Numbers 17

Mbàŋ Alòyn ɨ kasi sɨ a fɨ̂kàʼ ɨ nà kolâ mɨ̀tam

¹Bôbo Fɨyini nɨ̀n bê meyn sɨ̂ Mosìs na, ²“Bè sɨ̂ ghelɨ Isìlæ̀ na àŋena gvi nɨ̀ mbàŋsɨ nyamnɨsɨ njvàsɨ̀ bò. Fsɨ mbàŋ ìmoʼ ìmòʼ nô mɨ sɨ̂ wùl ɨ̀ tisɨnɨ ɨ̀ kfà asas a ndosɨ nɨ̀ ghɨ̀bo àŋena, ɨ nyàʼ nô mɨ ìzɨyn i nda a ŋweyn a mbàŋ. ³À na ghɨ a mbàŋ isas i ndo nɨ̀ Levì a ghɨ nyaʼ izɨyn i Alòyn bòm ta nô mɨ wul ɨ̀ tisɨnɨ ɨ̀ kfà asas i ndosɨ nɨ̀ ghɨ̀bo àŋena ghì njvàsɨ̀ bò na kelɨ mbàŋ ìmòʼ. ⁴Wa n-fsɨ mbàŋsɨ ateyn ɨ̀ ndù lèm asɨ a antayntayn a mɨ̂kàyn nɨ̀ Bôbo Fɨyini alèʼ ghè a ghesɨ̀ và nɨ̀n kôynɨ̀ ateyn. ⁵Mbàŋ wùl ɨ̀ vzɨ̀ a mà choʼ nɨn ntu-a a ghelɨ Isìlæ̀ yeyn, a àndɨ̀mlɨ̀ kèyn a àŋena nɨn dɨ̂mlɨ̀ kûm vâ tèyn mæ.”

⁶Mosìs ɨ kæ taŋi sɨ̂ ghelɨ Isìlæ̀, ghelɨ ghɨ tisɨnɨ nɨ̀ àŋena ɨ fu mbàŋsɨ̀ njvàsɨ̀ bò. Nô mɨ wul ɨ̀ tisɨnɨ ɨ̀ kfà asas a ndosɨ nɨ̀ ghɨ̀bo àŋena ɨ gvì nɨ̀ mbàŋ, Alòyn ɨ gvi kɨmɨ nɨ ɨyî ŋweyn. ⁷Mosìs ɨ lèm mbàŋsɨ ateyn asɨ a àntayntayn a mɨ̂kàyn a Fɨndo nɨ̀ Bôbo Fɨyini.

⁸Ɨtuʼ ɨ bɨs layn a ànkùmtɨ̀ achi Mosìs ɨ ndù a Fɨndo nɨ̀ Bôbo Fɨyini ɨ yeyn ma mbàŋ Alòyn zɨ̀ a yì li alêʼ isas i ndo nɨ̀ Levì tu meyn. Mbàŋ àteyn nɨ̀n bu læ tu kɨ tu yi n-læ meyn fvɨ̀sɨ̀ tɨ̀fyas ɨ fi bùs ɨ kola mɨ̀tam mɨ̀ almòn. ⁹Yi n-gàyn tî Mosìs ɨ li fvɨ̀ nɨ̀ mbàŋsɨ ateynsɨ sɨ a fɨndo nɨ̀ Bôbo ɨ dyèyn sɨ̂ ghelɨ Isìlæ̀, nô mɨ ndà ɨ nà kasî lî kɨ mbàŋ ŋweyn.

¹⁰Bôbo Fɨyini ɨ bè sɨ̂ Mosìs na, “Kasi lem mbàŋ Alòyn yì faŋ asɨ antayntayn a mɨ̂kàyn sɨ a nchwæ sɨ̂ ghelɨ ghì a ghɨ n-to nɨ̀ ɨ̀tu. Iwo nâ yèynì nɨn ni-à a àŋena faŋ tɨ̀ fì tɨ̀ dɨ̀mlɨ̀ kûm mà ɨ̀ faŋ tɨ̀ kfɨ̀tɨ.” ¹¹Mosìs nɨ̀n nî meyn kɨ̀ ighel ta Bôbo Fɨyini nɨ̂n bè sɨ̂ ŋweyn.

¹²Ghelɨ Isìlæ̀ ɨ bè sɨ̂ Mosìs na, “Samoʼ ghèsɨ̀ sɨ ghɨ kɨ ɨ̀kfɨ ɨfwo, ghès nɨn kfɨtɨ̂ kɨ ghɨ̀ jɨ̀m. ¹³À gvì baʼsɨ nô mɨ ndà a ngùŋ àntayntayn a mɨ̂kàyn nɨ̀ Bôbo a wù kfɨ, a ti bè na ghesɨ̀ nɨn kfɨtɨ kɨ ghɨ̀ jɨ̀m a?”