀ a kfɨ̂yn Sinày toynɨ̂ a Mosìs.